Oli Krae From Help

WAN woman Brasil i krae bigwan se: “!God i fogetem mi finis!” Afta we hasban blong hem i ded, hem i harem se laef blong hem i no moa gat mining. ?Yu yu traem finis blong halpem wan man we i stap harem nogud olsem, no we maet, i stap krae from help?

Samfala, tingting blong olgeta i foldaon bigwan mekem se oli kilim olgeta bakegen i ded—bighaf blong olgeta ya oli ol yangfala. Niuspepa ya, Folha de S. Paulo i tokbaot wan stadi we oli mekem long Brasil. Stadi ya i soemaot se “namba blong ol yangfala we oli kilim olgeta wan i ded, i go antap 26 pesen.” Traem tingbaot eksampel blong wan yangfala man São Paulo, nem blong hem Walter. * Hem i lusum papa mama blong hem, i no gat haos, i no gat prapa rum blong hem wan, mo i no gat ol fren we hem i save dipen long olgeta. Blong fri long ol trabol ya, Walter i mekem disisen blong jam godaon long wan brij blong kilim hem wan i ded.

Edna, wan mama we i no mared i gat tu pikinini finis, taem hem i mitim wan narafala man. Wan manis nomo biaen, hem mo man ya tufala i stap tugeta long haos blong mama blong Edna. Mama blong Edna i joen bigwan long wok blong rabis spirit mo i dring tumas alkol. Edna i bonem wan narafala pikinini bakegen, i stat blong dring bitim mak, mo tingting blong hem i foldaon bigwan, mekem se hem i wantem kilim hem wan i ded. Biaen, kot i karemaot raet we hem i gat blong lukaot long ol pikinini blong hem.

?Olsem wanem long ol olfala? Bifo, Maria i wan woman we i laekem blong mekem fani mo i toktok oltaem. Be taem we hem i stap kam olfala, hem i fraet se bambae hem i mekem sam mastik long wok blong hem, olsem wan nes, taswe hem i stat blong wari. Samting ya i mekem se tingting blong hem i trabol tumas. Taswe hem wan i traem faenem rod blong mekem hem i harem gud bakegen. Biaen hem i askem help long dokta, mo i luk olsem se help we hem i kasem i givhan long hem. Be taem hem i gat 57 yia, hem i lusum wok blong hem, mo samting ya i mekem tingting blong hem i trabol bakegen. Nao i luk olsem se bambae hem i no moa save winim problem ya. From samting ya, Maria i stat tingbaot blong kilim hem wan i ded.

Profesa José Alberto Del Porto blong Yunivesiti blong São Paulo i talem se: “Samwe 10 pesen blong ol man we tingting blong olgeta i trabol, oli traem blong kilim olgeta wan i ded.” Wan dokta blong U. S., hemia Dr. David Satcher i talemaot se: “I had blong bilif se ol man we oli kilim olgeta bakegen i ded, namba blong olgeta i bitim ol man we narafala i kilim olgeta i ded.”

Samtaem, taem wan man no woman i stap traem blong kilim hem wan i ded, hemia i olsem we hem i stap krae long ol narafala blong oli givhan long hem. Mo i sua se ol famle mo ol fren oli wantem blong mekem samting we i stret blong givhan long wan we tingting blong hem i foldaon. Be bambae i no givhan nating sipos yumi talem ol tok olsem se: “Yu  no stap sore tumas long yu wan olsem,” “Trabol blong sam man i moawas bitim yu” no, “Yumi evriwan i harem nogud sam samtaem long laef.” Defren olgeta, yumi mas traem kam wan trufala fren mo kam wan gudfala man blong lesin. Yes, traem blong givhan long wan we i stap harem nogud tumas blong luksave se hem i save harem gud long laef.

Franis man ya, Voltaire, we i man blong raetem buk, i raetem se: “Man we i kilim hem wan i ded tede from i harem nogud tumas, maet i wantem tumas blong laef sipos hem i bin wet wan moa wik bakegen.” ?Nao, olsem wanem ol man we tingting blong olgeta i foldaon oli save faenem se oli save haremgud long laef?

[Futnot]

[Tok blong pija long pej 3]

Bigfala namba blong ol yangfala mo ol bigman oli stap kilim olgeta wan i ded

[Tok blong pija long pej 4]

?Olsem wanem yu save givhan long man we tingting blong hem i foldaon bigwan?