?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Wanem i stamba rod blong stretem wan rao wetem narafala?

Fastaem yumi mas luksave se yumi evriwan i save mestem long tingting mo fasin blong yumi. Biaen yumi mas save se maet yumi, be i no narafala, we i stamba blong problem ya.​—⁠8/15, pej 23.

• ?Wetaem bambae taem blong mekem “olgeta samting oli kam niuwan bakegen,” we Ol Wok 3⁠:21 i tokbaot i kamtru?

Taem ya blong mekem olgeta samting oli kam niuwan bakegen i kamtru long tu fasin. Fastaem, olgeta samting oli kam niuwan bakegen long wan paradaes long saed blong spirit stat long 1919. Sekenwan, bambae i kamtru taem wol ya i kam olsem wan paradaes bakegen.​—⁠9/1, pej 17, 18.

• ?Olsem wanem ol anis oli no gat bos blong olgeta, olsem we Ol Proveb 6⁠:​6-8 i talem, mo samting ya i givim wan gudfala eksampol long yumi?

Long wan bigfala grup blong ol anis, i gat wan kwin, be hem i kwin nomo from we hem i givim ol eg mo hem i mama long grup blong ol anis ya. Ol anis oli wokhad, mo i gud we yumi mekem sem mak, taem yumi wokhad mo traem blong kamgud moa long wok blong yumi, nating se wan man i wajem yumi no nogat.​—⁠9/15, pej 26.

• ?From we Josaea i kasem bigfala kil long faet, i stret we profet tok blong Hulda we i stap long 2 King 22⁠:20 i talem se Josaea bambae i “gat gudfala laef gogo [i] ded”?

Yes, hem i ded long pis from we hem i ded bifo we bigfala trabol i kamtru long 609-607 B.K.T., long taem we ol man Babilon oli kam raonem mo spolemgud Jerusalem.​—⁠9/15, pej 30.

• ?Olsem wanem i stret nomo we Solomon i tokbaot wan waef olsem “wan naesfala nani”? (Ol Proveb 5:​18, 19, NW )

Bodi blong woman nani no nani blong hil i strong, i isi nomo blong muvmuf. Hem i save laef mo bonem pikinini long ol bigfala klif long ston we i had blong kasem kakae.​—⁠10/1, pej 30, 31.

• ?Hu ya Henry Grew mo George Storrs?

Tufala man ya oli laef long ol yia 1800 mo oli laekem blong mekem dip stadi long Baebol. Grew i lanem se Triniti i no stanap long Baebol. Hem i lanem tu se sol we i no save ded mo ol tijing blong helfaea, oli no kamaot long Baebol. Storrs i luksave se i gat sam man we bambae oli laef blong olwe long wol ya. Tufala tugeta i laef bifo we Charles Taze Russell i stat blong raetem magasin ya long 1879.​—⁠10/15, pej 26-​30.

• ?Wanem tingting blong ol Witnes blong Jeova long rod we sam dokta oli stap mekem blong tekemaot blad blong wan man mo biaen oli putumbak insaed long bodi blong man ya?

Folem bilif blong olgeta we i stanap long Baebol, oli no letem we dokta i karemaot blad blong olgeta mo biaen i putumbak blad ya long bodi blong olgeta. Wanwan Kristin i mas mekem disisen long saed blong hem wan olsem wanem bambae oli yusum blad blong hem taem dokta i katem hem, jekemap hem, no folem wan narafala rod blong winim sik blong hem. Kristin ya i mas tingbaot wanem we Baebol i talem long saed blong blad mo hem i mas tingbaot tu se hem i givim fulwan laef blong hem i go finis long God.​—⁠10/15, pej 30, 31.

• ?Wan stadi we oli mekem long stat blong yia ya i soemaot wanem impoten samting we ol Witnes blong Jeova raon long wol oli nidim?

Oli nidim moa long 11,000 Haos Kingdom long ol pua kantri, we oli no gat plante mane. Ol presen mane we ol Kristin long plante kantri oli givim, oli givhan blong bildim inaf ples blong miting.​—⁠11/1, pej 30.

• ?Wanem sam long ol olfala Grik tok we Baebol i yusum long saed blong wosip?

Wan hemia lei·tour·giʹa we i minim se “pablik savis.” Narawan hemia la·treiʹa we i minim se mekem “tabu wok.” (Hibrus 10⁠:11; Luk 2:​36, 37)​—⁠11/15, pej 11-​13.

• ?Wanem wan bigfala samting we yumi save lanem long stori blong Baebol long saed blong Adam mo Iv?

Ol kaen fasin blong no wantem dipen long God i krangke nomo.​—⁠11/15, pej 24-​7.

• ?Wanem pruf long Baebol we i soemaot se God i stap givim paoa long ol man blong hem?

Deved, Habakuk, mo aposol Pol, olgeta wanwan oli tokbaot ol pruf we i soem se Jeova God i bin givim paoa long olgeta. (Ol Sam 60⁠:12; Habakuk 3:​19; Filipae 4:​13) From samting ya, yumi sua se God bambae i glad blong mekem yumi strong.​—⁠12/1, pej 10, 11.