Gud Nius Blong Pis i Kasem Ol Hil Blong Chiapas

“Long olgeta nogud faet we i kamaot long stet blong Chiapas, wan we i rabis olgeta hemia faet we wan grup blong man . . . we oli holem masket oli mekem, taem oli kilim i ded 45 man blong wokem garen, wetem 13 pikinini.” Hemia nao wanem we niuspepa ya “El Universal” i tokbaot, we i bin hapen long Acteal long stet blong Chiapas, long Disemba 22, 1997.

CHIAPAS hem i wan stet blong Meksiko we i stap long saot olgeta, mo mak blong hem i finis long Guatemala. Histri i soemaot se ol man blong ples ya oli bin fesem plante hadtaem from oli pua mo oli lusum plante samting. From samting ya, wan grup blong ol manples nomo, hemia ol Mayan Indian, oli rerem wan ami blong olgeta blong mekem wan bigfala faet agensem gavman long Jenuware 1994. Oli karem nem ya se Ejército Zapatista de Liberación Nacional (EZLN, National Liberation Zapatista Army). Gavman i traem lukaot wan rod blong mekem pis from faet ya, be ol toktok blong stretem problem ya oli tektaem tumas. Kwiktaem nomo ol rebel mo ol ami blong gavman oli faet, mekem se blad i ron bigwan mo plante man i ded. Bigfala trabol ya i mekem se plante long ol man blong wokem garen long eria ya, oli ronwe oli go haed long narafala ples.

Long taem we ol samting ya oli stap hapen, i gat wan grup blong ol man we oli lavem pis mo oli no joen long ol faet blong politik. Oli wok strong blong pulum tingting blong man i go long Kingdom blong God olsem stamba hop blong winim ol problem we ol man oli stap fesem long ples blong olgeta mo long ful wol. (Daniel 2:​44) ?Hu nao olgeta ya? Hemia ol Witnes blong Jeova. Folem oda blong Jisas, olgeta ya oli traehad blong talemaot gud nius blong Kingdom blong God long olgeta hil blong Chiapas we oli stap longwe tumas. (Matiu 24⁠:14) ?Wok blong prij i olsem wanem long trabol taem ya, mo wanem ol frut we oli kamaot?

“Mi Mi Wan Long Ol Witnes Blong Jeova”

Wan dei, Adolfo, wan yangfala man we i jes kam wan pablisa blong talemaot Kingdom, i stap wok long radio stesen long Ocosingo. Wantaem nomo, wan man i kilkilim doa bigwan. Wan grup blong ol man we oli kavremap fes blong olgeta oli kam insaed mo oli poenem masket long hed blong hem. Oli ron i go insaed long rum we i blong toktok long radio mo oli yusum evri samting blong toktok insaed long rum ya blong talemaot long radio se oli rere nao blong mekem faet agensem gavman.

Ol man ya we oli gat masket oli lukluk Adolfo mo oli talem long hem blong i joenem grup blong olgeta. Nating se Adolfo i no baptaes yet, hem i ansa se: “Mi mi wan Witnes blong Jeova.” Hem i eksplenem se Kingdom blong God, hemia nomo trufala hop blong pis, mo hem i no wantem tekem yunifom mo masket we oli wantem givim long hem. Taem oli luk strong tingting we Adolfo i gat, oli letem hem i go fri. Adolfo i tingtingbak long taem ya, i se: “Samting ya we i bin kamaot, i rili mekem bilif blong mi i strong.”

Sloslou ol samting oli kam kwaet, be ol ami oli bos yet long olgeta eria. Nating se i olsem, Adolfo i glad taem ol  elda long kongregesen blong hem oli askem hem blong go wok wetem wan grup blong ol Kristin we oli stap olgeta nomo long wan eria longwe. Long ol ples we hem i mas stop blong oli jekem hem bifo we hem i save pastru, ol soldia oli soem respek long hem taem hem i talemaot long olgeta se hem i wan Witnes blong Jeova. Biaen, hem i baptaes mo hem i glad blong halpem grup ya we i stap longwe blong mekem se wan kongregesen blong ol Witnes blong Jeova i stanap long ples ya. Adolfo i talem se: “!Naoia we mi baptaes, mi save talem wetem ful bilif se mi mi wan long ol Witnes blong Jeova!”

“Jeova i Mekem Mitufala i Kam Strong”

Smoltaem afta we grup ya blong ol EZLN i talemaot long radio se oli mekem faet agensem gavman, ol man blong taon oli ronwe. Francisco i wan fultaem minista, no paenia, mo hem i eksplenem olsem wanem Jeova i mekem hem mo waef blong hem tufala i kam strong blong fesem sam samting.

“Mifala i mekem disisen blong wokbaot tri aoa blong go faenem sefples long wan eria. I gat wan kongregesen long ples ya, taswe mifala i save stap wetem ol brata. I no longtaem, hem i taem blong seket asembli blong mifala we bambae i stap long Palenque. Mi mo waef blong mi, mitufala i no wantem mestem spesel miting blong ol paenia, be mifala i harem we ol EZLN oli blokem rod we i go long asembli. Mifala i mekem disisen blong pastru long bus, we i  tekem naen aoa long mifala blong wokbaot. Mifala i kasem ples blong asembli long stret taem blong joen long miting blong ol paenia. Miting ya mo fulwan program blong asembli i mekem mifala i glad tumas.

“Taem mifala i gobak hom, mifala i faenem se oli bonem haos blong mifala mo oli stilim ol anamol blong mifala. Samting we i stap hemia wan smol basket blong ol klos nomo. Mifala i harem nogud from ol samting we mifala i lusum, be ol brata blong Ocosingo oli soem kaen fasin taem oli tekem mifala i go long haos blong olgeta. Mo tu, oli soem long mifala olsem wanem blong mekem ol samting we, mifala ol man blong wokem garen mifala i neva mekem bifo. Wan brata i tijim mi blong tekem ol foto, wan narawan i tijim mi blong fiksimap ol sus. Hemia nao ol wok we oli givhan long mi mo waef blong mi blong laef kam kasem naoia mo i mekem se, mifala i no nid blong lego long wok blong paenia. Taem mitufala i stap tingbaot wanem we i hapen, mitufala i luksave se i no isi long mifala blong stanap strong, be Jeova i givim paoa long mitufala.”

Frut We i Kamaot Long Wok Blong Prij

Ol Witnes we oli stap long Stet blong Chiapas oli no letem hadtaem mo ol denja i blokem olgeta blong mekem wan spesel traehad blong tekem gud nius i go long ol man long eria ya. Wan eksampol, long Epril mo Mei 1995, oli joen wetem ol Kristin brata blong olgeta long fulwol blong seremaot Kingdom Nius namba 34, we taetel blong hem i stretgud se ?From Wanem Laef i Fulap Tumas Long Trabol?

Long spesel wok ya​—⁠long wan ples we oli singaot se Pueblo Nuevo​—⁠wan fultaem paenia, we nem blong hem Ciro, i faenem wan famle we i soem intres. Tri dei biaen hem i gobak long olgeta mo i statem Baebol stadi wetem olgeta. Be taem Ciro mo wan narafala Witnes tufala i gobak blong gohed long stadi wetem famle ya, man blong haos ya i no stap. Defren olgeta, i gat wan grup blong ol man we oli kavremap fes blong olgeta, oli stap wet blong mekem trabol long hem. Oli askem Ciro mo fren blong hem se tufala i stap lukaot wanem, mo oli wantem kilim tufala. Afta we tufala i prea long hat blong tufala i go long Jeova, tufala Kristin ya i no fraet blong eksplenem se oli bin kam blong tijim Baebol long famle ya. Ale ol man ya oli lego tufala. From sam risen, long ful dei ya, man blong haos ya i no bin kambak long haos blong hem.

Wan dei, klosap tri yia biaen, Ciro i sapraes blong luk man ya i kam stanap long doa blong haos blong hem. !Ciro i glad blong lanem se ful famle i bin baptaes mo se naoia oli joen wetem wan kongregesen long Guatemala! Wan long ol gel blong famle ya i joen long wok blong fultaem paenia.

Glad From Ol Kakae Long Saed Blong Spirit

Nating se ol hadtaem oli stap gohed long Chiapas, wan distrik elda i talem se ol Kristin long ples ya oli gat bigfala fasin tangkiu from ol miting we oli gat tugeta. (Hibrus  10⁠:​24, 25) Hem i tokbaot samting we i bin hapen long wan spesel dei asembli, we program blong hem bambae i stat eli long moning blong mekem se olgeta we bambae oli kam oli save gobak sef long haos taem i delaet yet. Nating we sam long olgeta oli mas wokbaot moa long tri aoa long bus blong kasem ples blong asembli, evriwan oli sidaon long jea blong olgeta finis long 7 klok long moning. Long medel blong olgeta we oli stap long asembli ya i gat sikis memba blong grup blong EZLN, we oli stap lesin mo oli stap klaphan, we i luk olsem se oli glad long program ya. Olgeta tu oli wokbaot tri aoa blong kam long asembli ya. Twanti long olgeta ya oli kam long Memoriol blong ded blong Kraes, we ol brata oli mekem long haos Kingdom we i stap long ples ya.

Wan narafala yangfala man we i stap joen long grup we i agensem gavman, i kasem oda long ol bos blong hem blong go jekem ol samting long wan vilej long bus. Taem hem i kasem vilej ya, hem i faenemaot se olgeta man long hem we bighaf blong olgeta oli ol Witnes blong Jeova, oli ronwe finis. Taswe hem i stap insaed long wan long olgeta haos ya we i no moa gat man long hem. Hem i nogat plante samting blong mekem, ale, hem i tekem sam long ol buk we hem i faenem long haos ya mo i stat ridim olgeta. Hemia ol buk blong Watch Tower we sam long ol Witnes oli livim i stap. From we hem i stap hem wan, yangfala man ya i gat taem blong tingting dip long wanem we hem i ridim. Hem i mekem disisen se hem i mas jenisim laef blong hem mo lego ol tul blong faet. Kwiktaem nomo hem i faenem ol Witnes mo hem i stat blong stadi Baebol. I no sikis manis i pas yet, hem i stap talemaot gud nius long ol narafala. Hem mo tri memba blong famle blong hem we bifo oli stap agri wetem grup ya we i agensem gavman, naoia oli kam ol Kristin we oli baptaes.

Lukluk Long Gudfala Saed

Nating we ol man oli bin fesem bigfala hadtaem, i tru se faet ya i givhan long ol man blong oli gat gudfala tingting long saed blong wok blong prij. Wan elda long taon ya we faet i bin stat long hem, i talem se: “Raonabaot faef dei afta we faet i stat mifala i rerem wok blong prij insaed mo afsaed long taon. Ol man oli wantem tumas blong lesin long mifala. Mifala i givim plante buk mo statem sam Baebol stadi. Long wan eria, plante oli agensem trutok, be from ol trabol ya, naoia oli lesin, oli stadi long Baebol, mo oli kam long ol miting mo ol asembli.”

Ol brata oli glad se oli bin naf blong gohed wetem ol tiokratik wok blong olgeta nating se ol samting long taem ya oli olbaot lelebet. Ol ami blong gavman mo ol ami blong EZLN oli save ol Witnes, taswe oli letem olgeta oli gohed blong holem ol asembli we i mekem olgeta i strong long saed blong spirit. Ol seket elda tu, we oli kam visit oli bin givhan bigwan blong mekem se wok blong prij i gohed. I narakaen blong luk se olgeta we oli joen long faet ya, olgeta nao oli stap leftemap tingting blong ol Witnes blong oli gohed long wok blong olgeta blong prij.

Ol traem mo ol hadtaem we ol man long Chiapas oli mas fesem i godaon lelebet, be oli no rili finis fulwan. Nating se i olsem, i gat wan samting we i sua​—⁠ol Witnes blong Jeova oli gat strong tingting blong gohed mo no lego ol traehad blong olgeta blong karem gud nius blong pis we i stap long Tok blong God, Baebol, i go long ol man. (Ol Wok 10⁠:​34-​36; Efesas 6:​15) Oli luksave olsem we profet Jeremaea i talemaot se, “man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jeremaea 10⁠:23) Kingdom blong God nomo we i stap long han blong Pikinini blong hem, Jisas Kraes, i save winim ol fasin we i no stret mo fasin pua long wol ya.​—⁠Matiu 6:​10.

[Map blong pija long pej 9]

(Lukluk niuspepa)

Gulf of Mexico

CHIAPAS

GUATEMALA

Pacific Ocean

[Credit Line]

Mountain High Maps® Copyright © 1997 Digital Wisdom, Inc.

[Tok blong pija long pej 9]

Ol Witnes we oli go prij long ol hil blong Chiapas