Rod Blong Yu Save Kam Klosap Long God

Jemes 4:8 i talem se: “Stap klosap long God, nao hem bambae i kam stap klosap long yufala.” Jeova i givim Pikinini blong hem from yumi. Long rod ya hem i soem se hem i wantem tumas we ol man oli frengud wetem hem.

SAMTING ya we God i mekem wetem lav i pulum aposol Jon blong raetem se: “Yumi stap lavem God mo ol narafala man, from we God i lavem yumi fastaem.” (1 Jon 4:19) Be blong yumi wanwan i kam klosap long God, yumi mas kasem sam mak. Ol mak ya oli sem mak long fofala rod blong kam klosap long ol narafala man, olsem faswan haf i bin tokbaot. Naoia bambae yumi tokbaot ol rod ya.

Lukluk Ol Nambawan Fasin Blong God

God i gat plante nambawan fasin, sam long ol bigfala fasin ya, hemia lav, waes, stret fasin, mo paoa. Plante taem hem i soemaot waes mo paoa blong hem long ol samting long skae we i stap longwe mo long ol samting long wol raonabaot long yumi, stat long ol bigbigfala galaksi * i go kasem ol smolsmol atom. * Man blong raetem Sam i raetem se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.”—Ol Sam 19:1; Rom 1:20.

Ol samting we God i wokem oli soemaot lav blong hem. Fasin we God i mekem yumi, i soem se hem i wantem blong yumi haremgud long laef. Hem i mekem se yumi naf blong luk ol defren kala, testem mo smelem samting, harem gud long miusik, laf, laekem ol naesfala samting, mo tu i givim plante narafala samting we yumi wanwan nomo i gat gudhan blong mekem, we maet yumi no nidim ol samting ya blong stap laef. Yes, God i glad blong givim eni samting, hem i kaen, mo i gat lav—hemia ol fasin we oli mekem se hem i wan “hapi God.”—1 Timoti 1:11, NW; Ol Wok 20:35.

Jeova i glad bigwan from we hae rul blong hem we hem i stap yusum i stanap long lav, mo lav nao i stamba fasin we i pusum ol man blong sapotem rul blong hem. (1 Jon 4:8) I tru, nating se Jeova i Hae Rula blong heven mo wol, hem i mekem long ol man, antap moa long olgeta we oli stap tru long hem, olsem we wan papa we i gat lav i mekem long ol pikinini blong hem. (Matiu 5:45) Hem i no save holembak wan samting we i save mekem i gud long olgeta. (Rom 8:38, 39) Olsem we yumi tokbaot finis, hem i givim laef blong stret Pikinini blong hem, from yumi. Yes, yumi stap laef yet naoia mo yumi gat hop blong kasem laef we i no save finis, from lav ya blong God.—Jon 3:16.

Jisas i mekem se yumi gat dip save long ol fasin blong God from we hem i mekem stret olsem Papa blong hem. (Jon 14:9-11) Hem i no griri nating, hem i tingbaot narafala, mo hem i tingting gud bifo we hem i mekem wan samting. Wan taem, ol man oli tekem wan man we sora blong hem i fas mo i no save toktokgud, i kam long Jisas. Tingbaot se maet man ya i sem long medel blong plante man. I gud blong save se, Jisas i tekem man ya i go long wan ples we tufala nomo i stap mo i mekem hem i kamgud long ples ya. (Mak 7:32-35) ?Yu yu glad long ol man we oli tingbaot ol filing blong yu mo we oli respektem yu? Sipos i olsem, samting ya bambae i pulum yu blong kam klosap long Jeova mo Jisas, taem yu lanem moa long saed blong tufala.

Tingbaot Ol Fasin Blong God

Maet wan man i gat ol nambawan fasin, be yumi mas tingbaot hem blong bambae ol fasin ya oli pulum yumi i kam klosap long hem. Samting ya i sem mak long Jeova. Seken impoten rod blong kam klosap long hem, hemia taem yumi tingting dip long ol fasin blong hem. King Deved, wan man we i rili lavem Jeova mo we ol “fasin blong hem oli stret long tingting blong [Jeova],” i talem se: “Taem mi stap tingtingbak long ol dei ya we i pas finis, mi stap tingbaot  olgeta wok ya we yu yu mekem, mo mi stap tingting long olgeta samting ya we yu yu mekem long mi.”—Ol Wok 13:22; Ol Sam 143:5.

Taem yu luk ol nambawan samting we God i wokem no taem yu ridim Tok blong God, Baebol, ?yu yu mekem olsem Deved? ?Yu tingting dip long ol samting we yu luk no yu ridim? Tingbaot wan boe we i jes kasem wan leta long papa blong hem we hem i lavem tumas. ?Bambae hem i tingbaot leta ya olsem wanem? Bambae hem i no jes lukluk hareap nomo, mo putum i go insaed long wan dro. Defren olgeta, bambae hem i ridimgud leta ya, bambae hem i traem blong kasem save evri smolsmol samting we leta ya i talem mo mining blong ol tok long hem. Long sem fasin, yumi mas tingbaot Tok blong God olsem wan sas samting, olsem we man blong raetem Sam i singsing se: “Hae God. Mi mi laekem Loa blong yu tumas, mi stap tingting long hem i stat long moning, gogo kasem sapa.”—Ol Sam 119:97.

Toktokgud Tugeta Oltaem

Fasin blong toktokgud tugeta i stamba blong fasin blong frengud. Hem i minim fasin blong toktok mo lesin—mo i no jes wetem tingting nomo be wetem hat tu. Tru long prea, yumi toktok long Man ya We i Wokem olgeta samting, fasin ya blong toktok stret long God i joen long wosip blong yumi. Jeova i glad long prea blong olgeta we oli lavem hem mo we oli mekem wok blong hem, mo oli luksave se Jisas Kraes i wok long nem blong Hem.—Ol Sam 65:2; Jon 14:6, 14.

Longtaem bifo, God i yusum ol defren rod blong toktok long ol man, olsem tru long ol vison, ol drim, mo ol enjel. Be long taem naoia, hem i toktok tru long Tok blong hem, we ol man oli bin raetem, hemia Tabu Baebol. (2 Timoti 3:16) Tok ya we ol man oli raetem hem i gud long plante rod. Man i save lukluk long hem eni taem. Hem i olsem wan leta we man i save ridim bakegen mo bakegen. Mo hem i no olsem ol kastom stori we ol man oli taltalem nomo long olgeta, nao sam tok blong hem oli jenis. Taswe, tingbaot Baebol olsem wan bigfala hip blong ol leta we oli kam long Papa blong yu long heven we i laekem yu. Letem hem i toktok long yu tru long ol leta ya evri dei.—Matiu 4:4.

Eksampol, Baebol i talemaot tingting blong Jeova long ol samting we oli stret mo ol samting we oli rong. Hem i eksplenem stamba tingting we Jeova i gat long saed blong ol man mo wol ya. Hem i tokbaot ol bisnes blong hem wetem ol defren kaen man mo ol kantri, stat long olgeta we oli stap wosipim hem go kasem ol nogud enemi blong hem. Jeova i mekem se oli raetem storian blong ol samting we hem i mekem wetem ol man, long rod ya hem i soemaot klia evri smolsmol samting long saed blong ol fasin blong hem. Hem i soemaot lav blong hem, glad, fasin blong harem nogud, tingting we i foldaon, kros, fasin sore, fasin blong tingbaot ol man—yes, ol defren kaen tingting mo filing, mo ol risen from wanem hem i harem olsem—long ol rod we i isi blong ol man oli kasem save.—Ol Sam 78:3-7.

?Olsem wanem yu save kasem frut long riding blong yu long wan haf insaed long tok blong God? ?Mo, olsem wanem nao yu rili save kam klosap long God? Fastaem, tingbaot samting we yu ridim mo wanem we yu bin lanem long saed blong God we i soemaot se hem i wan trufala man, mo letem ol poen ya oli kasem hat blong yu. Biaen, prea blong talem long Jeova ol tingting blong yu mo ol dip filing blong yu long saed blong haf ya we yu bin ridim, mo olsem wanem yu save traehad blong kasem frut from. Hemia nao rod blong toktok tugeta. I tru, sipos i gat sam narafala samting tu we yu stap tingbaot, yu save talemaot ol samting ya long prea blong yu.

Wok Wetem God

Baebol i tokbaot sam gudfala man blong bifo se oli wokbaot wetem, no long fored, long trufala God. (Jenesis 6:9 NW; 1 King 8:25, NW) ?Samting ya i minim wanem? Hem i minim se, i olsem we God i stap wetem olgeta evri dei long laef blong olgeta. I tru, oli sinman. Be oli laekem ol loa blong God mo  ol rul blong hem, mo oli laef folem ol tingting blong God. Jeova i laekem blong kam klosap long ol man olsem, mo hem i kea long olgeta. Hemia wanem we Ol Sam 32:8 i soem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”

Jeova i save kam wan gudfala fren blong yu—wan fren we i wokbaot wetem yu, i kea long yu, mo i givim advaes long yu olsem wan papa. Profet Aesea i tokbaot Jeova se hem i “God ya we i stap tijim yufala blong karem gudfala frut long laef blong yufala, mo i stap mekem yufala i wokbaot long rod we i stret.” (Aesea 48:17, NW) Taem yumi kasem ol frut olsem, yumi harem save se Jeova “i stap klosap long [yumi],” sem mak olsem Deved.—Ol Sam 16:8.

Nem Blong God —Stamba Blong Ol Fasin Blong Hem

Plante skul mo plante moa kopi blong Baebol oli no moa stap yusum mo talemaot prapa nem blong God long ol man. (Ol Sam 83:18, NW) !Nating se i olsem, long Hibru haf blong Baebol, nem ya—Jeova —!i kamaot 7,000 taem! (!Ol man we oli tanem  Baebol i go long ol narafala lanwis, oli mekem i no stret nating taem oli karemaot nem blong God we i bin stap long ol faswan hanraet, be oli letem nem blong ol giaman god i stap olsem Bal, Bel, Merodak, mo Setan tu!)

Sam man oli ting se sipos nem blong God i no stap hemia i oraet nomo. Be traem tingbaot: ?I isi no i hadwok blong kam klosap mo gat wan nambawan fasin fren wetem wan man we i no gat nem? Ol taetel olsem God no Masta (we samtaem oli yusum long ol giaman god tu) maet oli pulum man blong tingbaot paoa blong Jeova, rul blong hem, no posisen blong hem, be prapa nem blong hem nomo i makemaot hem se hem i defren long ol narafala god. (Eksodas 3:15, NW; 1 Korin 8:5, 6) Prapa nem blong trufala God i soemaot klia ol fasin blong hem. Walter Lowrie, wan man we i stadi long bilif blong ol skul, i tok stret taem hem i talem se: “Wan man we i no save nem blong God i no rili savegud hem.”

Tingbaot eksampol blong Maria we i stap long Ostrelia. Hem i wan woman we i strong long ol bilif blong Katolik Jos. Fastaem we ol Witnes blong Jeova oli mitim hem, Maria i letem ol Witnes oli soem long hem nem blong God insaed long Baebol. ?Wanem tingting blong hem? “Fastaem we mi luk nem blong God insaed long Baebol, mi krae. Mi harem i gud tumas from save ya se naoia mi save prapa nem blong God mo mi naf blong yusum nem ya.” Maria i gohed blong stadi long Baebol, mo hemia faswan taem long laef blong hem we hem i gat save long Jeova olsem wan trufala man mo hem i save frengud wetem hem blong olwe.

Yes, yumi save “stap klosap long God,” nating se yumi no save luk hem wetem prapa ae blong yumi. Yumi save “luk” ol nambawan naesfala fasin blong hem long tingting mo hat blong yumi, long rod ya lav blong yumi long hem i save gru moa. Lav olsem i “save joenemgud olgeta samting, blong oli kam wan.”—Kolosi 3:14.

[Ol futnot]

[Tok blong pija long pej 7]

Wan rod blong kam klosap Jeova, hemia blong tingtinggud long ol samting we hem i wokem