?Tabu Spirit i Nambawan Helpa Blong Mi?

OL MAN blong stadi long saed blong ol skul, wetem plante narafala man tu, oli gat fulap defren tingting blong eksplenem se tabu spirit blong God i olsem wanem. Be, i no nidim blong gat plante tingting long saed ya. Baebol i talem klia se wanem ya tabu spirit. Hem i no wan man, olsem samfala oli talem, be hem i paoa blong God we i stap wok. God i yusum paoa ya blong mekem ol samting we hem i wantem oli kamtru.—Ol Sam 104:30; Ol Wok 2:33; 4:31; 2 Pita 1:21.

From we God bambae i yusum tabu spirit blong mekem bighaf blong ol stamba tingting blong hem oli kamtru, yumi mas mekem laef blong yumi i laenap wetem paoa ya. Yumi mas mekem tabu spirit i nambawan helpa blong yumi.

?From Wanem Yumi Nidim Wan Helpa?

Jisas i stap tingbaot se i no longtaem bambae hem i lego wol ya, nao hem i leftemap tingting blong ol disaepol blong hem se: “Bambae mi mi askem long Papa blong mi, mo hem bambae i givim wan narawan i kam blong givhan long yufala. Narawan ya hem i [“spirit blong givhan,” NW ], we bambae hem i save stap oltaem wetem yufala.” Mo bakegen hem i se: “Be nating. Mi mi mas talem trutok ya long yufala. I moa gud long yufala blong mi mi gowe long yufala, from we sipos mi mi no gowe long yufala, bambae spirit blong givhan ya, hem i no save kam stap wetem yufala. Be sipos mi gowe, bambae mi sanem hem i kam stap wetem yufala.”—Jon 14:16, 17; 16:7, Nyutesteman Wetem Ol Sam Long Bislama.

Jisas i givim wan impoten wok long ol disaepol blong hem i se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Wok ya bambae i no isi nating, from we plante man bambae oli agens long olgeta.—Matiu 10:22, 23.

Antap long fasin agens we ol man raonabaot bambae oli mekem long ol disaepol, bambae i gat smosmol rao tu i kamaot insaed long kongregesen. Pol i raet i go long ol Kristin blong Rom, samwe long 56 K.T., * hem i se: “Ol brata mo sista. Mi mi talem strong long yufala, se yufala i mas lukaot gud long olgeta we oli wantem mekem yufala i seraot, mo we oli wantem spolem bilif blong ol man. Yufala i no mas go klosap long olgeta. Olgeta oli stap agens long ol tok ya we yufala i kasem finis long ol man we oli tijim yufala long hem.” (Rom 16:17, 18) Ol samting bambae oli go nogud moa taem ol aposol oli ded. Pol i givim woning se: “Mi mi save finis, se bambae, taem mi mi aot long yufala, olgeta ya we oli olsem wael dog, bambae oli kam long yufala, mo bambae oli ronem yufala ol man blong Jisas, olsem we yufala i sipsip nomo. Yes, i gat taem i stap kam we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.”—Ol Wok 20:29, 30.

I nidim help blong God blong winim ol traem ya. Help ya i kam tru long Jisas. Samtaem afta we hem i ded mo i laef bakegen, samwe long 120 man blong hem oli stap wanples long dei blong Pentekos 33 K.T., nao “olgeta evriwan, [“tabu spirit,” NW ] i kam fulap long olgeta.”—Ol Wok 1:15; 2:4.

Ol disaepol oli luksave se tabu spirit we i kamdaon long olgeta long taem ya, hemia nao help we Jisas i bin promes blong givim. Naoia oli kasem save klia mining blong tok ya we Jisas i bin talem: “Spirit ya blong givhan, we hem i [“tabu spirit,” NW ] we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.” (Jon 14:26) Hem i talem tu se paoa ya hem i ‘spirit blong givhan, we hem i stamba blong trutok.’—Jon 15:26.

?Olsem Wanem Spirit Ya i Wan Helpa?

Spirit ya bambae i mekem wok blong helpa long plante rod. Fastaem, Jisas i promes se bambae spirit ya i mekem ol disaepol blong hem oli tingbaot olgeta samting ya we hem i bin talem long olgeta. Hemia i no minim nomo se spirit ya bambae i halpem olgeta blong rimemba ol tok blong hem. Spirit ya i mas givhan tu long olgeta blong kasem save ol dip mining  blong ol tijing blong Jisas. (Jon 16:12-14) Blong talem stret, spirit ya bambae i lidim ol disaepol blong hem blong oli naf moa blong kasem save long trutok. Samtaem biaen, aposol Pol i raetem se: “God i yusum [“spirit,” NW ] blong hem blong soemaot ol samting ya long yumi. Spirit ya blong God i save lukaot olgeta samting we i haed. Ol tingting blong God we man i no save faenemaot, be spirit ya i save faenemaot olgeta.” (1 Korin 2:10) Sipos ol tabu man blong Jisas oli wantem givim stret save long ol narafala man, save blong olgeta wan i mas stanap long wan strongfala fandesen.

Seken samting, Jisas i tijim ol disaepol blong hem blong prea mo blong mekem samting ya oltaem. Sipos samtaem oli no sua long saed blong samting we oli mas prea from, spirit ya bambae i save tok long ples blong olgeta no i save halpem olgeta. “Long sem fasin, [“tabu spirit,” NW ] tu i stap givhan long yumi, we yumi no gat paoa from we yumi no save wanem fasin i stret blong yumi folem blong prea. [“Tabu spirit,” NW ] ya, hem nomo i stap prea long God oltaem from yumi, hem i stap krae we i no gat ol tok we i naf blong makem ol tok blong hem.”—Rom 8:26.

Namba tri samting se, spirit ya bambae i givhan long ol disaepol blong Jisas blong tok blong sapotem trutok long fored blong plante man. Hem i givim woning long olgeta se: “Bambae ol man oli save mekem yufala i pas long ol kaonsel blong olgeta, blong ol kaonsel ya oli jajem yufala. Bambae oli save wipim yufala insaed long haos blong prea blong olgeta. Mo from we yufala i man blong mi, bambae oli save pulum yufala i go stanap long fes blong ol haeman blong gavman, mo long fes blong ol king. Be sipos oli mekem olsem, bambae yufala i gat janis blong talemaot gud nius blong mi long fes blong olgeta, mo long fes blong ol hiten man. Mo taem olgeta oli kam tekem yufala, bambae yufala i no wari. Yufala i no tingting tumas se, ‘?Bambae mi mi tok olsem wanem? ?Bambae mi talem wanem tok long olgeta?’ Bambae yufala i save talemaot tok we [“tabu spirit,” NW ] bambae i givim long yufala, stret long taem blong tok, from we bambae i no yufala nomo i tok. Spirit blong Papa blong yufala bambae i givim tok long yufala blong yufala i talemaot.”—Matiu 10:17-20.

Mo tu, tabu spirit bambae i olsem wan mak blong Kristin kongregesen mo bambae hem i pulum ol memba blong hem blong mekem ol disisen we oli waes. Naoia i gud yumi storian moa long saed blong tufala poen ya blong luk olsem wanem oli impoten long yumi tede.

Wan Mak We i Soemaot Se Yumi Hu

Blong plante handred yia ol man Jiu oli stap aninit long Loa blong Moses olsem nesen ya we God i jusumaot. Be, from we oli sakemaot Jisas we hem i Mesaea, hem i talem se i no longtaem bambae God i sakemaot olgeta tu: “I gat wan tok long Baebol we i talem se, ‘Pos ya we ol man blong wokem haos oli sakem finis, naoia hem i kam nambawan pos blong haos. Samting ya, Hae God i mekem, mo yumi luk we i gud tumas.’ ?Ating yufala i no ridim tok ya yet? . . . From samting ya, bambae God i putumaot yufala, bambae hem i no moa King blong yufala. Nao bambae hem i openem rod long ol narafala man we oli save mekem i stret long hem, blong oli kam we hem bambae i king blong olgeta.” (Matiu 21:42, 43) Taem Kristin kongregesen i stanap long Pentekos 33 K.T., ol man blong Kraes nao, oli kam olsem “ol narafala man we oli save mekem i stret long hem, blong oli kam we hem bambae i king blong olgeta.” Stat long taem ya i go, God i stap yusum kongregesen ya blong toktok long ol man. Blong givhan long ol man blong oli luksave jenis ya, God i givim wan mak we i kliagud blong olgeta man oli luksave.

Long taem blong Pentekos, tabu spirit i givhan long ol disaepol blong toktok long ol lanwis we neva oli bin lanem. Samting ya i mekem ol man raonabaot long olgeta oli sapraes bigwan, nao oli stat askem se: “?Olsem wanem nao yumi evriwan yumi save harem we olgeta oli stap toktok long ol lanwis blong yumi olsem?” (Ol Wok 2:7, 8) Save blong toktok long ol defren lanwis, wetem olgeta “samting blong sapraes, mo plante saen” we ol aposol oli mekem, i pulum samwe long tri taosen man blong luksave se spirit blong God i stap wok long taem ya.—Ol Wok 2:41, 43.

Mo tu, taem ol disaepol blong Kraes oli soemaot ol ‘fasin blong tabu spirit’—lav, glad, pis long tingting, longfala tingting, sore, fasin we i gud mo fasin we i stret oltaem, kwaet fasin mo fasin blong bos long tingting—olgeta fasin ya oli olsem wan mak we i soemaot klia se oli ol man blong God. (Galesia 5:22, 23) Tru ya, lav i wan mak we i rili makemaot trufala Kristin kongregesen. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.”—Jon 13:34, 35.

Ol memba blong faswan Kristin kongregesen ya oli letem tabu spirit blong God i lidim olgeta mo oli yusumgud help we hem i givim. Ol trufala Kristin tede oli luksave se naoia, God i no stap mekem ol dedman oli laef bakegen mo hem i no stap mekem ol merikel olsem long faswan handred yia. Be oli letem ol frut blong spirit blong God oli makemaot olgeta olsem ol trufala disaepol blong Jisas Kraes.—1 Korin 13:8.

Wan Helpa Blong Mekem Ol Disisen

Baebol i kamaot tru long paoa blong tabu spirit. Taswe, taem yumi letem Baebol i lidim yumi, i olsem we tabu spirit i stap tijim yumi. (2 Timoti 3:16, 17)  Hem i save halpem yumi blong mekem ol disisen we oli waes. ?Be yumi stap letem hem blong i halpem yumi?

?Olsem wanem taem yumi mas jusum wan wok no samting blong mekem long laef blong yumi? Taem yumi stap tingbaot blong tekem wan wok, tabu spirit bambae i givhan long yumi blong gat sem tingting olsem we Jeova i gat long saed blong wok ya. Wok we yumi jusum i mas laenap wetem ol rul blong Baebol, mo i gud tu sipos wok ya i no blokem yumi blong gohed long ol tiokratik wok blong yumi. Pei no haeples mo haenem we wan wok i save givim long yumi, oli no impoten tumas. Samting we i moa impoten hemia se, wok ya i givim samting we yumi nidim blong laef, mo i letem yumi gat inaf taem mo janis blong mekem ol Kristin wok we yumi mas mekem.

I stret nomo we yumi evriwan i wantem haremgud long laef. (Prija 2:24; 11:9) Taswe wan Kristin we tingting blong hem i skelgud, bambae i tekem taem blong spel mo pleplei blong haremgud. Be hem i mas jusum ol pleplei we oli givhan long hem blong wokem ol frut blong spirit, i no ol pleplei we oli pulum hem blong ‘mekem ol samting we tingting blong hem nomo i wantem.’ Pol i eksplenem se: “Fasin blong ol man we oli stap mekem ol rabis samting we tingting blong olgeta i wantem, hem i klia. Olgeta oli stap mekem nogud wetem woman, mo oli stap mekem ol samting blong sem, mo oli stap mekem ol samting we oli nogud olgeta. Olgeta oli mekem prea long ol narafala god, mo oli stap mekem ol bisnes blong posen mo kleva. Oli kam enemi, nao oli stap faet, mo oli stap jalus, mo oli stap kros, mo oli stap leftemap olgeta nomo. Olgeta oli stap rao oltaem, nao oli stap seraot from. Oli wantem kasem mak blong narafala man, mo oli stap dring we oli lusum hed, mo oli stap mekem lafet blong mekem nogud nomo, mo oli stap mekem ol narafala samting olsem.” I gud yumi stap longwe tu long ol fasin olsem fasin ya we “yumi stap praod, no yumi stap mekem yumi nomo i stap kros long yumi, no yumi nomo i stap jalus long yumi.”—Galesia 5:16-26.

Hemia i sem mak taem we yumi wantem jusum ol fren blong yumi. I waes blong jusum olgeta folem fasin blong olgeta long saed blong spirit, i no folem bodi mo fes blong olgeta no from ol samting we oli gat. Yumi sua se man ya Deved hem i wan fren blong God, from we God i tokbaot hem se “hem i stret long tingting blong mi.” (Ol Wok 13:22) God i no lukluk bodi mo fes blong Deved taem hem i jusum Deved blong kam king blong Isrel. God i folem wan rul, hemia se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.”—1 Samuel 16:7.

Plante taosen man oli lusum ol fren blong olgeta from we fasin fren blong olgeta i stanap nomo long bodi no olting we narafala i gat. Wan fasin fren we i stanap long ol rij samting we oli no save stap longtaem, bambae hem i save lus kwiktaem nomo. (Ol Proveb 14:20) Tok blong God we tabu spirit i stamba blong hem, hem i givim advaes se taem yumi jusum ol fren yumi mas jusum olgeta we oli save givhan long yumi blong mekem wok blong Jeova. Hem i talem long yumi se yumi mas traehad moa blong givim presen long narafala i bitim we yumi kasem presen, from we fasin ya blong givim hem i mekem man i glad moa. (Ol Wok 20:35) Taem mo kaen fasin, hemia sam long ol beswan samting we yumi save givim long ol fren blong yumi.

Baebol i givim advaes we i kamaot long tabu spirit, i go long ol Kristin we oli wantem mared. Long wan fasin, i olsem we Baebol i talem se: ‘Yu no luk bodi nomo. Lukluk ol leg blong hem.’ ?From wanem oli mas lukluk ol leg? Oli mas luk sipos ol leg ya oli stap mekem wok blong Jeova blong talemaot gud nius mo from samting ya oli naes long ae blong Jeova. ?Ol leg ya oli stap werem ol but blong karem mesej blong trutok mo gud nius blong pis i go long olgeta man? Yumi ridim se: “Samting we i naes tumas long ol hil, hemia leg blong man we i wokbaot blong karem gud nius i kam, man we i talemaot pis, man we i karem gud nius blong samting we i moa gud, man we i talemaot rod we God i stap yusum blong sevem ol man, man we i stap talem long Saeon se: ‘!God blong yufala i kam king!’”—Aesea 52:7, NW; Efesas 6:15.

From we yumi laef long taem we ‘laef long wol ya i kam strong tumas,’ yumi nidim help blong mekem wok blong God. (2 Timoti 3:1) Helpa ya, tabu spirit blong God, i sapotem bigwan wok blong ol Kristin long faswan handred yia, mo hem i givhan tu long olgeta wanwan. Tabu spirit i save givhan long yumi wanwan tu, sipos yumi stadi oltaem long Tok blong God, we i kamaot long tabu spirit. ?Yumi stap mekem samting ya?

[Futnot]