Sas Presen We Yumi Kasem—?Hem i Minim Wanem Long Yu?
Sas Presen We Yumi Kasem—?Hem i Minim Wanem Long Yu?
“Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam.”—MATIU 25:34.
1. ?Wanem sam samting we ol man oli kasem long narafala?
YUMI evriwan i gat sam samting we yumi kasem long papa mama blong yumi taem yumi bon. Samfala, maet oli bon long wan famle we i gat plante samting. Sam narafala, maet oli bon long wan famle we i pua. Samtaem, ol bubu blong yumi, oli agensem ol narafala we oli spolem olgeta no tok nogud long olgeta. Mo biaen, oli pasem fasin agens ya long ol pikinini blong olgeta. Nating se i olsem, evriwan long yumi i kasem wan samting we i sem mak. Yumi evriwan i bon wetem sin blong faswan man, Adam. Samting ya nao i mekem se ol man oli stap ded.—Prija 9:2, 10; Rom 5:12.
2, 3. ?Wanem faswan presen we Jeova i save givim long ol pikinini blong Adam mo Iv, mo from wanem oli no kasem presen ya?
2 Jeova, Papa we i stap long heven, hem i lavem yumi tumas. Fastaem hem i givim wan presen long ol man, we presen ya i defren olgeta—hemia laef we i no save finis long wan Paradaes we i stret olgeta. Hem i wokem faswan papa mama blong yumi, we tufala i stret gud olgeta, tufala i no gat sin. Jeova God i givim Wol ya long olgeta man olsem wan presen. (Ol Sam 115:16) Hem i wokem garen blong Iden olsem wan saen blong soemaot se bambae fulwol i kam olsem, mo i givim wan nambawan wok long faswan papa mama blong yumi. Wok ya i mekem tufala i harem gud tumas. Tufala i mas gat pikinini, lukaot long wol wetem ol defren tri, mo anamol, mo mekem Paradaes ya i kavremap evri ples long wol. (Jenesis 1:28; 2:8, 9, 15) Bambae ol pikinini blong tufala tu oli joen long wok ya. !Hemia i wan nambawan presen we tufala i save pasem i go long ol pikinini blong tufala!
3 Be blong haremgud long ol samting ya, Adam mo Iv wetem ol pikinini blong tufala, oli mas gat wan gudfala fasin fren wetem God. Oli mas lavem Jeova mo obei long hem. Be Adam mo Iv, tufala i no gat fasin tangkiu long wanem we God i givim long tufala, nao tufala i no obei long loa blong hem. Tufala i lusum Paradaes mo nambawan hop we God i putum fored long tufala. From samting ya, tufala i no save pasem ol nambawan presen ya i go long ol pikinini blong tufala.—Jenesis 2:16, 17; 3:1-24.
4. ?Olsem wanem yumi save kasem presen we Adam i lusum?
4 Jeova i gat bigfala sore long yumi. Taswe, hem i mekem rod blong ol pikinini blong Adam mo Iv, oli gat janis bakegen blong kasem presen ya we Adam i lusum. ?Olsem wanem hem i mekem rod ya? Long stret taem we God i makemaot finis, stret Pikinini blong hem, Jisas Kraes, i kam long wol ya mo i givim laef blong hem we i stret gud olgeta blong sevem ol pikinini blong Adam. Long rod ya, Kraes i pemaot olgeta evriwan. Be, oli no save kasem presen ya olsem nomo. Oli mas gat gudfala nem wetem God, mo blong mekem olsem, oli mas bilif long praes blong sakrefaes blong Jisas we i blong tekemaot sin, mo oli mas gat fasin obei blong soemaot bilif ya. (Jon 3:16, 36; 1 Timoti 2:5, 6; Hibrus 2:9; 5:9) ?Ol fasin blong yu oli soemaot se yu gat tangkiu from samting we Jeova i mekem?
Wan Presen We i Pastru Long Ebraham
5. ?Olsem wanem Ebraham i soem se hem i tinghae long fasin fren blong hem wetem Jeova?
5 Jeova i gohed blong mekem stamba tingting blong hem long saed blong wol ya i kamtru. Blong mekem olsem, hem i wok wetem Ebraham long wan spesel fasin. Hem i lidim Ebraham we i gat strong bilif blong lego kantri blong hem mo blong go long wan narafala kantri we God hem wan i soemaot long hem. Ebraham i rere blong obei. Afta we hem i kasem kantri ya, Jeova i talem se ol pikinini blong Ebraham, be i no Ebraham, bambae i kasem graon ya we i olsem presen. (Jenesis 12:1, 2, 7) ?Ebraham i mekem wanem? Hem i rere blong wosip long Jeova long eni ples we hem i go long hem mo hem i rere tu blong mekem wanem we Jeova i soem long hem. Long rod ya, ol pikinini blong hem oli save kasem presen we bambae God i givim long olgeta. Ebraham i go long wan narafala kantri, mo i wosip long Jeova long kantri ya blong 100 yia, go kasem we hem i ded. (Jenesis 12:4; 25:8-10) ?Yu yu rere blong mekem olsem? Jeova i talem se Ebraham i “fren” blong hem.—Aesea 41:8.
6. (a) ?Ebraham i soemaot wanem samting long fasin ya we hem i rere blong kilim boe blong hem i ded olsem sakrefaes? (b) ?Wanem sas presen we Ebraham i save pasem i go long ol pikinini blong hem?
6 Ebraham i mas wet plante yia blong gat pikinini boe ya, Aesak, we hem i lavem tumas. Taem boe ya i kam bigfala, Jeova i talem long Ebraham blong tekem boe ya, mo kilim hem i ded blong mekem sakrefaes. Ebraham i no save se hem i stap rere blong mekem wanem we i pija blong samting we bambae God i mekem, taem hem i givim Pikinini blong hem olsem ransom. Nating se i olsem, Ebraham i obei mo i rere blong givim Aesak olsem sakrefaes, be enjel blong Jeova i stopem hem. (Jenesis 22:9-14) Jeova i talem finis se ol promes we hem i bin talem long Ebraham, bambae oli kamtru long Aesak. Taswe, Ebraham i bilif strong se, sipos i nidim, God i save mekem Aesak i laef bakegen, nating se i no gat wan samting olsem i hapen bifo. (Jenesis 17:15-18; Hibrus 11:17-19) From we Ebraham i no holemtaet pikinini blong hem, Jeova i talem se: “From laen blong yu, olgeta nesen long wol bambae oli blesem olgeta nomo.” (Jenesis 22:15-18, NW) Hemia i soem se Laen we Jenesis 3:15 i tokbaot, Mesaea we bambae i mekem ol man oli fri, i mas kamtru long laen blong Ebraham. !Hemia wan sas presen blong pasem i go long narafala!
7. ?Olsem wanem Ebraham, Aesak, mo Jekob, oli soem fasin tangkiu from presen blong olgeta?
7 Ebraham i no save mining blong samting we Jeova i stap mekem long taem ya. Pikinini blong hem, Aesak mo bubu blong hem, Jekob, tufala “we God i givim sem promes nomo” long tufala, tufala tu i no save. Be trifala evriwan i gat strong bilif long Jeova. Oli no joen long eni kingdom blong wan taon long kantri we oli stap long hem, nogat. Be oli stap wet long wan samting we i moa gud—“wan taon we fandesen blong hem i save stap oltaem nomo. Taon ya, God i mekem ol plan blong hem, mo i wokem finis i stap.” (Hibrus 11:8-10, 13-16) Be ol pikinini blong Ebraham, i no olgeta evriwan we i luksave se presen ya we i pastru long Ebraham i sas tumas.
Samfala We Oli Ting Nating Long Presen Ya
8. ?Olsem wanem Esao i soem se hem i ting nating long sas presen blong hem?
8 Esao, we i fasbon boe blong Aesak, i no tinghevi long raet we hem i gat olsem fasbon. Hem i no gat fasin tangkiu from ol tabu samting. Taswe, wan dei, Esao i hanggri tumas, nao i girap, i salem raet ya blong hem olsem fasbon, long brata blong hem, Jekob. ?Hem i salem raet ya from wanem? !Jes blong kasem bred mo red bin blong i kakae! (Jenesis 25:29-34; Hibrus 12:14-17) Ol promes we God i bin mekem wetem Ebraham, bambae oli kamtru long wan nesen we i kamaot long laen blong Jekob, we God i jenisim nem blong hem i kam Isrel. ?Spesel presen ya i openem rod long olgeta blong kasem wanem blesing?
9. ?From presen long saed blong spirit we oli gat, olsem wanem ol pikinini blong Jekob oli kam fri?
9 Long wan taem we kakae i sot, Jekob mo famle blong hem oli muf i go long Ijip. Long ples ya, oli kam plante we i plante, be oli kam slef tu. Nating se i olsem, Jeova i no fogetem kontrak we hem i bin mekem wetem Ebraham. Long stret taem we God i makemaot finis, hem i mekem ol man Isrel oli fri long wok slef, mo i talem long olgeta se bambae hem i tekem olgeta oli go long “wan gudfala kantri, we i bigfala tumas, we graon blong hem i gud tumas, oltaem i karem fulap kakae.” Hemia nao kantri we hem i bin promes blong givim long Ebraham.—Eksodas 3:7, 8; Jenesis 15:18-21.
10. ?Long Hil Sinae, wanem ol bigfala samting we oli hapen, we oli joen wetem presen blong ol man Isrel?
10 Taem ol man Isrel oli stap go long promes Lan, Jeova i mekem oli hivap wanples long Hil Sinae. Long ples ya, hem i talem long olgeta se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi, yufala i stap mekem wok blong mi.” (Eksodas 19:5, 6) Afta we olgeta man oli ansa wetem wan tingting se oli agri, Jeova i givim Loa blong hem long olgeta—wan samting we hem i neva mekem long ol narafala nesen.—Ol Sam 147:19, 20.
11. ?Wanem sam long ol sas samting we oli joen wetem presen long saed blong spirit we ol man Isrel oli gat?
11 !Niufala nesen ya i rili gat wan nambawan presen long saed blong spirit! Oli wosip long wan God, we hem nomo i trufala God. God ya nao i tekemaot olgeta long Ijip, mo oli luk ol bigbigfala samting we hem i mekem taem i givim Loa long olgeta long Hil Sinae. Presen blong olgeta i kam sas moa taem God i ‘putum tok blong hem long han blong olgeta’ tru long ol profet. (Rom 3:1, 2) Jeova i jusumaot olgeta blong oli kam olsem witnes blong hem. (Aesea 43:10-12) Mesaea bambae i kamtru long nesen blong olgeta. Loa we i stap poen i go long hem, i makemaot hem, mo i mas halpem olgeta blong luksave from wanem oli nidim Mesaea. (Galesia 3:19, 24). Antap long hemia, bambae oli kasem jans blong joen wetem Laen ya we i Mesaea, nao oli wok olsem wan kingdom blong ol pris mo wan tabu nesen.—Rom 9:4, 5.
12. ?Nomata we oli go insaed long Promes Lan, wanem samting we ol man Isrel oli no kasem mo from wanem?
12 Jeova i mekem olsem we hem i bin promes, hem i lidim ol man Isrel oli go long Promes Lan. Be aposol Pol i eksplenem biaen se, olgeta oli no gat bilif, taswe kantri ya i no rili wan ‘ples blong kasem spel.’ Nesen ya i no kasem ‘spel blong God’ from we oli no kasem save mo oli no wok folem stamba tingting we God i gat long saed blong dei blong spel blong hem, we i stat afta we God i wokem Adam mo Iv.—Hibrus 4:3-10.
13. ?Taem ol man Isrel oli no tinghevi long presen blong olgeta long saed blong spirit, oli lusum wanem samting?
13 Ol prapa man Isrel oli gat jans blong mekemap ful namba blong ol man we oli mas rul wetem Mesaea long Kingdom blong heven. Oli gat janis blong kam olsem wan kingdom blong ol pris mo wan tabu nesen. Be oli no tinghevi long sas presen ya. Wan smol grup nomo blong ol prapa man Isrel oli akseptem Mesaea taem hem i kam. From samting ya, smol namba nomo blong olgeta oli joen long kingdom blong ol pris we God i talemaot bifo. God i tekemaot Kingdom ya long han blong ol prapa man Isrel, nao i givim “long ol narafala man we oli save mekem i stret.” (Matiu 21:43) ?Wanem nesen ya?
Wan Presen Long Heven
14, 15. (a) ?Afta long ded blong Jisas, olsem wanem ol nesen oli stat blong kasem blesing from “laen” blong Ebraham? (b) ?Wanem samting we ol memba blong “Isrel blong God” oli kasem olsem wan presen?
14 Nesen we God i givim Kingdom ya long hem, hemia ‘Isrel blong God,’ Isrel long saed blong spirit. Ol man we oli mekemap nesen ya, hemia ol 144,000 man blong Jisas Kraes, we tabu spirit i makemaot olgeta. (Galesia 6:16; Revelesen 5:9, 10; 14:1-3) Sam long ol 144,000 man ya, oli prapa man Isrel, be bighaf blong olgeta oli blong ol narafala nesen. Long rod ya, promes we Jeova i bin mekem wetem Ebraham i stat blong kamtru. Promes ya i talem se, tru long “laen” blong Ebraham, bambae olgeta nesen oli kasem blesing. (Ol Wok 3:25, 26; Galesia 3:8, 9) Hemia i faswan taem we promes ya i kamtru. Long taem ya, God i makemaot ol man blong narafala nesen wetem tabu spirit, mo hem i adoptem olgeta olsem pikinini blong hem long saed blong spirit, nao oli kam olsem ol brata blong Jisas Kraes. Taswe, olgeta ya tu oli kam olsem seken haf blong “laen.”—Galesia 3:28, 29.
15 Bifo we Jisas i ded, hem i tokbaot wan niufala kontrak wetem ol man Jiu we bambae oli kam memba blong niufala nesen. Hemia i fastaem we hem i tokbaot kontrak ya, mo niufala kontrak ya bambae hem i mekem i stanap wetem prapa blad blong hem. Taem oli bilif long sakrefaes ya we i mekem promes blong God i stanap, olgeta ya we God i tekem olgeta oli go insaed long niufala kontrak, hem i mekem olgeta oli kam “stret gud olgeta.” (Hibrus 10:14-18) God i save talem se oli “stret man finis long fes blong hem” mo hem i fogivim ol sin blong olgeta. (1 Korin 6:11) Nao, oli kam olsem Adam bifo we i mekem sin. Be, olgeta ya oli no blong laef long paradaes long wol ya. Jisas i talem se bambae hem i go mekemrere wan ples blong olgeta long heven. (Jon 14:2, 3) Oli lego hop we oli gat blong laef long wol ya, blong oli save ‘kasem gudfala presen ya we God i putumgud olgeta oli stap long heven.’ (1 Pita 1:4) ?Bambae oli mekem wanem long heven? Jisas i eksplenem se: “Mi mekem wan kontrak wetem yufala . . . from wan kingdom.”—Luk 22:29, NW.
16. ?Wanem nambawan wok we bambae ol tabu Kristin oli mekem?
16 Olgeta ya oli go long heven, bambae oli rul wetem Kraes. Bambae oli givhan blong finisim olgeta fasin blong rebel agensem hae rul blong Jeova. (Revelesen 2:26, 27) Olsem namba tu haf blong laen blong Ebraham long saed blong spirit, bambae oli givhan blong karem blesing blong laef we i stret gud i kam long ol man blong olgeta nesen. (Rom 8:17-21) !Hemia i rili wan sas presen we oli gat long heven!—Efesas 1:16-18.
17. ?Wanem presen we oli tabu Kristin oli kasem taem oli stap yet long wol ya?
17 Be ol presen we ol tabu man blong Jisas oli gat, i no evriwan we oli blong fiuja. Jisas i halpem olgeta blong kasem save long Jeova, we hem nomo i trufala God, mo i no gat wan man we save blong hem long saed blong God i sem mak long olgeta. (Matiu 11:27; Jon 17:3, 26) Wetem toktok mo eksampel, Jisas i tijim olgeta long wanem we oli mas mekem blong ‘trastem Jeova’ mo obei long hem. (Hibrus 2:13; 5:7-9) Jisas i putum save blong trutok long saed blong stamba tingting blong God long han blong olgeta mo i mekem sua long olgeta se bambae tabu spirit i lidim olgeta blong kasem fulwan save long stamba tingting ya. (Jon 14:24-26) Hem i makem long tingting mo hat blong olgeta se Kingdom blong God i impoten tumas. (Matiu 6:10, 33) Mo tu, Jisas i putum wok ya blong givim witnes mo mekem disaepol long han blong olgeta. Oli mas mekem wok ya long Jerusalem, mo long olgeta ples long Judia mo Sameria, gogo oli finisim olgeta ples long wol.—Matiu 24:14; 28:19, 20; Ol Wok 1:8.
Wan Sas Presen Blong Wan Bigfala Hip Blong Man
18. ?Long wanem rod, promes ya blong Jeova se bambae olgeta nesen oli kasem blesing from “laen” blong Ebraham i stap kamtru tede?
18 I luk olsem se ol man Isrel long saed blong spirit, ‘ol sipsip we oli no plante’ we bambae oli rul long Kingdom, oli kasem fulnamba blong olgeta finis. (Luk 12:32) Plante yia nao we Jeova i stap lukluk moa long wok ya blong hivimap wan bigfala hip blong ol narafala man we oli kamaot long olgeta nesen. Olsem nao, promes we Jeova i bin mekem wetem Ebraham, se olgeta nesen bambae oli kasem blesing from laen blong hem, i stap kamtru fulwan. Wetem bigfala glad, olgeta ya we God i blesem olgeta, olgeta tu oli stap mekem tabu wok blong Jeova mo oli luksave se, blong kasem sef, oli mas bilif long Smol Sipsip blong God, hemia Jisas Kraes. (Revelesen 7:9, 10) ?Yu yu akseptem ol gudfala toktok we Jeova i stap talem blong singaot ol man oli kam joen long grup ya we i glad tumas?
19. ?Ol man blong ol narafala nesen we oli kasem blesing naoia, oli stap wet long wanem presen?
19 ?Wanem sas presen we Jeova i givim long olgeta we oli olsem ol narafala sipsip? I tru, presen ya, hem i no stap long heven. Be hemia presen ya we Adam i mas pasem i go long ol pikinini blong hem—hop blong laef we i no save finis, we i stretgud olgeta, long wan paradaes we sloslou i kavremap fulwol. Bambae hem i wan wol we “i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) Ale, Tok blong God i go stret long yu, se: “Yu mas trastem Hae God, mo yu mas mekem ol fasin we i gud, blong yu save stap long graon ya, nao yu harem gud from we yu yu sef. Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas. Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting. Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:3, 4, 10, 11, 29.
20. ?Olsem wanem “ol narafala sipsip” oli harem gud long plante presen long saed blong spirit we ol tabu man oli kasem?
20 “Ol narafala sipsip” blong Jisas, oli gat wan presen we bambae oli kasem long wol ya aninit long rul blong Kingdom blong heven. (Jon 10:16a) Nating se oli no blong go long heven, plante long ol presen we ol tabu Kristin oli harem gud long hem, bambae ol narafala sipsip ya tu oli kasem. Ol tabu man, “slef we i stret mo waes,” olgeta nao oli givhan long ol narafala sipsip blong kasem save long ol nambawan promes blong God we oli stap long Tok blong hem. (Matiu 24:45-47; 25:34 NW) Ol tabu Kristin mo ol narafala sipsip, olgeta evriwan oli save Jeova, we hem nomo i trufala God mo oli wosip long hem. (Jon 17:20, 21) Olgeta evriwan oli talem bigfala tangkiu long God from praes blong sakrefaes blong Jisas we i kavremap sin blong olgeta. Oli wok tugeta olsem wan kampani blong ol sipsip, we i gat wan man nomo, hemia Jisas Kraes, i lukaot long olgeta. (Jon 10:16b) Olgeta evriwan, oli olsem wan kampani blong ol brata nomo long fulwol, we oli lavlavem olgeta. Oli joen tugeta long wok ya blong givim witnes long Jeova mo Kingdom blong hem. Yes, sipos yu yu givim laef blong yu finis long Jeova mo tekem baptaes, olgeta samting ya oli joen wetem presen blong yu long saed blong spirit.
21, 22. ?Olsem wanem yumi evriwan i save soem se yumi tinghae long presen we yumi gat long saed blong spirit?
21 ?Yu yu tingbaot presen ya long saed blong spirit olsem we i sas tumas? ?Yu yu tingbaot wok ya blong mekem samting we God i wantem olsem wok we i moa impoten long laef blong yu? ?Sipos yes, yu yu stap folem advaes blong Tok mo ogenaesesen blong hem, we i askem yu blong go oltaem long ol miting blong Kristin kongregesen? (Hibrus 10:24, 25) ?Presen ya i sas tumas long yu we i mekem se yu gohed nomo blong wosip long God nomata we yu kasem hadtaem? ?Yu yu gat bigfala tangkiu long God we i save givim paoa blong mekem yu kam inaf blong winim eni traem we i save pulum yu blong lusum sas presen ya?
22 I gud we yumi evriwan i tinghae long presen long saed blong spirit we God i givim. Taem yumi stap wet long Paradaes we i stap kam, i gud we yumi joen fulwan long ol blesing long saed blong spirit we Jeova i stap givim long yumi naoia. Yumi mas mekem fasin fren blong yumi wetem Jeova i kam bigfala samting long laef blong yumi. Olsem nao yumi pruvum bigwan se presen ya we God i givim long yumi, hem i rili sas. I gud we yumi stap wetem olgeta we oli talem se: “Hae God. Yu yu God blong mi, mo yu yu King blong mi. Oltaem bambae mi stap talemaot hae nem blong yu, bambae mi stap talem tangkiu long yu, gogo i no save finis.”—Ol Sam 145:1.
?Bambae Yu Save Eksplenem?
• ?Sipos Adam i bin stap tru long God, wanem presen we hem i save pasem i kam long yumi?
• ?Olsem wanem ol pikinini blong Ebraham oli tingbaot presen we oli kasem?
• ?Wanem olgeta samting we oli joen wetem presen blong ol tabu man blong Kraes?
• ?Wanem presen we bigfala hip blong man i kasem, mo olsem wanem oli save soem se oli tinghevi long presen ya?
[Kwestin]
[Tok blong pija long pej 20]
Ol pikinini blong Ebraham oli kasem promes long saed blong wan sas presen
[Tok blong pija long pej 23]
?Yu yu tinghevi long presen blong yu long saed blong spirit?