Wok Long “Garen”—Bifo We Kakae i Rere

OL disaepol blong Bigfala Tija oli no kasem save long samting ya. Jisas i jes talem wan sotfala stori long olgeta long saed blong wit mo rabis gras. Stori ya i wan nomo long plante narafala parabol we hem i bin talem long dei ya. Taem hem i finis, bighaf blong ol man we oli stap lesin long hem oli aot finis. Be ol man blong hem oli save se i mas gat wan stret mining long ol parabol ya—antap moa hemia long saed blong wit mo rabis gras. Oli save se Jisas i no wan man blong talem ol naesfala stori nomo.

Matiu i talem wanem we oli bin askem: “Plis yu talem long mifala, mining blong parabol ya blong rabis gras ya we i gru long garen.” Blong ansa long olgeta, Jisas i eksplenem parabol ya, mo i soem se wan bigfala apostasi * bambae i kamaot long medel blong olgeta ya we oli talem se oli disaepol blong hem. (Matiu 13:24-30, 36-38, 43) Samting ya i hapen, mo apostasi i gru kwiktaem afta long ded blong aposol Jon.  (Ol Wok 20:29, 30; 2 Tesalonaeka 2:6-12) Paoa we apostasi ya i gat long ol man i bigwan, taswe i stret nomo we Jisas i askem kwestin ya we i stap long Luk 18:8: “?Be taem mi, mi Pikinini blong Man, mi kambak . . . bambae mi save faenem plante man we oli bilif long mi, no nogat?”

Taem ya we Jisas bambae i kambak, i makem stat blong wok ya blong ‘hivimap’ ol Kristin ya we oli olsem wit. Mo hem i makem tu, taem blong ‘en blong wol ya,’ we i stat long 1914. Taswe yumi no mas sapraes se i gat plante man lelebet we oli bin stat blong soem intres long ol trutok blong Baebol bifo long taem blong tekem kakae i kam.—Matiu 13:39.

Taem yumi lukluk long ol stori blong histri, antap moa long yia 14 handred i kam, i klia se tingting blong plante man i girap. Plante long ol hip man long Krisendom tu, we oli olsem ol “rabis gras,” no ol giaman Kristin, oli stat blong tingting. From we i isi moa long plante man blong kasem wan Baebol, mo from we sam man oli bin wokem ol konkodens blong ol wod long Baebol, ol man we hat blong olgeta i stret oli stat lukluk moa insaed long Baebol.

Laet i Saenaot Moa

Wan long ol man ya we i laef long stat blong ol yia 18 handred, hemia Henry Grew (1781-1862), we i blong Birmingham, Inglan. Taem hem i gat 13 yia, hem mo famle blong hem oli tekem bot i gokros long Atlantik Si blong go long Yunaeted Stet. Oli kasem ples ya long Julae 8, 1795, mo oli go laef long Providence, long Rhode Aelan. Papa mama blong hem oli tijim hem blong laekem Baebol. Long 1807, taem Grew i gat 25 yia, oli singaot hem blong mekem wok blong pasta long Baptis Jos long Hartford, Connecticut.

Hem i tinghevi long wok blong hem blong tij mo hem i traem givhan long ol memba blong jos blong hem blong oli laef folem wanem we Baebol i talem. Be, hem i bilif se ol man we oli wantem mekem sin oli no mas stap insaed long kongregesen we i klin. Samtaem, hem, wetem sam narafala bigman blong jos, oli mas putumaot olgeta we oli stap slip tugeta be oli no mared mo eni man we i joen long olkaen fasin we oli doti.

I gat sam narafala problem insaed long jos we oli mekem tingting blong Grew i trabol. Jos i stap letem ol man we oli no memba blong jos oli lukaot long sam bisnes blong jos mo oli stap lidim ol  singsing long ol sevis blong jos. Ol man ya oli gat raet blong vot long saed blong sam samting insaed long kongregesen mo long rod ya oli save bos long sam samting we oli hapen insaed long jos. Grew i bilif se ol man we oli holemstrong long bilif, olgeta nomo oli gat raet blong mekem ol samting olsem. Tingting blong hem i stanap long rul ya blong Baebol we i talem se ol Kristin oli mas seraot long wol ya. (2 Korin 6:14-18; Jemes 1:27) Long tingting blong hem, fasin ya blong letem ol man we oli no gat bilif oli singsing ol sing blong presem God, i no soem respek nating mo i agensem God. From strong tingting ya, long 1811, jos i sakemaot Henry Grew. Sam narafala memba blong jos we oli gat sem tingting olsem Grew, oli seraot long jos tu.

Seraot Long Krisendom

Grup ya, wetem Henry Grew, oli stat blong stadi long Baebol we mak blong olgeta i blong traem mekem laef mo wok blong olgeta i laenap wetem ol advaes blong Baebol. Kwiktaem nomo, ol stadi ya oli givhan long olgeta blong kasem moa save long trutok blong Baebol mo i mekem se oli luksave plante long ol mastik blong Krisendom. Eksampol, long 1824, Grew i raetem wan klia tok blong pruvum se Triniti i rong. Makem trutok we i stap long vas ya we hem i putum long hanraet blong hem: “‘Long saed blong dei ya, mo aoa ya, i no gat man i save, ol enjel long heven oli no save, mo Pikinini tu i no save, be PAPA nomo.’ [Mak 13:32] Yu luk wanem oda we vas ya i folem we i soemaot posisen blong wanwan man. Man, Enjel, Pikinini, Papa. . . . Masta blong yumi i tijim yumi se Papa nomo i gat save long dei ya. Be tok ya i no laenap wetem tingting blong ol man we oli talem se Papa, Tok, mo Tabu Spirit trifala i wan God nomo; from we [tijing ya, Triniti] i minim se . . . Pikinini i mas save ol sem samting we Papa i save.”

Grew i soemaot klia se ol lida blong skul mo ol komanda blong ami oli gat tu fes taem oli talem se oli stap mekem wok blong Kraes. Long 1828 hem i talem se: “Tingting blong yumi i fasfas taem yumi tingbaot se, wan Kristin we i jes prea from ol enemi blong hem, i girap mo i givim oda long ol soldia blong hem blong sperem hat blong ol enemi ya wetem naef blong faet blong olgeta long wan fasin we i rabis olgeta. Long wan saed, Kristin man ya i soemaot se hem i folem fasin blong Masta blong hem we i ded; ?be narafala aksin blong hem i folem hu ya? Jisas i prea from ol man we oli kilim hem i ded. Be ol Kristin oli prea from ol man mo biaen oli go kilim ol man ya oli ded.”

Grew i raetem wan tok we i strong moa se: “?Wetaem bambae yumi bilif long God ya we i gat Olgeta Paoa taem hem i talem stret se ‘man i no save trikim hem?’ ?Wetaem bambae yumi kasem save long fasin mo tingting we i stap biaen long tabu skul ya we i askem yumi blong stap longwe long eni samting we i ‘luk olsem se i rabis?’ . . . ?Yu no ting se yumi daonem Pikinini blong God, taem yumi tingting se skul blong hem i askem man blong mekem ol gudfala wok olsem enjel mo long semtaem i letem man tu blong gat fasin olsem devel?”

Laef Blong Olwe i No Stap Insaed Long Yumi

Long ol yia bifo we man i wokem radio mo televisin, wan rod we plante man oli yusum blong talemaot tingting blong olgeta hemia taem oli raetem mo seremaot ol smosmol pepa. Raonabaot long yia 1835, Grew i raetem wan impoten tok long ol smosmol pepa blong soemaot se ol tijing blong sol we i no save ded mo helfaea oli no laenap wetem Baebol. Hem i luksave se ol tijing ya oli sakem doti long nem blong God.

Ol smosmol pepa ya we hem i raetem oli gat bigfala paoa long tingting blong plante man. Long 1837, George Storrs, we i gat 40 yia, i faenem wan kopi blong pepa ya long wan tren. Storrs i wan man we i bon long Lebanon, wan taon long New Hampshire, be long taem ya hem i stap long Utica, New York.

Hem i wan lida blong Metodis-Episkopal Jos, we plante man oli respektem hem bigwan. Taem hem i ridim smol pepa ya, hem i sapraes se i save gat ol strong pruf olsem blong agensem ol stamba tijing blong Krisendom, we neva bifo tingting blong hem i hafhaf long olgeta. Hem i no save hu man ya we i raetem ol tok ya, mo sam yia nomo biaen, ating long 1844, hem i mitim Henry Grew taem tufala tugeta i stap long Philadelphia, Pennsylvania. Be, Storrs i stadi long bisnes ya hem wan blong tri yia, mo hem i storebaot samting ya nomo wetem ol narafala lida blong skul.

Ale, from we i no gat man i save pruvum se samting we hem i stap lanem i giaman, George Storrs i mekem disisen se hem i no save stap tru long God sipos hem i gohed blong stap long Metodis Jos.  Long 1840, hem i karemaot nem blong hem long jos ya mo i muf i go long Albany, New York.

Long taem we ol tri oli putum flaoa, long 1842, Storrs i givim sikis defren tok long sikis wik we stamba tok blong olgeta se “Wan Kwestin—?Ol Rabis Man Oli Gat Wan Sol We i No Save Ded?” Plante man oli intres long tok ya mekem se hem i raetemdaon ol tok blong hem i go long buk. Nao, long ol nekis 40 yia, hem i salem 200,000 kopi blong buk ya long Yunaeted Stet mo Inglan. Storrs mo Grew tufala i wok tugeta blong agiu agensem tijing ya blong sol we i no save ded. Grew i gohed strong blong prij go kasem taem we hem i ded long Ogis 8, 1862, long Philadelphia.

Smoltaem afta we Storrs i bin mekem ol sikis tok ya we yumi jes tokbaot, hem i stat intres long tok we William Miller i stap prijimaot. Man ya i talem se Kraes bambae i kambak long 1843, mo evri man bambae oli save luk hem. Blong klosap tu yia, Storrs i strong blong talemaot mesej ya long not is blong Yunaeted Stet. Afta long 1844, hem i no moa wantem putumap wan stret dei we Kraes bambae i kambak, be hem i no go agensem ol man we oli wantem faenemaot moa long saed blong ol taem. Storrs i bilif se taem i klosap nao blong Kraes i kambak mo i impoten we ol Kristin oli stap wekap long saed blong spirit, mo rere from dei ya blong jajmen. Be hem i seraot long grup blong Miller from we oli agri long sam tijing we oli no laenap wetem Baebol, olsem tijing ya se sol i no save ded, graon ya bambae i lus long faea, mo tijing ya se ol man we oli ded bifo we oli gat save long God, oli no gat hop blong laef olwe.

?Fasin Blong Lavem God i Mas Lidim Yumi Blong Mekem Wanem?

Storrs i no agri nating long tingting blong ol Adventis se God bambae i mekem ol rabis man oli laef bakegen long ded, jes blong kilim olgeta oli ded bakegen. Hem i no faenem wan pruf long Baebol we i sapotem aksin ya blong God. Aksin ya i no gat mining mo i olsem fasin blong givimbak nomo. Be, Storrs mo ol fren blong hem oli bitim mak tu, taem oli talem se ol rabis man bambae oli no save laef bakegen samtaem. Nating se oli no save eksplenem mining blong sam vas we oli talem se ol rabis man bambae oli laef bakegen long ded, be oli bilif se tingting ya blong olgeta i laenap moa wetem lav blong God. I no longtaem biaen, olgeta ya oli kasem save long wan narafala samting bakegen long saed blong stamba tingting blong God.

Long 1870, Storrs i sik bigwan mo blong sam manis hem i no moa save wok. Long taem ya hem i tekem janis blong lukluk bakegen long olgeta samting we hem i bin lanem long ol 74 yia we oli pas. Hem i luksave se hem i mestem wan impoten haf long stamba tingting we God i gat long saed blong ol man, we i stap long kontrak blong Ebraham—hemia se, ‘ol man long olgeta kantri long wol bambae oli kasem blesing from we Ebraham i obei long tok blong God.’—Jenesis 22:18; Ol Wok 3:25.

Samting ya i karem wan niufala tingting i kam long maen blong hem. ?Sipos ‘olgeta kantri long  wol’ oli kasem blesing, i minim se olgeta evriwan oli mas harem gud nius? ?Olsem wanem nao bambae oli harem nius ya? Plante milian long olgeta oli ded finis. Taem hem i gohed blong skelem Baebol, hem i faenem se i gat tu defren grup blong dedman we oli “rabis”: I gat olgeta we oli mekem prapa disisen blong olgeta blong sakemaot lav blong God, mo i gat olgeta we oli ded bifo we oli kasem save long saed blong God.

Storrs i luksave se olgeta ya we oli no gat save, bambae oli mas laef bakegen long ded blong oli gat janis ya we ransom sakrefaes blong Jisas Kraes i givim. Olgeta we oli akseptem ransom ya bambae oli laef blong olwe long wol. Olgeta we oli sakemaot ransom ya bambae oli lus blong olwe. Yes, Storrs i bilif se God i no save mekem wan man i laef bakegen sipos man ya i no gat hop blong gohed blong stap laef. !Long rod ya, bambae i no gat wan man long wol we i ded from sin blong Adam, be Adam hem wan nomo i ded from sin blong hem! ?Be, olsem wanem long olgeta we oli laef long taem we Masta Jisas Kraes i kambak? Storrs i luksave se i gat wan bigfala wok blong prij blong mekem olbaot long wol blong kasem ol man ya. Hem i no save nating olsem wanem wok ya bambae i stat, be hem i gat bilif mo i raetem se: “Plante man oli no luksave olsem wanem samting ya bambae i save kamtru, taswe oli no wantem bilivim samting ya. I olsem se, long tingting blong olgeta, God i no naf blong mekem samting ya from we olgeta oli no luksave rod we bambae hem i yusum blong mekem samting ya.”

George Storrs i ded long Desemba 1879, long haos blong hem long Brooklyn, New York. Hemia klosap nomo long ples ya we biaen i kam stamba ples blong lidim bigfala wok ya blong prij long fulwol, we hem i bin wantem tumas blong luk.

I Nidim Moa Laet

?Ol man olsem Henry Grew mo George Storrs oli kasem klia save long trutok olsem we yumi save tede? Nogat. Oli luksave se i hadwok tumas long olgeta blong kasem save, olsem Storrs i talem long 1847: “Yumi mas rimemba se yumi jes kamaot long taem ya blong tudak we ol jos oli stap long hem; taswe yumi no sapraes sipos yumi stap werem yet sam ‘klos blong Babilon’ from we yumi ting se oli trutok.” Eksampol, Grew i gat tangkiu from ransom we Jisas i givim, be hem i no kasem save se ransom ya i wan ‘praes we i stret,’ minim se, Jisas i givim laef blong hem we i stret gud olgeta long ples blong laef blong Adam we i stret gud olgeta. (1 Timoti 2:6) Mo tu, Henry Grew i mekem mastik taem hem i bilif se Jisas bambae i kambak wetem bodi olsem man mo rul long medel blong ol man long wol ya. Be, Grew i tinghae long fasin blong mekem nem blong Jeova i tabu, wan samting we plante man stat long ol yia wan handred K.T. i kam, oli no intres tumas blong mekem.

Long sem fasin, George Storrs i no gat stret save long saed blong sam impoten poen. Hem i luksave sam giaman tok we ol lida blong jos oli sapotem, be samtaem hem i bitim mak tu long ol tingting blong hem. Eksampol, Storrs i no agri long tingting we ol lida blong ol jos oli gat long saed blong Setan, ale hem i sakemaot fulwan tingting ya se Devel hem i rili wan man. Hem i sakemaot Triniti; be, gogo kasem taem we klosap hem i ded, hem  i no sua yet sipos tabu spirit i wan man no nogat. George Storrs i save se Kraes i mas kambak long wan fasin we man bambae i no save luk hem, be hem i ting se samtaem biaen, bambae ol man oli mas luk hem. Nomata long samting ya, i luk olsem se tufala man ya oli gat gudhat mo oli rili wantem faenem moa save, mo oli kam klosap moa long trutok i bitim bighaf blong ol narafala man long taem ya.

“Garen” ya we Jisas i tokbaot long parabol blong hem long saed blong wit mo rabis gras, i no rere yet blong man i tekem kakae long hem. (Matiu 13:38) Grew, Storrs, mo ol narafala man, oli wok long “garen” ya blong mekem i rere from taem ya we bambae i taem blong tekem kakae i kam.

Charles Taze Russell, we i stat wokem magasin ya Wajtaoa long 1879, i raetem tok ya long saed blong ol faswan yia blong hem: “Masta i yusum plante rod blong givhan long yumi long stadi blong Tok blong Hem, wan long ol rod ya hemia tru long gudfala olfala brata blong yumi ya, George Storrs, we ol tok mo hanraet blong hem oli givhan bigwan long yumi; be yumi no wantem folem man, nomata se ol man ya oli gud mo waes olsem wanem, yumi wantem kam ‘Man blong folem God, olsem ol pikinini blong hem.’” Yes, ol trufala Baebol studen oli save kasem blesing tru long traehad we sam man oli mekem, olsem Grew mo Storrs, be i impoten moa blong lukluk i go long Tok blong God, Baebol, olsem stamba blong trutok.—Jon 17:17.

[Futnot]

[Bokis/Foto blong pija long pej 26]

Bilif We Henry Grew i Gat

Ol man oli sakem doti long nem blong Jeova, mo i nidim blong mekem nem ya i tabu.

Tijing blong Triniti, sol we i no save ded, mo helfaea oli giaman nomo.

Kristin kongregesen i mas seraot long wol.

Ol Kristin oli no mas joen long ol faet blong ol nesen.

Ol Kristin oli no stap aninit long wan loa we i talem se Sarede no Sande hem i Sabat.

Ol Kristin oli no mas joen long ol grup blong man we oli wok haed, olsem ol Masonik.

Ol Kristin oli no seraot long tu defren grup, olsem ol lida mo ol memba blong jos.

Ol haenem insaed long jos oli kamaot long ol man we oli no bilif long Kraes.

Olgeta kongregesen oli mas gat wan grup blong elda.

Ol elda oli mas tabu long olgeta fasin blong olgeta, we i no gat man i save tok agensem olgeta.

Olgeta Kristin oli mas talemaot gud nius.

Bambae i gat sam man we oli laef blong olwe long wan Paradaes long wol.

Singsing blong ol Kristin i mas presem Jeova mo Kraes.

[Credit Line]

Photo: Collection of The New-York Historical Society/69288

[Bokis/Foto blong pija long pej 28]

Bilif We George Storrs i Gat

Jisas i givim laef blong hem olsem ransom blong pemaot olgeta man long wol.

Wok blong talemaot gud nius i no stat yet (long 1871).

From samting ya, en i no save kamtru yet long taem ya (long 1871). Wok blong prij bambae i mas kamtru yet long fiuja.

Bambae i gat sam man we oli kasem laef we i no save finis long wol ya.

Ol man we oli ded bifo we oli gat save long God, bambae oli laef bakegen. Olgeta we oli akseptem ransom sakrefaes blong Kraes bambae oli kasem laef we i no save finis long wol. Olgeta we oli sakemaot ransom ya bambae oli lus blong olwe.

Sol we i no save ded mo helfaea oli ol giaman tijing we oli no givim ona nating long God.

Lodsapa hem i wan lafet we ol Kristin oli mas mekem evri yia long Naesan 14.

[Credit Line]

Photo: SIX SERMONS, by George Storrs (1855)

[Tok blong pija long pej 29]

Long 1909, C.T. Russell, we i wokem “Zion’s Watch Tower,” i muf i go long Brooklyn, New York, Yunaeted Stet