Wan Kwestin

?Sipos wan hasban i wantem divos long waef blong hem we i stap tru long God, Kristin waef ya i mas traehad olsem wanem blong sevem mared blong hem?

Taem God i stanemap faswan mared, hem i talem se hasban mo waef, tufala i mas “joen” gud tugeta. (Jenesis 2⁠:​18-24) Be taem sin i kamaot, fulap problem oli kam insaed long plante mared. Nating se i olsem, God i wantem yet se ol hasban mo waef oli joen gud tugeta. Aposol Pol i raetem se: “Long olgeta we oli mared finis, tok blong mi i no blong mi nomo, i blong Masta blong yumi tu. Mi mi talem se woman i no mas lego man blong hem. Sipos woman i lego man blong hem, bambae i mas stap olsem nomo, i no mared bakegen. No sipos no, bambae i mas kambak blong joen gud bakegen long man blong hem. Mo man i no mas mekem divos long woman blong hem.”​—⁠1 Korin 7⁠:​10, 11.

Ol tok ya oli soem klia se long medel blong yumi ol sinman, samtaem wan man no woman i save jusum blong lego hemia we hem i mared wetem. Pol i talem se sipos wan man no woman i mekem wan jus olsem, tufala tugeta “i mas stap olsem nomo, i no mared bakegen.” ?From wanem? From we long lukluk blong God, tufala i joen tugeta yet, nating se wan long tufala i lego narawan. Pol i talem tok ya from we Jisas i bin stanemap wan rul long saed blong Kristin mared se: “Sipos wan man i mekem divos long woman blong hem, we woman ya i no bin slip wetem narafala man [Grik, por·neiʹa], nao man ya i go mared long narafala woman, man ya i mekem sin.” (Matiu 19⁠:⁠9) Baebol i givim wan risen nomo blong divos mo finisim wan mared. Hemia sipos hasban no waef i “slip wetem narafala.” Hemia wan fasin blong slip olbaot. I klia se hasban mo waef we Pol i tokbaot oli no bin slip olbaot. Taswe, long lukluk blong God, taem woman ya i lego man blong hem, mared blong tufala i no finis.

Biaen, Pol i tokbaot ol Kristin we hasban no waef blong olgeta i no bilif. Hem i talem se: “Sipos man we i no bilif i wantem lego woman blong hem we i Kristin, no woman we i no bilif i wantem lego man blong hem we i Kristin, i gud nomo, hem i save mekem. Nao man no woman we i Kristin, hem i no moa gat samting i fasem hem long woman no man we i lego hem. God i singaot yumi, blong yumi stap long kwaet laef.” (1 Korin 7:​12-16) ?Wan Kristin waef i save mekem wanem sipos hasban blong hem we i no bilif i lego hem, i wantem divos long hem folem loa?

Maet Kristin waef ya i jusum se hasban blong hem i stap nomo wetem hem. Maet hem i lavem hasban blong hem yet, i tingbaot filing we tufala i bin soem long tufala mo ol nid long saed blong seks, mo maet hem i save se hem mo ol smol pikinini blong hem oli nidim help long saed blong bodi. Maet waef ya i stap tingting tu se wan dei, hasban blong hem i save bilif mo i kasem sef. Be sipos hasban ya i tekem aksin blong finisim mared ya (folem risen we i no stanap long Baebol), waef i letem “hem i save mekem” olsem Pol i talem. Hemia i sem mak long wan Kristin hasban we i sakemaot tingting blong God long saed blong mared mo i wantem lego waef blong hem.

Be maet Kristin waef ya i luksave se i nidim blong folem loa blong mekem se hem mo ol pikinini blong hem oli save stap gud. ?Olsem wanem blong mekem samting ya? Bambae hem i wantem se hem nao i gat raet blong lukaot ol pikinini blong hem we hem i lavem olgeta tumas. Olsem nao, hem i save gohed blong soem lav blong mama long olgeta, tijim olgeta blong save ol fasin we i gud mo ol fasin we i nogud, mo trenem olgeta blong gat bilif we i stanap long ol nambawan tijing blong Baebol. (2 Timoti 3:​15) Divos i save mekem se hem i lusum ol samting ya we hem i gat raet long hem. Taswe, maet hem i save tekem aksin blong go long kot blong faet from raet we hem i gat long ol pikinini blong hem mo blong mekem sua se hasban blong hem i givhan long famle ya we hem i lego. Long samfala ples, wan woman we i putum man blong hem long kot from divos, i save saenem sam pepa we i soem wanem wan pikinini i nidim mo help long saed blong mane. Waef ya i save mekem olsem, nomata we hem i no agri long divos we hasban blong hem i wantem mekem.

Bighaf blong ol man long komuniti mo long kongregesen bambae oli no save evri samting long saed ya. Oli no save sipos divos ya i stanap long risen we Baebol i givim no nogat. Taswe, bifo we ol samting ya oli hapen olsem, i gud we Kristin waef ya i talemaot bisnes ya (raetem wan leta) long presiden elda mo wan narafala elda long kongregesen blong mekem tufala i save long hem bifo we i gat kwestin i kamaot long saed ya​—⁠naoia no long fiuja.

I gud yumi ridim bakegen tok blong Jisas se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.” Sipos wan hasban i slip olbaot be i wantem gohed blong stap wetem waef blong hem, waef ya  (hemia we Jisas i tokbaot se hem i no gat fol) i mas jusum sipos hem i wantem fogivim hasban ya mo gohed blong stap wetem hem no i wantem lego hem. Sipos hem i wantem fogivim hasban blong hem mo gohed blong stap wetem hem, hemia i oraet nomo, hem i no mekem sin.​—⁠Hosea 1:​1-3; 3:​1-3.

Maet hasban we i slip olbaot i wantem mekem divos, be waef blong hem i wantem yet blong fogivim hem, i gat tingting se wan dei tufala i save stap tugeta bakegen. Waef ya i gat raet blong jus. Folem tingting we i stap jajem hem mo samting ya we i hapen, hem i save jusum sipos hem i wantem putum bisnes ya long kot no nogat. Long sam ples, woman we i putum bisnes ya long kot i save saenem sam pepa we oli givim raet long hem blong kea long ol pikinini blong hem mo givhan long olgeta long saed blong mane. Long ol pepa olsem, i no gat tok we i soemaot se hem i agri long divos we hasban blong hem i mekem. Taem hem i saenem ol pepa ya, hemia i no min se hem i no moa wantem man ya. Be long sam narafala ples, wan waef we i talem se hem i putum bisnes ya long kot, maet oli askem hem blong saenem wan pepa we i talem se hem i agri wetem divos ya. Sipos hem i saen long pepa ya, hem i soem klia se hem i no moa wantem hasban blong hem we i mekem nogud.

Blong blokem ol rong tingting we i save kamaot, i gud se waef i raetemdaon bisnes ya long pepa mo givim long ol elda long kongregesen blong talemaot wanem we hem i bin mekem mo risen from wanem hem i mekem olsem. Waef ya i save eksplenem se hem i bin talem long hasban blong hem se hem i rere blong fogivim hem mo blong stap olsem waef blong hem. Hemia i min se waef ya i no agri long divos we hasban blong hem i mekem. Waef ya i rere yet blong fogivim hem. Afta we hem i mekem i klia se hem i rere blong fogivim hasban blong hem mo stap olsem waef blong hem, hem i save saenem ol pepa blong stretem ol samting we hasban blong hem i mas pem. Taem hem i saenem ol pepa ya, hem i no min se hem i no moa wantem man blong hem. *

Sipos waef i rere blong fogivim man blong hem, nating se tufala i divos finis, wanwan long tufala i no gat raet blong mared bakegen wetem wan narafala. Nao sipos waef we i no gat fol i rere blong fogif, be man blong hem i no wantem, nao biaen waef ya i jus blong sakemaot man from we man ya i slip olbaot, naoia tufala tugeta i fri blong mared bakegen. Jisas i soem se hemia we i no gat fol i gat raet blong mekem wan disisen olsem.​—⁠Matiu 5:​32; 19⁠:9; Luk 16⁠:18.

[Futnot]