Finisim Ol Trabol Blong Faet

ABRAHAM i joen long ami blong wan rebel grup blong 20 yia finis. * Be, hem i no moa mekem faet mo bambae hem i neva go long wan faet bakegen. Tru ya, sam man we bifo oli enemi blong hem, be naoia oli kam ol fren blong hem. ?Wanem i mekem se hem i jenis? Baebol nomo i mekem olsem. Baebol i givim hop mo fasin luksave long Abraham, mo i halpem hem blong lukluk ol problem blong man olsem we Jeova i lukluk olgeta. Baebol i karemaot tingting ya we hem i gat blong wantem faet, mekem se ol soasore, fasin kros mo fasin agens we hem i gat oli lus. Hem i faenem se Baebol i olsem wan strongfala meresin we i save mekem hat blong man i kamgud bakegen.

?Olsem wanem nao Baebol i save givhan long wan man, blong karemaot ol filing we i trabol? Baebol i no save jenisim samting we i bin hapen long Abraham. Nating se i olsem, taem hem i ridim mo i tingting dip long Tok blong God, samting ya i givhan blong mekem tingting blong hem i laenap wetem wanem we Man ya We i Wokem olgeta samting i wantem. Naoia hem i gat wan hop blong fiuja, mo i gat sam niufala samting we oli stap fasples long laef blong hem. Ol samting we oli impoten long ae blong God, oli kam impoten long hem. Long rod ya, ol trabol we oli stap long hat blong hem oli stat blong finis. Hemia nao samting we i bin givhan long Abraham blong i jenis.

Joen Long Faet

Abraham i bon long Afrika long ol yia 1930. Afta long namba tu bigfala faet blong wol, wan narafala kantri klosap long ples blong hem, i rul antap long olgeta. Be plante long ol man long ples blong Abraham oli wantem kasem independens. Long 1961, Abraham i joen wetem wan grup blong ol man mo oli mekem faet agensem narafala kantri ya we i rul long olgeta.

Abraham i eksplenem se: “Oli enemi blong mifala. Oli mekem plan blong kilim mifala, taswe mifala i go blong kilim olgeta.”

Plante taem, laef blong Abraham i stap long denja, taswe long 1982, afta we hem i joen long faet ya blong 20 yia, hem i ronwe i go long Yurop. Long taem ya hem i gat moa long 40 yia finis, mo hem i gat taem nao blong skelemgud laef blong hem. ?Wanem i hapen long ol hae mak we hem i wantem kasem? ?Wanem nao fiuja blong hem? Abraham i mitim sam long ol Witnes blong Jeova mo i stat blong go long ol miting blong olgeta. Hem i rimemba se sam yia bifo, long Afrika, hem i ridim wan traket we wan Witnes i bin givim long hem. Traket ya i tokbaot wan paradaes we bambae i stap long wol ya, mo wan gavman long heven we bambae i rul antap long ol man. ?Samting ya i rili tru?

Abraham i talem se: “Stadi blong mi long Baebol, i mekem mi luksave  se mi bin westem olgeta yia ya we mi spenem blong faet. I gat wan gavman nomo we bambae i save mekem i stret long olgeta man, hemia Kingdom blong God.”

I no longtaem afta we Abraham i baptaes olsem wan Witnes blong Jeova, wan man we nem blong hem Robert i ronwe long Afrika blong kam stap long taon ya long Yurop we Abraham i stap long hem. Robert mo Abraham tufala i bin joen long sem faet, be tufala i blong tu defren saed. Oltaem Robert i stap tingbaot mining blong laef. Hem i wan man blong skul, mo from we hem i ridim sam haf blong Baebol finis hem i save se nem blong God hem i Jeova. Taem ol Witnes blong Jeova, oli askem blong givhan long Robert blong hem i kasem save moa long Baebol, hem i agri nomo.

Robert i eksplenem se: “Fastaem finis, mi sapraes long fasin we ol Witnes oli yusum nem blong Jeova mo Jisas, mo olsem wanem oli soemaot long ol man se tufala ya oli tu defren man. Samting ya i laenap wetem wanem we mi lanem finis long Baebol. Ol Witnes oli werem ol gudfala klos mo oli soem kaen fasin long ol narafala, nating se oli blong wanem kantri. Olgeta samting ya oli gat bigfala paoa long mi.”

Ol Enemi Oli Kam Fren

Robert mo Abraham, we bifo oli enemi, naoia oli kam gud fren. Naoia tufala i man blong prij fultaem mo tufala i stap long sem kongregesen blong ol Witnes blong Jeova. Abraham i eksplenem se: “Long taem blong faet, oltaem mi stap tingting se olsem wanem nao ol man we kantri blong olgeta i kloklosap nomo​—⁠mo we plante oli blong sem skul nomo​—⁠oli wantem agensem narawan. Mi mo Robert i blong sem jos, nating se i olsem, mitufala i faet agensem mitufala. Naoia mitufala i kam Witnes blong Jeova, mo bilif blong mitufala i joenem mitufala.”

Robert i gohed i se: “Hemia nao samting we i defren olgeta. Naoia mitufala i gat wan bilif we i mekem se mitufala i joen wetem kampani blong ol trufala brata long ful wol. Bambae mifala i no moa go faet bakegen.” Baebol i bin gat paoa blong jenisim hat blong olgeta ya we bifo oli enemi. Fasin blong trastem narafala mo blong frengud wetem narafala, i tekem ples blong fasin agens mo fasin blong no laekem narafala nating.

Long sem taem we Abraham mo Robert tufala i stap faet, i gat tu narafala yangfala man blong tu defren kantri klosap we tufala tu i joen long wan narafala faet. I no longtaem, Baebol i wok olsem wan strongfala meresin blong mekem hat blong tufala i kamgud. ?Olsem wanem?

Kilim Man i Ded​—⁠Rere Blong Lusum Laef From Kantri

Gabriel i gruap long wan famle we i bilif long God mo oli tijim hem se kantri blong hem i stap long wan tabu faet. Taswe, taem hem i gat 19 yia, hem i wantem joen long wok blong ami mo hem i askem blong oli save sanem hem i go blong faet. Hem i stap 13 manis long ples we faet i strong tumas, mo samtaem ol enemi oli stap wan kilometa haf nomo longwe long hem. Hem i talem se: “Mi rimemba gud samting we i bin hapen wan taem. Komanda blong mifala i talem long mifala se ol enemi bambae oli kam mekem faet long naet ya. Mifala i fraet tumas mekem se mifala i sut wetem masket blong mifala long fulnaet we mifala i no stop.” Hem i luk ol man blong kantri ya we i stap klosap, olsem ol enemi blong hem we i stret nomo blong oli ded. “Tingting blong mi se sipos i gat rod blong mekem, mi mas kilim plante man i ded. Biaen mi wantem mekem olsem plante long ol fren blong mi, we oli lusum laef from kantri blong mifala.”

Be sloslou Gabriel i no moa bilif long samting ya. Hem i  ronwe i go long ol hil, hem i haed blong gokros long wan kantri we i no gat faet long hem, nao hem i go long Yurop. Hem i gohed blong askem God from wanem laef i strong tumas, mo se sipos olgeta problem oli olsem panis we i kam long God. Hem i mitim ol Witnes blong Jeova, mo oli soem long hem insaed long Baebol from wanem laef tede i fulap long ol problem.​—⁠Matiu 24⁠:​3-14; 2 Timoti 3:​1-5.

Taem Gabriel i gohed blong lanem moa samting long Baebol, hem i luksave moa se trutok i stap long buk ya. “Mi lanem se yumi save laef blong olwe long wan paradaes wol. Samting we i narakaen olgeta, se hemia nao wanem we mi bin laekem tumas taem mi pikinini yet.” Baebol i mekem Gabriel i haremgud mo i karemaot trabol soa we i bin stap long hat blong hem. Ol dip filing blong hem we oli trabol oli stat blong kamgud. Nao long taem ya we Gabriel i mitim Daniel, enemi blong hem bifo, hem i no moa tingting blong agensem hem. ?Be wanem nao i mekem Daniel i kam long Yurop?

“!Sipos Yu Rili Stap, Plis Halpem Mi!”

Daniel i gruap olsem wan Katolik, mo taem hem i gat 18 yia oli singaotem hem blong joen long wok blong ami. Oli sanem hem blong faet long sem faet ya we Gabriel i joen long hem, be long defren saed. Wan taem, Daniel i draevem bigfala trak blong faet i go klosap long ples we faet i stap gohed, nao ol enemi oli sakem wan bom long olgeta. Ol fren blong hem oli ded, hem i kasem bigfala kil mo ol enemi oli tekem hem, oli putum hem long kalabus. Hem i spenem plante manis long hospital mo long wan kalabus, biaen oli sanem hem i go long wan kantri we i no joen long faet ya. Hem i tingting blong kilim hem wan i ded from we hem i stap hem wan mo hem i lusum olgeta samting blong hem. Daniel i prea long God i se: “!Sipos yu rili stap, plis halpem mi!” Long nekis dei nomo, ol Witnes blong Jeova oli kam storian wetem hem mo oli ansa long plante kwestin we hem i gat. Biaen hem i go long Yurop olsem wan refuji. Bakegen long ples ya, Daniel i joen wetem ol Witnes mo i stadi Baebol. Samting we hem i lanem i mekem se wari blong hem mo fasin blong hem blong no laekem narafala i godaon.

Naoia Gabriel mo Daniel oli kam gud fren, oli joengud olsem ol brata long saed blong spirit mo oli baptaes olsem ol Witnes blong Jeova. Gabriel i talem se: “Lav we mi gat long Jeova mo save blong mi long saed blong Baebol i givhan long mi blong luk ol samting olsem hem. Daniel i no moa enemi blong mi. Sam yia bifo bambae mi glad nomo blong kilim hem. Be Baebol i tijim mi blong mekem i defren​—⁠naoia mi rere blong ded from hem.”

Daniel i talem se: “Mi bin luk ol man blong ol defren skul mo kantri oli stap kilkilim olgeta. Mo i gat ol man long tufala saed long faet ya we oli blong sem skul nomo, be oli stap kilkilim olgeta. Taem mi luk samting ya, mi harem olsem se hemia i fol blong God. Naoia mi save se Setan nao i stamba blong olgeta faet ya. Mi mo Gabriel, mitufala i kam ol man blong bilif we oli frengud. !Bambae mitufala i neva faet bakegen!”

“Tok Blong God i Wan Samting We i Laef, Mo i Stap Wok”

?From wanem nao Abraham, Robert, Gabriel, mo Daniel oli mekem ol bigfala jenis olsem? ?Olsem wanem nao oli naf blong karemaot fasin agens mo soasore we i stap longtaem finis long hat blong olgeta?

 Wanwan long ol man ya oli ridim, tingting dip mo lanem ol trutok long Baebol, we “i laef, mo i stap wok.” (Hibrus 4:​12) Bigfala Man ya We i Wokem ol man hem nao i stamba blong Baebol. Hem i save olsem wanem blong pulum hat blong wan man i go long gudfala rod sipos man ya i rere blong lesin mo lanem samting. “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” Taem wan man i letem Baebol i lidim hem, hem i gat ol niufala fasin mo hem i folem ol niufala rul long laef. Hem i stat blong lanem olsem wanem Jeova i tingbaot ol samting. Rod ya i karem plante gudfala frut, mo hem i karemaot ol trabol soa we faet i mekem long man.​—⁠2 Timoti 3:​16.   

Tok blong God i soem se i no gat wan kantri, kala, no laen we i moa gud i bitim ol narawan no we i moa nogud long narafala. “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem.” Man we i ridim Baebol mo i agri wetem ol tok ya, bambae hem i save winim ol filing we bifo hem i bin gat blong agensem narafala from kala no laen.​—⁠Ol Wok 10⁠:​34, 35.

Ol profet tok blong Baebol oli soemaot we God bambae i mekem se Kingdom blong Mesaea i tekem ples blong rul blong man. God bambae i yusum gavman ya blong “mekem ol faet i finis long olgeta ples long wol.” Bambae hem i karemaot ol ogenaesesen we oli mekem ol faet mo oli stap pusum ol man blong joen long ol faet ya. Ol man we oli ded from faet bambae oli laef bakegen mo bambae oli gat janis blong laef long wan paradaes wol. Bambae oli no moa ronwe long wan man we i agensem olgeta no wan man we i mekem i strong tumas long olgeta.​—⁠Ol Sam 46⁠:9; Daniel 2:​44; Ol Wok 24⁠:15.

Baebol i tokbaot ol man we bambae oli laef long taem ya se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesin blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem . . . Ol wok we bambae oli stap mekem, bambae oli save go gud, mo bambae i no gat trabol i kasem ol pikinini blong olgeta.” Bambae i no moa gat wan samting we i bagarap no man we i kasem bigfala kil, evri samting bambae i kamgud bakegen. Taem man i bilif long wan hop olsem, sloslou samting ya bambae i save karemaot ol trabol soa we oli stap long hat blong hem.​—⁠Aesea 65⁠:​21-23.

I tru se Baebol hem i wan nambawan meresin blong hat blong man. Ol tijing blong hem oli stat finis blong karemaot ol trabol we faet i bin mekem long man. Ol man we bifo oli enemi, naoia oli joengud olsem ol brata long ful wol. Rod ya blong mekem olgeta samting i kam gud bakegen, bambae i gohed kasem niufala wol blong God, taem we bambae i no moa gat fasin agens mo fasin blong no laekem narafala mo ol trabol soa insaed long hat blong ol man. Man We i Wokem olgeta samting i promes se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.”​—⁠Aesea 65⁠:17.

[Futnot]

[Tok blong makem poen long pej 4]

“Stadi blong mi long Baebol i mekem mi luksave se mi bin westem olgeta yia ya we mi spenem blong faet”

[Tok blong makem poen long pej 5]

Baebol i save gat paoa blong jenisim hat blong olgeta we bifo oli enemi

[Tok blong makem poen long pej 6]

Fasin blong trastem narafala mo blong frengud wetem narafala, i tekem ples blong fasin agens mo fasin blong no laekem narafala nating

[Tok blong makem poen long pej 6]

Taem wan man i letem Baebol i lidim hem, hem i gat ol niufala fasin mo hem i folem ol niufala rul long laef

[Tok blong pija long pej 7]

Ol man we bifo oli enemi, naoia oli stap joengud olsem ol brata long ful wol

[Foto Credit Line blong pija long pej 4]

Refugee camp: UN PHOTO 186811/J. Isaac