?Yu Save Kam Klosap Long Wan God We Yu No Save Luk?
?Yu Save Kam Klosap Long Wan God We Yu No Save Luk?
Maet yu askem se, ‘?Olsem wanem nao mi save frengud wetem wan man we mi no save luk hem?’ Maet i stret blong askem wan kwestin olsem. Be traem tingbaot:
?I IMPOTEN we yumi luk wan man blong bambae yumi save laekem hem mo frengud wetem hem longtaem? ?I no tru se ol samting we yumi no save luk oli impoten tu? !Yes i tru! From risen ya, sam man oli bin frengud wetem sam narafala man we oli raetem leta nomo i go long olgeta oltaem—long ol leta ya oli tok tru blong talem ol samting we oli laekem, ol mak long laef, ol rul we oli folem, ol tok fani, mo ol narafala fasin blong olgeta wanwan no ol samting we oli intres long hem.
Ol blaenman tu oli soemaot klia se yumi no rili nidim blong luk wan man blong yumi save frengud wetem hem. Tingbaot eksampol blong Edward mo Gwen, tufala i mared be tufala i blaen. * Edward i mitim Gwen long wan skul blong ol man we oli blaen, Gwen i wan studen long skul ya. Edward i tinghae long ol fasin blong Gwen, antap moa fasin ya we hem i tok tru mo i no gat wan samting i haed long ol fasin blong hem, mo hem i gat nambawan tingting long saed blong wok. Biaen, Gwen tu i laekem Edward. Long prapa tok blong hem, Gwen i talem se, “hem i soemaot olgeta fasin we taem mi mi smol, oli bin tijim mi se oli impoten.” Tufala i stat blong fren, mo tri yia biaen tufala i mared.
Edward i talem se: “Taem yu kampani wetem wan narafala, fasin blaen i no mekem se i hadwok long yutufala blong frengud tugeta. Maet yutufala i no save luk yutufala, be ol filing oli no blaen.” Naoia, 57 yia biaen, tufala i stap lavlavem tufala yet. Tufala i eksplenem se rod blong nambawan fasin fren blong tufala i joen wetem fo samting: (1) makem ol fasin blong narafala, (2) tingbaot ol fasin ya mo letem oli pulum yu, (3) toktok gud tugeta oltaem, mo (4) mekem ol samting tugeta.
Ol fofala poen ya oli impoten long eniman we i wantem statem wan gudfala fasin fren, nating se hem i bitwin ol fren nomo, no bitwin hasban mo waef, no, hemia we i moa impoten, bitwin man mo God. Long haf we i kam biaen, bambae yumi luk olsem wanem taem yumi mekem ol poen ya oli wok, samting ya i save givhan long yumi blong frengud wetem God, nating se yumi no save luk hem. *
[Ol futnot]
^ Mifala i jenisim ol nem.
^ Fasin fren wetem God i stanap long bilif ya se hem i stap, hemia i no olsem fasin fren we ol man oli gat bitwin olgeta. (Hibrus 11:6) Blong save gud moa olsem wanem blong gat wan strong bilif long God, plis lukluk buk ya Is There a Creator Who Cares About You?, we Watchtower Bible and Tract Society of New York, Inc., i wokem.