Jeova i Glad Long Josaea From We Hem i Gat Tingting Daon

PRINS ya Josaea blong Juda, we i gat faef yia nomo, i fraet tumas. Mama blong hem, Jedida i stap krae. Jedida i krae from se King Manase we i bubu blong Josaea i ded.—2 King 21:18.

Naoia Amon we i papa blong Josaea, bambae i kam king blong Juda. (2 Kronikel 33:20) Tu yia biaen (659 B.K.T. *), ol wokman blong Amon oli kilim hem i ded. Ol man Juda oli kilim ol wokman ya oli ded, mo oli mekem Josaea i kam king. (2 King 21:24; 2 Kronikel 33:25) Long ol yia we Amon i stap rul, Josaea i lan long smel blong insens we i stap olbaot long Jerusalem, from ol olta we oli stap antap long ruf blong haos blong ol man we oli wosip long ol giaman god. Hem i save luk ol hiten pris oli stap wokbaot antap, mo olgeta we oli joen long wosip ya—wetem sam long olgeta tu we oli talem se oli stap wosipim Jeova—olgeta oli stap talem ol tok blong promes long nem blong god ya Malkam.—Sefanaea 1:1, 5.

Josaea i save we Amon i mekem rabis fasin taem hem i wosipim ol giaman god. Yangfala king ya blong Juda i kasem save tu long ol tok we profet blong God, Sefanaea i bin talemaot. Josaea i gat 15 yia nomo (652 B.K.T.) long namba eit yia blong rul blong hem, mo hem i gat strong tingting blong folem ol tok blong Sefanaea. Hem i wan smol boe yet, taem hem i stat blong lukaot Jeova.—2 Kronikel 33:21, 22; 34:3.

!Josaea i Tekem Aksin!

Josaea i stat blong klinimaot ol giaman skul long Juda mo Jerusalem fo yia biaen (648 B.K.T.). Hem i spolem gud ol aedol, ol tabu pos, mo ol olta blong insens we oli stap yusum blong wosip long Bal. Oli graenem ol aedol blong ol giaman god i kam paoda, biaen oli sakem antap long gref blong olgeta we oli bin mekem sakrefaes i go long ol aedol ya. Oli daonem ol olta we oli yusum long giaman wosip, mo biaen oli spolemgud olgeta.—2 King 23:8-14.

Taem Jeremaea we i pikinini blong wan pris blong Livae i kam long Jerusalem (647 B.K.T.), strongfala wok blong Josaea blong klinimaot giaman wosip i stap gohed finis. !Jeova God i putumap yangfala Jeremaea olsem profet blong hem, mo hem i tok strong blong talemaot mesej blong Jeova agensem ol giaman skul! Josaea i gat raonabaot sem yia olsem Jeremaea. Nating se Josaea i mekem bigfala wok blong klinimaot giaman wosip mo Jeremaea i no fraet blong talemaot ol strong tok, be kwiktaem nomo ol man oli foldaon bakegen long giaman wosip.—Jeremaea 1:1-10.

!Faenem Wan Samting We i Sas Tumas!

Faef yia i pas. Naoia Josaea i gat twanti faef yia mo hem i rul 18 yia finis. Hem i singaotem i kam, Safan, we hem i sekretari; Mahasea, we hem i jif blong taon, mo Joa, we hem i man blong rikodem ol samting blong king. King i talem long Safan se: ‘Talem long hae pris, Hilkia, blong mekemrere ol kleksen ya we ol man oli stap givim long ol pris ya we oli stap stanap long doa blong tempel, mo putum mane ya long han blong ol wokman we oli stap lukaot long wok blong fiksimap haos ya.’—2 King 22:3-6; 2 Kronikel 34:8.

Ol man we oli fiksimap haos blong Jeova bakegen oli wokhad, stat long eli moning. I sua se Josaea i talem tangkiu long Jeova from ol wokman ya oli stap karemaot ol nogud samting we sam long ol bubu blong hem oli bin mekem long haos blong God. Taem wok i stap gohed, Safan i kam blong talem wan ripot. ?Be wanem i stap long han blong hem? !Hem i stap karem wan rol blong pepa! Hem i eksplenem se Hae Pris  Hilkia i faenem “Buk blong Loa blong Hae God, we i gat Loa i stap long hem we Hae God i bin givim long Moses bifo.” (2 Kronikel 34:12-18) Hemia wan nambawan samting ya we oli faenem—!i klia se hemia prapa buk blong Loa we Moses i bin raetem!

Josaea i intres tumas blong harem olgeta tok blong buk ya. Taem Safan i stap ridim, king ya i traem luk olsem wanem ol wanwan loa oli laenap wetem hem mo olgeta man. Hem i laekem moa olsem wanem buk ya i soemaot klia trufala wosip, mo i talemaot se sipos ol man oli joen long ol giaman skul, bambae oli save kasem panis mo go kalabus long defren kantri. Naoia Josaea i terem klos blong hem from hem i luksave se ol man oli no bin folem olgeta loa blong God nating. Mo hem i givim oda long Hilkia, Safan, mo ol narafala se: ‘Yufala i go faenemaot tingting blong Hae God long mining blong ol tok we i stap long buk ya. Hae God i kros tumas long yumi, from we ol bubu blong yumi oli no bin folem ol samting we buk ya i talem se oltaem, ol man blong hem oli mas mekem.’—2 King 22:11-13; 2 Kronikel 34:19-21.

Oli Talemaot Tok Blong Jeova

Ol man blong Josaea oli go long Jerusalem blong luk woman profet ya, Hulda, mo oli karem wan ripot i kambak wetem olgeta. Hulda i talemaot tok blong Jeova, mo hem i soemaot se, ol panis we oli stap insaed long buk ya we oli jes faenem, bambae oli kasem nesen ya from we i lego trufala wosip. Be Josaea bambae i no luk panis ya, from hem i gat tingtingdaon fored long Jeova God. Bambae oli berem hem long pis long beregraon wetem ol bubu blong hem.—2 King 22:14-20; 2 Kronikel 34:22-28.

?From we Josaea i ded long faet, yumi save talem se profet tok blong Hulda i stretgud? (2 King 23:28-30) Yes, from se “panis” we i mas kamtru long ol man Juda, i defren olgeta long taem ya we oli berem Josaea long “pis.” (2 King 22:20; 2 Kronikel 34:28) Josaea i ded bifo we bigfala trabol i kamtru long 609-607 B.K.T., long taem we ol man Babilon oli kam raonem mo spolemgud Jerusalem. Mo blong ‘berem wan man long pis long beregraon wetem ol bubu blong hem’ i no minim se bambae hem i no save ded long faet. Oli yusum sem toktok blong tokbaot olgeta we oli ded from faet mo olgeta tu we oli no ded from faet.—Dutronome 31:16; 1 King 2:10; 22:34, 40.

Trufala Wosip i Gohed

Josaea i hivimap ol man blong Jerusalem mo i ridimaot “olgeta tok blong hem [buk ya] i go long olgeta blong oli harem. Buk ya i buk blong promes ya we Hae God i bin mekem wetem ol man blong hem bifo” we oli faenem insaed long haos blong Jeova. Biaen hem i mekem wan promes blong “bambae hem i obei long hem [God], i holem ol loa blong hem mo ol tok blong hem long olgeta tingting blong hem, mo long evri haf blong laef blong hem. Mo hem i promes tu se bambae hem i folem ol rul blong promes ya we Hae God i bin mekem bifo, we oli raetem long buk ya.” Olgeta man oli stanap long saed blong promes ya.—2 King 23:1-3.

I klia se naoia King Josaea i statem bakegen wan bigfala wok blong finisim wosip long ol aedol. Oli karemaot wok long ol pris blong ol god blong narafala kantri, we oli stap long Juda. Ol pris blong Livae we oli joen long giaman wosip oli lusum wok blong olgeta long olta blong Jeova, mo oli brekem daon ol hae ples we oli bildim long rul blong Solomon, mekem se man i no moa save yusum olgeta blong mekem wosip. Oli klinimaot giaman wosip tu long teritori we bifo i blong ten laen blong kingdom blong Isrel, we ol man Asiria oli bin winim longtaem finis long faet (740 B.K.T.).

Josaea i bonem ol bun blong ol pris blong Bal long olta we King Jeroboam namba wan i bin stanemap long Betel. Hemia i blong mekem tok ya i kamtru we wan “man blong trufala God” we oli no talem nem blong hem, i bin talem 300 yia bifo. Oli karemaot ol hae ples long Betel mo ol narafala taon. Mo oli kilim ol pris we oli wosip long ol aedol i ded olsem sakrefaes long ol semfala olta we oli bin yusum blong mekem wosip blong olgeta.—1 King 13:1-4, NW; 2 King 23:4-20.

Oli Mekem Wan Bigfala Pasova

God i sapotem Josaea fulwan long wok blong hem blong leftemap klin wosip. Long olgeta taem we king ya i stap laef, bambae hem i talem tangkiu long Jeova from we ol man oli “no tanem baksaed long Jeova God ya blong ol bubu blong olgeta.” (2 Kronikel 34:33, NW) Josaea i no save fogetem nambawan samting ya we i bin hapen long namba 18 yia blong rul blong hem.

King ya i talem long ol man se: “Hae God i God blong yumi, mo yumi mas mekem Lafet blong Pasova blong ona long hem, stret olsem we oli raetem long buk ya blong promes blong hem.” (2 King 23:21) Josaea i glad tumas taem hem i luk we ol man oli mekem olsem we hem i talem. Long lafet ya Josaea hem wan i givim 30,000 anamol blong Pasova mo 3,000 buluk. !Wan bigfala Pasova ya! Ol presen we oli givim, gudfala plan blong lafet ya, mo namba blong olgeta we oli joen long wosip, i bitim eni narafala pasova we i bin tekem ples i stat long taem blong profet Samuel go kasem taem ya.—2 King 23:22, 23; 2 Kronikel 35:1-19.

 Oli Krae Bigwan Taem Hem i Ded

Josaea i rul olsem wan gudfala king long olgeta 31 yia ya we hem stap long paoa (659-629 B.K.T.). Klosap long en blong rul blong hem, hem i harem we Fero Neko i plan blong pastru long Juda blong blokem ol ami blong Babilon mo blong givhan long king blong Asiria long Kakemis, long reva blong Yufretes. Nao from sam risen we yumi no save, Josaea i go blong faetem ol man Ijip ya. Neko i sanem ol man blong talemaot long hem, se: “God i stap long saed blong mi ya. I nogud yu girap, yu agens long mi. Bambae hem i spolem yu nomo.” Be Josaea i putum ol narafala klos blong mekem se ol man Ijip oli no luksave hem, mo long Megido, hem i traem blong mekem olgeta oli tanraon oli gobak.—2 Kronikel 35:20-22.

!Sore tumas long king blong Juda! Ol enemi we oli sut long bonara oli sutum hem, mo hem i talem long wokman blong hem se: “!Olgeta! !Mi karekil we i nogud olgeta! !Yufala tekemaot mi i gowe long faet ya!” Oli tekemaot Josaea long kat blong faet blong hem, mo oli putum hem long wan narafala kat, mo oli karem hem i go long Jerusalem. Taem oli stap ron yet long rod i go long taon ya, Josaea i pulum laswan win blong hem. Stori blong Baebol i talem se: “Nao hem i ded, mo oli berem hem long wan hol long ston long ples ya, long beregraon blong ol king. Mo olgeta man Jerusalem wetem ol narafala man Juda oli krae bigwan long hem.” Jeremaea i singsing long ded blong hem, mo long taem blong ol spesel lafet we i kam biaen, oli tokbaot king ya long ol singsing we i soemaot sore blong olgeta.—2 Kronikel 35:23-25.

Yes, sore tumas we King Josaea i mekem mastik blong joen long faet agensem ol man Ijip. (Ol Sam 130:3) Nating se i olsem, tingtingdaon mo strong tingting we hem i gat long trufala wosip i mekem se God i glad long hem. !Laef blong Josaea i soemaot klia se Jeova i laekem olgeta man blong wok blong hem we tingting blong olgeta i stap daon!—Ol Proveb 3:34; Jemes 4:6.

[Futnot]

[Tok blong pija long pej 29]

Yangfala King Josaea i gat strong tingting blong lukaot Jeova

[Tok blong pija long pej 31]

Josaea i spolemgud ol hae ples mo i leftemap trufala wosip