?From Wanem Yu Mas PREA?

“MO TAEM yufala i askem long God, yufala i no kasem from we tingting blong yufala i no stret. . . . Yufala i mas stap klosap long God, nao hem bambae i kam stap klosap long yufala.” (Jemes 4:3, 8) Ol tok ya blong Jemes, we i wan disaepol blong Jisas, oli pusum yumi blong tingbaot ol risen from wanem yumi prea.

Prea i no wan rod blong talem nomo wanem we yumi nidim long God. Long bigfala Toktok we Jisas i mekem antap long Hil, hem i talem se: “Taem yufala i no askem ol samting long Papa blong yufala yet, be hem i save finis ol samting we yufala i sot long hem.” Jisas i talem tu se: “Sipos yufala i wantem samting, yufala i mas gohed blong askem, nao bambae yufala i save kasem.” (Matiu 6:8; 7:7) Taswe Jeova i wantem we yumi talem long hem samting we yumi harem se yumi nidim. Be prea i no minim hemia nomo.

Ol trufala fren oli no toktok tugeta nomo taem oli nidim sam samting. Oli intres long olgeta, mo fasin fren blong olgeta i gru taem oli tokbaot ol filing blong olgeta. Long sem fasin, prea i gat wan bigfala stamba risen, hem i no jes blong askem ol samting we yumi nidim. Prea i givim janis long yumi blong mekem fasin fren blong yumi wetem Jeova i kam strong moa, taem yumi tokbaot long hem ol samting long hat blong yumi we oli mekem se yumi fasgud long hem.

Yes, God i givim blesing ya long yumi long saed blong prea, blong mekem se yumi save kam klosap long hem. Samting ya i save hapen nomo sipos yumi tokbaot ol prapa filing blong yumi long God, i bitim we yumi talemaot bakegen mo bakegen ol prea we yumi lanem baehat. !Yumi glad bigwan taem yumi toktok wetem Jeova long prea! Antap  long samting ya, wan waestok long Baebol i talem se: “Taem ol gudfala man oli prea, Hae God i glad blong harem olgeta.”—Ol Proveb 15:8.

Asaf, man ya blong raetem Sam, i singsing se: “Taem we mi mi kam stap klosap long yu [God], mi harem se i gud tumas long mi.” (Ol Sam 73:28) Be blong kam klosap long God, i gat sam moa samting we yumi mas mekem i bitim we yumi prea nomo. Makem olsem wanem stori ya, we i kam biaen, i soemaot klia samting ya:

“Wan man blong [Jisas] i talem long hem se, ‘Masta. Plis yu tijim mifala, blong mifala i prea.’” Blong ansa Jisas i talem se: “Taem yufala i prea, bambae yufala i talem se, ‘Papa, nem blong yu i tabu. Mifala i wantem we ol man oli ona long yu, mo we yu yu kam King blong olgeta man.’” (Luk 11:1, 2) ?Yu ting se prea blong yumi i save gat mining sipos yumi no lanem fastaem wanem nem blong God mo olsem wanem blong mekem nem ya i tabu? ?Mo yu ting se yumi save prea folem olgeta tok ya blong Jisas sipos yumi no kasem save se wanem ya Kingdom blong God? Yumi naf blong kasem save long saed blong ol samting ya sipos yumi stadi gud long Baebol. Save we yumi kasem bambae i givhan long yumi blong save God mo kasem save ol fasin blong hem. Antap moa, taem yumi savegud Jeova God, bambae yumi harem se yumi kam klosap long hem mo fasgud moa long hem. Biaen, samting ya bambae i givhan long yumi blong harem se yumi fri blong toktok wetem hem long prea.

Prea i Save Winim Ol Problem

Taem yumi wokem fasin blong frengud wetem Jeova, bambae samting ya i givhan long yumi blong winim ol problem. Makemgud olsem wanem samting ya i kamaot long wanwan long ol stori ya we oli kam biaen. Ol stori ya oli soemaot se ol man we oli prea oli naf blong mekem fasin fren blong olgeta wetem Jeova i kam strong.

Long Brasil wan woman we nem blong Maria i prea blong askem help long God. Hem i no moa wantem folem ol fasin blong laef we oli stret, from wan risen se hem i luk we ol man long ples blong hem oli gat fasin tu fes. Maria i lego hasban blong hem, ol pikinini, mo haos blong hem. Hem i stat blong yusum ol drag tu. Be from we hem i no save faenem glad, hem i prea long God blong talemaot olgeta samting we oli stap long hat blong hem mo blong askem help blong hem.

I no longtaem, tu Witnes blong Jeova oli storian wetem Maria mo oli livim wan kopi blong Wajtaoa wetem hem, we i tokbaot se i impoten blong letem God i lidim yumi. Magasin ya i tajem hat blong Maria, mo hem i stat blong stadi Baebol wetem ol Witnes blong Jeova long sem dei ya nomo. Biaen, samting ya i mekem se famle blong hem i joengud bakegen. Taem hem i lanem ol samting long saed blong Jeova, hem i wantem soemaot lav we hem i gat long hem. Maria i talem se: “Mi jenisim ol fasin blong mi oli kam moa gud. Fastaem, hasban blong mi mo famle blong mi oli no laekem nating we mi stadi Baebol. Be taem oli luk we mi stap jenisim ol fasin blong mi, oli stat blong leftemap tingting blong mi.” Biaen, Maria i givim laef blong hem i go long Man ya We i Stap Lesin long ol prea, blong mekem wok blong hem.   

Nating se José i gat wan naesfala waef mo wan bisnes we i winim plante mane long hem, hem i no hapi. Hem i slip wetem wan narafala woman mekem se waef blong hem i lego hem. Hem i dring bitim mak mo i harem se hem i olsem nating nomo. José i talem se: “Mi stat blong prea wetem ful hat blong mi, mi askem long God wanem we mi mas mekem blong hem i glad long mi. I no longtaem ol Witnes blong Jeova oli visitim ples we mi wok long hem, mo oli askem blong mekem Baebol stadi wetem mi fri nomo, be mi sanemaot olgeta. Samting ya i hapen tri taem. Evri taem we mi prea blong askem help, ol Witnes oli kam. Biaen, mi mekem disisen se nekis taem bambae mi lesin. Mi bin ridim Baebol finis mo mi gat plante kwestin, be oltaem oli givim ol ansa we i mekem mi mi glad. !Samting we mi lanem long saed blong Jeova i givim wan niufala mining long laef long mi, mo ol fren blong mi we oli Witnes, oli eksampol we i leftemap tingting blong mi! Mi lego gelfren blong mi mo ol fren blong mi we mifala i stap dring wanples. Biaen, mi gobak long waef mo ol pikinini blong mi. Mi baptaes long stat blong 1999.”

Long Itali, Tamara i prea blong kasem waes, from we mared blong hem i stap long trabol. Taem hem i gat 14 yia, famle blong hem i bin kilim hem mo sakemaot hem, from samting ya hem i wan woman we fasin blong hem i strong tumas. Tamara i talem se: “Mi faenem wan Baebol mo mi stat blong ridim. Wan taem, long sapa, mi ridim se, ‘man we i faenem waes i olsem we hem i faenem wan sas samting we i haed i stap.’ Mi prea blong kasem waes ya. (Ol Proveb 2:1-6) Nekis moning, ol Witnes blong Jeova oli kam storian wetem mi. Mi stat blong stadi Baebol wetem olgeta, be i tekem taem blong mekem wanem we mi lanem i wok long laef blong mi. Be biaen,  mi mekem disisen blong folem Kristin rod blong laef mo mi baptaes. Naoia, mi joen wetem hasban blong mi blong halpem ol narafala blong oli kasem blesing from waes blong God.”

Bifo, Beatriz hem i wan long olgeta we oli rij tumas long Caracas, Veneswela. Nating se i olsem, hem i bin divos long man blong hem mo tingting blong hem i trabol bigwan. Hem i lusum hop, mekem se wan taem hem i spenem plante aoa blong prea. Nekis moning, wan man i kilkilim doa blong hem. Beatriz i kros, hem i lukluk i gotru long hol blong doa, mo i luk wan man wetem woman blong hem tufala i stanap i stap wetem basket blong tufala. Be, hem i no openem doa, hem i mekem olsem se hem i no stap long haos. Be bifo we man ya mo woman blong hem tufala i go, tufala i pusum wan smol pepa aninit long doa. Pepa ya i talem olsem se: “Save Baebol Blong Yu.” ?Visit blong tufala ya i joen wetem ol prea we hem i mekem las naet? Hem i singaot tufala blong kambak. I no longtaem hem i stap stadi Baebol, mo biaen hem i baptaes. Beatriz i glad tumas, naoia hem i stap tijim ol narafala olsem wanem blong faenem glad.

Carmen i prea from we hem i fesem hadtaem long saed blong fasin pua. Hem i gat ten pikinini mo hasban blong hem, Rafael, i drong oltaem. Carmen i talem se: “Mi traem winim smol mane taem mi wasem klos blong narafala man.” Be fasin blong Rafael blong dring i kam moa nogud. Carmen i se: “Hasban blong mi i jenisim fasin blong hem nomo taem we mifala i stat stadi Baebol wetem ol Witnes blong Jeova. Mifala i lanem promes long saed blong Kingdom—se Jeova bambae i karemaot fasin pua mo trabol long wol. !Ol prea we mi mekem i go long God oli kasem ansa!” Taem Rafael i lanem ol rod blong Jeova, samting ya i givhan long hem blong no moa dring, mo hem “i kam niufala man.” (Efesas 4:24) Hem mo famle blong hem oli naf blong mekem laef blong olgeta i kam gud moa. Rafael i talem se: “Maet mifala i no rij, mo mifala i no gat prapa haos blong mifala, be mifala i gat ol stamba samting blong laef we mifala i nidim, mo mifala i hapi.”

Taem We God Bambae i Ansa Long Olgeta Prea

?Prea i bin mekem i gud long olgeta ya? !Yes prea i mekem i gud long olgeta! Mo yu makem se, plante taem, prea blong olgeta i kasem ansa taem wan memba blong Kristin kongregesen i halpem olgeta blong kam klosap long Jeova God tru long stadi blong Baebol.—Ol Wok 9:11.

From samting ya, i gat gudfala risen blong yumi prea. I no longtaem, God bambae i ansarem prea ya we i askem Kingdom blong Hem i kam, mo blong mekem olgeta samting we hem i wantem oli kamaot long wol ya. (Matiu 6:10) Afta we God i karemaot olgeta we oli agensem hem long wol ya, “bambae [wol] i fulap gud long ol man we oli savegud Hae God.” (Aesea 11:9) Biaen, olgeta we oli laekem Jeova bambae oli haremgud from we “olgeta samting ya we God i mekem bambae oli fri olgeta, olsem ol pikinini blong hem”—mo i sua se long taem ya God bambae i ansarem prea blong olgeta.—Rom 8:18-21.

[Tok blong pija long pej 7]

?Yu yu save from wanem yumi mas prea?