?Prea i Gat Paoa Blong Mekem i Gud?
?Prea i Gat Paoa Blong Mekem i Gud?
KLOSAP evri man i harem samtaem long laef blong olgeta se oli nidim blong prea. Tru ya, klosap evri skul we bilif blong olgeta i no sem mak long narawan, oli gat strong tingting blong prea. Eksampol, plante taem long dei, maet wan Budis i save talem bakegen mo bakegen prea ya se “Bilif blong mi i stap long Amida Buddha.”
Taem yumi tingbaot ol problem we oli stap gohed long olgeta ples long wol, i stret nomo blong askem se: ?Ol man oli tingbaot blong kasem wanem taem oli prea? ?Olgeta prea ya oli gat paoa blong mekem i gud long man?
?From Wanem Ol Man Oli Prea?
Plante man long ol kantri blong Is oli prea long ol bubu blong olgeta we oli ded finis, mo long ol god blong Shinto no Tao. Oli prea blong bambae oli pasem ol eksam long skul, karem gudfala kakae long garen, no blong blokem ol sik. Ol Budis oli hop blong kam fri long fasin safa taem oli traehad blong prea oltaem. Ol Hindu oli strong blong prea long ol man god mo ol woman god we oli laekem, blong oli givim save, plante mane, mo blong oli lukaotgud long olgeta.
Sam Katolik oli hop blong givhan long ol man taem oli givim ful laef blong olgeta olsem ol pris no ol sista blong jos we oli stap long ol spesel haos no ol tabu ples longwe long ol man, blong prea oltaem. Plante milian Katolik oli talem bakegen mo bakegen ol prea long Meri we oli lanem baehat, blong askem samting long hem, mo maet oli yusum ol bidbid blong mekem olsem. Long ol kantri blong Esia, plante man oli yusum ol wil we oli mas tantanem taem oli talem ol prea blong olgeta. Ol Protestan oli talem bakegen mo bakegen ol tok blong Prea blong Masta, nating se oli prea tu blong talemaot
filing blong olgeta long God. Plante man Jiu oli mekem longfala trep blong go prea long Stonwol blong Wes, long Jerusalem. Oli hop se haos wosip bambae i stanap bakegen mo wan niufala laef i kam we ol man bambae oli save gat plante samting mo pis.Nating se plante man oli traehad blong prea oltaem, laef blong olgeta i fulap wetem ol problem olsem fasin pua, oli kalabus long ol nogud fasin, famle i seraot, i gat fasin blong brekem loa, mo ol faet. ?Olsem wanem? ?Ol man ya oli no stap prea long rod we i stret? ?I tru se i gat wan man we i stap harem ol prea?
?I Gat Wan Man We i Harem Ol Prea?
Ol prea oli no rili save mekem wan gudfala samting long man sipos i no gat wan man we i harem ol prea ya. Taem wan man i stap prea, hem i bilif se wan man we i stap long ples blong ol spirit man i stap harem hem. Be ol prea oli no olsem wan saon blong voes nomo we i pas i go long man we i stap harem ol prea ya. Plante man oli bilif se i gat wan man we i save ridim tingting blong man we i prea. ?Be hu man ya we i save mekem olsem?
Ol man we oli mekem dip stadi oli no kasem save olsem wanem nao ol tingting oli stat insaed long ol bilian nev sel we oli stap long haf ya blong bren we oli kolem cerebral cortex. Nating se i olsem, i stret nomo blong ting se Jeova God, Man ya We i Wokem bren, hem i save luk olgeta tingting. Man i no naf blong mekem olsem, Man ya We i Wokem yumi, hemia Jeova God, hem nomo i naf. (Ol Sam 83:18; Revelesen 4:11) Evri prea i mas go long hem. ?Be Jeova i stap lesin long olgeta prea we ol man oli mekem?
?God i Harem Olgeta Prea?
King Deved we i wan man blong Isrel bifo, hem i prea oltaem. God i mekem hem i wan nambawan man blong raetem ol singsing. Hem i singsing se: “From we oltaem, yu yu stap ansa long ol prea blong mifala. Olgeta man long evri ples bambae oli mas kam long yu.” (Ol Sam 65:2) Jeova i naf blong kasem save long olgeta prea we oli kamaot long enikaen lanwis we man i toktok long hem. From we tingting blong man i no naf blong holem plante save wantaem, samting ya i no minim se God i no save lesin long olgeta we oli prea long hem long wan fasin we i stret.
Nating se i olsem, Jisas Kraes—we hem i wan man blong prea tu—i soemaot se i no olgeta prea we God i glad long olgeta. Makem wanem we Jisas i talem long saed blong fasin ya we plante man oli mekem long taem blong hem, hemia blong talem bakegen mo bakegen ol prea we oli lanem baehat. Folem tok blong Jerusalem Bible blong Katolik skul, Jisas i talem se: “Taem yufala i prea, i nogud yufala i stap talem ol sem toktok bakegen mo bakegen olsem we ol hiten man oli stap mekem. Ol hiten man ya oli ting se taem ol talem plante toktok nao ol god blong olgeta bambae oli save harem olgeta.” (Matiu 6:7) Yumi neva mas ting se Jeova bambae i save lesin long ol prea we oli no soemaot ol trufala filing blong yumi.
Wan waestok long Baebol i soemaot klia from wanem God i no glad long sam prea, hem i se: “Sipos yu no obei long ol loa blong Hae God, hem bambae i no save lesin nating long ol prea blong yu, bambae i tanem baksaed long yu.” (Ol Proveb 28:9) Wan narafala waestok i talem se: “Taem ol gudfala man oli prea, Hae God i stap harem olgeta, be hem i stap tanem baksaed long ol man nogud.” (Ol Proveb 15:29) Long wan taem we ol man Juda oli mekem wan bigfala sin, Jeova i talemaot se: “Sipos yufala i leftemap han blong yufala, yufala i prea long mi, bambae mi mi tanem fes blong mi. Nating we yufala i stap mekem plante prea, be bambae mi no save lesin, from we han blong yufala i fulap long blad blong man.”—Aesea 1:1, 15.
Aposol Pita i tokbaot wan narafala samting we i save mekem se God i no akseptem prea blong wan man. Pita i raetem se: “Mo long sem fasin, yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala. Yufala i mas mekem olsem blong bambae i no gat samting we i save blokem ol prea blong yufala.” (1 Pita 3:7) !Man we i ting nating long ol advaes ya, God i no save harem ol prea we hem i mekem!
I klia se, i gat sam samting we man i mas mekem sipos hem i wantem se God i harem ol prea blong hem. Be, plante man we oli prea oli no stap tingbaot blong mekem samting we God i wantem yumi blong mekem. Taswe wol i no save kam wan gudfala ples, nating se plante man oli gat strong tingting blong prea from wol ya.
?Wanem samting nao we God i wantem blong yumi mekem blong hem i save harem ol prea blong yumi? Ansa i joen wetem risen blong prea. I tru, sipos yumi wantem save se olgeta prea oli gat paoa blong mekem i gud long man no nogat, yumi mas kasem save stamba risen blong prea. ?From wanem Jeova i wokem rod blong yumi save toktok wetem hem?
[Tok blong pija long pej 3]
G.P.O., Jerusalem