Tingting Blong God Long Saed Blong Fasin Klin
Tingting Blong God Long Saed Blong Fasin Klin
“Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.”—AESEA 48:17.
1, 2. (a) ?Wanem tingting blong ol man tede long saed blong seks? (b) ?Ol Kristin oli gat wanem tingting long saed blong fasin blong seks?
TEDE, long plante ples long wol, ol man oli tingbaot fasin we oli mekem long laef blong olgeta se hemia bisnes blong olgeta nomo. Oli tingbaot fasin blong seks olsem wan rod we i stret nomo blong soemaot filing blong olgeta long eni taem we oli wantem, oli no tingting se seks i blong olgeta we oli mared nomo. Oli ting se eni fasin we man i jusum blong mekem i oraet nomo, sipos hem i no spolem filing blong narafala. Long lukluk blong olgeta, i no stret blong jajem wan man from fasin blong hem, antap moa from ol fasin long saed blong seks.
2 Be tingting blong ol man we oli save God i defren olgeta. Oli glad blong folem ol rul blong Baebol, from we oli laekem Jeova mo oli wantem se hem i glad long olgeta. Olgeta ya oli luksave se Jeova i laekem olgeta mo i stap lidim olgeta blong mekem i gud long olgeta, mo rod ya bambae i givhan long olgeta mo mekem olgeta oli glad. (Aesea 48:17) From we God i Stamba blong laef, i stret nomo we ol man oli lukluk i go long hem blong i lidim olgeta long saed blong fasin blong yusum bodi blong olgeta. Antap moa, long saed blong fasin ya we i rod blong pasem laef i go long pikinini blong olgeta.
Wan Presen Blong Man Ya We i Wokem Yumi Wetem Lav
3. ?Krisendom i tijim wanem long saed blong fasin blong slip tugeta, mo olsem wanem tijing ya i defren long wanem we Baebol i tijim?
3 Defren long ol man blong wol tede, sam skul long Krisendom * oli tijim se fasin blong seks i wan samting blong sem, olsem we hem i wan sin. Mo tu, hem i tijim se “faswan sin” long garen blong Iden hemia taem Adam i pulum Iv blong slip wetem hem. Tingting ya i no laenap nating wetem wanem we God i talem insaed long Baebol. Baebol i tokbaot faswan man mo woman olsem “man ya wetem woman blong hem.” (Jenesis 2:25) God i talem long tufala blong karem pikinini, se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol.” (Jenesis 1:28) I krangke nomo sipos God i givim oda long Adam mo Iv blong karem pikinini mo biaen i panisim tufala from we tufala i mekem wanem we hem i talem.—Ol Sam 19:8.
4. ?Wanem stamba risen blong fasin blong seks?
4 Oda ya we God i givim long faswan papa mama blong yumi, we hem i talem bakegen long Noa mo ol pikinini blong hem, i soemaot stamba risen blong seks: hemia blong karem pikinini. (Jenesis 9:1) Be, Tok blong God i no minim se ol man blong hem we oli mared oli save slip tugeta nomo taem oli wantem karem pikinini. Nogat. Fasin ya blong slip tugeta i fulumap wan nid we hasban mo waef tufala i gat long saed blong filing mo bodi, mo tufala i save haremgud from fasin ya. Hem i wan rod blong tufala blong soem dip filing long tufala.—Jenesis 26:8, 9; Ol Proveb 5:18, 19; 1 Korin 7:3-5.
God i Putum Mak
5. ?Wanem ol rul we God i putum long fasin blong slip tugeta?
5 Fasin blong seks i wan presen we God i givim. Be samting ya i no minim se hem i no putum sam rul long saed blong fasin ya. Hemia i tru insaed long mared tu. (Efesas 5:28-30; 1 Pita 3:1, 7) Afsaed long mared, i tabu blong slip tugeta. Baebol i klia long saed ya. Long Loa we God i givim long nesen blong Isrel, hem i talem se: “Yufala man we i mared, bambae yufala i no mas go slip wetem narafala woman, mo yufala woman we i mared, bambae yufala i no mas go slip wetem narafala man.” (Eksodas 20:14) Mo biaen, Jisas i tokbaot ‘man we i save mekem nogud wetem gel’ mo fasin blong ‘man we i save stilim woman blong narafala man, mo woman we i mared finis i save go slip wetem narafala man.’ Jisas i soem se ol fasin ya oli joen wetem ol “rabis tingting” we oli kamaot long hat mo we oli mekem man i doti. (Mak 7:21, 22) God i pulum aposol Pol blong givim advaes long ol Kristin long Korin se: “Bambae yufala i no moa mekem fasin nogud wetem woman.” (1 Korin 6:18) Mo long leta we hem i raetem long ol man Hibru hem i se: “Mared i wan fasin we yufala evriwan i mas tinghae long hem. Mo bed blong mared i mas klin nomo, from we God bambae i jajem olgeta we oli stap mekem rabis fasin long saed blong seks, mo olgeta we oli stap mekem i krangke long hasban no waef blong olgeta.”—Hibrus 13:4, NW.
6. ?Long Baebol, ol tok ya “olgeta we oli stap mekem rabis fasin long saed blong seks” i karem wanem mining?
6 ?Tok ya “mekem rabis fasin long saed blong seks,” i minim wanem? Tok ya i kamaot long wan Grik tok, hemia por·neiʹa, we oli yusum samtaem blong tokbaot fasin blong slip tugeta afsaed long mared. (1 Korin 6:9) Long sam narafala vas long Baebol, olsem long Matiu 5:32 mo Matiu 19:9, tok ya i karem wan mining we i bigwan moa. Hem i minim tu, fasin blong slip wetem man no woman blong narafala, mekem nogud wetem narafala memba blong famle, mo mekem seks wetem anamol. Mo tu, por·neiʹa, i save minim sam narafala fasin blong seks bitwin ol man we oli no mared, olsem fasin blong seks we oli mekem long as no maot, no fasin blong pleplei wetem samting blong narafala. Tok blong God i talem stret, no i givim tingting ya se, olgeta fasin ya oli nogud.—Levitikas 20:10, 13, 15, 16; Rom 1:24, 26, 27, 32. *
Ol Loa Blong God Oli Givhan
7. ?Fasin blong stap klin i givhan long yumi olsem wanem?
7 From we yumi sinman, i no isi blong obei long ol loa blong Jeova long saed blong seks. Maimonides, wan man Jiu we i gat bigfala waes long saed blong wol, mo we i laef long ol yia 11 handred, i talem se: “Long fulwan Torah [Loa blong Moses] i no gat wan tabu we i hadwok moa blong folem i bitim hemia long saed blong ol rabis fasin blong seks.” Be, nating se i olsem, sipos yumi folem ol loa blong God, bambae oli givhan bigwan long yumi. (Aesea 48:18) Eksampol, fasin blong obei long ol loa ya i blokem yumi blong no kasem ol nogud sik long saed blong seks. Sam long ol sik ya i no gat meresin blong olgeta mo yumi save ded from. * Yumi no kasem problem we i kamaot from fasin blong gat bel bifo mared. Mo tu, from we yumi mekem waes blong God i wok long laef blong yumi, tingting blong yumi i no stikim yumi. Yumi gat respek long yumi wan mo ol narafala tu oli respektem yumi, olsem ol famle blong yumi, hasban no waef no pikinini blong yumi, mo ol Kristin brata sista blong yumi. Mo tu, fasin obei ya i halpem yumi blong gat tingting we i klin mo we i stret long saed blong seks. Samting ya i save givhan blong mekem mared blong yumi i hapi. Wan Kristin woman i talem se: “Trutok blong Tok blong God hem i beswan rod blong lukaot long yumi. Mi no mared yet, be taem we bambae mi mared mi glad tumas blong talem long Kristin man ya we bambae i hasban blong mi se mi bin stap klin oltaem.”
8. ?Olsem wanem klin fasin blong yumi i save leftemap trufala wosip?
8 Taem fasin blong yumi i klin, yumi save blokem rong tingting we man i gat long saed blong trufala wosip mo yumi save pulum olgeta oli kam long God ya we yumi stap wosipim. Aposol Pita i talem se: “Naoia ol man we oli no bilif long God oli stap talem se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God i kam blong jajem olgeta, bambae oli save leftemap nem blong God from ol gudfala wok ya blong yufala.” (1 Pita 2:12) Mo nating sipos ol man we oli no mekem wok blong Jeova oli no luksave no agri long klin fasin blong yumi, yumi save sua se Papa blong yumi long heven i stap luk yumi, i agri long yumi, mo i glad we yumi traehad blong folem ol loa blong hem.—Ol Proveb 27:11; Hibrus 4:13.
9. ?Nating se yumi no kasem save fulwan long ol risen blong hem, from wanem yumi trastem God blong i lidim yumi? Givim wan pijatok.
9 Bilif long God i minim se yumi trastem se hem i save wanem i gud long yumi, nating sipos yumi no kasem save fulwan se from wanem hem i lidim yumi long rod ya. Tingbaot wan eksampol long Loa blong Moses. Wan loa we i go long ol man long ol kamp blong ami i talem se oli mas berem sitsit blong olgeta afsaed long kamp. (Dutronome 23:13, 14) Maet ol man Isrel oli no kasem save from wanem God i lidim olgeta blong mekem samting ya; mo maet sam oli ting se i no nidim blong mekem olsem. Be, longtaem biaen, ol sayentis oli faenemaot se loa ya i givhan blong mekem se ples we oli karem wota long hem i no kam doti mo i blokem ol sik we oli kasem from ol flae. Long sem fasin, God i putum tabu long fasin blong seks afsaed long mared, from we i gat ol gudfala risen long saed blong spirit, fasin joen wetem ol narafala, ol filing, bodi, mo tingting tu. I gud we naoia yumi luk eksampol blong sam man long Baebol we oli gat klin fasin.
Josef i Kasem Blesing From Klin Fasin Blong Hem
10. ?Hu ya i traem pulum Josef blong slip wetem hem, mo Josef i mekem wanem?
10 Ating yu savegud stori long Baebol long saed blong Josef, pikinini boe blong Jekob. Taem hem i gat 17 yia nomo, hem i wok olsem slef long Potifa, kapten blong ol gad blong Fero blong Ijip. Jeova i blesem Josef, mo i no longtaem hem i kam bos long olgeta samting long haos blong Potifa. Taem hem i gat 20 yia, Josef i wan boe we “bodi blong hem i naes.” Waef blong Potifa i stat blong lukluk Josef, mo i traem pulum Josef blong slip wetem hem. Long klia fasin Josef i talemaot tingting blong hem. Hem i talem se sipos hem i agri long fasin ya, hem i mekem i no stret long masta blong hem be tu, hem i “sin long fes blong God.” ?From wanem Josef i gat tingting olsem?—Jenesis 39:1-9.
11, 12. ?Nating se oli no raetemdaon wan loa yet agensem fasin blong slip olbaot, from wanem tingting blong Josef i blokem hem blong mekem fasin ya?
11 I klia se, Josef i no mekem disisen ya from we hem i fraet se ol man bambae oli faenemaot rong ya. Famle blong Josef i stap longwe long hem, mo papa blong hem i ting se hem i ded. Sipos Josef i mekem rabis fasin long saed blong seks, bambae famle blong hem i neva faenemaot. Mo ating hem i save haedem sin ya long Potifa mo ol man blong wok blong hem, from we olgeta oli no stap long haos oltaem. (Jenesis 39:11) Be, Josef i save se bambae hem i no save haedem fasin ya long God.
12 I sua se Josef i tingbaot ol save we hem i gat finis long saed blong Jeova. Hem i save tok blong Jeova long garen blong Iden se: “Man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” (Jenesis 2:24) Antap long samting ya, maet Josef i save wanem we Jeova i talem long king blong ol Filistaen we i wantem pulum Sera, bubu woman blong Josef, blong slip wetem hem. Jeova i talem long king ya se: “!Naoia nomo, bambae mi mi kilim yu yu ded! !Woman ya we yu tekem i kam, hem i woman blong Ebraham ya! . . . Taswe mi blokem yu blong yu no tajem bodi blong hem, blong mekem sin agens long mi.” (Jenesis 20:3, 6) Taswe nating se Jeova i no givim wan loa yet we man i raetemdaon, tingting blong hem long saed blong mared i klia nomo. Tingting we Josef i gat long saed blong ol fasin we oli gud mo ol fasin we oli nogud, mo strong tingting blong hem blong mekem Jeova i glad, oli blokem hem blong mekem nogud long saed blong seks.
13. ?Maet wanem risen nao i mekem se Josef i no save stap longwe long woman blong Potifa?
13 Be, waef blong Potifa i gohed blong askem Josef “evri dei” blong slip wetem hem. ?From wanem Josef i no stap longwe long woman ya? Hem i wan slef mo i gat ol wok blong mekem mo hem i no save jenisim samting ya. Ol man blong digim graon oli faenem se folem plan blong ol haos blong Ijip, man i mas pastru long ol bigfala rum blong haos fastaem blong go long ol smosmol rum we oli kipim ol samting i stap long hem. Taswe, Josef i no save haed long waef blong Potifa.—Jenesis 39:10.
14. (a) ?Wanem i hapen long Josef afta we hem i ronwe long woman blong Potifa? (b) ?Olsem wanem Jeova i blesem Josef from fasin blong hem blong holemstrong?
14 Nao wan dei i kam we tufala nomo i stap long haos. Ale, waef blong Potifa i holem Josef mo i talem se: “!Yu kam slip wetem mi!” Be Josef i ronwe. Waef blong Potifa i harem nogud from we Josef i no wantem hem, taswe hem i talem se Josef i wantem fosem hem blong slip wetem hem. ?Wanem frut i kamaot? ?From fasin blong Josef blong holemstrong long klin fasin, Jeova i kwik blong givim pei long hem? No gat. Ol man oli kam fasem Josef mo oli sakem hem i go long kalabus. (Jenesis 39:12-20; Ol Sam 105:18) Be Jeova i luk we ol man oli no mekem i stret long Josef mo samtaem biaen hem i mekem se Josef i aot long kalabus i kasem wan haeples long haos blong king. Josef i kam namba tu haeman long Ijip mo Jeova i blesem hem taem hem i givim wan waef mo ol pikinini long hem. (Jenesis 41:14, 15, 39-45, 50-52) Antap long samting ya, stori blong Josef we i holemstrong long klin fasin, oli raetemdaon long Baebol 3,500 yia bifo, blong ol man blong God oli save tingtinggud long hem. !Ol blesing ya oli nambawan, mo oli kamaot from fasin blong folem ol stret loa blong God! I sem mak long yumi tede, maet frut we i kamaot from we yumi holemstrong long klin fasin i no kamaot kwiktaem, be yumi save sua se Jeova i luk fasin blong yumi mo bambae hem i blesem yumi long stret taem blong hem.—2 Kronikel 16:9.
“Strong Promes” Blong Job
15. ?Wanem ya “strong promes” we Job i mekem?
15 Job i wan narafala man we i holemstrong long God. Long taem blong ol traem we Devel Setan i mekem long Job, Job i tingtingbak long laef blong hem. Hem i talem se hem i agri blong kasem strong panis sipos hem i bin brekem ol rul blong Jeova, olsem rul ya long saed blong fasin klin. Job i talem se: “Mi mi mekem wan strong promes finis, se sipos mi luk wan gel, bambae mi no save tingting nogud long hem.” (Job 31:1) Job i minim se from strong tingting we hem i gat blong holemstrong long God, hem i mekem wan promes blong no lukluk wan woman wetem tingting blong wantem woman ya tumas. I tru se Job i stap luk ol woman evri dei long laef blong hem mo hem i givhan long olgeta sipos oli nidim help. Be Job i neva givhan long ol woman wetem tingting ya se bambae hem i traem pulum filing blong olgeta blong wantem slip wetem hem. Nogat. Bifo we Job i kasem ol traem blong hem, hem i wan man we i rij tumas, “i winim olgeta man long ol ples ya blong Is.” (Job 1:3) Be, hem i no yusum paoa we hem i gat from we hem i rij, blong pulum fulap woman blong oli laekem hem. I klia nomo se, hem i neva pleplei wetem filing blong ol yangfala woman blong pulum olgeta blong slip wetem hem.
16. (a) ?Olsem wanem Job i soemaot wan gudfala eksampol long olgeta we oli mared? (b) ?Olsem wanem fasin blong ol man long taem blong Malakae i defren olgeta long fasin blong Job, mo olsem wanem tede?
16 Taswe, long ol gudfala taem, mo ol hadtaem tu, Job i holemstrong long klin fasin. Jeova i luk fasin ya blong hem mo i blesem hem bigwan. (Job 1:10; 42:12) !Job i wan nambawan eksampol long ol Kristin we oli mared, ol man mo ol woman tu! !Yumi no sapraes se Jeova i laekem hem tumas! Long defren fasin, plante man tede oli olsem ol man long taem blong Malakae. Profet ya i harem nogud from we plante hasban oli lego waef blong olgeta blong mared wetem ol woman we, plante taem, oli yangfala moa long olgeta. Wota blong ae blong ol waef we hasban blong olgeta i lego olgeta, i kavremapgud olta blong Jeova. Mo God i tok strong agensem ol hasban we oli ‘no holem ol promes ya we oli mekem long ol woman blong olgeta.’—Malakae 2:13- 16.
Wan Yangfala Woman We i Klin
17. ?Olsem wanem gel Sulam i olsem wan garen “we stonwol i goraon long hem”?
17 Namba tri eksampol blong fasin blong holemstrong long klin fasin, hem i wan gel Sulam. Gel ya i yang mo i gat naesfala bodi. Wan yangfala man blong lukaot long ol sipsip i laekem hem, mo Solomon, king blong Isrel we i rij tumas, i laekem hem tu. Naesfala stori blong hem, we yumi faenem long Sing blong Solomon, i soem se gel Sulam ya i gat klin fasin oltaem. From samting ya hem i kasem respek long olgeta we oli stap raonabaot long hem. Nating se gel ya i no wantem Solomon, God i pulum Solomon blong raetemdaon stori blong hem. Yangfala man we i lukaot long ol sipsip, we gel ya i laekem tumas, hem tu i gat respek long klin fasin blong gel ya. Wan taem hem i bin talem se gel Sulam ya i olsem wan garen we “stonwol i goraon long hem.” (Sing Blong Solomon 4:12) Long Isrel bifo, ol naesfala garen oli fulap long ol defren kaen ligim, ol flaoa we oli smel gud, mo ol bigfala tri. Raon long ol garen ya i gat wan stonwol no wan fenis blong ol smosmol tri. Blong go insaed, man i mas pastru long wan get we i gat lok long hem. (Aesea 5:5) Long tingting blong yangfala man ya, klin fasin mo naesfala fasin blong gel Sulam i olsem naesfala garen ya we i no gat plante olsem. Fasin blong gel ya i klin olgeta. Ol filing blong lav we hem i gat, bambae hem i soem nomo long man we bambae i hasban blong hem.
18. ?Ol stori blong Josef, Job, mo gel Sulam oli mekem yumi tingbaot wanem samting?
18 Gel Sulam i soem wan nambawan eksampol long ol Kristin woman tede blong oli holemstrong long ol gudfala fasin. Jeova i lukluk mo i glad long fasin blong gel ya mo i blesem hem, olsem we hem i bin blesem Josef mo Job. Stori blong olgeta we oli holemstrong long klin fasin, i stap long Tok blong God blong lidim yumi. Nating se tede oli no raetemdaon ol traehad blong yumi long Baebol, be Jeova i gat wan ‘buk blong rimemba’ olgeta we oli traehad blong mekem wanem we hem i wantem. Yumi neva mas foget se Jeova i ‘stap harem mo i stap lesin gud’ mo i glad taem yumi traehad blong stap klin long ol fasin blong yumi.—Malakae 3:16, NW.
19. (a) ?Yumi mas gat wanem tingting long saed blong fasin klin? (b) ?Bambae yumi tokbaot wanem kwestin long haf we i kam biaen?
19 Nating se olgeta we oli no gat bilif oli jikim yumi, yumi glad blong obei long Man ya We i Wokem yumi mo we i gat lav. Ol fasin blong yumi oli gud moa from we yumi folem ol haefala rul blong God. Yumi glad tumas blong folem ol rul ya, yumi tinghae long olgeta. From we yumi traehad blong stap klin oltaem long ol fasin blong yumi, yumi haremgud long blesing blong God mo yumi gat nambawan hop blong kasem ol blesing blong olwe. ?Be, wanem ol samting we yumi save mekem blong stap klin long fasin blong yumi? Nekis haf bambae i tokbaot impoten kwestin ya.
[Ol futnot]
^ Ol skul we oli giaman se oli Kristin.
^ Lukluk Wajtaoa blong Maj 15, 1983, pej 29-31 (Inglis no Franis).
^ Sore tumas, samtaem wan Kristin we i no gat fol, i save kasem wan nogud sik long saed blong seks from we hasban no waef blong hem we i no folem ol loa blong God, i stap tekem narafala man no woman.
?Yu Yu Save Eksplenem?
• ?Baebol i talem wanem long saed blong fasin blong slip tugeta?
• ?Long Baebol, ol tok ya “olgeta we oli stap mekem rabis fasin long saed blong seks” oli karem wanem mining?
• ?Fasin blong stap klin i givhan long yumi olsem wanem?
• ?From wanem Josef, Job, mo gel Sulam, trifala i gudfala eksampol long ol Kristin tede?
[Kwestin]
[Tok blong pija long pej 9]
Josef i ronwe long fasin blong mekem nogud long saed blong seks
[Tok blong pija long pej 10]
Gel Sulam i olsem wan garen “we i gat stonwol i goraon long hem”
[Tok blong pija long pej 11]
Job i mekem wan “strong promes” blong no lukluk nogud long wan woman