Olsem Wanem Yu Save Mekem Fren

“SIPOS YU GAT WAN GUDFALA FREN LONG FUL LAEF BLONG YU, HEMIA WAN BIGFALA SAMTING YA, MO SIPOS YU GAT TU GUDFALA FREN, NAO YU SAVE TALEM SE YU GAT FULAP FREN; BE BLONG GAT TRI GUDFALA FREN, ATING HEMIA I NO KAMTRU OLTAEM.”—Henry Brooks Adams.

TOK blong man ya i soemaot se i no oltaem we yumi save faenem ol trufala fren. Plante taem yumi harem ol tok olsem se “Mi no gat wan fren nating we mi save go long hem blong kasem help,” “I no gat wan man we mi save trastem,” no “Dog blong mi hem i beswan fren blong mi.” Ol man we oli talem ol tok ya oli stap olgeta nomo oltaem, mo oli wantem tumas blong faenem wan fren.

I nidim bigfala traehad blong mekem fren mo holemtaet fasin fren wetem narafala. Wan stadi i soemaot se “long Yunaeted Stet, 25 pesen blong olgeta bigman oli harem nogud from ‘fasin blong stap olgeta wan nomo blong longtaem’ mo . . . long Franis, haf blong olgeta man oli bin harem nogud finis samtaem long laef blong olgeta from we oli no gat fren nating.” Ol spesel klab we ol man oli go long hem jes blong faenem wan boefren no gelfren, mo ol program blong kompiuta we man i save yusum blong fren mo storian wetem narafala, mo ol toktok long niuspepa we ol man mo woman oli raetem blong askem narawan blong fren wetem olgeta, oli kam antap bigwan. Ol samting ya oli soem se ol man oli wantem tumas mo oli nidim blong fren wetem narafala.

Dokta David Weeks, wan man we i stadi long ol nev blong bren blong luk olsem wanem oli bos long aksin blong man, i talem se fasin ya we man i no gat fren i save spolem gudfala tingting blong hem, be tu, i save mekem se hem i gat problem long helt blong hem. “Bigfala namba blong ol man we oli kam luk mi wetem tingting we i trabol bigwan from ol wari mo tingting we i foldaon olgeta, oli man we yumi save talem se oli no gat fren. Tingting we i foldaon bigwan i joen plante taem wetem fasin ya we man i stap hem wan nomo oltaem.”

Divos mo fasin seraot we i kamaot insaed long famle i mekem se plante moa man naoia oli stap laef olgeta wan nomo. Wan stadi we oli mekem long Briten i  soemaot se long stat blong ol yia 2000, 30 pesen blong ol man long kantri ya bambae oli man we oli laef olgeta wan nomo long ol hom blong olgeta.

Baebol, we i kamaot long God, i talemaot finis se long taem blong “Lasdei” ol man bambae oli tingbaot olgeta nomo. (2 Timoti 3:​1-5) I luk olsem se plante man oli intres moa long ol sas samting, olsem wan haos no wan trak, no oli intres moa long wok blong olgeta i winim we oli traem blong frengud wetem ol narafala man. Anthony Storr, wan man blong raetem buk, i luksave se: “Oli no putum tingting blong olgeta i stap long hasban no waef mo pikinini blong olgeta, be laef blong olgeta i stanap nomo long wok blong olgeta.”

WAN TRUFALA FREN I SAS TUMAS

Fasin blong laef blong yu i dipen bigwan long fasin blong yu blong fren wetem narafala. Plante taem, ol man we oli mekem samting we olgeta nomo oli wantem long laef, oli no hapi from we oli no gat fren blong serem ol samting no ol tingting wetem olgeta. Ol tok blong Jisas Kraes oli tru tumas se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20⁠:35) George Byron, wan man Inglan we i man blong raetem ol naesfala tok, i soemaot se tok ya i tru taem hem i raetem se: “Olgeta we oli wantem kasem glad, oli mas serem glad ya wetem narafala.”

?Wanem ya wan fren? Wan diksonari i talem mining blong wan fren se hem i “wan man we i joengud wetem narafala from we hem i gat filing no i tinghae long narafala.” Wan trufala fren i save halpem yumi blong putum tingting blong yumi i stap long ol gudfala samting. Taem yumi nidim help, wan fren i save leftemap tingting blong yumi mo mekem yumi strong bakegen. Hem i save serem sore blong yumi. King Solomon i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Ol Proveb 17⁠:​17, NW ) Ol samting long saed blong bodi oli lusum praes blong olgeta long ol yia we oli pas, be wan trufala fasin fren i gru mo i karem gudfala frut taem ol yia oli pas.

Baebol i pulum ol Kristin se oli mas soemaot kaen gud fasin long narafala blong “mekem moa fren.” (2 Korin 6:​13, NW ) I waes blong soem intres long ol narafala. Long Prija 11:​1, 2 (NW ), yumi ridim se: “Sakem bred blong yu i go long wota from we plante dei biaen, bambae yu faenem hem bakegen. Givim smol i go long seven, no maet eit man, from we yu no save se long wanem ples long wol bambae trabol i kamaot.” ?Olsem wanem rul ya i laenap wetem fasin fren? Sipos yu bin wokem fasin fren wetem plante man, sam long olgeta bambae oli save givhan long yu taem trabol i kam.

Ol trufala fren oli save givhan long yu long wan narafala rod. Ol Proveb 27⁠:6 i talem se: “Maet fren blong yu i mekem wan samting long yu we i mekem yu yu harem nogud, be hem i mekem from we i wantem givhan long yu.” Enikaen man i save talem ol naesfala tok long yu blong leftemap yu. Be ol trufala fren nomo oli rere blong talemaot ol bigfala mastik blong yu mo givim gudfala advaes long yu, wetem lav, blong givhan long yu, from we oli tinghae long yu.​—⁠Ol Proveb 28:23.

Ol gudfala fren, we oli save gud yu, oli olsem wan presen we i sas tumas from we oli save mekem yu yu kam gud moa. Long Ol Wok japta 10, yumi ridim stori blong Konilias, wan man Rom we i kapten blong ol soldia. Wan enjel i kamtru long  hem blong talem se God i harem ol prea blong hem. Nao, taem Konilias i wet long aposol Pita blong i kam luk hem, hem i ‘singaot ol famle blong hem mo ol fren blong hem’ oli kam. Ol fren ya blong Konilias oli sam long ol faswan Hiten man we oli no sakomsaes mo we oli lesin long gud nius nao tabu spirit i makemaot olgeta mo oli gat hop blong rul wetem Kraes long Kingdom blong God. !From Konilias, ol fren ya oli kasem wan nambawan blesing!​—⁠Ol Wok 10⁠:​24, 44.

?Be, olsem wanem yu save mekem fren? Baebol i talem plante samting long saed blong fasin fren. Hem i save ansa long kwestin ya wetem sam gudfala advaes. (Lukluk bokis we i stap daon.)

WEPLES BLONG FAENEM TRUFALA FREN

Beswan ples blong faenem fren hemia long Kristin kongregesen. Fastaem, yu save tekem janis blong frengud wetem Jeova, Man ya We i Wokem yu mo we i Papa blong yu long heven. Mo tu, yu save frengud wetem Jisas Kraes we hem i Man ya We i Sevem yu. Jisas i singaot yu blong fren wetem hem, i se: “I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15⁠:​13, 15) Sipos yu frengud wetem Jeova mo Jisas Kraes, yu save sua se bambae tufala i “tekem yufala i go insaed long haos ya we i no save lus samtaem.” Yes, fasin blong fren wetem Jeova mo Jisas i minim se bambae yumi kasem laef we i no save finis.​—⁠Luk 16⁠:9; Jon 17⁠:⁠3.

?Olsem wanem yu save frengud wetem tufala ya? Ol Sam namba 15 i tokbaot ol samting we yumi nidim blong mekem blong fren wetem Jeova mo kam naf blong go long haos tapolen blong hem. Jekemap Sam ya long Baebol, mo ridim ol faswan faefala vas blong hem. Mo tu, Jisas Kraes i talem se: “Sipos yufala i  stap mekem ol samting we mi mi talem long yufala, yufala i fren blong mi.”​—⁠Jon 15⁠:⁠14.

Yes, sipos yu keagud blong stadi mo letem Tok blong God, Baebol, i lidim yu, yu soem se yu wantem stap wan fren blong Jeova mo Jisas. Be tu, blong kasem mak ya, yu mas go long ol Kristin miting oltaem. Ol miting ya oli givimaot save long saed blong Jeova God. Holemstrong long fasin ya blong lesin long Jeova, mo bambae yu kam klosap moa long hem mo Pikinini blong hem.

Long ol miting, yu gat janis tu blong save gud ol narafala man we oli laekem Jeova mo we oli soemaot ol frut blong spirit long laef blong olgeta​—⁠lav, glad, pis, longfala tingting, kaen fasin, gudfala fasin, bilif, tingting daon mo fasin blong bos long tingting. (Galesia 5:​22, 23) Sipos yu rili wantem gat ol fren mo sakemaot fasin blong stap yu wan oltaem, yu mas go long ol Kristin miting evri wik. Taem yu mekem olsem, yu stap long ples we i stret mo long taem we i stret blong wokem wan gudfala fasin fren wetem ol man blong God we hem i stap blesem olgeta.

FREN BLONG OLWE

Trufala fasin fren i wan nambawan presen we Jeova God i givim. Hem i kamaot from ol gudfala fasin blong God. From we hem i gat lav mo i glad oltaem blong givim samting long narafala, hem i fulumap wol ya wetem ol man we oli waes mo yu save wokem wan fasin blong fren wetem olgeta. Kampani wetem ol narafala Kristin. Leftemap tingting blong olgeta. Wok wetem olgeta long wok blong prij. Prea wetem olgeta mo prea from olgeta oltaem. Ale, bambae yu folem eksampol blong Jeova mo Pikinini blong hem, Jisas Kraes.

Fasin fren i wan presen we yumi evriwan i save givim mo kasem. Long fiuja we i klosap nao, bambae yu gat janis blong mekem moa fren bakegen. Yu save fren wetem plante milian man we oli laef naoia, be bambae yu save fren tu wetem ol man blong bifo we oli stap slip yet long ded mo oli stap wet blong laef bakegen long taem ya we “bambae i no moa gat man i ded.” (Revelesen 21⁠:4; Jon 5:​28, 29) Traehad naoia blong gat fasin fren, mo mekem fren wetem olgeta we oli lavem Jeova. Traem kasem fasin fren wetem Jeova God mo Jisas Kraes taem yu lesin long Tok blong God, Baebol. Ale, bambae yu neva harem nogud blong stap yu wan oltaem, gogo i no save finis.

[Bokis/Foto long pej 22, 23]

SIKIS ROD BLONG HOLEM FASIN FREN WETEM NARAFALA

1. YU MAS STAP OLSEM WAN FREN. Baebol i singaot Ebraham se “Fren blong God” from we bilif blong hem i strong oltaem. (Jemes 2:​23) Be i gat wan narafala risen blong samting ya. Baebol i talem se Ebraham i soemaot se hem i laekem God. (2 Kronikel 20⁠:7) Hem i tekem aksin mo i letem Jeova i save ol filing blong hem. (Jenesis 18⁠:​20-​33) Yes, yumi mas tekem aksin blong pruvum fasin fren blong yumi. Jisas i talem se: “Yufala i mas givim ol samting i go long narafala man, nao [“ol man ya,” NW ] bambae [oli] givim ol samting i kam long yufala.” (Luk 6:​38) Ol gudfala tok we oli leftemap tingting no rere oltaem blong givhan, hemia nao ol rod blong wokem wan fasin fren we i save kam strong. Ralph Waldo Emerson, wan man Amerika we i man blong raetem buk, i talem bifo se: “I gat wan rod nomo blong kasem fren, hemia sipos yu yu gat fasin blong frengud fastaem.”

2. TEKEM TAEM BLONG WOKEM FASIN FREN WETEM NARAFALA. Plante man oli wantem gat ol fren. Be oli bisi tumas, nao oli no tektaem blong mekem fren. Rom 12⁠:​15, 16 i leftemap tingting blong yumi blong serem glad mo gudfala samting wetem ol narafala, mo blong serem sore mo tingting we i harem nogud, wetem ol narafala. Vas ya i talem se: “Taem ol man oli stap harem gud, yufala tu i mas harem gud wetem olgeta. Mo taem ol man oli stap harem nogud, oli stap krae, be yufala tu i mas krae wetem olgeta. Mo yufala i mas mekem i gud long olgeta man.” Jisas Kraes i faenem taem blong spenem wetem ol fren blong hem, nating se hem i wan man we i bisi. (Mak 6:​31-​34) Rimemba se, fasin blong fren i olsem wan tri we i karem flaoa, yumi mas givim wota long hem mo lukaot gud long hem blong i karem frut​—⁠mo samting ya i tektaem blong mekem.

3. LESIN TAEM NARAFALA I TOKTOK. Plante taem, olgeta we oli lesingud mo oli soem intres, oli faenem fren kwiktaem. Disaepol Jemes i talem se: “Yufala evriwan i mas rere oltaem blong lesin, be yufala i no mas hareap blong toktok.” (Jemes 1:​19) Taem yu storian wetem ol narafala, soem intres long filing blong olgeta wanwan. Pulum olgeta blong talemaot tingting blong olgeta. Yu yu mas faswan blong soem ona long olgeta. (Rom 12⁠:10) Nao, bambae oli wantem stap wetem yu. Defren olgeta, sipos oltaem yu nomo yu toktok, no yu pulum tingting i go long yu nomo, bambae yu no save faenem man we i rere blong lesin long yu no we i kea long filing mo nid blong yu.

4. RERE BLONG FOGIF. Jisas i bin talem wan taem long Pita se hem i mas rere blong fogif “olwe gogo i no save finis.” (Matiu 18⁠:​21, 22) Wan trufala fren i rere blong fogetem ol smosmol mastik. Tingbaot wan eksampol. Sam man oli no laekem kakae guava from ol smosmol sid blong hem oli strong tumas. Be, olgeta we oli laekem kakae frut ya oli no kea long ol smosmol sid ya. Long sem fasin, yumi laekem ol trufala fren from we oli gat ol naesfala fasin mo yumi no kea long ol smosmol mastik blong olgeta. Pol i pulum yumi se: “Yufala i mas givgivhan long yufala, mo . . . yufala i mas fofogivim yufala.” (Kolosi 3:​13) Olgeta we oli lanem olsem wanem blong fogif, bambae oli no save lusum ol fren blong olgeta.

5. RESPEKTEM RAET BLONG NARAFALA. Yumi evriwan i gat raet mo i nidim sam samtaem blong stap yumi wan. Ol fren blong yumi olgeta tu oli gat raet ya. Ol Proveb 25⁠:17 i givim waes tok ya se: “I nogud yu stap go oltaem blong visitim fren blong yu we i stap klosap long yu. I isi blong hem i kam taed tumas long yu, nao bambae i no wantem yu, i agens long yu.” Taswe, yu mas skelemgud hamas taem we bambae yu spenem blong go visitim ol fren blong yu. Lukaot blong no jalus long ol fren blong yu from we yu wantem se oli blong yu nomo. Gat fasin luksave taem yu talemaot tingting blong yu mo samting we yu yu laekem. Ol samting ya oli save givhan blong gat wan gudfala fasin fren mo i leftemap fasin fren.

6. GIVIM WETEM GLADHAT. Fasin fren i gru taem we yumi glad blong givim. Advaes blong aposol Pol hemia se yumi mas ‘gat gladhat blong givhan long ol man, mo blong seraot ol samting blong yumi long ol narafala man.’ (1 Timoti 6:​18) Eksampol, maet yu save serem sam gudfala toktok wetem narafala blong leftemap tingting blong olgeta. (Ol Proveb 11⁠:25) No holembak ol gudfala tok we oli save presem narafala mo mekem olgeta oli kam strong moa. Taem yu soem se yu rili intres long narafala mo yu wantem se oli harem gud, samting ya bambae i pulum olgeta i kam long yu. Tingbaot ol samting we yu yu save mekem long olgeta, i bitim we yu tingbaot wanem samting we olgeta oli save mekem long yu.