Ripot Long Wok Blong Kingdom

Putum Wota Long Ol Sid Blong Trutok Long Jili

LONG draeples long not blong Jili, sam yia i mas pas bifo we ren i foldaon. Be taem ren i foldaon, graon ya we i drae tumas, i jenis i kam olsem wan mat we i fulap long ol flaoa we i gat defdefren kala. Ol flaoa ya we i naes tumas blong luk, oli pulum ol turis raonabaot long kantri ya oli kam long ples ya.

Be i gat wan samting we i pulum moa intres i stap kamaot long Jili. Wota blong trutok blong Baebol i stap ron i go kasem evri ples long kantri ya, mekem se plante man we hat blong olgeta i stret oli stap “givim flaoa,” oli kam disaepol blong Jisas Kraes. Wan rod blong givimaot wota ya blong trutok, hemia telefon. Ol stori we oli kam biaen oli soem ol gudfala frut we i kamaot from fasin blong givim witnes long telefon.

• Long wan seket asembli, oli askem long Karina, wan fultaem paenia, blong mekem wan pleplei blong soem olsem wanem blong prij long telefon. Be Karina i neva prij long telefon bifo. Ale, wan elda wetem waef blong hem, tufala i leftemap tingting blong Karina blong mekem pleplei ya. Trifala i lukluk bakegen sam poen long fasin blong prij long telefon. Tufala i talem long hem tu se hem i mas prea long Jeova blong i lidim hem long saed ya. Hem i mekem olsem, ale hem i traem blong prij long telefon.

Karina i jusum blong telefon long wan vilej we i stap klosap. Wan woman i ansa long telefon long postofis, mo Karina i eksplenem from wanem hem i ring. Woman ya i glad blong lesin, mo tufala i mekem plan blong toktok bakegen long telefon, tri dei biaen. Taem hem i visitim woman ya bakegen long telefon, tufala i statem wan Baebol stadi long buklet ya ?Wanem Samting We God i Wantem Yumi Blong Mekem? Kam kasem naoia, oli rili glad blong mekem stadi ya we i intres tumas, mo Karina i bin sanem sam buk i go long woman ya, blong ansa long sam kwestin blong hem.

• Bernarda i tekem jans blong prij long wan man we i mekem rong namba, i telefon i kam long haos blong hem. Bernarda i no kam kros long man ya, be hem i talemaot long man ya se hem i wan Witnes blong Jeova mo i givhan long man ya. Tufala i gohed blong storian, mo man ya i lesingud taem Bernarda i eksplenem olsem wanem bambae Kingdom blong God i finisim rabis fasin i no longtaem. Man ya i givim telefon namba blong hem long Bernarda, mo hem i visitim man ya bakegen long telefon. Wan taem we hem i ring long man ya bakegen, hem i ridim long hem wan haf insaed long buk ya Save Blong Lidim Yu Long Laef We i No Save Finis. Man ya i askem olsem wanem hem i save kasem wan kopi blong buk ya, ale Bernarda i sanem wan Save buk mo wan Baebol i go long hem. Nao tufala i mekem plan blong wan brata long ples ya i visitim hem, mo naoia brata ya i stap gohed blong putum “wota” long “plan” ya we i stap gru gud.

Yes, long wol ya, we i olsem draeples long saed blong spirit, ol sid we oli haed oli stap wet blong gru, taem wota blong trutok we i save givim laef, i kasem olgeta. Plante taosen man we oli tosta, oli stap gohed blong “gru gud” mo “givim flaoa,” oli kam ol man we oli strong blong mekem wok blong Jeova God.—Aesea 44:3, 4.