?Olsem Wanem Blong Makem Gudfala Frut Long Laef Blong Yu?

WAN diksonari i talemaot mining blong gudfala frut long laef se hemia “fasin blong kam rij, blong ol man oli glad long yu, no blong gat wan haenem.” ?Hemia nao fulwan mining blong tok ya? ?Man i kasem gudfala frut long laef blong hem nomo sipos hem i kam rij, ol man oli glad long hem, no hem i gat haenem? Bifo we yu ansa, tingbaot samting ya: Jisas Kraes i no gat plante rij samting long saed blong bodi taem hem i stap laef long wol ya. I no gat plante man we oli glad long hem; olgeta tu we oli folem ol niufala stael blong laef long taem ya, oli no tinghae long hem nating. Be, Jisas i wan man we i kasem gudfala frut long laef blong hem. ?From wanem?

Taem Jisas i stap long wol, hem i ‘rijman long fes blong God.’ (Luk 12:21) Biaen, taem hem i laef bakegen, God i givim pei long hem, “i leftemap hem, i givim hae nem long hem.” Jeova i leftemap Pikinini blong hem “i go antap olgeta, i givim nem long hem we i hae moa long ol narafala nem.” (Hibrus 2:9; Filipae 2:9) Fasin blong laef we Jisas i gat long wol ya, i mekem hat blong Jeova i glad. (Ol Proveb  27:11) Laef blong hem long wol ya i karem frut, from we hem i kasem mak blong olgeta samting we hem i kam blong mekem. Jisas i mekem wanem we God i wantem mo samting ya i givim ona long nem blong God. From samting ya, God i soem ona long Jisas, i givim plante sas samting long hem, i mekem ol man oli glad long hem, mo i givim wan hae nem long hem we i no gat wan man blong hae save, politik, no wan man blong spot we i bin kasem olsem samtaem. Tru tumas, Jisas i man ya nomo we i bin kasem gudfala frut long laef i bitim eni man long wol ya.

Ol Kristin papa mama oli luksave se sipos ol yangfala blong olgeta oli folem fasin blong Kraes, blong kam rij long ae blong God olsem Jisas, bambae oli kasem plante blesing naoia mo haremgud long plante gudfala blesing bakegen we yumi no naf blong tingbaot, long niufala wol ya we i klosap. Nambawan rod blong wan yangfala blong folem fasin blong Kraes hemia blong mekem wok olsem we Jisas i bin mekem—joen long fultaem minista wok sipos hem i gat janis blong mekem olsem.

Be long sam kantri, kastom we i stap hemia se ol yangfala oli no mekem fultaem minista wok. Taem wan yangfala i finis long skul, maet papa mama blong hem i wantem se hem i mas kasem wan fultaem wok, i mas mared, mo gat wan famle. Samtaem ol yangfala we oli kamaot long ol kastom olsem oli mekem mastik ya se, oli no traem kasem mak blong joen long fultaem minista wok. (Ol Proveb 3:27) ?From wanem? From we ol narafala oli gat paoa long tingting blong olgeta nao oli folem ol rul blong kastom we i stap finis. Hemia samting we i hapen long Robert. *

Taem Kastom i Agensem Tingting We i Jajem Yu

Robert i gruap olsem wan Witnes blong Jeova. Taem hem i bitwin 13 kasem 19 yia, fasin blong hem mo ol fren we hem i jusum oli no stret. Mama blong hem i stat blong wari long hem. From samting ya, hem i askem wan paenia, hemia wan Witnes blong Jeova we i prij fultaem, blong i leftemap tingting blong Robert. Robert i eksplenem wanem we i hapen.

“Mi glad tumas long intres we brata ya i soem long mi. Gudfala eksampol blong hem i mekem se mi wantem mekem wok blong paenia taem mi finis long skul. Long taem ya nao Mama i stat wari bakegen—be from wan defren risen. Long kastom blong mifala, i oraet nomo blong wan gel i paenia taem hem i finis long skul, be wan boe i mas faenem wan gudfala wok fastaem we i givim plante mane, mo biaen hem i save tingbaot wok blong paenia.

“Mi lanem wan wok mo mi statem prapa bisnes blong mi. I no longtaem, mi kam bisi long bisnes ya mo mi stap go long ol miting mo prij olsem we oli wan kastom nomo. Tingting blong mi i stat blong jajem mi—mi save se mi naf blong mekem moa long wok blong Jeova. Be i rili wan strong faet blong kam fri long tingting ya we ol narafala oli wantem mi blong folem, be mi glad se mi bin winim traem ya. Naoia mi mared finis, mo tu yia i pas we mi wetem waef blong mi i bin paenia. I no longtaem i pas, oli putumap mi olsem wan man blong givhan long kongregesen. Mi save talem stret se naoia mi rili harem gud taem mi mekem wok blong Jeova wetem olgeta hat blong mi go kasem mak we mi naf blong kasem.”

Ol Wajtaoa oli leftemap tingting blong ol yangfala bakegen mo bakegen se, sipos oli gat janis taem oli stap long skul yet, oli mas lanem wan wok no sam gudfala save we i blong givhan long olgeta. ?Blong mekem wanem? ?Blong kam rij? Nogat. Bigfala risen hemia blong oli save lukaot gud long olgeta wan, taem oli bigman mo mekem wok blong Jeova fulwan olsem we oli naf blong mekem, i tru moa long fultaem minista wok. Nating se i olsem, plante taem ol yangfala man mo woman oli bisi tumas blong traem kasem wan wok blong wol we i givim plante mane long olgeta, mekem se minista wok i no moa impoten long tingting blong olgeta. Sam oli no stap  tingbaot nating blong joen long fultaem Kristin minista wok. ?From wanem?

Ol tok blong Robert oli mekem se yumi luksave problem ya. Wan taem nomo afta we hem i lanem wok, Robert i statem bisnes blong hem. I no longtaem hem i stap mekem sem kaen wok bakegen mo bakegen, we i luk olsem se i no gat en blong hem. Mak blong hem i blong gat inaf mane we i save mekem laef blong hem i sefgud. ?Be i gat wan man samtaem insaed no afsaed long Kristin kongregesen we i save kasem mak ya fulwan? Ol Kristin oli mas wok blong kasem mane blong lukaot long olgeta wanwan. Oli mas lukaotgud se oli pembak ol kaon blong olgeta; be oli mas luksave tu se, long ol taem naoia we yumi neva sua gud long hem, smol man nomo oli kasem mak ya we oli ting se oli gat inaf mane blong mekem laef blong olgeta i sefgud. Hemia nao from wanem promes blong Jisas we i stap long Matiu 6:33, i mekem ol Kristin oli harem gud tumas.

Robert i glad se hem i bin jusum blong folem wanem we hat blong hem i wantem i bitim we hem i folem ol tingting long kastom blong hem. Tede, hem i harem gud long fultaem Kristin minista wok. Yes, fultaem minista wok i wan wok we i givim ona long man. Robert i gat pis long tingting blong hem from we hem i stap mekem wok blong Jeova, olsem hem i talem, ‘go kasem mak we mi naf blong kasem.’

Yusum Gud Ol Spesel Save We Yu Gat

Plante long ol Witnes blong Jeova oli kasem sam spesel presen. Sam oli gat gud save; sam oli save mekem gudfala wok wetem han blong olgeta. Olgeta presen olsem oli kamaot long Jeova, we “hem nomo i stap mekem yumi evriwan i laef, mo hem i stap givim olgeta samting long yumi.” (Ol Wok 17:25) Sipos i no gat laef, ol presen ya bambae oli olsem nating nomo.

Taswe, i stret nomo blong yusum laef ya we yumi givim i go long Jeova blong mekem wok blong hem. Hemia nao disisen we wan yangfala man we i gat spesel save i wantem mekem. Hem i laef long faswan handred yia K.T. Hem i memba blong wan famle we i impoten, mo i spenem yangtaem blong hem long taon ya we plante man oli save gud, hemia Tasas long Silisia. Taem hem i bon, hem i wan man Jiu, be from papa blong hem, hem i karem sitisen blong Rom. Samting ya i mekem se hem i gat raet mo janis blong mekem plante samting. Taem hem i kam bigwan, hem i stadi long Loa wetem wan long ol bigfala “tija” long taem ya—Gamaliel. I luk olsem se i no longtaem bambae hem i kam ‘rij, ol man oli glad long hem, mo bambae hem i gat wan haenem.’—Ol Wok 21:39; 22:3, 27, 28.

?Hu nao yangfala man ya? Nem blong hem Sol. Be Sol i kam wan Kristin, mo biaen hem i kam aposol Pol. Hem i livim ol hae mak we hem i wantem kasem long wol ya, mo hem i givim fulwan laef blong hem blong mekem wok blong Jeova olsem wan Kristin. I no from we hem i kam wan man blong loa we i mekem se plante man oli save hem, be from we hem i wan man blong talemaot gud nius wetem strong tingting. Afta we hem i spenem 30 yia olsem wan misinari, Pol i raetem wan leta i go long ol fren blong hem long Filipae. Long leta ya hem i tokbaot sam long olgeta mak we hem i bin kasem finis, bifo we hem i kam wan Kristin mo hem i talem se: “Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.” (Filipae 3:8) !Tru ya, Pol i no sore nating long rod we hem i bin jusum blong yusum laef blong hem!

?Olsem wanem long trening ya we Pol i kasem long Gamaliel? ?Trening ya i givhan long hem? !Yes! Plante taem hem i “blokem ol enemi blong gud nius, mo mekem [gud nius] i stanap strong long saed blong loa.” Be bigfala wok blong Pol hemia blong talemaot gud nius—wan samting we oli no bin tijim hem long skul blong hem bifo.—Filipae 1:7, NW; Ol Wok 26:24, 25.

Sem mak tede, sam oli bin yusum gudhan mo save, mo edukesen blong olgeta tu, blong mekem wok blong Kingdom i gohed moa. Wan eksampol, Amy i gat stefeket blong Yunivesiti long saed blong bisnes mo loa. Bifo, hem i bin wok long wan kampani mo i winim bigfala mane, be tede hem i wok fri nomo long wan long ol branj ofis blong Watch Tower Sosaeti. Hemia nao olsem wanem Amy i tokbaot laef we hem i gat naoia, hem i se: “Mi ting se mi bin jusum wan nambawan samting blong mekem long laef. . . . Mi no wantem blong jenisim wok blong mi wetem hemia we ol fren blong mi long Yunivesiti oli gat. Mi mi glad long rod ya we mi folem. Mi gat evri samting we mi nidim—glad, hapi laef mo wan wok we i givim mining long laef blong mi mo i mekem mi mi harem gud.”

Amy i jusum wan rod we i givim pis long tingting blong hem, i mekem hem i harem gud, mo hem i kasem ol blesing blong Jeova. !I sua se ol Kristin papa mama oli wantem se ol pikinini blong olgeta oli gat wan laef olsemia!

 Frut Long Kristin Wok Blong Prij

I tru, hem i impoten blong gat stret tingting long saed blong ol frut we oli kamaot long Kristin wok blong prij. I no hadwok blong kasem gudfala frut taem yumi spenem taem long wok blong prij, taem yumi seremaot ol buk we oli stanap long Baebol no taem yumi pulum ol man blong haos blong storian long wan poen long Baebol we i pulum intres blong olgeta. Be sipos wan wantaem nomo yumi mitim man we i glad blong lesin, maet yumi foldaon long traem ya blong ting se yumi stap westem taem blong yumi nomo. Nating se i olsem, rimemba se, wan mining blong kasem frut long laef hemia mekem ‘man i glad long yu.’ ?Yumi wantem mekem hu i glad? Yes, hemia, Jeova. Jeova i glad long yumi nating we ol man oli lesin long mesej blong yumi no nogat. Jisas i tijim ol disaepol blong hem long wan lesen we i gat bigfala paoa long saed ya.

Rimemba se Jisas i sanem 70 disaepol blong talemaot Kingdom “long ol vilej mo ol narafala ples we bambae i no longtaem, hem i save pas long olgeta.” (Luk 10:1) Oli mas prij long ol taon mo vilej olgeta nomo, we Jisas i no joen wetem olgeta. Hemia wan samting we i niu long olgeta. From samting ya, Jisas i givim advaes long olgeta bifo we hem i sanem olgeta i go, se taem oli mitim wan “man long ples ya we i wantem pis,” oli mas storian gud wetem hem long saed blong Kingdom. Be sipos ol man oli no wantem, bambae oli mas folem rod blong olgeta i go nomo, we i no nid blong oli wari. Jisas i eksplenem se ol man we oli no wantem lesin long olgeta, i olsem we oli no wantem lesin long Jeova.—Luk 10:4-7, 16.

Taem ol 70 man ya oli finisim gud wok blong prij blong olgeta, oli kambak long Jisas “we oli glad tumas. Olgeta oli talem se, ‘!Masta! Nating we ol devel, be taem mifala i tok long olgeta long nem blong yu, olgeta oli obei long mifala.’” (Luk 10:17) !Hemia wan bigfala glad we ol man ya we oli no stret gud olgeta oli kasem, taem oli ronemaot ol spirit man we oli gat bigfala paoa! Be Jisas i talem long ol disaepol blong hem we oli glad tumas se: “I nogud yufala i stap glad nomo, from we ol devel ya oli stap obei long yufala. I moa gud yufala i glad from we God i raetemdaon nem blong yufala, i stap long heven finis.” (Luk 10:20) Maet i no oltaem we ol 70 man ya bambae oli gat paoa blong ronemaot ol rabis spirit, mo tu, maet i no olgeta man we oli glad oltaem blong lesin long olgeta long wok blong prij. Be sipos oli gohed blong stap tru long Jeova, bambae hem i agri long olgeta oltaem.

?Yu Yu Gat Tangkiu From Olgeta We Oli Wok Fultaem?

Wantaem, wan yangfala man i talem long wan Kristin elda se: “Taem mi kasem stefeket blong mi long hae skul, bambae mi traem faenem wan wok. Biaen sipos mi no save faenem wan wok, bambae mi tingbaot blong joen long sam haf blong fultaem Kristin minista wok.” Be, hemia i no wan tingting we plante long olgeta we oli mekem wok blong paenia oli bin gat. Sam oli lego janis we oli gat blong mekem sam wok we i save givim plante mane long olgeta. Sam oli lego janis ya blong kasem wan bigfala edukesen. Olsem aposol Pol, olgeta ya oli mekem sam sakrefaes, be olsem Paul, Robert, mo Amy, oli no sore from ol jus we oli mekem finis. Oli glad we oli bin yusum ol presen we oli kasem blong presem Jeova. I moa impoten we Jeova nao i kasem ol beswan samting we yumi save givim i go long hem.

From ol defren risen, plante Witnes blong Jeova we oli stap tru long hem oli no save mekem paenia. Maet oli gat sam wok we Baebol i talem se oli mas mekem. Be sipos oli stap mekem wok blong God wetem olgeta ‘hat, laef, mo tingting,’ blong olgeta, Jeova i glad long olgeta. (Matiu 22:37) Nating se olgeta wan oli no save mekem wok blong paenia, oli luksave se olgeta we oli paenia oli bin jusum wan nambawan wok.

Aposol Pol i raetem se: “Yufala i no mas letem fasin blong yufala i kam olsem fasin blong ol man long wol.” (Rom 12:2) Folem advaes blong Pol, yumi no mas letem kastom no tingting we plante man long wol oli gat tede, i lidim tingting blong yumi. Nomata sipos yu save paenia no nogat, yu mas putum wok blong Jeova i stap long fasples long laef blong yu. Bambae yu save kasem gudfala frut sipos oltaem Jeova i agri long yu.

[Futnot]

[Tok blong pija long pej 19]

Yu no mas fas long wan wok we yu mekem sem samting bakegen mo bakegen mo i luk olsem se i no givim wan gudfala samting long yu