Jeova i Stap Givim Paoa Long Olgeta We Oli Taed
Jeova i Stap Givim Paoa Long Olgeta We Oli Taed
“Olgeta we oli taed, [“Jeova,” NW ] i stap givim paoa long olgeta, mo olgeta we oli no strong, hem i stap mekem olgeta oli strong bakegen.”—AESEA 40:29.
1. ?Paoa we i stap long ol samting we God i wokem i bigwan olsem wanem?
PAOA blong Jeova i no gat mak blong hem. !Mo tingbaot bigbigfala paoa we i stap long ol samting we hem i wokem! Smosmol samting ya we oli kolem atom, * hem i stamba samting insaed long olgeta samting raonabaot long yumi. Hem i smol bitim mak, wan drop wota nomo i gat wan handred bilian bilian atom long hem. * Olgeta laef samting long wol ya oli dipen long paoa blong san. ?I nidim hamas paoa blong san blong sapotem laef long wol ya? Wan smolsmol haf nomo long paoa blong san i kasem graon ya. Nating se i olsem, smolsmol paoa ya blong san we i kasem graon, i strong moa i winim paoa blong olgeta faktri blong fulwol.
2. ?Aesea 40:26 i talem wanem long saed blong paoa blong Jeova?
2 Nating se yumi tingbaot wan smosmol atom no yumi traem lukluk bigbigfala ples we ol sta oli stap long hem, be yumi sapraes tumas mo yumi fraet tu long strongfala paoa blong Jeova. Taswe, Baebol i tokbaot hem olsem se: “!Yufala i traem luk antap long skae! Ol sta ya we yufala i stap luk, hem nomo i wokem olgeta. Oltaem hem i stap lidim olgeta i kam, olsem we komanda i lidim ol soldia blong hem. Hem i savegud hamas sta i stap, mo i stap singaot olgeta wanwan long nem blong olgeta. Mo from we paoa blong hem i strong we i strong, neva wan sta i mestem ples blong hem.” (Aesea 40:26) Yes, Jeova i “strong we i strong,” mo hem i Stamba blong “paoa” ya we i wokem olgeta samting long heven mo long wol.
Paoa Blong Yumi i No Naf
3, 4. (a) ?Wanem sam samting we oli save mekem yumi kam taed? (b) ?Wanem kwestin we yumi mas faenem ansa blong hem?
3 Paoa blong God i no gat en blong hem, be hemia i no sem mak long ol man. Yumi stap kam taed. Long eni ples we yumi go long hem, yumi luk ol man we oli taed. Taem oli wekap long moning, oli taed finis. Oli go long wok no long skul, be oli harem se oli taed. Taem oli kambak long haos, oli taed. Taem oli go slip long naet, oli taed bitim mak we bodi blong olgeta i slak tumas. Samfala oli wantem ronwe i go long wan ples we oli save spel smol. Yumi ol man blong Jeova, yumi save kam taed tu, from we long laef blong yumi olsem ol man blong onagud long God, i nidim we yumi wok strong mo traehad oltaem. (Mak 6:30, 31; Luk 13:24; 1 Timoti 4:8) Mo i gat plante narafala samting tu we oli save daonem paoa blong yumi.
4 Ol Kristin oli stap kasem ol semfala trabol olsem ol narafala man. (Job 14:1) Sik, trabol long saed blong mane, mo sam narafala trabol long laef, oli save mekem tingting blong yumi i foldaon, nao yumi save harem se yumi no moa gat paoa. Antap long ol trabol ya, olgeta we oli stanap strong long stret fasin oli save kasem hadtaem. (2 Timoti 3:12; 1 Pita 3:14) Ol samting blong wol we oli traem yumi evri dei, mo fasin agens we yumi kasem long wok blong talemaot Kingdom, olgeta tu oli save mekem sam long yumi i kam taed gogo, yumi harem se bambae yumi kam slak long wok blong Jeova. Mo tu, Devel Setan i stap yusum enikaen samting nomo blong spolem yumi, blong mekem se yumi no moa holemstrong long God. ?Taswe, olsem wanem yumi save kasem paoa we yumi nidim long saed blong spirit, blong yumi no kam taed mo lego Jeova?
5. ?From wanem paoa blong yumi nomo i no naf blong mekem Kristin wok blong yumi?
5 Blong stap strong long saed blong spirit, yumi mas dipen long Jeova, we hem i gat olgeta paoa, mo hem i wokem yumi. Aposol Pol i soem se prapa paoa blong yumi ol sinman i no naf blong mekem Kristin wok blong yumi, bambae yumi nidim moa. Hem i raetem se: “Mifala ya, we mifala i stap holem ol gudgudfala samting ya we God i givim, mifala i olsem ol graonpot nomo. Nao fasin ya i stap soemaot, we paoa ya we i bigwan tumas i blong God, i no blong mifala.” (2 Korin 4:7) Ol tabu Kristin oli stap mekem wok blong ‘pulum ol narafala man blong oli kam, oli fren blong God,’ mo ol Kristin we oli gat hop blong laef olwe long wol ya, oli stap givhan long ol tabu Kristin ya. (2 Korin 5:18; Jon 10:16; Revelesen 7:9) From we yumi ol sinman i stap mekem wok ya blong God mo yumi stap fesem hadtaem long wok ya, yumi no naf blong gohed long prapa paoa blong yumi. Jeova i stap givhan long yumi wetem tabu spirit blong hem. Taem yumi no moa gat paoa, samting ya i stap givim janis long hem blong soemaot paoa blong hem. !Yes, yumi harem gud tumas long promes ya se Jeova “bambae i blokem olgeta we oli gud, i sevem olgeta”!—Ol Sam 37:17.
‘Jeova i Olsem Bigfala Paoa Blong Yumi’
6. ?Wanem tok blong Baebol we i mekem yumi sua se Jeova nao i Stamba blong paoa blong yumi?
6 Papa blong yumi long heven, hem i “strong we i strong.” I isi nomo long hem blong givim paoa long yumi. Baebol i talem se: “Olgeta we oli taed, [Jeova] i stap givim paoa long olgeta, mo olgeta we oli no strong, hem i stap mekem olgeta oli strong bakegen. Ol yangfala oli save kam slak we oli taed olgeta, mo ol yang man oli save foldaon we oli taed nogud. Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.” (Aesea 40:29-31) From ol trabol we i stap kasem yumi moa naoia, maet sam samtaem yumi harem olsem wan man blong resis we hem i taed tumas, nao leg blong hem i stap seksek mo hem i harem se hem i no moa save gohed. Be yumi no mas lego, en blong resis blong laef i stap klosap tumas. (2 Kronikel 29:11) Mo tu, enemi blong yumi, Setan, i stap raon long yumi “olsem wan laeon we i stap singaot bigwan,” mo hem i wantem mekem yumi lego. (1 Pita 5:8) Be, yumi no mas fogetem se Jeova ‘hem i paoa blong yumi mo hem i stap lukaot gud long yumi,’ mo hem i mekem plante rod blong ‘givim paoa long olgeta we oli taed.’—Ol Sam 28:7.
7, 8. ?Wanem samting i soemaot se Jeova i givim paoa long Deved, Habakuk, mo Pol?
7 Taem Deved i bin fesem sam bigfala trabol mo i nidim paoa blong gohed, Jeova i givim paoa ya long hem. Taswe, Deved i bilif fulwan long Jeova mo i trastem hem, nao hem i talem se: “God, sipos yu yu stap wetem mifala, bambae mifala i win, from we yu bambae yu winim ol enemi blong mifala.” (Ol Sam 60:12) Jeova i givim paoa long Habakuk tu blong hem i naf blong finisim wok blong hem olsem wan profet. Habakuk 3:19 i talem se: “[“Jeova,” NW] nomo i stap givim paoa long mi, i stap mekem mi mi stanap strong olsem anamol ya dia. Mo taem mi stap wokbaot antap long hil, hem i stap lukaot gud long mi.” Yumi save makem tok blong Pol tu, hem i se: “Mi save mekem evri samting, long paoa blong [God] we i stap mekem mi mi strong.”—Filipae 4:13.
8 Yumi mas mekem olsem Deved, Habakuk mo Pol, yumi mas bilif se God hem i nafgud blong mekem yumi strong, mo se hem i gat paoa blong sevem yumi. From we yumi save finis se Hae King mo Masta blong yumi Jeova, i Stamba blong paoa we i save mekem yumi “win,” i gud we naoia yumi tokbaot ol samting we God i mekemrere finis, blong yumi save kasem paoa long saed blong spirit.
Ol Samting Long Saed Blong Spirit Blong Givim Paoa
9. ?Wanem wok we ol Kristin buk oli mekem blong givim paoa long yumi?
9 Fasin blong mekem dip stadi blong Baebol mo ol Kristin buk, i save givim paoa long yumi blong stanap strong oltaem. Wan man blong raetem Ol Sam i singsing se: “Olgeta we . . . oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet [oli save haremgud]. Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” (Ol Sam 1:1-3) Yumi mas kakae blong stap strong long bodi. Long sem fasin, yumi nidim kakae long saed blong spirit we God i stap givim long Tok blong hem mo long ol Kristin buk, blong yumi save stap strong oltaem long saed blong spirit. Taswe, i impoten tumas we yumi stadi mo tingting dip long tok blong Hem.
10. ?Wetaem yumi save tekem taem blong stadi mo tingting dip?
10 I gat gudfala frut i save kamaot taem yumi tingting dip long “ol tingting blong God.” (1 Korin 2:10) ?Be wetaem nao yumi save tekem taem blong tingting dip? Aesak, pikinini blong Ebraham, hem i tingting dip “taem san i stap godaon, hem i stap wokbaot long open ples.” (Jenesis 24:63-67) Deved we i raetem plante Sam, ‘i stap tingting long God, i stat long sapa gogo kasem long moning.’ (Ol Sam 63:6) Yumi save stadi mo tingting dip long Tok blong God enitaem nomo, maet long moning, sapa, no long naet. Taem yumi stadi mo tingting dip, samting ya i save pulum yumi blong yusum wan narafala samting we Jeova i stap givim long yumi blong stap strong long saed blong spirit, hemia prea.
11. ?From wanem yumi mas tinghae tumas long prea?
11 Prea i save givhan long yumi blong gat paoa. Taswe, yumi “mas prea oltaem.” (Rom 12:12) Sam samtaem, maet yumi nidim blong talemaot klia long God wan traem we i stap kasem yumi, mo askem long hem blong givim waes mo paoa we i naf blong winim traem ya. (Jemes 1:5-8) Mo tu, yumi mas talem tangkiu long God mo presem hem taem yumi luk wan samting i kamaot we i givhan blong mekem stamba tingting blong hem i kamtru, no taem yumi haremsave se hem i givim paoa long yumi blong gohed long wok blong hem. (Filipae 4:6, 7) Sipos yumi stap klosap long Jeova long prea, neva bambae hem i save lego yumi. Deved i singsing se: “Oltaem God i stap givhan long mi.”—Ol Sam 54:4.
12. ?From wanem yumi mas askem long God blong givim tabu spirit blong hem long yumi?
12 Papa blong yumi long heven i stap yusum tabu spirit blong hem, blong givim paoa long yumi mo mekem yumi strong. Pol i raetem se: “Mi bodaon, mi prea long Papa blong yumi, . . . Hem i gat bigfala paoa blong heven, mo mi mi stap askem long hem blong hem i yusum Spirit blong hem blong givim paoa long yufala, blong mekem yufala i stanap strong oltaem.” (Efesas 3:14-16) Yumi mas prea from tabu spirit, wetem strong bilif se Jeova bambae i givim blesing ya long yumi. Jisas i talem se: ?Sipos wan pikinini i askem papa blong hem blong givim wan fis long hem, yu ting se papa ya we i gat lav i save girap i givim wan snek long hem? Nogat. Nao, hem i gohed, i se: “Nating we yufala i [sinman no] man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.” (Luk 11:11-13) Yumi mas prea wetem strong bilif olsemia, mo yumi no mas fogetem se ol trufala man blong God oli save “stanap strong oltaem” from paoa we tabu spirit i stap givim.
Kongregesen i Save Givim Paoa
13. ?Wanem tingting we yumi mas gat long saed blong ol Kristin miting?
13 Jeova i stap yusum ol miting blong Kristin kongregesen blong givim paoa long yumi. Jisas i talem se: “Long weples we tu no tri man oli joen wanples long nem blong mi, mi mi stap wetem olgeta.” (Matiu 18:20) Taem Jisas i mekem promes ya, hem i stap tokbaot sam samting we ol elda long kongregesen oli mas stretem. (Matiu 18:15-19) Be tok ya i stret tu long ol miting mo asembli blong yumi, we yumi prea long nem blong Jisas blong openem mo klosem olgeta. (Jon 14:14) I wan bigfala blesing blong joen long ol Kristin miting olsem, nating se i gat smol man nomo i stap no i gat plante taosen man oli hivap wanples. Taswe, yumi mas soemaot tangkiu from ol miting ya we oli blong mekem yumi strong long saed blong spirit. Mo tu oli pulum yumi blong laeklaekem yumi mo blong mekem ol gudfala fasin.—Hibrus 10:24, 25.
14. ?Hadwok blong ol Kristin elda i stap givhan long yumi olsem wanem?
14 Ol Kristin elda oli givhan long yumi long saed blong spirit mo leftemap tingting blong yumi. (1 Pita 5:2, 3) Pol i halpem mo i leftemap tingting blong ol kongregesen we hem i visitim olgeta, olsem ol elda we oli goraon tede blong visitim ol kongregesen oli stap mekem. Yes, Pol i wantem tumas blong joen wetem ol Kristin brata sista blong hem, blong hem i save leftemap tingting blong olgeta, mo olgeta oli save leftemap tingting blong hem. (Ol Wok 14:19-22; Rom 1:11, 12) Yumi mas gat tangkiu oltaem long ol lokol elda blong yumi mo ol narafala Kristin man we oli stap lukaot long kongregesen, from we oli mekem wan bigfala wok blong halpem yumi blong stap strong long saed blong spirit.
15. ?Olsem wanem ol Kristin brata sista long kongregesen oli save ‘mekem yumi harem gud’?
15 Ol Kristin brata mo sista blong yumi long kongregesen oli save ‘mekem yumi harem gud tumas.’ (Kolosi 4:10, 11) From we oli “trufala fren” blong yumi, oli save givhan long yumi taem yumi harem nogud. (Ol Proveb 17:17, NW ) Samting olsemia i kamaot long 1945, taem 220 man blong God oli kam fri long rabis kalabus blong ol Nasi long Sachsenhausen. Oli mas wokbaot 200 kilometa long leg nomo, mo ol soldia blong Nasi oli stap gad long olgeta. Oli wokbaot olsem wan grup, mo olgeta we bodi blong olgeta i strong lelebet oli givhan long olgeta we oli slak tumas. Oli putum olgeta long sam smol kat, nao oli pulum olgeta i go wetem olgeta. ?Wanem i kamaot from? Long wokbaot ya, 100,000 narafala man we oli bin stap long rabis kalabus ya oli ded long rod, be i no gat wan Witnes blong Jeova we i ded. Ol stori olsem, yumi save ridim long ol buk blong Watch Tower mo long Yearbook of Jehovah’s Witnesses mo long buk ya Jehovah’s Witnesses—Proclaimers of God’s Kingdom. Oli soemaot klia se God i stap givim paoa long ol man blong hem, blong oli stanap strong.—Galesia 6:9. *
Kasem Paoa From Wok Blong Prij
16. ?Olsem wanem yumi stap kam strong moa long saed blong spirit taem yumi prij plante?
16 Taem yumi joen oltaem long wok blong talemaot Kingdom, samting ya i stap mekem yumi strong long saed blong spirit. Wok ya i givhan long yumi blong tingbaot Kingdom blong God oltaem, mo blong no fogetem hop blong laef we i no save finis wetem ol blesing blong hem. (Jud 20, 21) Ol promes blong Baebol we yumi tokbaot long wok blong prij, oli givim hop long yumi, mo oli save mekem tingting blong yumi i strong olsem profet Maeka, we hem i talem se: “Yumi ya, . . . bambae yumi stap mekem wosip long [“Jeova,” NW ], mo yumi stap obei long hem oltaem nomo, gogo i no save finis.”—Maeka 4:5.
17. ?Wanem advaes i gud blong folem long saed blong ol Baebol stadi?
17 Yumi wanwan i save fren moa wetem Jeova sipos yumi yusum Baebol moa, taem yumi stap tijim ol narafala. Eksampol, taem yumi stap mekem wan Baebol stadi long buk ya Save Blong Lidim Yu Long Laef We i No Save Finis. I gud blong ridim mo tokbaot plante vas we oli stap long ol paragraf. Samting ya bambae i givhan gud long studen, mo tu, bambae i mekem se ol samting long saed blong spirit oli kam klia moa long tingting blong yumi. Sipos i hadwok long studen blong kasem save long wan tijing blong Baebol no long wan pijatok, yumi save tektaem lelebet, yumi no nid blong flatem wan ful japta blong Save buk long wan stadi. !Oltaem yumi mas glad blong reregud long stadi blong yumi, mo mekem wan spesel traehad blong halpem ol narafala blong kam klosap long God!
18. Talem wan stori blong soem olsem wanem Save buk i stap givhan long plante man.
18 Evri yia, yumi stap yusum Save buk blong givhan long plante taosen man mo woman blong givim laef blong olgeta i go long Jeova. Bifo, olgeta ya oli no save nating long Baebol. Long Sri Lanka, wan pikinini boe we hem i Hindu, i harem wan Witnes woman i tokbaot Paradaes wetem wan narafala man. Plante yia biaen, hem i go luk Witnes ya, nao hasban blong woman ya i stat stadi Baebol wetem yangfala ya. Evri dei tufala i stadi, mekem se tufala i finisim Save buk ya hareap nomo. Yangfala ya i stat kam long olgeta miting, i lego skul we hem i stap joen long hem fastaem, mo hem i kam wan pablisa blong Kingdom. Taem hem i tekem baptaes, hem i stap mekem Baebol stadi finis wetem wan fren blong hem.
19. ?Taem yumi putum Kingdom i stap fasples long laef, yumi save sua long wanem samting?
19 Taem yumi putum Kingdom i stap fasples long laef blong yumi, samting ya i save givim glad we i mekem yumi strong. (Matiu 6:33) Nating se yumi kasem plante traem, bambae yumi gohed wetem glad mo strong tingting blong talemaot gud nius. (Taetas 2:14) Plante long yumi oli stap kam naf blong joen long wok blong fultaem paenia, mo samfala oli stap muf i go long ol ples we i nidim moa man blong prij. Nomata sipos yumi mekem olsemia no yumi glad blong folem wan narafala rod blong mekem wok blong Kingdom i go moa, be yumi sua gud se Jeova i no save fogetem hadwok blong yumi mo lav we yumi gat long nem blong hem.—Hibrus 6:10-12.
Gohed Long Paoa Blong Jeova
20. ?Olsem wanem blong soemaot se yumi stap lukluk i go long Jeova blong givim paoa long yumi?
20 Wetem fulhat blong yumi, yumi mas soemaot se yumi stap putum tingting blong yumi i stap strong long Jeova, mo yumi stap lukluk i go long hem blong kasem paoa. Yumi save mekem olsemia taem yumi yusum gud olgeta samting long saed blong spirit we Jeova i stap givim long yumi tru long “slef ya we i stret.” (Matiu 24:45, NW) Fasin blong stadi Baebol mo ol Kristin buk we yumi mekem yumi wan mo wetem kongregesen, prea wetem fulhat, ol elda we oli givhan long Kristin laef blong yumi, gudfala eksampol blong ol Kristin brata sista, mo wok blong prij we yumi save joen long hem oltaem, oli sam samting we Jeova i stap givim long yumi blong mekem yumi kam klosap moa long hem, mo blong givim paoa long yumi blong gohed long tabu wok blong hem.
21. ?Aposol Pita mo Pol tufala i talem wanem blong soem se tufala i nidim paoa we God i stap givim?
21 Nating se yumi sinman nomo, Jeova bambae i givim paoa long yumi blong mekem samting we hem i wantem, sipos yumi dipen long hem. Aposol Pita i luksave se yumi nidim God blong i givhan long yumi, hem i se: “Sipos yufala i stap givhan long ol man, yufala i mas mekem long paoa we God i givim long yufala.” (1 Pita 4:11) Pol tu i soem se hem i dipen long paoa we God i stap givim long hem, i se: “Taem mi mi stap long trabol from we mi man blong Kraes, be tingting blong mi i save stap kwaet. Taem mi no gat paoa, no ol man oli tok nogud long mi, no mi gat hadtaem, no ol man oli mekem i nogud long mi, no mi harem we laef i strong tumas, be mi mi glad nomo, from we long taem we mi mi no gat paoa, long taem ya nao, mi mi gat paoa.” (2 Korin 12:10) I gud we yumi gat strong bilif olsemia, nao bambae yumi givim ona long Hae Masta mo King blong yumi Jeova, we hem i stap givim paoa long olgeta we oli taed.—Aesea 12:2.
[Ol futnot]
^ Ol smosmol samting insaed long evri samting long skae mo long graon, we man i save luk wetem glas nomo.
^ Folem fasin blong ol man Amerika blong raetem ol namba, wan handred bilian bilian i olsem: 1, wetem 20 siro biaen.
^ Watchtower Bible and Tract Society of New York, Inc., i wokem ol buk ya.
?Bambae Yu Yu Ansa Olsem Wanem?
• ?From wanem ol man blong Jeova oli nidim paoa we i bigwan moa i bitim prapa paoa blong olgeta?
• ?Wanem sam samting long Baebol we oli soem se God i stap givim paoa long ol man blong hem?
• ?Wanem sam samting we Jeova i stap givim long yumi blong mekem yumi strong?
• ?Olsem wanem blong soemaot se yumi stap lukluk i go long God blong hem i givim paoa long yumi?
[Kwestin]
[Tok blong pija long pej 12]
Bambae yumi wanwan i kam klosap moa long Jeova taem yumi gohed blong yusum Baebol blong tijim narafala