Baebol Wan Buk Blong Lidim Laef Blong Man

“TOK blong God i wan samting we i laef, mo i stap wok, mo i sap we i sap, i winim naef blong faet ya we i sap tu saed, . . . [mo] i save jajem olgeta tingting blong man, mo ol samting we man i wantem long tingting blong hem.” (Hibrus 4:​12) I sua se toktok ya we i eksplenem samting we Tok blong God i save mekem, i soemaot wan samting we i defren long saed blong Baebol. Hemia se, hem i no jes wan gudfala buk nomo.

Wan man blong skul i raetem long sot tok nomo se: “Mesej blong hem i impoten long laef blong yumi olsem we fasin blong pulum win i givhan long yumi blong stap laef.” Biaen hem i gohed i se: “Tede, yumi wantem tumas mo yumi nidim wan samting blong mekem yumi haremgud. Taem yumi tingbaot samting ya, mo yumi ridim Baebol bambae yu sapraes blong luk ol frut we oli kamaot biaen.” Olsem wan laet we i saenaot klia, Baebol i givim ol klia ansa long plante bigfala kwestin we i fasfas long saed blong laef naoia.​—⁠Ol Sam 119⁠:105.

Tru ya, waes we i stanap long Baebol i gat paoa blong jenisim tingting blong yumi, hem i save halpem yumi blong winim ol problem, mekem laef blong yumi i kam moa gud, mo mekem yumi naf blong fesem ol problem ya we yumi no save jenisim. Samting we i moa impoten se, Baebol i givhan long yumi blong save God mo blong lavem hem.

Wan Buk We i Givim Risen Blong Ol Samting

Bigfala man blong raetem Baebol, Jeova God, i ‘save olgeta samting we yumi stap mekem.’ Hem i save gud ol samting we yumi nidim long saed blong bodi, filing, mo spirit, i bitim wanem we yumi save. (Ol Sam 139:​1-3) Hem i tingtinggud taem hem i putum mak long ol fasin we man i no mas bitim. (Maeka 6⁠:⁠8) I waes blong traem kasem save ol mak mo ol rul ya we oli blong lidim yumi mo lanem blong folem olgeta long laef blong yumi. Man blong raetem Sam i talem se, man we i “glad blong folem Loa blong Hae God,” hem i save harem gud. Hem i “stap win long evri samting we [hem] i stap mekem.” (Ol Sam 1:​1-3) I sua se blesing olsem i save kamaot sipos yumi stadi long Baebol.

Maurice, wan skul tija we i ritae finis, i bilif oltaem se Baebol i gat sam impoten samting long saed blong histri mo ol toktok. Nating se i olsem, hem i no bilif se God nao i pusum ol man blong raetem buk ya. Nao taem Maurice i harem mo i kasem save from wanem God i givim Tok blong hem long ol man, hem i stat skelem ol profet tok blong Baebol. Taem hem i yang yet, hem i bin stadi long saed blong histri, olsem wanem blong raetem ol buk, sayens, mo ol ples. Hem i talem se hem i bin stanap long prapa waes blong hem, mekem se hem i no luksave ol eksampol we oli pruvum se Baebol i wan buk we man i save trastem. “Mi fas long trap ya blong ronem wan gudfala laef, ol rij samting, mo ol samting blong haremgud long laef. Sore tumas we mi  no gat save mo mi no bin luksave tu, se nambawan buk ya i sas tumas mo i tru moa i winim eni narafala buk we man i bin raetem samtaem.”

Naoia we Maurice i gat bitim 70 yia, hem i tingbaot storian blong Jisas taem hem i bin kamtru long aposol Tomas, mo Maurice i talem wetem fasin tangkiu se: “Han blong mi i tajem ‘kil ya we blad i stap ron long hem’ mekem se naoia mi bilif fulwan se Baebol i buk blong trutok.” (Jon 20⁠:​24-29) I stret nomo blong aposol Pol i talem se, Baebol i soemaot klia ol samting we i stap long hat, mo i givim mining long laef. I tru tumas se hem i wan buk blong lidim laef blong man.

Kasem Paoa Blong Fesem Wan Laef We i Trabol

Baebol i givim advaes tu blong halpem ol man blong oli lego ol nogud fasin blong olgeta. Daniel i winim doti fasin ya blong smok, mo tu blong no joen long ol lafet we oli wael olgeta mo blong dring alkol bitim mak. (Rom 13⁠:13; 2 Korin 7⁠:1; Galesia 5:​19-​21) I tru tumas se i nidim strong tingting blong sakemaot ol fasin olsem mo blong “putum niufala fasin blong laef.” (Efesas 4:​22-​24, NW ) Daniel i talem se: “Hemia wan bigfala faet long mi, from we yumi sinman.” Nating se i olsem, hem i winim faet ya. Naoia Daniel i ridim tok blong God evri dei, mo samting ya i mekem se hem i stap klosap long Jeova.

Taem Daniel i stap gruap, oltaem hem i respektem Baebol​—⁠nating se hem i neva ridim​—⁠mo hem i prea long God evri naet. Be i gat wan samting we hem i mestem. Hem i no glad. Nao wan bigfala jenis i kamaot taem we, long fastaem long laef blong hem, hem i luk nem blong God long Baebol. (Eksodas 6⁠:3; Ol Sam 83⁠:18) Biaen long taem ya, hem i yusum nem blong Jeova taem hem i prea, mo hem i harem se hem i kam klosap moa long God taem hem i prea. Hem i se: “Jeova i kam olsem wan man we i klosap moa long mi i winim ol narafala man, mo hem i stap yet olsem wan gudfala fren blong mi.”

Taem Daniel i no stadi long Baebol yet, tingting we hem i gat long saed blong fiuja i no klia nating. Hem i talem se: “I no nidim bigfala save blong luk se wol i stap kam moa nogud. Mi mi fraet, mo mi traem blong wok oltaem blong no tingbaot samting ya.” Biaen hem i lanem se God bambae i stanemap stret fasin blong olgeta man long wan wol we i klin, long wol ya ol man we oli obei bambae oli save haremgud long pis mo glad blong olwe. (Ol Sam 37⁠:​10, 11; Daniel 2:​44; Revelesen 21:​3, 4) Naoia Daniel i gat wan hop we i sua gud. Paoa blong Baebol i givhan long hem mekem se hem i naf blong holem wan gudfala tingting long saed blong fiuja.

Help Blong Winim Ol Problem Long Saed Blong Filing

George i gat seven yia nomo taem mama blong hem i ded. Hem i fraet tumas blong slip long naet, from we hem i no save sipos bambae hem i girap long nekis dei. Biaen hem i ridim wanem we Jisas i talem long saed blong ded mo laef bakegen, se: “I gat taem i stap kam we ol dedman bambae oli harem voes blong mi [Jisas], nao bambae oli aot long beregraon blong olgeta.” Mo tu, ol tok blong Jisas i kasem hat blong hem, se: “Jisas i talem long hem se, ‘Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.’ ” (Jon 5:​28, 29; 11⁠:25) George i harem se ol tingting ya oli no bitim mak, oli stret, mo oli leftemap tingting. George i talem se: “Trutok ya, i no pulum tingting nomo be i tajem hat tu.”

Daniel, we yumi tokbaot bifo, hem tu i stap fraet. Mama blong Daniel i no naf blong lukaot Daniel hem wan. Taswe hem i sanem Daniel i go laef long plante defren haos blong ol pikinini we oli no gat papa mama. Hem i harem olsem se hem i wan strenja nomo long ol haos ya, mo hem i wantem tumas blong stap sef insaed long wan famle we i soem lav long hem. I no longtaem, taem hem i stadi Baebol, hem i faenem wanem we hem i stap lukaot. Daniel i joen wetem Kristin kongregesen blong ol Witnes blong Jeova mo hem i kam haf blong wan famle long saed blong spirit. Long ples ya hem i haremsave se ol narafala oli glad mo oli lavem hem. Tru ya, Baebol i karem blesing i kam long laef from we ol tok blong hem oli wokgud mo oli mekem man i haremgud long ol filing blong hem.

Rimemba se, Jeova i stap lukluk wanem i stap insaed long hat blong yumi mo hem i save wanem  we yumi stap lukaot. God i stap “skelem ol tingting blong yu,” mo hem i givim long wanwan man “stret long mak blong laef blong hem.”​—⁠Ol Proveb 21⁠:2; Jeremaea 17⁠:⁠10.

Nambawan Advaes Long Saed Blong Famle Laef

Baebol i givim ol advaes we i wokgud long saed blong fasin fren bitwin ol man. George i talem se: “Fasin blong agiu no fasin blong raorao oli samting we i givim hadtaem long laef mo mekem man i harem nogud tumas.” ?Olsem wanem hem i winim ol samting ya? “Sipos mi harem se wan man i gat wan poen agensem mi, mi wokem advaes ya we i stap long Matiu 5:​23, 24: ‘Stretem poen ya wetem brata blong yu blong yutufala i fren gud.’ Smol samting ya we mi mekem blong stretem rao ya wetem narafala i mekem gudfala frut i kamaot. Mi haremsave pis ya blong God we Baebol i stap tokbaot. Ol advaes ya oli rili wok. Oli nambawan tumas long laef.”​—⁠Filipae 4:​6, 7.

Taem hasban mo waef tufala i no agri long wan samting, tufala tugeta i nidim blong “rere oltaem blong lesin, be [tufala] i no mas hareap blong toktok. Mo [tufala] i no mas hareap blong kros.” (Jemes 1:​19) Advaes olsem i mekem se fasin blong toktok i kam gud. George i gohed se: “Taem mi folem advaes ya blong lavem waef blong mi mo mekem long hem olsem we mi stap mekem long mi wan, kwiktaem nomo mi luk we gudfala frut i kamaot from. I isi blong hem i respektem mi.” (Efesas 5:​28-​33) Yes, Baebol i tijim yumi olsem wanem blong luksave mo winim ol slak fasin blong yumi wan, mo olsem wanem blong winim ol traem we oli kamaot from slak fasin blong ol narafala.

Advaes We i Blong Olwe

Waes King Solomon i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:​5, 6) !I no hadwok blong kasem save ol tok ya, be oli impoten tumas!

Baebol i gat paoa blong jenisim laef blong man i kam gud. Hem i mekem se ol man we oli lavem God oli naf blong mekem laef blong olgeta i laenap wetem ol samting we God i wantem mo i mekem se oli faenem glad taem “oli stap folem Loa blong Hae God.” (Ol Sam 119⁠:⁠1) Baebol i gat ol rul mo ol advaes we yumi nidim, nating se laef blong yumi i olsem wanem. (Aesea 48⁠:​17, 18) Ridim Baebol evri dei, tingting dip long wanem we yu ridim, mo mekem i wok long laef blong yu. Bambae hem i mekem tingting blong yu i stap klia mo i stap gud long ol samting we oli klin mo oli gudwan. (Filipae 4:​8, 9) Bambae yu lanem olsem wanem blong harem gud long laef, be tu, bambae yu lanem olsem wanem blong lavem Man ya We i Wokem laef.

Taem yu folem wan rod olsem, long tingting blong yu​—⁠olsem long tingting blong plante milian narafala man​—⁠bambae Baebol i moa impoten bitim wan gudfala buk. !Tru ya bambae hem i kam olsem wan buk blong lidim laef long yu!

[Tok blong pija long pej 6]

Baebol i save mekem yu yu strong blong holem disisen we yu mekem blong winim ol nogud fasin

[Tok blong pija long pej 7]

Baebol i tijim yu olsem wanem blong kam klosap long God