Yu Save Stap Klin Long Fasin Blong Yu
Yu Save Stap Klin Long Fasin Blong Yu
“Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”—1 JON 5:3.
1. ?Olsem wanem fasin blong ol man i defren tede?
LONGTAEM bifo, God i pulum profet Malakae blong tokbaot wan taem we bambae fasin blong ol man blong God i defren olgeta long fasin blong ol man we oli no mekem wok blong hem. Profet ya i talem se: “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.” (Malakae 3:18, NW) Profet tok ya i stap kamtru tede. Olgeta we oli folem ol loa blong God, we i minim ol loa ya tu long saed blong fasin klin, oli waes mo oli folem wan rod blong laef we i stret. Be, i no isi blong folem rod ya oltaem. Taswe, Jisas i talem se ol Kristin oli mas traehad blong kasem sef.—Luk 13:23, 24.
2. ?Olsem wanem ol samting raonabaot long yumi i mekem i hadwok blong stap klin?
2 ?From wanem i hadwok blong gat klin fasin oltaem? Wan risen hemia from ol samting raonabaot long yumi. Ol kampani blong bisnes, we oli wokem ol pleplei, oli soem fasin blong slip olbaot olsem se hem i wan fasin we i naes tumas, i mekem man i haremgud, mo i soemaot se man i kam bigman finis. Be oli neva tokbaot ol nogud frut we oli kamaot from fasin ya. (Efesas 4:17-19) Bighaf blong ol man mo woman we oli soem long ol pleplei ya se oli stap slip tugeta, oli no mared. Plante taem ol sinema mo ol so long televisin oli soem se olgeta we oli slip tugeta oli no nidim blong frengud no blong stap tru long olgeta, mo oli no nidim blong gat gudfala filing mo respek long olgeta. Hemia nao ol mesej we fulap man oli bin harem i stat taem oli smol gogo kasem taem we oli bigwan. Mo tu, i gat ol nogud fren we oli strong blong pulum yumi blong gat tingting ya blong tede se i oraet nomo blong folem eni fasin we yu yu wantem folem. Mo samtaem oli jikim no tok nogud long olgeta we oli no wantem folem ol fasin ya.—1 Pita 4:4.
3. ?From wanem plante man long wol tede oli mekem nogud long saed blong seks?
3 Mo tu i gat wan paoa insaed long yumi we i mekem se i hadwok blong gat fasin we i klin. Jeova i wokem man wetem ol filing ya we hem i wantem haremgud long saed blong seks, mo ol filing ya oli save gat paoa long man. Ol filing blong wan man oli joen wetem wanem we man ya i stap tingbaot. Mo ol nogud fasin long saed blong seks oli joen wetem ol tingting we oli no laenap wetem ol tingting blong Jeova. (Jemes 1:14, 15) Wan eksampol, long wan stadi we British Medical Journal i mekem, oli faenem se bighaf blong ol man we oli bin slip tugeta blong faswan taem, oli mekem olsem blong faenemaot nomo se fasin ya i olsem wanem. Sam narafala oli tingting se bighaf blong ol man we oli gat sem yia olsem olgeta oli stap slip tugeta, taswe olgeta tu oli wantem mekem sem mak. Mo sam narafala bakegen oli talem se oli bin letem filing nomo i pulum olgeta, no maet “long taem ya oli bin drong lelebet.” Sipos yumi wantem se God i glad long yumi, yumi no mas gat ol tingting olsem. ?Wanem tingting nao we yumi mas gat blong stap klin long fasin blong yumi?
Mekem Tingting Blong Yumi i Strong
4. ?Yumi mas mekem wanem blong stap klin oltaem?
4 Blong stap klin oltaem, yumi mas luksave se fasin ya blong laef bambae i karem gudfala frut. Hemia i laenap wetem samting we aposol Pol i tokbaot long ol Kristin long Rom se: “Jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Blong luksave se klin fasin i karem gudfala frut, i no naf jes blong save se Tok blong God i putum tabu long ol nogud fasin long saed blong seks. Yumi mas save ol risen from wanem God i putum tabu long fasin ya mo olsem wanem yumi karem gudfala frut sipos yumi stap longwe long fasin ya. Sam long ol risen ya yumi tokbaot finis long faswan stadi.
5. ?Wanem stamba risen from wanem ol Kristin oli wantem stap klin?
5 Be ol strongfala risen from wanem yumi no mekem nogud long saed blong seks, oli kamaot from fasin fren blong yumi wetem Jeova. Yumi lanem finis we hem nao i beswan blong save wanem i gud mo wanem i nogud long yumi. Lav we yumi gat long God bambae i halpem yumi blong no laekem nating ol rabis fasin. (Ol Sam 97:10) God hem i Man blong givim “evri samting we oli gud mo evri presen we oli nambawan.” (Jemes 1:17) Hem i lavem yumi. Taem yumi obei long hem, yumi soemaot se yumi lavem hem mo yumi gat tangkiu from ol samting we hem i mekem long yumi. (1 Jon 5:3) Yumi neva wantem mekem Jeova i harem nogud from we yumi brekem ol stret loa blong hem. (Ol Sam 78:41) Yumi no wantem mekem wan samting we i save pulum ol narafala blong tok nogud long wosip blong God we i tabu mo i stret. (Taetas 2:5; 2 Pita 2:2) Taem yumi stap klin long fasin blong yumi, yumi mekem Man ya we i Hae Olgeta, i glad.—Ol Proveb 27:11.
6. ?From wanem i gud we ol narafala oli save se yu wantem stap klin?
6 Taem yumi mekemap tingting blong yumi blong stap klin, yumi mas letem ol narafala oli save long samting ya. I gud blong ol man oli save se yu yu wan man blong wok long Jeova God mo yu gat strong tingting blong folem ol hae rul blong hem. Hemia laef blong yu, bodi blong yu, jus blong yu. ?Wanem samting i stap long denja? Gudfala fasin fren blong yu wetem Papa blong yu long heven. Taswe yu mas mekem i klia long ol man se bambae yu yu no save lego ol stret fasin. Soemaot se yu glad blong wok long nem blong God taem yu folem ol rul blong hem. (Ol Sam 64:10) Neva yu mas sem blong letem ol narafala oli save strong tingting we yu yu gat blong stap klin. Fasin ya i save mekem tingting blong yu i strong moa, hem i lukaot long yu, mo i leftemap tingting blong ol narafala blong folem eksampol blong yu.—1 Timoti 4:12.
7. ?Olsem wanem yumi holem strong tingting blong stap klin?
7 Afta we yumi mekemap tingting blong yumi blong stap klin mo yumi letem ol narafala oli save long hem, yumi mas mekem sam samting blong holem strong tingting ya. Wan samting i blong jusumgud ol fren blong yu. Baebol i talem se: “Sipos man i go joen long ol waes man, bambae hem i save kam waes.” Yu mas fren wetem olgeta we oli gat sem klin fasin olsem yu; olgeta ya bambae oli mekem tingting blong yu i strong moa. Mo tu, vas ya i talem se: “Be sipos hem i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) Traem bes blong yu, blong no joen nating wetem ol man we oli save mekem tingting blong yu i kam slak.—1 Korin 15:33.
8. (a) ?From wanem yumi mas fidim tingting blong yumi long ol gudfala samting? (b) ?Wanem ol samting we yumi mas stap longwe long olgeta?
8 Antap long samting ya, yumi mas fidim tingting blong yumi long ol samting we oli tru, oli hae, oli stret, oli klin gud, ol samting we oli save mekem yumi haremgud, mo we man i save ona long olgeta. (Filipae 4:8) Blong mekem samting ya yumi mas lukaotgud long wanem we yumi lukluk mo ridim mo wanem miusek we yumi lesin long hem. Ol gudfala buk oli save leftemap tingting blong yumi blong stap klin. Long sem fasin ol rabis buk oli save spolem tingting blong yumi. Rimemba, i isi nomo long man we i gat sin blong foldaon from nogud fasin long saed blong seks. Taswe ol buk, ol sinema, mo miusek we oli pulum filing blong man long saed blong seks oli save lidim man blong wantem tumas ol samting we oli nogud, mo ol filing ya oli save lidim hem blong mekem sin. Sipos yumi wantem stap klin, yumi mas fulumap tingting blong yumi wetem waes blong God.—Jemes 3:17.
Ol Samting We Oli Lidim Man Blong Mekem Nogud
9-11. ?Olsem Solomon i tokbaot, wanem ol samting we oli lidim wan yangfala man blong mekem nogud long saed blong seks?
9 Plante taem, yumi naf blong makem ol step we oli lidim man blong mekem nogud long saed blong seks. Ol wanwan step we man i tekem, bambae i mekem i hadwok moa long hem blong tanraon. Makemgud olsem wanem Ol Proveb 7:6-23 (NW) i tokbaot samting ya. Solomon i luk wan yangfala man we “hat blong hem i wantem tumas wan samting,” hem i no gat wan gudfala tingting i pusum hem. “Long sapa, taem i tudak finis,” yangfala man ya i “stap wokbaot long big rod klosap long wan kona, we haos blong wan woman [wan woman blong rod] i stap long hem.” Hemia faswan mastik blong hem. Long taem we i tudak finis, “hat” blong hem i pulum hem blong wokbaot, i no jes long eni rod, be stret long rod ya we hem i save se ol woman blong rod oli stap long hem.
10 Biaen yumi ridim se: “Wantaem nomo, woman ya i kam luk hem. Woman ya, klos blong hem i soemaot we hem i woman blong rod stret, mo hem i stap folem plan blong hem.” !Man ya i luk woman ya! Hem i save tanraon mo gobak long haos blong hem, be no gat, naoia i hadwok tumas blong mekem olsem from we tingting blong hem i slak finis. Woman ya i putum han blong hem i goraon long hem mo i kisim hem. Hem i letem woman ya i kisim hem, nao i lesin long ol swit tok blong hem. Woman ya i se: “Tede mi mekem sakrefaes ya long God we haf i blong bonem i go long hem, haf i blong kakae.” Long ol sakrefaes ya, man i mas givim mit, flaoa, oel, mo waen. (Levitikas 19:5, 6; 22:21; Namba 15:8-10) Ating woman ya i talem olsem blong soemaot se hem i no sot long saed blong spirit. Mo tu, hem i wantem letem yangfala man i save se i gat plante gudfala samting blong kakae mo dring long haos blong hem. Hem i askem hem blong kam se: “!Ale, yu kam slip wetem mi kasem delaet! !Bambae yumitufala i stap glad blong pleplei long naet ya!”
11 I klia nomo wanem samting we bambae hem i mekem. “Yang man ya i go wetem hem from ol swit tok ya blong hem.” Hem i folem woman ya i go long haos blong hem “olsem wan buluk we i stap wokbaot i go blong oli kilim hem i ded” mo “olsem wan pijin we i flae i go, be i go insaed long wan net.” Solomon i finisim stori blong hem wetem ol impoten tok ya se: “Hem i no save nating we hem i stap long rod blong ded.” Sol, no laef, blong hem i stap long denja from we “God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.” (Hibrus 13:4) !Hemia wan impoten lesen blong ol man mo ol woman tu! Yes, i gud sipos yumi kwik blong blokem ol samting we oli lidim yumi i go long rod we i save mekem se God i no glad long yumi.
12. (a) ?Wanem mining blong tok ya se hat i “wantem tumas wan samting”? (b) ?Olsem wanem yumi save wokem wan strong tingting blong folem stret fasin?
12 Makemgud long stori ya se “hat” blong yangfala man ya “i wantem tumas wan samting.” Tok ya i soemaot se tingting blong hem, ol samting we hem i wantem mo i laekem, ol filing blong hem, mo ol mak we hem i wantem kasem long laef blong hem, oli no laenap wetem samting we God i agri long hem. Slak fasin blong hem i lidim hem blong kasem bigfala trabol. Long ol “lasdei” ya we laef i strong tumas, i nidim fasin traehad blong gat wan strong tingting blong folem stret fasin. (2 Timoti 3:1, Nyutesteman Wetem Ol Sam Long Bislama) God i wokem rod blong givhan long yumi. Hem i givim ol miting blong Kristin kongregesen blong leftemap tingting blong yumi blong folem rod we i stret mo blong joen wetem ol narafala we oli stap traehad blong kasem ol semfala mak ya olsem yumi. (Hibrus 10:24, 25) Long kongregesen i gat ol elda we oli lukaot long yumi mo tijim yumi long rod blong stret fasin. (Efesas 4:11, 12) Yumi gat Tok blong God, Baebol, blong lidim yumi. (2 Timoti 3:16) Mo oltaem, yumi save prea long God blong askem se tabu spirit blong hem i givhan long yumi.—Matiu 26:41.
Lanem Samting From Ol Sin Blong Deved
13, 14. ?Olsem wanem Deved i mekem bigfala sin?
13 Sore tumas be i gat sam gudfala man blong God tu we oli foldaon from nogud fasin long saed blong seks. Wan long ol man ya hemia King Deved, we long plante yia finis hem i stap tru long Jeova. Yumi sua se hem i lavem God tumas. Nating se i olsem, hem i foldaon long rod blong sin. Olsem yangfala man we Solomon i tokbaot, Deved tu i mekem sam samting we i lidim hem blong mekem sin.
14 Long taem ya Deved i olfala lelebet, maet hem i gat bitim 50 yia. Hem i stap antap long haos blong hem, mo i stap luk Batseba, we i naes tumas, i stap swim. Hem i askem ol man blong save hu ya woman ya. Hem i faenemaot se hasban blong woman ya, hemia Uria, i stap wetem ami blong hem, oli hivap raon long Raba, wan taon blong Amon. Nao Deved i sanem sam man blong hem oli tekem Batseba i kam long haos blong hem mo i slip wetem hem. Biaen, ol trabol we oli kamaot from fasin ya i mekem laef blong Deved i fasfas. Batseba i faenemaot se hem i gat bel long Deved. Blong mekem i luk olsem se Uria i papa blong pikinini blong Batseba, Deved i singaot Uria i kambak long faet. Hem i wantem se Uria i slip wetem waef blong hem. Be Uria i no gobak long haos blong hem. Nao Deved i wari tumas. Blong kavremap sin blong hem, hem i sanem Uria i gobak long Raba wetem wan leta i go long kapten blong ami blong hem. Leta ya i talem se oli mas putum Uria long ples we faet i strong tumas long hem, blong ol enemi oli kilim hem i ded. Ale, Uria i ded, mo Deved i mared long wido woman ya, bifo we ol man oli faenemaot se hem i gat bel.—2 Samuel 11:1-27.
15. (a) ?Olsem wanem sin blong Deved i kam long klia ples? (b) ?Deved i mekem wanem afta we Natan i stretem hem?
15 I luk olsem se plan blong Deved blong kavremap sin blong hem i win. Plante manis i pas. Pikinini ya—wan boe—i bon. Sipos Deved i stap tingbaot bisnes ya long taem we hem i raetem Ol Sam 32, i klia se tingting blong hem i jajem hem from sin blong hem. (Ol Sam 32:3-5) Antap moa, Deved i no save haedem sin ya long God. Baebol i talem se: “Hae God i no glad nating long fasin ya we king i mekem.” (2 Samuel 11:27) Jeova i sanem profet Natan i go luk Deved. Long wan fasin we i waes, Natan i tokbaot bisnes ya wetem Deved. Kwiktaem nomo Deved i talemaot sin blong hem mo i askem Jeova blong fogivim hem. Deved i rili tanem tingting blong hem mo fasin ya nao i mekem se hem i fren wetem God bakegen. (2 Samuel 12:1-13) Deved i agri long fasin stretem. Yes, hem i soemaot tingting ya we Ol Sam 141:5 (NW) i tokbaot se: “Sipos wan stret man i kilim mi, fasin ya i kaen gud long mi. Mo sipos hem i tok strong blong stretem mi, fasin ya i gud tumas olsem oel long hed, we bambae hed blong mi i no save blokem.”
16. ?Wanem woning mo advaes we Solomon i givim long olgeta we oli mekem sin?
16 Maet Solomon, we hem i namba tu pikinini boe blong Deved mo Batseba, i tingbaot nogud taem ya long laef blong papa blong hem. Biaen hem i raetem se: “Sipos yu stap traem haedem ol sin blong yu, bambae yu no save win long laef blong yu. Be sipos yu tanem tingting blong yu, nao yu talemaot ol sin ya blong yu long Hae God, mo yu gowe long olgeta, hem bambae i gat sore long yu.” (Ol Proveb 28:13) Sipos yumi mekem wan bigfala sin, i gud yumi lesin long advaes ya we God i givim. Hem i wan woning long yumi mo i blong lidim yumi tu. Yumi mas talemaot sin blong yumi long Jeova mo go luk ol elda long kongregesen blong oli givhan long yumi. Wan impoten wok blong ol elda i blong givhan long olgeta we oli foldaon long sin blong oli folem stret rod bakegen.—Jemes 5:14, 15.
Laef Wetem Ol Frut Blong Sin
17. ?Nating se Jeova i fogivim sin, hem i no blokem yumi long wanem samting?
17 Jeova i fogivim Deved. ?From wanem? From we Deved i wan man we i wantem holem stret fasin, hem i sore long ol narafala, mo hem i rili tanem tingting from sin blong hem. Be nating se i olsem, Jeova i no blokem ol nogud frut we oli kamaot biaen from sin blong hem. (2 Samuel 12:9-14) Samting ya i tru tede tu. Nating se Jeova i no mekem nogud long ol man we oli tanem tingting from sin blong olgeta, be hem i no blokem ol frut we oli kamaot from ol nogud aksin blong olgeta. (Galesia 6:7) Sam long ol frut we maet oli kamaot from nogud fasin long saed blong seks, hemia divos, gat bel bifo mared, ol rabis sik, mo fasin blong lusum tras mo respek blong ol narafala.
18. (a) ?Pol i talem wanem long kongregesen blong Korin long saed blong man we i mekem rabis fasin long saed blong seks? (b) ?Olsem wanem Jeova i soemaot fasin lav mo sore long olgeta we oli mekem sin?
18 Sipos yumi wan i mekem wan bigfala mastik, i isi blong harem nogud long ol nogud frut we oli kamaot from mastik ya. Be, yumi no mas letem wan samting nating i blokem yumi blong tanem tingting blong yumi mo fren bakegen wetem God. Long ol faswan handred yia, Pol i talem long ol man Korin blong putumaot wan man long kongregesen we i mekem nogud long saed blong seks wetem wan memba blong famle blong hem. (1 Korin 5:1, 13) Afta we man ya i rili tanem tingting blong hem, Pol i givim advaes long kongregesen ya se: “I gud yufala i fogivim hem, yufala i leftemap tingting blong hem bakegen.” (2 Korin 2:5-8) Long advaes ya we i kamaot long God, yumi luk lav mo sore we Jeova i gat long olgeta sinman we oli tanem tingting blong olgeta. Ol enjel long heven oli glad tumas long wan sinman we i tanem tingting blong hem from sin blong hem.—Luk 15:10.
19. ?Olsem wanem fasin blong harem nogud afta we yumi mekem wan rong i save halpem yumi?
19 Nating se yumi harem nogud from rong we yumi mekem, sipos yumi sore from rong ya we yumi mekem bambae i save halpem yumi blong “no moa folem ol fasin ya.” (Job 36:21) Yes, nogud frut we i kamaot from sin i mas mekem yumi strong blong no mekem sin ya bakegen. Mo, Deved i yusum samting we hem i lanem from sin blong hem, blong stretem ol narafala. Hem i talem se: “Bambae mi tijim ol man nogud long ol tok blong yu, mo bambae oli kambak long yu.”—Ol Sam 51:13.
Wok Blong Jeova i Givim Glad
20. ?Wanem gudfala frut i kamaot from fasin blong obei long ol stret rul blong God?
20 Jisas i talem se: “Man we i harem tok blong God mo i obei long hem, hem i save harem gud moa.” (Luk 11:28) Fasin blong obei long ol stret rul blong God i givim glad naoia mo blong olwe long fiuja. Sipos yumi bin holemstrong long klin fasin, i gud yumi gohed long rod ya. Yusumgud ol rod we Jeova i givim blong givhan long yumi long saed ya. Sipos yumi foldaon long fasin nogud long saed blong seks, yumi no mas letem tingting blong yumi i foldaon olgeta, from we Jeova i rere blong fogivim ol man we oli rili tanem tingting from sin blong olgeta. Mo i gud yumi gat strong tingting blong neva mekem sin ya bakegen.—Aesea 55:7.
21. ?Olsem wanem advaes blong Pita i save halpem yumi blong stap klin?
21 I no longtaem rabis wol ya bambae i lus wetem ol rabis tingting mo fasin blong hem. Fasin blong stap klin oltaem bambae i karem blesing long yumi naoia mo blong olwe. Aposol Pita talem se: “Ol fren. From ol samting ya, taem yufala i stap wet long Dei ya, yufala i mas traehad blong mekem we long fes blong God, laef blong yufala i klin gud, mo we i no gat wan samting i rong long laef blong yufala. Nao long fasin ya, yufala i gat pis wetem God. . . . Ol fren. Yufala i kasem finis ol tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.”—2 Pita 3:14, 17.
?Yu Yu Save Eksplenem?
• ?From wanem i no isi blong stap klin?
• ?Wanem sam rod we oli save givhan long yumi blong gat strong tingting blong folem ol hae rul blong klin fasin?
• ?Yumi save lanem wanem long ol sin blong yangfala man ya we Solomon i tokbaot?
• ?Yumi lanem wanem long eksampol blong Deved taem hem i tanem tingting from sin blong hem?
[Kwestin]
[Tok blong pija long pej 13]
Fasin blong letem narafala i save se yu gat strong tingting blong stap klin i save lukaotgud long yu
[Tok blong pija long pej 17]
From we Deved i rili tanem tingting blong hem from sin blong hem, Jeova i fogivim hem