Yumi Man Blong Bilif

Talemaot Kingdom Blong God Long Ol Aelan Blong Fiji

WANTAEM Jisas Kraes i tokbaot tu rod. Wan rod, hem i bigwan mo man we i folem, hem i go blong ded. Narafala rod, i strong blong man i folem, be rod ya i go kasem laef. (Matiu 7:13, 14) Blong givhan long ol man blong jusum rod we i stret, Jeova God i stanemap wok ya blong talemaot gud nius blong Kingdom long olgeta ples long wol. (Matiu 24:14) Taswe, ol man long evri ples oli stap harem mesej blong Kingdom, mo samfala oli jusum laef taem oli kam “man blong bilif long God, mo hem bambae i sevem [olgeta].” (Hibrus 10:39) Mifala i askem yu blong ridim stori blong sam man we oli jusum laef, long Fiji mo ol narafala aelan klosap long Fiji long Saot Pasifik.

Oli Trastem Jeova

Mere i stap skul yet taem hem i harem fastaem mesej blong Kingdom long 1964. Hem i no save storian plante wetem ol Witnes blong Jeova from we hem i stap long wan aelan we i no gat Witnes long hem. Be, biaen hem i kasem stret save blong Baebol. Long taem ya, hem i mared long wan man we i jif long vilej blong hem. Mere i jusum blong folem ol rul blong Baebol long laef blong hem. From samting ya, hasban blong hem mo ol famle blong hasban blong hem oli mekem i nogud tumas long hem, mo ol narafala man long vilej oli daonem hem. Nating se i olsem, hem i baptaes long 1991.

Smoltaem afta, hasban blong Mere, Josua, i no moa agensem hem, be hem i stat blong joen wetem Mere mo ol pikinini blong tufala taem oli stap tokbaot Baebol. Josua i no moa go long Jos blong Metodis. Be from se hem i wan jif, hem i gohed blong lidim ol miting blong vilej evri wik. Ol man long vilej oli talem se Josua i mekem i no stret from we long Fiji, Metodis Jos i wan impoten samting long laef blong ol man blong vilej. Taswe, pasta blong vilej ya i tok strong long Josua se hem i mas kambak long faswan skul blong hem.

Josua i no fraet blong talemaot stret se hem mo famle blong hem oli mekem disisen blong olgeta finis mo se oli gat strong tingting blong wosipim Jeova God “wetem spirit mo long trutok.” (Jon 4:24, NW) Long wan miting we i kam biaen, bigfala jif blong vilej ya i talemaot se Josua mo famle blong hem oli mas aot long vilej ya. Oli givim seven dei long olgeta blong aot long aelan, mo livim haos blong olgeta, graon, mo garen blong olgeta—yes evri samting we oli gat blong laef.

Ol brata long saed blong spirit we oli stap long wan narafala aelan oli givhan long Josua mo famle blong hem, oli halpem olgeta, oli givim wan ples blong slip mo graon blong wokem garen. Naoia Josua mo fasbon boe blong hem oli baptaes finis, mo wan narafala pikinini i stap wok olsem man blong talemaot gud nius nating se hem i no baptaes yet. I no longtaem i pas, Mere i kam wan fultaem paenia (wok fultaem blong talemaot Kingdom). Disisen we oli tekem blong mekem wok blong Jeova i mekem se Josua i lusum posisen blong hem mo i mekem se oli lusum ol samting long saed blong bodi. Be olsem aposol Pol, oli luk ol samting ya olsem nating nomo taem oli tingbaot wanem we oli bin kasem.—Filipae 3:8.

Wan Disisen We i Joen Wetem Tingting We i Stap Jajem Yumi

Man we i wantem folem wan tingting we Baebol i trenem, hem i nidim bilif mo fasin blong no fraet. Samting ya i tru long saed blong Suraang we i jes tekem baptaes. Suraang i wan yangfala woman we i stap long Tarawa, wan long ol aelan blong Kiribati. Wan dei, hem i askem blong no mekem wan haf blong wok blong hem olsem wan nes long hospital. Oli no akseptem wanem we hem i askem, nao oli girap, oli sanem hem i go lukaot long wan smol klinik long wan narafala aelan. Oli mekem long hem olsem blong hem i no moa joen wetem ol narafala we oli gat sem bilif olsem hem.

 Long aelan ya, oli gat wan kastom we i talem se sipos wan man i kam we i fastaem blong hem, hem i mas mekem sakrefaes i go long “spirit” blong ples ya. Oli bilif se sipos man i no mekem olsem, bambae hem i ded from. Suraang i no wantem se oli mekem kaen fasin ya long taem blong kakae we oli mekem i go long hem, from we hemia i olsem fasin blong wosip long aedol. From samting ya, olgeta long vilej oli stap wet se rabis spirit we i kros bambae i kilim hem i ded. From we i no gat wan samting i hapen long Suraang no long . Samting ya i givim plante janis long hem blong givim nambawan witnes.

Be ol traem we Suraang i fesem oli no finis yet. Sam yangfala man long aelan ya oli gat tingting blong pulum ol yangfala woman we oli jes kam. Be, Suraang i winim ol samting we oli mekem blong pulum hem, mo hem i holemstrong oltaem long God. Yes, Suraang i save mekem wok olsem fultaem paenia, nating se hem i wok olsem wan nes 24 aoa evri dei.

Bifo long wan kakae we oli mekem blong soem respek long Suraang, taem hem i rere blong livim aelan ya, ol elda blong vilej oli talemaot se hem i faswan trufala misinari we i visitim olgeta. Suraang i holemstrong long ol rul blong Baebol. Samting ya i mekem se ol narafala long aelan ya oli lesingud long mesej blong Kingdom.

Ol Traem Long Saed Blong Bodi

Sam vilej oli stap long bus olgeta. Samting ya i minim se ol man blong Jeova oli mas mekem bigfala traehad blong joen long wok blong prij mo blong kam long ol Kristin miting. Tingbaot eksampel blong fo Witnes we oli baptaes finis—wan man mo tri woman—we oli spenem plante aoa blong kam long ol miting mo gobak long ples blong olgeta. Yes, oli mas krosem tri reva blong go mo kambak. Taem wota i ron bigwan, brata ya i swim i gokros fastaem, mo i pulum wan bigfala sospen, we insaed i gat ol basket, ol buk, mo ol klos blong miting. Biaen hem i swim i kambak blong givhan long ol trifala sista ya.

Wan narafala smol grup, we i stap joen long ol miting long smol aelan ya, Nonouti long Kiribati, oli fesem ol defren traem. Haos we oli stap mekem miting long hem, i naf long seven no eit man nomo. Ol narafala we oli kam oli sidaon afsaed, mo oli lukluk tru long wol blong haos ya we oli mekem long net waea blong faol. Haos blong miting ya i stap long klia ples, taswe taem ol man blong vilej oli stap wokbaot i kam mo go long ol naesfala jos blong olgeta, oli luk smol haos ya klia nomo. Yes, ol man blong Jeova oli luksave se man nao i rili sas long ae blong God, be i no ol haos. (Hagae 2:7) Long aelan ya, wan we sista i baptaes finis, hem i olfala mo hem i no save wokbaot longwe. Nating se i olsem, wan yangfala woman we i pablisa be i no baptaes yet i givhan long hem long wok blong prij. Yangfala woman ya i pusum olfala sista ya long wan kat. !Oli soem bigfala fasin tangkiu from trutok!

I gat moa long 2,100 pablisa we oli stap prij long ol aelan blong Fiji. Oli gat strong tingting blong gohed mo talemaot gud nius blong Kingdom blong God. Mo oli bilif fulwan se plante moa man bambae “[oli] man blong bilif long God, mo hem bambae i sevem [olgeta].”

[Map blong pija long pej 8]

(Lukluk niuspepa)

Ostrelia

Fiji