?Hu Ya Ol Minista Blong God Tede?

“Mifala i naf from we God i mekem mifala i naf. Hem nao i mekem mifala i naf blong kam minista blong niufala kontrak.”—2 KORIN 3:5, 6, NW.

1, 2. ?Wanem wok we olgeta Kristin long faswan handred yia oli joen long hem, be olsem wanem samting ya i jenis?

 LONG faswan handred yia Kristin Taem, olgeta Kristin oli joen long wan impoten wok—hemia wok blong talemaot gud nius. Olgeta evriwan oli man we tabu spirit i makemaot olgeta mo oli minista blong niufala kontrak. Sam long olgeta oli gat ol narafala wok blong mekem, olsem wok blong tij insaed long kongregesen. (1 Korin 12:27-29; Efesas 4:11) Olgeta we oli papa mama tu oli gat bigfala wok blong mekem insaed long famle. (Kolosi 3:18-21) Be evriwan i joen long stamba wok ya we i impoten tumas, hemia blong prij. Long Grik lanwis, we oli yusum blong raetem Kristin haf blong Baebol, wok ya i wan di·a·ko·niʹa—hemia i minim wan sevis, no wan minista wok.—Kolosi 4:17.

² Be taem i pas, nao ol samting oli jenis. Wan grup blong man i stanap, we oli kolem olgeta ol lida blong skul, mo oli talem se olgeta nomo oli gat raet blong prij. (Ol Wok 20:30) Grup ya we oli talem se oli lida, oli wan smol haf nomo blong olgeta ya we oli talem se oli Kristin. Bigfala haf ya blong man we oli talem se oli Kristin oli man we oli daon moa long ol lida. Olgeta ya oli kasem tijing se oli gat sam wok blong mekem, olsem givim presen mane blong sapotem ol lida. Be plante taem, ol memba blong bigfala grup ya oli man blong lesin nomo long toktok we ol lida oli stap prijimaot.

3, 4. (a) ?Olsem wanem ol man long Krisendom oli kam minista? (b) ?Hu i wan minista long Krisendom, mo from wanem samting ya i defren long ol Witnes blong Jeova?

 ³ Ol lida ya oli talem se oli minista (tok ya minister, i wan tok long lanwis Latin blong talem di·aʹko·nos, we i minim “wokman”). * Oli go long ol yunivesiti no long ol semina blong oli putumap olgeta olsem minista. Buk ya The International Standard Bible Encyclopedia i talem se: “Tok ya ‘putumap’ wan man, plante taem i stap minim wan spesel nem we ol minista no pris oli kasem folem ol kastom blong jos. Ol spesel nem ya oli givim raet long olgeta blong talemaot Tok no blong mekem ol tabu sevis, no blong mekem tufala samting ya tugeta.” ?Hu i putumap ol minista ya? Buk ya The New Encyclopædia Britannica i talem se: “Long ol jos we oli gat man we i holem posisen blong bisop, oltaem, bisop ya nao i putumap wan minista. Long ol Presbiterian jos, wok ya blong putumap wan man i stap long han blong wan grup blong ol minista blong jos [presbytery].”

⁴ Taswe, long ol jos blong Krisendom, wok ya blong minista hem i blong sam man nomo. Be long saed blong ol Witnes blong Jeova, i no olsem. ?From wanem? From we long Kristin kongregesen blong faswan handred yia tu, i no olsem.

?Hu Olgeta We Oli Trufala Minista Blong God?

5. ?Folem wanem we Baebol i talem, hu olgeta we oli mekem wok blong minista?

⁵ Baebol i soemaot se olgeta man we oli wosipim Jeova—long heven mo long wol—oli ol minista. Ol enjel oli mekem wok blong minista long Jisas. (Matiu 4:11; 26:53; Luk 22:43) Mo tu, ol enjel oli “stap mekem ol wok blong God [no “oli minista,” NW]. Hem i stap sanem olgeta blong oli kam givhan long ol man ya we bambae i sevem olgeta.” (Hibrus 1:14; Matiu 18:10) Jisas hem i wan minista. Hem i se: “Mi mi Pikinini blong Man, be mi mi no kam blong bambae ol man oli mekem wok blong mi [no “oli minista long mi,” NW]. Mi mi kam blong mekem wok blong [no “minista long,” NW] olgeta.” (Matiu 20:28; Rom 15:8) Taswe, from we ol man blong Jisas oli mas ‘biaen long hem,’ yumi no sapraes we olgeta tu oli mas mekem wok blong minista.—1 Pita 2:21.

6. ?Olsem wanem Jisas i soemaot se ol disaepol blong hem oli mas mekem wok blong minista?

⁶ Smoltaem bifo we Jisas i gobak long heven, hem i talem long ol disaepol blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Ol disaepol blong Jisas oli mas man blong mekem disaepol—oli ol minista. Biaen, ol niufala disaepol ya tu oli mas lanem blong folem olgeta tok ya we Jisas i talem, olsem oda ya blong go mekem narafala disaepol bakegen. Wan trufala disaepol blong Jisas Kraes bambae i stap olsem wan minista, nomata sipos hem i wan man no wan woman, wan bigman no wan pikinini.—Joel 2:28, 29.

7, 8. (a) ?Wanem vas blong Baebol i soemaot se olgeta trufala Kristin oli minista? (b) ?Wanem sam kwestin we oli stanap long saed blong fasin ya blong putumap man?

⁷ Stret folem tok ya, long dei blong Pentekos 33 K.T., olgeta disaepol blong Jisas we oli stap wanples, ol man mo woman tu, oli joen long wok ya blong talemaot “ol bigbigfala wok ya we God i mekem.” (Ol Wok 2:1-11) Mo tu, aposol Pol i raetem se: “Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” (Rom 10:10) Pol i no talem ol tok ya long wan spesel grup blong man we oli lida blong kongregesen. No gat. Hem i toktok long ‘olgeta long Rom, we God i lavem olgeta.’ (Rom 1:1, 7) Long sem fasin, olgeta ‘Kristin man long Efesas, we oli joen long Jisas Kraes,’ oli mas ‘talemaot gud nius blong pis. Hemia i olsem but blong olgeta blong wokbaot.’ (Efesas 1:1; 6:15) Mo olgeta we oli harem leta we  Pol i sanem i go long ol man Hibru oli mas ‘holemtaet fasin ya we oli talemaot finis se i fasin blong olgeta, we olgeta i putum tingting blong olgeta i stap strong long God.’—Hibrus 10:23.

⁸ ?Be, wetaem wan man i save kam wan minista? ?Wetaem nao i stret blong putumap wan man olsem? ?Mo hu i putumap man ya?

Putumap Man Olsem Minista—?Wetaem?

9. ?Wetaem Jisas i kam wan minista, mo hu i putumap hem?

⁹ Blong save wetaem wan man i save kam wan minista mo hu ya i putumap man ya, tingbaot eksampol blong Jisas Kraes. Hem i no gat wan stefeket blong soem se oli putumap hem no wan pepa we i pruvum se hem i wan minista, mo i no wan man we i putumap hem. ?Taswe, from wanem yumi save talem se hem i rili wan minista? From we ol tok blong Aesea we tabu spirit i pusum hem blong raetem, oli kamtru long Jisas: “Hae God i jusumaot mi, mo paoa blong Spirit blong hem i kam fulap long mi blong mi talemaot gud nius.” (Luk 4:17-19; Aesea 61:1) Ol tok ya oli soemaot klia se Jisas i kasem oda ya blong talemaot gud nius. ?Hu i givim oda ya? I klia se Jeova God nao i putumap Jisas blong mekem wok ya, from we spirit blong Jeova i kam fulap long hem. ?Samting ya i hapen wetaem? Spirit blong Jeova i kamdaon long Jisas taem hem i tekem baptaes. (Luk 3:21, 22) Taswe, Jeova i putumap Jisas long taem blong baptaes blong hem.

10. ?Hu i makem sipos wan Kristin minista “i naf” blong mekem wok ya?

¹⁰ ?Olsem wanem long ol man blong Jisas long faswan handred yia? Olgeta tu oli kam minista from we Jeova i givim wok ya long olgeta. Pol i talem se: “Mifala i naf from we God i mekem mifala i naf. Hem nao i mekem mifala i naf blong kam minista blong niufala kontrak.” (2 Korin 3:5, 6, NW) ?Olsem wanem Jeova i mekem ol man ya we oli wosipim hem oli naf blong kam ol minista? Tingbaot eksampol blong Timoti, we Pol i singaot hem se ‘man blong wok blong God, [no “minista blong God,” NW] mo i stap talemaot gud nius blong Kraes.’—1 Tesalonaeka 3:2.

11, 12. ?Olsem wanem Timoti i gru go kasem mak ya we hem i kam wan minista?

¹¹ Ol tok ya biaen, we oli go long Timoti, oli halpem yumi blong kasem save olsem wanem hem i kam wan minista: “Yu yu mas holemstrong ol samting ya we mifala i tijim yu long hem bifo, mo we yu bilif gud long hem finis, from we yu savegud ol man we oli tijim yu. Mo yu save tu we taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, mo i save lidim yu blong yu save stanap strong long bilif blong yu long Jisas Kraes, blong God i save sevem yu.” (2 Timoti 3:14, 15) Stamba blong bilif blong Timoti we i pulum hem blong prij, hemia save long saed blong Baebol. ?Be Timoti i ridim Baebol nomo blong kam wan man olsem? No gat. Timoti i nidim narafala blong halpem hem taem hem i rid, blong kasem  stret save mo fasin blong luksave ol samting long saed blong spirit. (Kolosi 1:9) Taswe, Timoti i bilif from we narafala ‘i tijim hem.’ From we hem i save Baebol finis ‘taem hem i pikinini yet,’ i sua se ol faswan tija blong hem hemia mama mo bubu blong hem, from we i luk olsem se papa blong hem i no man blong bilif.—2 Timoti 1:5.

¹² Be i gat narafala samting bakegen we i mekem se Timoti i naf blong kam wan minista. Wan long ol samting ya hemia se, bilif blong hem i kam strong moa taem hem i joen wetem ol Kristin we oli stap long ol kongregesen klosap long hem. ?Olsem wanem yumi save samting ya? From we, taem Pol i mitim Timoti fastaem, ‘ol brata blong hem long Listra mo Ikoniam oli stap talem se Timoti i wan gudfala man.’ (Ol Wok 16:2) Mo tu, long taem ya i gat sam brata we oli stap raetem leta i go long ol kongregesen blong mekem olgeta oli kam strong moa. Mo i gat ol elda we oli stap visitim ol kongregesen ya blong mekem bilif blong olgeta i stap strong. Olgeta samting ya oli halpem ol Kristin olsem Timoti blong gru long saed blong spirit.—Ol Wok 15:22-32; 1 Pita 1:1.

13. ?Wetaem Timoti i kam wan minista, mo from wanem yumi talem se long taem ya hem i gohed yet blong gru long saed blong spirit?

¹³ Taem yumi folem oda blong Jisas we i stap long Matiu 28:19, 20, yumi sua se samtaem long laef blong Timoti, bilif i bin pusum hem blong folem Jisas mo tekem baptaes. (Matiu 3:15-17; Hibrus 10:5-9) Hemia wan saen we i soemaot se Timoti i givim ful laef blong hem i go long God. Taem Timoti i baptaes hem i kam wan minista. Stat long taem ya i go, laef blong hem, paoa blong hem, mo evri samting we hem i gat, oli blong God. Hemia wan impoten haf blong wosip blong hem, hemia “wan tabu wok.” Be, Timoti i no spel mo harem gud from we hem i kasem mak ya finis blong minista. No gat. Hem i gohed blong gru mo hem i kam wan Kristin minista we i bigman long saed blong spirit. Samting ya i hapen from we Timoti i joen oltaem wetem ol Kristin we oli bigman long saed blong spirit, olsem Pol. Mo tu, Timoti i mekem prapa stadi blong hem, mo i strong blong joen long wok blong prij.—1 Timoti 4:14; 2 Timoti 2:2; Hibrus 6:1.

14. ?Tede, olsem wanem wan man we “i stret blong kasem laef blong olwe” i save kasem mak blong kam wan minista?

¹⁴ Tede, yumi folem sem fasin blong putumap wan man long Kristin minista wok. Wan man we i stret “blong kasem laef ya we i no save finis” i mas stadi long Baebol blong lanem moa long saed blong God mo ol stamba tingting blong hem. (Ol Wok 13:48) Man ya i lanem blong mekem ol rul blong Baebol oli wok long laef blong hem mo blong prea long God long fasin we i gat mining. (Ol Sam 1:1-3; Ol Proveb 2:1-9; 1 Tesalonaeka 5:17, 18) Hem i joen wetem ol narafala man blong bilif mo i folem olgeta plan we oli kamaot long “slef we i stret mo waes.” (Matiu 24:45-47, NW; Ol Proveb 13:20; Hibrus 10:23-25) Long rod ya hem i stap gru folem wan program blong edukesen.

15. ?Wanem i hapen taem wan man i tekem baptaes? (Lukluk futnot.)

¹⁵ Taem Baebol studen ya i gat moa lav long Jeova God mo bilif blong hem long ransom sakrefaes i kam strong moa, bambae hem i wantem givim laef blong hem fulwan i go long Papa blong hem long heven. (Jon 14:1) Hem i givim laef blong hem i go long God tru long wan prea we hem wan i mekem mo biaen hem i tekem baptaes long fored blong olgeta man blong soemaot disisen ya we hem i bin tekem finis hem wan. Baptaes blong hem i olsem seremoni we i putumap hem olsem wan minista, from we long taem ya nao olgeta man oli luksave hem olsem wan trufala man blong wok blong God, no wan di·aʹko·nos. Hem i mas stap longwe long ol fasin blong wol. (Jon 17:16; Jemes 4:4) Hem i givim laef blong hem fulwan  olsem wan “sakrefaes we i laef mo i tabu, mo we God i glad blong tekem.” Hem i no holembak wan samting we hem i save givim i go long God, mo hem i no wet blong kasem wan samting taem hem i mekem ol wok blong God. (Rom 12:1) * Hem i minista blong God, folem fasin blong Kraes.

?Kristin Minista Wok i Minim Wanem?

16. ?Wanem sam long ol wok we Timoti i mas mekem olsem wan minista?

¹⁶ ?Timoti i mekem wanem long minista wok blong hem? From we hem i wokbaot wetem Pol long ol trep blong hem, hem i gat sam spesel wok blong mekem. Mo taem Timoti i kam wan elda, hem i wokhad blong tijim ol Kristin brata blong hem mo mekem oli kam strong moa. Be, olsem Jisas mo Pol, impoten haf long minista wok blong Timoti, hemia wok blong talemaot gud nius mo mekem disaepol. (Matiu 4:23; 1 Korin 3:5) Pol i talem long Timoti se: “Oltaem, nomata wanem samting i kamtru long laef blong yu, be tingting blong yu i mas klia gud. Sipos yu stap harem nogud, be yu mas mekem tingting blong yu i strong. Yu mas mekem wok ya blong talemaot gud nius blong Kraes, mo yu mas finisim olgeta wok ya we God i givim long yu blong mekem.”—2 Timoti 4:5.

17, 18. (a) ?Lon wanem minista wok we wan Kristin i joen long hem? (b) ?Wok blong prij i impoten olsem wanem long tingting blong wan Kristin minista?

¹⁷ Hemia i sem mak long ol Kristin minista tede. Oli joen long wan wok blong prij we i soem rod blong sef long ol man, tru long sakrefaes blong Jisas. Oli tijim olgeta we oli gat tingting daon se oli mas singaot long nem blong Jeova. (Ol Wok 2:21; 4:10-12; Rom 10:13) Oli yusum Baebol blong pruvum se Kingdom nomo hem i hop blong ol man we oli stap safa. Oli soem se stat naoia ol man oli save gat wan laef we i moagud sipos oli folem ol rul blong God. (Ol Sam 15:1-5; Mak 13:10) Be wan Kristin minista i no prijimaot wan mesej jes blong mekem laef blong ol man i kam moa gud. Be, hem i tijim se sipos man i “stap traehad oltaem blong mekem ol fasin we God i wantem, hemia i gud moa long olgeta laef blong yu. Man we i mekem olsem, fasin ya bambae i givhan long hem long laef ya long wol, mo bakegen, long laef ya we bambae i kamtru biaen.”—1 Timoti 4:8.

¹⁸ I tru se bighaf blong ol Kristin minista oli gat sam narafala wok bakegen we oli mas mekem we i defren long wanwan long olgeta. Plante long olgeta oli gat wok blong lukaot long wan famle. (Efesas 5:21-6:4) Ol elda mo man blong givhan oli gat wok blong mekem insaed long kongregesen. (1 Timoti 3:1, 12, 13; Taetas 1:5; Hibrus 13:7) Plante Kristin oli givhan long wok blong bildim ol Haos Kingdom. Sam oli gat nambawan janis blong wok long wan long ol Betel haos blong Watch Tower Sosaeti. Nating se i olsem wanem, olgeta Kristin minista oli joen long wok blong talemaot gud nius. I no gat wan we i fri blong no mekem wok ya. Fasin blong joen long wok ya nao i makemaot wan man se hem i wan trufala Kristin minista.

Fasin Blong Wan Kristin Minista

19, 20. ?Ol Kristin minista oli mas traehad blong kasem wanem tingting?

¹⁹ Bighaf blong ol minista long Krisendom oli laekem blong kasem wan spesel fasin respek long ol narafala man, mo oli tekem ol taetel olsem “reveren” mo “fata.” Be, wan Kristin minista i save se Jeova nomo i gat raet blong kasem ona ya. (1 Timoti 2:9, 10) I no gat wan Kristin minista we i wantem se narafala i leftemap hem mo i no gat wan we i wantem karem sam spesel taetel. (Matiu 23:8-12) Hem i save se stamba mining blong tok ya di·a·ko·niʹa hemia “mekem wok blong narafala.” Veb we i joen wetem tok ya, samtaem Baebol i yusum blong tokbaot wok we man i mekem blong givhan long narafala, olsem wok long restoron. (Luk 4:39, NW; 17:8, NW; Jon 2:5, NW) Nating se Baebol i yusum semfala tok ya blong tokbaot Kristin minista wok we i moa impoten, wan di·aʹko·nos i karem mining ya yet se man blong mekem wok blong narafala.

²⁰ Taswe, i no gat wan Kristin minista we i gat risen blong tinghae long hem wan. Olgeta trufala Kristin minista—nating sipos oli gat sam spesel wok insaed long kongregesen—oli wok olsem slef we oli gat tingting daon. Jisas i talem se: “Sipos wan long yufala i wantem kam haeman blong yufala, hem i mas kam olsem man blong wok blong yufala [no “minista blong yufala,” NW]. Mo sipos wan long yufala i wantem kam bos blong yufala, hem i mas kam olsem slef nomo blong yufala.” (Matiu 20:26, 27) Taem Jisas i wantem soemaot long ol disaepol wanem stret tingting we oli mas wokem, hem i mekem wan wok we wan slef we i daon olgeta i stap mekem, hemia se hem i wasem leg blong olgeta. (Jon 13:1-15) !Hemia wan wok we i rili soem tingting daon! Taswe, ol Kristin minista oli mekem wok blong Jeova God mo Jisas Kraes wetem tingting daon. (2 Korin 6:4; 11:23) Oli soem tingting we i stap daon taem oli mekem wok blong narafala. Mo taem oli talemaot gud nius blong givhan  long ol man raonabaot long olgeta we oli no gat bilif, oli soem se oli no tingbaot olgeta nomo.—Rom 1:14, 15; Efesas 3:1-7.

Stanap Strong Long Minista Wok

21. ?Olsem wanem Pol i kasem blesing from we hem i stanap strong longtaem long minista wok blong hem?

²¹ Blong mekem minista wok, Pol i nidim fasin blong stanap strong. Hem i talem long ol Kristin long Kolosi se hem i harem nogud long plante samting blong bambae hem i save talemaot gud nius long olgeta. (Kolosi 1:24, 25) Be, from we hem i stanap strong longtaem, plante man oli lesin long gud nius mo oli kam ol minista. Ol man ya oli kam ol pikinini blong God mo ol brata blong Jisas Kraes, we hop blong olgeta i blong kam ol spirit man mo stap wetem hem long heven. !Hemia wan nambawan praes ya from fasin blong stanap strong!

22, 23. (a) ?From wanem ol Kristin minista tede oli nidim fasin blong stanap strong longtaem? (b) ?Wanem nambawan frut i kamaot taem wan Kristin i stanap strong longtaem?

²² Ol trufala minista blong God tede oli nidim fasin blong stanap strong tu. Plante long olgeta ya oli stap harem nogud evri dei from wan sik no from we oli kam olfala. Ol papa mama—we plante long olgeta oli no gat hasban no waef—oli wokhad blong lukaot long ol pikinini blong olgeta. Ol pikinini we oli stap skul yet oli soem strong tingting blong agensem ol nogud fasin we oli stap raonabaot long olgeta. Plante Kristin oli fesem hadtaem long saed blong mane. !Mo plante long olgeta oli harem nogud long trabol we narafala i mekem long olgeta, no from sam narafala hadtaem bakegen we i kamaot from we tede ‘laef long wol ya i kam strong tumas’! (2 Timoti 3:1) Yes, ol minista blong Jeova, we tede namba blong olgeta i klosap sikis milian, oli save talem olsem aposol Pol se: “Long olgeta samting we mifala i mekem, mifala i stap soemaot we mifala i man blong wok blong God [no “minista blong God,” NW]. Mifala i gat trabol, . . . be tingting blong mifala i stap gud, i no foldaon.” (2 Korin 6:4) Ol Kristin minista oli no lego wok blong olgeta. Oli rili nidim we yumi presem olgeta from we oli stanap strong longtaem.

²³ Mo tu, olsem Pol, fasin blong stanap strong longtaem i karem plante gudfala frut. Taem yumi stanap strong yumi holemtaet fasin fren blong yumi wetem Jeova mo yumi mekem hat blong hem i glad. (Ol Proveb 27:11) Yumi mekem bilif blong yumi i kam strong moa mo yumi mekem moa disaepol, ale Kristin famle blong yumi i gohed blong gru. (1 Timoti 4:16) Jeova i sapotem ol minista blong hem mo i blesem minista wok blong olgeta long ol las dei ya. From samting ya, ol laswan memba blong 144,000 man oli hivap finis, mo plante milian moa man oli gat strongfala hop ya blong harem gud olwe long laef long wan paradaes long wol. (Luk 23:43; Revelesen 14:1) Tru ya, Kristin minista wok hem i rili wan wok we i soemaot fasin sore blong Jeova. (2 Korin 4:1) I gud sipos yumi evriwan i tinghae tumas long wok ya mo harem gud from we ol frut blong wok ya bambae oli stap gogo i no save finis.—1 Jon 2:17.

[Ol futnot]

?Yu Yu Save Eksplenem?

• ?Wanem wok we olgeta Kristin long faswan handred yia oli joen long hem?

• ?Wetaem wan Kristin i kam wan minista mo hu i putumap hem?

• ?Wanem tingting we wan Kristin minista i mas wokem?

• ?From wanem wan Kristin minista i mas stanap strong taem hem i fesem hadtaem?

[Kwestin]

[Tok blong pija long pej 17]

Taem Timoti i pikinini yet, hem i kasem tijing long Tok blong God. Hem i kam wan minista taem hem i tekem baptaes

[Tok blong pija long pej 18]

Baptaes i wan saen se yumi givim laef blong yumi i go long God mo i soemaot se yumi kam wan minista

[Tok blong pija long pej 20]

Ol Kristin minista oli rere blong wok