?Yu Yu Laekem Tumas Ol Tok We Jeova i Stap Talem Bakegen Mo Bakegen?
?Yu Yu Laekem Tumas Ol Tok We Jeova i Stap Talem Bakegen Mo Bakegen?
“Mi stap obei long ol [“tok we yu yu stap talem bakegen mo bakegen,” NW ], mo mi laekem olgeta tumas.”—OL SAM 119:167.
1. ?Wanem japta blong Baebol i tokbaot plante ol tok we Jeova i stap talem bakegen mo bakegen?
JEOVA i wantem se ol man blong hem oli glad. Blong rili glad, yumi mas obei long ol loa mo rul blong Jeova. Mo blong givhan long yumi long rod ya, hem i stap talem ol tok ya bakegen mo bakegen. Plante taem Baebol i tokbaot samting ya. Naesfala singsing blong Sam namba 119, we maet yangfala Prins Hesekia blong Juda i bin wokem, i tokbaot plante ol tok ya we Jeova i stap talem bakegen mo bakegen. Singsing ya i stat olsem: “Ol man we laef blong olgeta i stret, we oltaem oli stap folem Loa blong Hae God, bambae oli save harem gud. Ol man we oli stap obei long hem long olgeta tingting blong olgeta, mo we oli stap folem ol [“tok we hem i stap talem bakegen mo bakegen,” NW], bambae oli save harem gud.”—Ol Sam 119:1, 2.
2. ?Olsem wanem ol tok we God i stap talem bakegen mo bakegen oli joen wetem fasin glad?
2 Yumi “stap folem Loa blong Hae God” taem yumi kasem stret save long Tok blong hem mo mekem i wok long laef blong yumi. Be yumi sinman, taswe yumi nidim we hem i talem ol tok ya bakegen mo bakegen long yumi. Hibru tok we oli tanem i kam “talem bakegen mo bakegen” i minim se God i mekem ol loa, rul, oda, mo toktok blong hem oli kambak bakegen long tingting blong yumi. (Matiu 10:18-20) Wan rod nomo blong stap glad, hemia blong gohed oltaem blong obei long ol tok ya we hem i stap talem bakegen mo bakegen long yumi, from we ol tok ya i save givhan long yumi blong no foldaon long ol trap long saed blong spirit, nao yumi kasem bigfala trabol mo harem nogud tumas.
Holemtaet Ol Tok We Jeova i Stap Talem Bakegen Mo Bakegen
3. ?Ol Sam 119:60, 61 i mekem se yumi save gud wanem samting?
3 Ol tok we God i stap talem bakegen mo bakegen, oli sas long tingting blong man ya we i raetem Sam 119. Hem i singsing se: “Mi mi no tektaem, mi girap mi obei long ol tok we yu yu putum. Ol man nogud oli putum wan trap finis blong kasem mi, be mi mi no fogetem Loa blong yu.” (Ol Sam 119:60, 61) Ol tok we Jeova i stap talem bakegen mo bakegen, oli givhan long yumi blong stanap strong taem samfala oli agensem yumi, from we yumi savegud se Papa blong yumi long heven hem i naf blong spolem ol trap we ol enemi oli putum blong kasem yumi. Long stret taem blong hem, hem i tekemaot ol samting ya we oli save blokem yumi, nao yumi fri blong gohed long wok blong talemaot Kingdom.—Mak 13:10.
4. ?Yumi mas mekem wanem taem yumi harem ol tok blong God bakegen mo bakegen?
4 Sam samtaem, ol tok we Jeova i stap talem bakegen mo bakegen, oli stretem yumi. Yumi mas talem tangkiu oltaem from ol tok ya we i stretem yumi, olsem man blong raetem Sam 119 i mekem. Hem i prea long God, i se: “[“Ol tok we yu yu stap talem bakegen mo bakegen,” NW], oltaem oli stap mekem mi mi haremgud. . . . mi mi laekem [“ol tok we yu yu stap talem bakegen mo bakegen,” NW].” (Ol Sam 119:24, 119) Tede, yumi gat moa tok we God i stap talem bakegen mo bakegen long yumi, i bitim wanem we man blong raetem Sam ya i bin gat. I gat plante handred vas blong Hibru haf blong Baebol we oli kamaot bakegen long Grik haf blong Baebol. Olgeta ya oli talem bakegen ol tok we Jeova i givim long ol man blong hem we oli stap aninit long Loa blong Moses. Mo tu, sam long ol tok ya oli talem bakegen ol tingting blong God long saed blong Kristin kongregesen. Taem hem i luk se i stret, hem i talem bakegen sam samting long saed blong ol loa blong hem, mo yumi glad we hem i soemaot rod long yumi olsemia. Sipos yumi “holemtaet ol tok we Jeova i stap talem bakegen mo bakegen,” yumi no save foldaon long wan samting we i pulum yumi blong mekem sin, nao yumi mekem Man we i Wokem yumi i harem nogud, mo yumi no moa glad tu.—Ol Sam 119:31, NW.
5. ?Olsem wanem yumi save kasem mak ya we yumi laekem tumas ol tok we Jeova i stap talem bakegen mo bakegen?
5 ?Yumi mas laekem ol tok we Jeova i stap talem bakegen mo bakegen long yumi, go kasem wanem mak? Man blong raetem Sam 119 i singsing se: “Mi stap obei long ol [“tok we yu yu stap talem bakegen mo bakegen,” NW ], mo mi laekem olgeta tumas.” (Ol Sam 119:167) Blong kasem mak we yumi laekem tumas ol tok we Jeova i stap talem bakegen mo bakegen, yumi mas tingbaot mo folem olgeta olsem advaes blong wan Papa we i rili wantem lukaotgud long yumi. (1 Pita 5:6, 7) Yumi nidim ol tok ya, mo bambae yumi laekem olgeta moa taem yumi luk we oli stap givhan long yumi bigwan.
?From Wanem Yumi Nidim Ol Tok Ya Bakegen Mo Bakegen?
6. ?From wanem yumi nidim ol tok blong Jeova bakegen mo bakegen, mo wanem samting bambae i givhan long yumi blong rimemba ol tok ya?
6 Wan risen from wanem yumi nidim ol tok blong Jeova bakegen mo bakegen, hemia se yumi stap fogetem plante samting. The World Book Encyclopedia i talem se: “Klosap olgeta man oli gat fasin ya blong fogetem ol samting taem ol manis mo yia oli pas. . . . Ating yu tu, samtaem yu bin traehad blong tingbaot nem blong wan man no wan smol samting we yu save finis, be i hadwok blong mekem i kambak long tingting blong yu. . . . Fasin ya blong fogetem samting blong smoltaem, we i stap kamaot plante taem long yumi, i olsem we yumi no save faenem save we yumi stap lukaotem. Ol man blong sayens oli talem se i olsem we yumi stap traehad blong faenem wan samting long wan rum we i gat plante tumas samting long hem. . . . Gudfala rod blong holemtaet wan save long tingting, i blong stadi long hem longtaem afta we yu bin lanem gud fastaem.” Dip stadi mo fasin blong talem samting plante taem, i save givhan long yumi blong rimemba ol tok we God i stap talem bakegen mo bakegen, mo blong folem olgeta mo kasem gudfala frut from.
7. ?From wanem yumi nidim moa naoia, blong harem ol tok blong God bakegen mo bakegen?
7 Tede, yumi nidim moa ol tok we Jeova i stap talem bakegen mo bakegen, from we fasin nogud i kam antap kasem wan mak we i neva bin kasem bifo. Sipos yumi lesin long ol tok we God i stap talem bakegen long yumi, yumi kam naf blong luksave mo blokem ol samting we oli save pulum yumi blong folem ol rabis fasin blong wol ya. Man blong raetem Sam 119 i talem se: “From we oltaem mi mi stap tingting long [“ol tok we yu yu stap talem bakegen mo bakegen,” NW], mi mi [luksave] plante samting moa, i winim ol tija blong mi. Oltaem, mi mi stap obei long ol loa blong yu nao mi mi waes moa, i winim ol ololfala. Mi mi no save folem ol fasin nogud, from we mi wantem obei long ol tok blong yu.” (Ol Sam 119:99-101) Sipos yumi obei long ol tok we God i stap talem bakegen mo bakegen, yumi “no save folem ol fasin nogud.” Bambae yumi no save kam olsem bighaf blong ol man tede, we “tingting blong olgeta ya i stap long tudak nomo. Nao oli stap longwe tumas long laef ya we God i stap givim.”—Efesas 4:17-19.
8. ?Olsem wanem yumi save rere moa blong fesem mo winim ol samting we oli traem bilif blong yumi?
8 Wan narafala risen from wanem yumi nidim ol tok we God i stap talem bakegen long yumi, hemia blong givim paoa long yumi blong stanap strong agensem plante traem, long taem ya we i “klosap en blong wol ya.” (Daniel 12:4) Sipos yumi no kasem ol tok ya, bambae yumi kam olsem man we i “fogetem ol samting” we loa blong God i talem. (Jemes 1:25) Taem yumi wan no yumi joen wetem kongregesen blong stadi Baebol mo ol buk we “slef we i stret mo waes” i givim, samting ya bambae i givhan long yumi blong winim ol samting we oli stap traem bilif blong yumi. (Matiu 24:45-47, NW ) Taem trabol mo hadtaem i kasem yumi, ol samting ya long saed blong spirit bambae oli givhan long yumi blong luksave wanem rod yumi mas folem blong mekem Jeova i glad.
Ol Miting Oli Mekem Wan Impoten Wok
9. ?Hu ya “ol presen” ya, mo olsem wanem oli stap givhan long ol Kristin brata sista blong olgeta?
9 Taem yumi go long ol Kristin miting, yumi kasem ol tok blong God we oli stap kamaot bakegen mo bakegen blong givhan long yumi. Long ples ya, ol brata oli gat wok blong tijim yumi. Aposol Pol i raetem se, taem Jisas “i go antap long ples we i hae we i hae, hem i tekem ol man we i winim olgeta long faet oli go kalabus i givim ol presen i go nomo long ol man.” Hem i gohed i se: “Long sam man, [Kraes] i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli evanjelis. Mo long sam narafala man bakegen, hem i givim paoa blong oli [man blong lukaot long ol sipsip] mo tija insaed long jos. Kraes i mekem olsem blong olgeta man blong hem bambae oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.” (Efesas 4:8, 11, 12) Yumi glad tumas from ol “presen” ya, hemia ol elda we tabu spirit i putumap olgeta. Taem yumi joen wanples blong wosip, ol elda oli pulum yumi blong tingbaot ol tok we Jeova i stap talem bakegen mo bakegen long yumi.
10. ?Wanem bigfala tingting insaed long Hibrus 10:24, 25?
10 Yumi mas gat bigfala tangkiu long God from ol samting we hem i stap givim long yumi. Samting ya bambae i pulum yumi blong kam long olgeta faef miting blong kongregesen evri wik. Pol i soemaot se yumi nidim blong joen wanples oltaem, i se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.”—Hibrus 10:24, 25.
11. ?Olsem wanem ol wanwan miting blong yumi evri wik oli givhan long yumi?
11 ?Yu yu luksave olsem wanem ol miting oli givhan long yumi? Stadi blong Wajtaoa evri wik, hem i mekem bilif blong yumi i kam strong moa, hem i givhan long yumi blong obei long ol tok we Jeova i stap talem bakegen mo bakegen, mo hem i givim paoa long yumi blong agensem “spirit blong wol ya.” (1 Korin 2:12, NW; Ol Wok 15:31) Long Pablik Tok, ol brata oli yusum Baebol blong tijim yumi, oli yusum ol tok we Jeova i stap talem bakegen mo bakegen long yumi, mo ol nambawan tok blong Jisas “blong laef ya we i no save finis.” (Jon 6:68; 7:46; Matiu 5:1 kasem 7:29) Long Tiokratik Skul, yumi kasem advaes olsem wanem blong mekem fasin blong yumi blong tijim ol narafala i kamgud moa. Miting blong Kingdom Wok i nambawan blong halpem yumi blong kamgud moa long fasin blong talemaot gud nius long evri haos, long ol visit bakegen, ol Baebol stadi, mo long ol narafala ples we yumi prij long hem. Long Buk Stadi, i gat wan smol grup blong man nomo i hivap, mekem se yumi gat moa janis blong givim ol ansa we plante taem oli joen wetem ol tok we God i stap talem bakegen mo bakegen long yumi.
12, 13. ?Olsem wanem ol man blong God long wan kantri blong Esia oli soemaot tangkiu from ol Kristin miting?
12 Sipos yumi kam oltaem long ol miting, samting ya bambae i mekem yumi tingbaot bakegen mo bakegen ol loa blong God. Mo tu, bambae i givhan long yumi blong stap strong long saed blong spirit, we yumi naf blong fesem olkaen samting we oli traem bilif blong yumi, olsem bigfala faet long kantri blong yumi mo hadtaem long saed blong mane. Long wan kantri long Esia, i gat 70 Kristin we oli harem se i impoten tumas blong kam long ol miting. Olgeta ya oli mas ronwe long ples blong olgeta from faet, mo go stap long dak bus. Be oli gat strong tingting blong gohed blong joen wanples long ol miting. Taswe, oli gobak long taon we oli stap long hem fastaem, we bigfala faet i stap gohed long hem, oli karemaot haf Haos Kingdom we i stap yet, nao oli go bildim bakegen long bus.
13 Long wan narafala ples long semfala kantri ya, bigfala faet ya i stap gohed plante yia finis. Be ol man blong Jeova oli stanap strong tru long ol yia ya, mo oli gohed wetem strong tingting yet blong mekem wok blong hem. Long ples ya, wan man i askem long wan elda se: “?Wanem samting i bin givhan moa long ol brata sista blong oli holemtaet fasin joengud?” Hem i ansa se: “Long 19 yia, mifala i neva mestem wan miting. Sam samtaem, ol ami oli stap sakem plante bom no i gat wan narafala trabol olsem, we i mekem se sam brata oli no save kasem ples blong miting, be mifala i neva talem se miting i nogat, mifala i gohed nomo blong mekem miting.” Ol gudfala brata mo sista ya oli rili luksave se i impoten tumas blong no “lego ol miting blong [kongregesen].”
14. ?Yumi save lanem wanem samting from fasin we olfala Ana i folem oltaem?
14 Long taem bifo, wido woman ya Ana we hem i gat 84 yia blong hem, “oltaem nomo, hem i stap long haos blong God.” From samting ya, hem i luk Jisas jes afta we hem i bon, taem papa mama blong hem tufala i karem hem i kam long haos blong God. (Luk 2:36-38) ?Yu yu gat strong tingting blong no mestem wan miting? ?Yu yu stap traem bes blong yu blong kam long olgeta haf blong ol asembli? Ol gudfala save we yumi stap kasem long ol miting mo asembli, i soemaot klia se Papa blong yumi long heven i rili stap lukaotgud long ol man blong hem. (Aesea 40:11) Mo tu, yumi kasem bigfala glad long ol taem ya we yumi joen tugeta. Fasin blong yumi blong no mestem ol miting, i soemaot se yumi gat bigfala tangkiu long Jeova from ol tok we hem i stap talem bakegen mo bakegen.—Nehemaea 8:5-8, 12.
Ol Tok We Jeova i Stap Talem Bakegen i Mekem Yumi Seraot Long Wol
15, 16. ?Olsem wanem fasin blong yumi i save jenis taem yumi obei long ol tok we Jeova i stap talem bakegen mo bakegen?
15 Taem yumi obei long ol tok we Jeova i stap talem bakegen mo bakegen, yumi stap longwe long ol rabis fasin blong wol ya, olsem fasin slip olbaot. (Dutronome 5:18; Ol Proveb 6:29-35; Hibrus 13:4) Taem wan samting i kam blong pulum yumi blong giaman, mekem i no stret, no stil, yumi save winim ol samting ya sipos yumi folem ol tok we Jeova i stap talem bakegen mo bakegen. (Eksodas 20:15, 16; Levitikas 19:11; Ol Proveb 30:7-9; Efesas 4:25, 28; Hibrus 13:18) Mo tu, sipos yumi obei long ol tok ya, yumi no save givimbak long wan we i mekem nogud long yumi, yumi no save holem kros longtaem, mo yumi no save talemaot ol giaman tok olbaot blong spolem nem blong narafala.—Levitikas 19:16, 18; Ol Sam 15:1, 3.
16 Yes, taem yumi obei long ol tok we God i stap talem bakegen mo bakegen, yumi stap olsem ol man we oli tabu, oli seraot long wol ya blong mekem wok blong Jeova. !Mo i impoten tumas blong stap longwe long ol fasin blong wol ya! Jisas i prea long Jeova long laswan naet blong hem long wol ya, i askem long Hem blong mekem wan samting long ol disaepol blong hem. Hem i se: “Mi mi talemaot ol tok blong yu long olgeta. Mo ol man blong wol ya oli no laekem olgeta, oli stap agens long olgeta, from we olgeta oli no man blong wol, olsem we mi mi no man blong wol. Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya. Tok blong yu i tru olgeta. Plis yu mekem tok ya blong yu i wok long laef blong olgeta, blong oli tabu, oli man blong yu.” (Jon 17:14-17) Yumi mas gohed blong tinghae tumas long Tok blong God we i stap seraotem yumi long wol, blong yumi mekem tabu wok blong Hem.
17. ?Wanem i save hapen sipos yumi no wantem lesin long ol tok we God i stap talem bakegen mo bakegen, taswe, yumi mas mekem wanem?
17 Yumi ol man blong Jeova, yumi wantem stap olsem we Jeova i glad blong yusum yumi blong mekem wok blong hem. Sipos yumi no wantem lesin long ol tok we hem i stap talem bakegen mo bakegen, maet spirit blong wol ya i save winim yumi. Yumi luk spirit ya long ol tok we ol man blong wol oli yusum, ol buk, ol pleplei, mo ol fasin blong olgeta. Mo tu, yumi no wantem kam man blong laekem mane tumas, tok flas, tingting i go antap tumas, no save talem tangkiu, no moa tingbaot God, wael olgeta, stronghed, praod, laekem ol pleplei i bitim we yumi laekem God. Hemia sam nomo long ol fasin blong man we i gowe long God. (2 Timoti 3:1-5) From we yumi stap long en blong ol las dei blong rabis wol ya, yumi mas gohed blong prea blong askem God blong givhan long yumi blong folem ol tok we hem i stap talem bakegen mo bakegen. Olsemia nao, yumi save ‘obei long ol tok blong hem.’—Ol Sam 119:9.
18. ?Sipos yumi obei long ol tok we God i stap talem bakegen mo bakegen, samting ya bambae i pulum yumi blong girap mo mekem wanem gudfala samting?
18 Ol tok we Jeova i stap talem bakegen mo bakegen, oli go moa i winim we oli jes givim woning long yumi from ol samting we yumi no mas joen long olgeta. Oli pusum yumi tu blong girap mo mekem ol gudfala samting, trastem Jeova fulwan, mo laekem hem wetem olgeta hat, laef, tingting, mo paoa blong yumi. (Dutronome 6:5; Ol Sam 4:5; Ol Proveb 3:5, 6; Matiu 22:37; Mak 12:30) Mo tu, ol tok ya oli pusum yumi blong soem lav long ol man raonabaot long yumi. (Levitikas 19:18; Matiu 22:39) Bigfala rod blong soem lav long God mo ol man raonabaot, hemia blong mekem wok blong God mo serem “save blong God” wetem ol narafala.—Ol Proveb 2:1-5, NW.
!Obei Long Ol Tok Ya, Mo Sevem Laef Blong Yu!
19. ?Olsem wanem blong soem long ol narafala se ol tok we Jeova i stap talem bakegen mo bakegen oli save givhan long yumi mo wokgud long laef?
19 Sipos yumi obei long ol tok we Jeova i stap talem bakegen mo bakegen, mo yumi givhan long ol narafala tu blong mekem olsemia, bambae yumi sevem laef blong yumi wan mo blong olgeta we oli lesin long yumi. (1 Timoti 4:16) ?Olsem wanem blong soemaot long ol narafala se ol tok ya blong Jeova oli rili save givhan long yumi mo wokgud long laef? Blong mekem olsem, yumi mas folem ol rul blong Baebol long prapa laef blong yumi. Olsem nao, “olgeta we God i jusumaot olgeta finis blong oli kasem laef ya we i no save finis,” bambae oli luksave se rod we Tok blong God i soemaot, i beswan blong folem. (Ol Wok 13:48) Mo tu, bambae oli luksave se ‘God i stap long medel blong yumi,’ nao hat blong olgeta bambae i pulum olgeta blong joen wetem yumi blong wosip long King mo Masta blong yumi, Jeova.—1 Korin 14:24, 25.
20, 21. ?Ol tok we God i stap talem bakegen mo bakegen, mo tabu spirit blong hem, bambae oli givhan long yumi blong mekem wanem?
20 Sipos yumi gohed blong stadi Baebol, mekem ol samting we yumi lanem, mo yusum fulwan ol samting long saed blong spirit we Jeova i stap givim long yumi, bambae yumi kasem mak we yumi laekem tumas ol tok we Hem i stap talem bakegen mo bakegen. Sipos yumi obei long ol tok ya, bambae oli givhan long yumi blong “putum niufala fasin blong laef we God i wokem olsem we hem i wantem. Fasin ya i kamaot long trufala stret fasin mo fasin blong obei long hem oltaem.” (Efesas 4:20-24) Ol tok we Jeova i stap talem bakegen mo bakegen mo tabu spirit blong hem, bambae oli mekem se yumi save soemaot lav, glad, pis, longfala tingting, kaen fasin, gud fasin, bilif, kwaet fasin, mo bos long tingting. !Hemia ol fasin we oli defren olgeta long fasin blong wol ya we i stap long paoa blong Setan! (Galesia 5:22, 23; 1 Jon 5:19) Taswe, yumi glad tumas taem yumi harem ol rul blong Jeova bakegen mo bakegen, taem yumi mekem prapa Baebol stadi blong yumi wanwan, long tok we ol elda oli talem long yumi, mo long ol miting mo asembli.
21 Taem yumi obei long ol tok we Jeova i stap talem bakegen mo bakegen, yumi glad bigwan, nating sipos yumi stap kasem trabol mo hadtaem from stret fasin blong yumi. (Luk 6:22, 23) Yumi trastem God nomo blong sevem yumi, taem ol bigfala trabol oli kasem yumi we oli save spolem yumi. Fasin ya i impoten moa naoia, from we ol nesen oli stap hivap blong “mekem faet long bigfala Dei blong God ya we i gat olgeta paoa,” hemia Amagedon.—Revelesen 16:14-16.
22. ?Wanem strong tingting we yumi mas gat long saed blong ol tok we Jeova i stap talem bakegen mo bakegen?
22 Blong kasem presen ya we God i givim long gladhat blong hem, hemia laef we i no save finis, yumi mas laekem tumas ol tok we Jeova i stap talem bakegen mo bakegen, mo yumi mas folem olgeta wetem fulhat blong yumi. I gud yumi gat semfala fasin olsem man we i raetem Sam 119, hem i singsing se: “Oltaem [“ol tok we yu stap talem bakegen mo bakegen,” NW ] oli stret nomo. Plis yu givhan long mi blong mi savegud olgeta, nao bambae mi save stap gud long laef blong mi.” (Ol Sam 119:144) Mo i gud yumi gat strong tingting olsem man blong raetem Sam we i talem se: “Mi mi stap krae long yu. Plis yu sevem mi, blong mi save holem [“ol tok we yu yu stap talem bakegen mo bakegen,” NW ].” (Ol Sam 119:146) Yes, long ol toktok mo fasin blong yumi, yumi mas soemaot se yumi rili laekem tumas ol tok we Jeova i stap talem bakegen mo bakegen.
?Bambae Yu Yu Ansa Olsem Wanem?
• ?Man blong raetem Sam 119 i ting wanem long ol tok we Jeova i stap talem bakegen mo bakegen?
• ?From wanem yumi nidim ol tok we God i stap talem bakegen mo bakegen?
• ?Wanem wok we ol miting oli mekem long saed blong ol tok ya blong God?
• ?Olsem wanem ol tok we Jeova i stap talem bakegen mo bakegen oli mekem yumi seraot long wol ya?
[Kwestin]
[Tok blong pija long pej 15]
Man blong raetem Sam 119 i lavem ol tok we Jeova i stap talem bakegen mo bakegen
[Tok blong pija long pej 16, 17]
?Yu yu stap folem eksampol blong Ana, we i neva mestem wan miting?
[Tok blong pija long pej 18]
Taem yumi folem ol tok we Jeova i stap talem bakegen mo bakegen, yumi seraot long wol, yumi klin mo Jeova i glad blong yusum yumi