Yumi Save Lanem Sam Samting Long Faswan Man Mo Woman

GOD i luklukgud Wol ya. Hem i stap rerem wol ya blong ol man oli laef long hem. Hem i luk se evri samting we hem i wokem oli gud. Yes, taem wok ya i finis, hem i talemaot se i “gud tumas (NW).” (Jenesis 1:12, 18, 21, 25, 31) Be bifo we hem i talemaot nambawan toktok ya, hem i tokbaot wan samting we i “nogud.” I tru se, God i neva mekem wan samting we i no stretgud olgeta. Hemia nomo se ol samting we hem i wokem oli no finis gud yet. Jeova i talem se: “I nogud we man ya i stap hem wan. I moa gud mi mekem wan fren blong hem we i olsem hem, blong i givhan long hem.”—Jenesis 2:18.

Hem i stamba tingting blong Jeova se olgeta man oli haremgud blong olwe, oli gat gudfala helt, oli glad, mo oli gat plante samting long wan wol we i wan paradaes. Papa blong olgeta man hemia Adam. Woman blong hem, Iv, i kam “mama blong olgeta man we i laef.” (Jenesis 3:20) Nating se naoia wol i fulapgud wetem plante bilian pikinini blong tufala, ol man oli no stretgud nating.

 Plante man oli savegud stori blong Adam mo Iv. ?Be olsem wanem stori ya i save givhan long laef blong yumi? ?Yumi save lanem wanem long ol samting we i kamaot long laef blong faswan man mo woman?

“Hem i Wokem Tufala, Man Mo Woman”

Taem Adam i stap givim nem long ol anamol, hem i luk we olgeta evriwan oli gat wan fren blong olgeta mo hem i no gat. Taswe taem Adam i luk naesfala woman ya, we Jeova i wokem long rib blong hem, hem i glad tumas. Adam i luksave se woman ya i wan haf blong hem, hem i talemaot se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi. Bambae nem blong hem Woman, from we hem i kamaot long man.”—Jenesis 2:18-23.

Man i nidim wan fren “blong i givhan long hem.” Naoia hem i gat wan fren we i stret long hem. Iv i stretgud blong kam fren blong Adam—blong lukaotgud long garen ya we i hom blong tufala mo ol anamol, blong karem ol pikinini, mo blong storian wetem Adam mo sapotem hem olsem wan trufala fren.—Jenesis 1:26-30.

Jeova i givim evri samting we i stret blong man mo woman ya i wantem. God i stanemap fasin blong mared mo famle we olgeta man oli mas folem, taem hem i karem Iv i kam long hasban blong hem. Long rod ya hem i joenem tufala wanples long fasin we i tabu. Stori we i stap long Jenesis i talem se: “Man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” Jeova i blesem faswan man mo woman we tufala i mared mo hem i talem long tufala blong gat plante pikinini. I klia se hem i wantem we evri pikinini oli mas bon insaed long wan famle we i kea long olgeta, wetem wan papa mo wan mama blong lukaot long olgeta.—Jenesis 1:28; 2:24.

“Long Pija Blong God”

Adam i wan pikinini blong God we i stretgud, we God i mekem long ‘pija blong Hem mo i karem fasin (NW)’ blong Hem. Be from we “God, hem i Spirit” man i no sem mak olsem hem long saed blong bodi. (Jenesis 1:26; Jon 4:24) Man i pija blong God from we hem i karem ol fasin blong Hem, we i mekem se man i hae moa long anamol. Yes, taem God i wokem man, hem i putum ol fasin insaed long man olsem lav, waes, paoa, mo stret fasin. God i givim fasin fri long hem blong jus, mo blong hem i naf blong kasem save ol samting long saed blong spirit. God i wokem man ya wetem wan tingting we i save jajem hem, mekem se hem i naf blong jusum wanem fasin i gud mo wanem i nogud. Man i naf blong kasem save, blong tingting dip long stamba risen from wanem ol man oli stap laef, blong kasem moa save long saed blong Man We i Wokem hem, mo blong frengud wetem Man ya. Taswe, Adam i gat evri samting we hem i nidim, blong mekem wok blong hem olsem man blong lukaot long nambawan wol ya we God i wokem.

Iv i Mekem Sin

I klia se, kwiktaem nomo Adam i talemaot long Iv tabu ya we Jeova i putumap: Tufala i save kakae frut blong olgeta tri long garen blong tufala be i gat wan nomo—tri ya blong save wanem i gud mo wanem i nogud. Tufala i no mas kakae long hem. Sipos tufala i mekem olsem, long dei ya nomo bambae tufala i ded.—Jenesis 2:16, 17.

I no longtaem, wan kwestin i stanap long saed blong frut ya we God i putum tabu long hem. Wan spirit we man i no save luk i yusum wan snek blong askem kwestin long Iv. Snek ya i mekem olsem se i no gat wan samting i rong mo i askem long Iv se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Iv i talem se i oraet blong kakae frut blong evri tri be i gat wan nomo we oli no mas kakae. Be biaen snek ya i talem wan samting long woman ya we i agensem tok blong God se: “No, hemia i no tru ya. Yutufala i no save ded. Hem i talem olsem from we i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.” Naoia tingting we woman ya i gat long saed blong tri ya i jenis: “Tri ya i gud tumas . . . frut blong hem tu i gud blong kakae, mo hem i wantem tumas blong kasem waes ya we frut ya i save givim long hem.” Snek ya i trikim gud Iv, nao hem i brekem loa blong God.—Jenesis 3:1-6; 1 Timoti 2:14.

?Iv i no naf blong blokem sin ya? !Yes, hem i naf! Putum yu wan long ples blong hem. Samting we snek ya i talem i defren olgeta long wanem we God mo Adam tufala i bin talem. ?Bambae yu harem olsem wanem sipos wan strenja i talem se man we yu lavem mo yu trastem, i man blong giaman? Iv i mas  mekem i defren olgeta, hem i mas soem se hem i no laekem tok ya nating mo i mas kros, mo tu hem i no wantem lesin. Antap moa, snek ya i no gat raet nating blong tok agensem stret fasin blong God mo wanem we hasban blong Iv i talem long hem. Iv i no soem respek nating long rul we God i stanemap, we hasban i hed. Bifo we Iv i mekem enikaen disisen hem i mas askem advaes long hasban blong hem fastaem. Hemia nao samting we yumi mas mekem sipos wan dei yumi kasem sam tok we i go agensem ol advaes we God i givim. Nating se i olsem, Iv i trastem ol tok blong Man ya We i Traem hem, hem i wantem folem prapa tingting blong hem nomo, long saed blong wanem i gud mo wanem i nogud. Moa we hem i tingbaot ol tok ya blong snek, moa naes we ol tok ya i kam long tingting blong hem. !Hem i mekem wan bigfala mastik blong holemtaet wan rong tingting, mo i no sakemaot rong tingting ya no i no tokbaot samting ya wetem hed blong famle blong hem!—1 Korin 11:3; Jemes 1:14, 15.

Adam i Lesin Long Waef Blong Hem

I no longtaem biaen Iv i pulum Adam blong joen mo mekem sin wetem hem. ?Olsem wanem nao yumi save eksplenem slak tingting blong Adam we i agri long waef blong hem mo i no tok agensem samting ya nating? (Jenesis 3:6, 17) ?Adam i mas jusum blong stap tru long hu? ?Bambae hem i obei long Man We i Wokem hem, we i givim evri samting long hem, olsem waef blong hem Iv we hem i laekem tumas? ?Bambae Adam i lukaot help blong God long samting we hem i mas mekem naoia? ?No bambae hem i mekem disisen blong joen wetem waef blong hem? Adam i savegud se samting we Iv i hop blong kasem taem hem i kakae tabu frut ya, i neva save hapen. Tingting ya nao i pusum aposol Pol blong raetem se: “I no Adam we Setan i trikim hem bifo, be Iv ya, nao hem i brekem loa blong God.” (1 Timoti 2:14) Taswe Adam i jusum blong agensem Jeova. I klia se hem i fraet moa blong seraot long waef blong hem i bitim we hem i bilif se God nao i naf blong stretem problem ya.

I olsem we Adam i kilim hem wan i ded taem hem i mekem samting ya. Mo tu i olsem we hem i kilim i ded olgeta pikinini we bambae oli kamaot biaen long hem, we long fasin sore Jeova i letem Adam i kam papa blong olgeta. Nao from we olgeta evriwan oli bon wetem sin, oli mas ded. (Rom 5: 12) !Yes tufala i tingbaot tufala nomo, nao tufala i lusum wan nambawan samting from fasin blong no obei!

Ol Frut We Oli Kamaot From Sin

Fasin sem, hemia nao faswan frut we i kamaot from sin. Man mo woman blong hem, tufala i no glad blong ron i go blong toktok long Jeova. Tufala i haed blong hem i no luk tufala. (Jenesis 3:8) Tufala i spolem fasin fren we tufala i gat wetem God. Taem God i askem wanem nao tufala i bin mekem, tufala i no soem sore, nating se tufala i save se tufala i bin brekem loa blong God. Tufala i tanem baksaed long ol gudgudfala fasin blong God, taem tufala i kakae frut ya.

From samting ya, God i talem se bambae woman ya i harem i soa moa taem hem i bonem pikinini. Iv bambae i wantem hasban blong hem tumas, mo man ya bambae i bos long hem. Frut we i kamaot from Iv i no dipen long God, i defren olgeta long wanem we snek i talem. Naoia Adam bambae i wokhad long graon blong kasem kakae. Hem i mas wok strong blong kasem ol samting we hem i nidim long laef blong hem. Long Iden hem i no hadwok from kakae blong hem nating. Bambae i mas olsem gogo kasem we hem i gobak bakegen long graon ya, we God i yusum blong wokem hem fastaem.—Jenesis 3:16-19.

Nao, God i putumaot Adam mo Iv long garen blong Iden. Jeova i talem se: “Naoia, man ya i kam olsem wan long yumi, from we hem i save ol fasin we i nogud mo ol fasin we i gud. Naoia, yumi mas blokem hem blong i no kakae frut blong tri ya we i save givim laef. Sipos hem i kakae frut ya, bambae i no save ded samtaem . . .” Wan tija, Gordon Wenham, we i stadi long saed blong ol jos i makem se: “Ol tok ya oli no finis gud.” Yumi mas ademap narafala haf long tingting blong God—maet wetem ol tok olsem, “bambae mi sakemaot hem long garen ya.” Plante taem, wan man blong raetem Baebol i talem fulwan tingting blong God long saed blong wan samting. Be long ples ya, Wenham i gohed i se: “From we tok ya i no finis gud hem i soemaot se aksin blong God i hareap. Hem i no finisim gud toktok blong hem bifo we hem i sanemaot tufala long garen ya.” (Jenesis 3:22, 23) Nao, i luk olsem fasin fren bitwin Jeova mo faswan man mo woman ya i finis.

Adam mo Iv tufala i no ded long sem dei ya. Be, tufala i ded long saed blong spirit. Tufala i stap longwe long Stamba blong laef mo i no moa gat rod blong kambak long Hem. Sloslou bodi blong tufala i kam olfala go kasem we tufala i ded. !Tingbaot se tufala i harem nogud taem tufala i fesem faswan ekspiriens blong ded taem we faswan boe blong tufala i kilim i ded namba tu boe blong tufala, Ebel!—Jenesis 4:1-16.

Biaen long taem ya, i no gat plante samting we yumi save long saed blong faswan man mo woman ya. Namba tri pikinini blong tufala, Set, i bon taem Adam i gat 130 yia blong hem. Adam i ded 800 yia biaen, taem hem i gat 930 yia. Hemia afta we “hem i bonem ol narafala pikinini bakegen, sam we i boe mo sam we i gel.”—Jenesis 4:25; 5:3-5.

Wan Lesen Blong Yumi

Stori blong faswan man mo woman i soemaot klia stamba risen we i mekem se laef blong man i kam nogud tede, mo tu, stori ya i tijim yumi wan impoten lesen. Enikaen fasin blong no wantem dipen long God i krangke nomo. Olgeta we oli rili waes oli bilif long Jeova mo Tok blong hem, i no long prapa save blong olgeta we oli ting se i naf. Jeova nomo i save talem wanem samting i gud mo wanem i nogud. Mo impoten samting, hemia blong obei long hem. Man we i brekem ol loa blong God mo i ting nating long ol rul blong hem, hem i mekem fasin we i nogud.

God nao i save givim mo i gohed blong promes blong givim olgeta samting we man i wantem—laef we i no save finis, fasin fri, haremgud, glad, gudfala helt, pis, kasem plante samting, mo faenemaot ol niufala samting. Be blong haremgud long olgeta samting ya, yumi mas luksave se yumi dipen fulwan long Jeova, Papa blong yumi long heven.—Prija 3:10-13; Aesea 55:6-13.

[Bokis/Foto blong pija long pej 26]

Adam Mo Iv—?Kastom Stori Nomo?

Ol man Babilon, Asiria, Ijip, mo ol man blong sam narafala kantri tu oli bilif long wan paradaes we i lus from sin. I gat plante stori we oli tokbaot wan tri blong laef, we frut blong hem i save givim laef we i no save finis long olgeta we oli kakae long frut ya. Yes, ol man oli rimemba se wan samting nogud i hapen long Iden.

Tede, plante man oli talem se stori blong Baebol long saed blong Adam mo Iv i wan kastom stori nomo. Nating se i olsem, plante sayentis oli luksave se olgeta man long wol oli wan famle nomo, oli gat wan stamba we i sem mak. Plante man we oli stadi long saed blong ol skul oli faenem i hadwok blong agensem poen ya se, frut we i kamaot from faswan sin we bubu blong yumi nao i mekem i kasem olgeta man. Bilif ya se man i kamaot long plante stamba bambae i fosem ol man blong talem se faswan sin i kamaot long plante papa. Biaen, samting ya bambae i pusum olgeta blong no bilif se Kraes, we i “las Adam,” i sevem ol man. Be Jisas wetem ol man blong hem oli no fesem problem ya. Oli luksave se stori ya we i stap long Jenesis i rili tru.—1 Korin 15:22, 45; Jenesis 1:27; 2:24; Matiu 19:4, 5; Rom 5:12-19.