Strong Tingting Blong Wok

?WANEM i pulum 24 hasban mo waef we oli gat gudfala laef, blong lego ol famle, ol fren, mo kantri blong olgeta blong mekem wok blong misinari long narafala kantri? ?From wanem olgeta ya oli glad blong go long ol ples olsem Papua Niu Gini, Taewan, mo ol kantri blong Afrika mo Latin Amerika? ?Oli jes wantem blong go lukluk ples? No gat. Trufala lav we oli gat long God mo ol man raonabaot i pulum olgeta blong go long ol ples ya.​—⁠Matiu 22⁠:​37-​39.

?Hu ya ol man mo woman ya? Hemia ol studen blong klas namba 109 long Wajtaoa Baebol Skul blong Gilead. Long Sarede, Septemba 9, 2000, i gat 5,198 man oli kam tugeta long Wajtaoa Edukesenol Senta​—⁠long Patterson, New York​—⁠mo samfala oli folem program ya long spesel radio, blong harem ol advaes we bambae i givhan long ol studen ya blong karem gudfala frut long misinari wok blong olgeta.

Jeaman blong program ya hem i Stephen Lett, wan memba blong Tijing Komiti long Hed Kampani blong ol Witnes blong Jeova. Hem i statem tok blong hem wetem Matiu 5⁠:​13, we i talem se: “Yufala i olsem sol long ol man long wol.” Brata Lett i eksplenem se ol tok ya blong Jisas oli stret long ol studen ya. Tingbaot, sol i save givim moa tes long kakae. Long sem fasin, ol misinari ya oli olsem sol taem oli karem gudfala frut long wok blong prij.

Tok Blong Leftemap Tingting Bifo We Oli Seraot

Nao, brata Lett i askem sam brata we oli bin mekem wok blong Jeova longtaem blong oli givim sam sotfala tok long saed blong Baebol. Faswan, hemia John Wischuk, we i wok long Raeting Dipatmen. Stamba blong tok blong hem se “Sotfala Sam Ya We i Givim Tingting Blong Kam Misinari.” Stamba tok ya i stanap long Ol Sam 117. Tede, long “evri ples long wol” i nidim man blong givim witnes long saed blong Jeova mo Kingdom blong hem. Hem i leftemap tingting blong ol studen ya blong folem tok blong Ol Sam 117 taem oli pulum ol narafala blong “Presem Hae God.”

Nao jeaman i askem Guy Pierce blong Hed Kampani blong i kam givim tok blong hem. Stamba tok blong hem se “Rere Oltaem Blong Jenis, Be Stap Strong.” Tok blong God i gat paoa. Dutronome 32⁠:4 (NW) i tokbaot Jeova se hem i wan Bigfala Ston. Nating se i olsem, Tok blong hem i no mekem i strong long man from we hem i stret gud long ol man blong enikaen lanwis no fasin blong laef​—⁠yes, hem i stret long olgeta man long wol. Brata Pierce i givim advaes long ol studen blong oli talemaot Tok blong God, mo letem mesej blong hem i kasem hat mo tingting blong ol man. (2 Korin 4⁠:⁠2) Brata ya i gohed se: “Yufala i mas strong blong holem ol stret rul, be yufala i mas rere blong jenis tu. Yufala i no mas daonem ol man jes from we fasin blong laef blong olgeta i defren.”

Karl Adams, wan tija blong Gilead skul we i wok klosap 53 yia finis long hedkwota, i givim tok ya we i pulum tingting se “?Afta Long Hemia Bambae Yufala i Go Wea?” I tru se ol 24 hasban mo waef ya oli mas go blong mekem wok blong misinari long 20 defren kantri raon  long wol, be kwestin we i stap se, ?Taem yu stap long ples ya, yu luk se hem i olsem wanem, ale nao bambae yu mekem wanem? Yumi stap long wan wol we ol man oli jenisim tingting kwiktaem. Ol man oli wantem go long ol niufala ples mo oli wantem mekem ol samting we oli defren, from we oli wantem harem gud. Be ol studen ya oli kasem wan wok we Jeova i givim long olgeta blong mekem long ol ples we hem i wantem olgeta oli go long hem, blong lukaot long ol “sipsip” blong hem. Ol studen ya oli no mas mekem olsem ol man Isrel bifo we oli tingbaot olgeta nomo, taswe oli lusum janis ya we Jeova i yusum olgeta blong blesem olgeta man long wol. Be oli mas folem eksampol blong Jisas Kraes, we i no tingbaot hem wan nomo be i mekem wanem we Papa blong hem i wantem mo i obei oltaem nomata wanem i hapen long laef blong hem.​—⁠Jon 8:​29; 10⁠:⁠16.

“Tinghevi Long Ol Dip Save Blong God,” hem i stamba blong tok we Wallace Liverance i mekem, we hem i rejistarem nem blong ol studen long skul ya. Plante taem Baebol i tokbaot Tok blong God olsem samting we i sas, ol sas ston, mo narafala samting we man i mas tinghae long hem mo i mas traehad blong faenem. Ol Proveb 2:​1-5 i soem se, blong ‘savegud God,’ yumi mas lukaot hem olsem we yumi stap lukaot ‘silva we man i berem.’ Brata Liverance i leftemap tingting blong ol studen blong oli gohed blong digim ol dip save blong God taem oli stap wok long ples ya we bambae oli go long hem. Hem i talem long olgeta se:  “Fasin ya i wokgud from we hem i bildimap bilif mo tras long Jeova mo bambae i mekem tingting blong yufala i strong moa blong holemtaet wok ya we yufala i kasem. Bambae hem i halpem yufala blong toktok wetem strong tingting mo bambae i mekem yufala i kam ol tija we oli karem gudfala frut taem yufala i talemaot ol stamba tingting blong God long ol narafala.”

Wan narafala tija blong Gilead Skul i mekem olsem se hem i stap long wan klasrum taem hem i talem bakegen olsem wanem Jeova i bin blesem wok blong prij we ol studen oli bin mekem long ol faef manis we oli pas. Lawrence Bowen i yusum tok blong aposol Pol long Ol Wok 20⁠:20 long saed blong wok blong prij long Efesas. Hem i soemaot se Pol i tekem olgeta janis we hem i gat blong givim witnes. Ol samting we i hapen long laef blong ol studen ya i soemaot klia se, olsem aposol Pol, olgeta we oli lavem God mo ol narafala man, oli neva letem wan samting i blokem olgeta blong tokbaot trutok mo letem Tok blong God i wok long laef blong narafala man. Frut we i kamaot hemia se oli kasem plante blesing.

Toktok Blong Olgeta We Oli Bin Wok Plante Yia

Long ol manis blong kos ya, ol studen ya blong Gilead, oli kasem spesel blesing from we oli save joen wetem ol memba blong Branj Komiti blong 23 defren kantri. Olgeta ya tu oli bin kam long Patterson Edukesenol Senta blong kasem spesel trening. Leon Weaver mo Merton Campbell we tufala i wok long Sevis Dipatmen, tufala i askem kwestin long ol defren memba ya blong Branj Komiti, we sam long olgeta oli bin joen long Gilead skul bifo. Ol studen wetem famle mo ol fren blong olgeta oli harem gud tumas taem oli lesin long tok blong ol misinari ya we oli bin spenem plante yia long wok ya.

Ol studen blong klas ya oli kasem fulap defren advaes we i halpem olgeta blong lan kwiktaem long kantri we bambae oli go long hem. Ol advaes olsem se: “Holem stret tingting oltaem. Sipos yu luk wan samting we i narakaen no we yu no kasem save long hem, yu no mas kam slak. Yu mas dipen long Jeova”; “lanem blong stap glad long wanem we yu kasem, mo trastem se bambae Jeova i givim wanem we yu nidim blong laef.” Sam narafala tok oli halpem ol studen blong oli glad oltaem long wok blong olgeta. Sam tok i olsem: “Yu no mas skelem ples we yu wok long hem wetem ples we yu bin stap long hem bifo”; “lanem lanwis blong ol man ples mo traem toktok klia lanwis ya blong bambae yu naf blong storian wetem ol man”; “lanem kastom mo fasin blong laef blong ol man, from hemia bambae i halpem yu blong holemstrong long wok blong yu.” Ol tok ya oli leftemap tingting blong ol niufala misinari ya bigwan.

Afta we oli toktok mo askem kwestin long olgeta ya, David Splane, we bifo hem i wan misinari mo i bin joen long klas namba 42 long Gilead, mo we naoia hem i wan memba blong Hed Kampani blong ol Witnes blong Jeova, i givim tok ya “?Yufala i Studen No Man We i Kasem Stefeket?” Hem i askem ol studen blong klas ya se: “?Taem we bambae yufala i go long ples ya we yufala i wok long hem, bambae yufala i lukluk yufala wan olsem wanem? ?Yufala i man we i kasem stefeket nao yufala i save evri samting finis long saed blong wok blong misinari, no yufala i ol studen we i gat plante samting yet blong lanem?” Brata Splane i makem klia se man we i waes, bambae i tingbaot hem wan olsem wan studen nomo. Ol misinari oli mas tingbaot se evri man we oli mitim long wok blong prij, i save tijim olgeta long sam samting. (Filipae 2⁠:⁠3) Ol studen ya oli mas wokgud tugeta wetem ol narafala misinari, branj ofis, mo kongregesen we oli stap long hem. Brata Splane i leftemap tingting blong olgeta se: “Yufala i pasem laswan eksam blong yufala finis, be yufala i stap yet olsem studen. Soem long ol narafala se yu yu rere blong letem olgeta oli tijim yu.”

Afta long tok ya, ol studen oli kasem stefeket blong olgeta, mo oli talemaot ples we bambae oli go long hem. Ol studen ya oli harem gud tumas taem wan memba blong klas ya i ridimaot wan tok we i soemaot strong tingting we ol studen oli gat blong letem evri samting we oli lanem long Tok blong God i lidim olgeta blong mekem tabu wok blong olgeta i go moa.

Olgeta man we oli stap long taem ya oli agri se ol advaes we oli kamaot long miting ya oli mekem tingting blong ol studen i kam strong moa blong soem lav long God mo ol narafala. Mo tu, hem i mekem tingting blong ol misinari ya i strong moa blong halpem ol man blong wosipim God long olgeta ples ya we bambae oli go wok long hem.

[Tok blong pija long pej 25]

OLI KAONTEM KLAS:

Namba blong ol kantri we oli kamaot long olgeta: 10

Namba blong ol kantri we bambae oli go wok long olgeta: 20

Namba blong ol studen: 48

Medel namba blong ol yia we oli gat: 33.7

Medel namba blong ol yia we oli stap long trutok: 16.2

Medel namba blong ol yia we oli stap long fultaem minista wok: 12.5

[Tok blong pija long pej 26]

Olgeta Long Klas Namba 109 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.

(1) Collins, E.; Miles, L; Alvarado, A; Lake, J (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.