Lav i Mekem Yumi Kam Strong Moa
Lav i Mekem Yumi Kam Strong Moa
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”—MATIU 22:37.
1. (a) ?Wanem sam fasin we wan Kristin i mas gat? (b) ?Weswan Kristin fasin i moa impoten, mo from wanem?
WAN Kristin i mas mekem plante samting sipos hem i wantem kam wan gudfala man blong wok blong God. Buk blong Ol Proveb i talem se i impoten tumas blong gat save, fasin blong harem save, mo waes. (Ol Proveb 2:1-10) Aposol Pol i tokbaot from wanem ol Kristin oli nidim strongfala bilif mo strongfala hop. (Rom 1:16, 17; Kolosi 1:5; Hibrus 10:39) Mo tu, i impoten tumas blong wan Kristin i mekem tingting blong hem i longfala mo blokem ol samting we hem nomo i wantem. (Ol Wok 24:25; Hibrus 10:36) Be, i gat wan samting yet i stap. Sipos wan Kristin i no gat samting ya, bambae ol narafala gudfala fasin blong hem oli blong nating nomo. Samting ya, hemia lav.—1 Korin 13:1-3, 13.
2. ?Olsem wanem Jisas i soem se lav i impoten tumas, mo samting ya i stanemap wanem kwestin?
2 Jisas i soem se lav i impoten tumas taem hem i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Lav nao i makemaot wan trufala Kristin, from samting ya yumi mas askem ol kwestin ya se: ?Wanem ya lav? ?From wanem hem i impoten tumas, mekem se Jisas i talem se hemia faswan fasin we i makemaot ol disaepol blong hem? ?Olsem wanem blong gat lav ya? ?Yumi mas soemaot lav ya long hu? I gud yumi tokbaot ol kwestin ya.
?Wanem Ya Lav?
3. ?Yumi save talem se lav i olsem wanem, mo from wanem tingting mo hat tufala i joen wetem fasin ya?
3 Wan mining blong lav hemia ‘filing we i mekem man i joengud wetem narafala mo i laekem tumas narafala, lav i wan filing we i mekem man i tinghae mo i gat gudfala tingting long narafala.’ Lav i pulum man blong mekem i gud long ol narafala, nating sipos samtaem, hem i mas lego plante samting long laef blong hem. Lav we Baebol i tokbaot, hem i joen wetem tingting mo hat wantaem. Yumi save talem se lav i joen wetem tingting from we taem wan man i soem lav, hem i mekem olsem wetem save. Hem i luksave se hem wetem ol narafala man we hem i lavem olgeta, olgeta evriwan oli gat sam slak fasin mo oli gat sam gudfala fasin tu. Mo lav i mas joen wetem tingting from we wan Kristin i mas soem lav long sam man we i no isi nating blong lavem olgeta, be hem i mas mekem olsem from we hem i save se long Baebol, God i wantem we hem soem lav. (Matiu 5:44; 1 Korin 16:14) Be, lav i wan fasin we i kamaot fastaem long hat. Trufala lav we Baebol i tokbaot, hem i neva kamaot long tingting nomo. Man we i gat lav, hem i no gat tu fes mo hem i soemaot ol trufala filing long narafala.—1 Pita 1:22.
4. ?Olsem wanem lav i gat paoa blong joenemgud olgeta samting?
4 Ol man we oli tingbaot olgeta nomo, oli no save soemaot trufala lav mo oli no save frengud wetem narafala. Hemia from we, man we i gat lav, hem i rere blong lukaot long laef blong narafala fastaem long prapa laef blong hem wan. (Filipae 2:2-4) Jisas i talem se, “Man we i stap givim presen i go, hem i save harem gud moa, i winim man we i stap kasem presen blong hem.” Ol tok ya oli tru tumas taem lav nao i pusum man blong givim presen. (Ol Wok 20:35) Lav i gat paoa blong joenemgud olgeta samting. (Kolosi 3:14) Plante taem, lav i pulum ol man blong fren gud. Be, paoa blong lav i strong moa i winim fasin fren nomo. Yumi save talem se fasin fren we wan hasban i gat wetem waef blong hem, hemia nao lav. Be, lav we Baebol i pulum yumi blong wokem, hem i bigwan moa i winim lav we i stanap long naesfala fes mo bodi. Taem hasban mo waef tufala i lavlavem tufala, tufala i save stap tugeta nating sipos tufala i sik no tufala i kam olfala.
Lav—Wan Fasin We i Impoten Tumas
5. ?From wanem lav i wan impoten fasin we ol Kristin oli mas gat?
5 ?From wanem i impoten tumas we ol Kristin oli gat lav? Faswan risen, hemia from we Jisas i talem long ol man blong hem se oli mas lavlavem olgeta. Hem i se: “Sipos yufala i stap mekem ol samting we mi mi talem long yufala, yufala i fren blong mi. Loa ya we mi mi givim long yufala i olsem, se yufala i mas lavlavem yufala.” (Jon 15:14, 17) Seken risen, hemia from we Jeova hem wan i stamba blong lav, mo ol man we oli wosipim hem, olgeta tu oli mas gat lav. (Efesas 5:1; 1 Jon 4:16) Baebol i talem se, blong kasem laef we i no save finis, man i mas save Jeova mo Jisas. ?I stret blong talem se yumi save God, sipos yumi no folem fasin blong hem? Aposol Jon i talem se: “Man we i no save lavem narafala man, hem i no save God, from we God i stamba blong fasin ya blong lavem man.”—1 Jon 4:8.
6. ?Olsem wanem lav i save givhan long yumi blong skelem ol defren samting long laef blong yumi?
6 Be, i gat wan narafala risen bakegen we i soem se lav i impoten tumas. Lav i halpem yumi blong skelemgud ol samting long laef blong yumi mo i givim gudfala tingting long yumi long wanem we yumi stap mekem. Eksampol, i impoten tumas we oltaem, yumi kasem ol save we i stap long Tok blong God. Ol save ya i olsem kakae blong wan Kristin. Oli halpem Kristin ya blong kam bigman long tingting mo blong mekem ol samting we i laenap wetem tingting blong God. (Ol Sam 119:105; Matiu 4:4; 2 Timoti 3:15, 16) Nating se i olsem, Pol i givim woning se: “Save ya i stap mekem tingting blong man i go antap, i blong flas nomo. Be fasin ya we man i lavem God mo i lavem ol man, hem i stap leftemap laef blong man.” (1 Korin 8:1) I no rong blong kasem ol stret save. Samting we i rong, hemia ol slak fasin blong yumi we oli kamaot from sin. (Jenesis 8:21) Sipos wan man i no gat lav we i save pusum hem blong skelem ol samting, bigfala save blong hem bambae i mekem hem i flas mo i ting se hem i moa gud i winim ol narafala. Samting ya i no save hapen sipos man ya i letem lav i lidim hem. “Man we i stap lavem man, . . . [hem] i no save mekem tingting blong hem i go antap, mo i no save flas.” (1 Korin 13:4) Wan Kristin we i gat lav, hem i no save praod, nating sipos hem i gat bigfala save. Lav i mekem se hem i gat tingting daon mo i blokem hem blong no mekem samting we i blong leftemap hem nomo.—Ol Sam 138:6; Jemes 4:6.
7, 8. ?Olsem wanem lav i halpem yumi blong tingbaot ol samting we oli moa impoten?
7 Pol i raet i go long ol Kristin long Filipae se: “Mi mi stap prea we oltaem bambae yufala i save kam we yufala i stap lavlavem yufala moa. Mo mi prea we long fasin ya, oltaem bambae yufala i save kam waes moa, mo yufala i save luksave wanem fasin we i stret gud olgeta blong yufala i save jusumaot [“ol samting we oli moa impoten,” NW ].” (Filipae 1:9, 10) Kristin lav bambae i halpem yumi blong jusumaot ol samting we oli moa impoten. Eksampol, tingbaot ol tok ya we Pol i talem long Timoti: “Sipos wan man i wantem mekem wok blong elda long kongregesen, man ya i wantem wan gudfala wok.” (1 Timoti 3:1, NW ) Long sevis yia blong 2000, i gat 1,502 niufala kongregesen oli stanap, mekem se naoia i gat wan niufala namba blong 91,487 kongregesen long fulwol. Taswe, i nidim moa elda, mo i gud yumi leftemap tingting blong olgeta we oli stap traehad blong kasem nambawan wok ya.
8 Be, olgeta we oli wantem kasem wok ya blong lukaot long kongregesen, bambae oli save skelemgud ol samting sipos oli tingting oltaem long stamba risen blong wok ya. Paoa no haenem i no impoten. Ol elda we Jeova i glad long olgeta, oli mas lavem Jeova mo ol brata blong olgeta. Oli no traem blong leftemap olgeta no blong bos long ol narafala. Aposol Pita i talem long ol elda blong kongregesen se oli mas holem gudfala fasin, mo oli mas ‘mekem tingting blong olgeta i stap daon.’ Hem i givim advaes long evriwan insaed long kongregesen se: “God i gat paoa, mo yufala i mas putum yufala i stap daon, aninit long han blong hem.” (1 Pita 5:1-6) Man we i wantem kam wan elda, hem i mas tingbaot eksampol blong plante elda raonabaot long wol we oli stap wok had, oli gat tingting daon, mo from samting ya, oli kam olsem wan blesing long kongregesen blong olgeta.—Hibrus 13:7.
Gudfala Tingting i Mekem Yumi Stanap Strong Longtaem
9. ?From wanem ol Kristin oli tingbaot ol promes blong Jeova oltaem?
9 I gat wan narafala samting we i soemaot se i impoten tumas blong letem lav i lidim yumi. Baebol i promes se olgeta we oli wosip long God from we oli lavem hem, bambae oli kasem bigfala blesing naoia mo ol nambawan blesing long fiuja. (1 Timoti 4:8) Wan Kristin we i bilif strong long ol promes ya, mo i sua fulwan se Jeova “i stap mekem i gud long olgeta we oli stap traem faenem hem,” bambae hem i save stanap strong mo holem bilif blong hem. (Hibrus 11:6) Plante long yumi i wantem tumas blong luk we ol promes blong God oli kamtru mo yumi gat sem filing olsem aposol Jon we i talem se: “Jisas, Masta, plis yu kam.” (Revelesen 22:20) Yumi save stanap strong longtaem sipos yumi tingting dip long ol blesing we bambae yumi kasem taem yumi holem bilif. Jisas tu i mekem olsem, hem i stanap strong longtaem from we “hem i luksave finis we bambae [hem] i save harem gud.”—Hibrus 12:1, 2.
10, 11. ?Olsem wanem lav i save givhan long yumi blong stanap strong longtaem?
10 ?Olsem wanem sipos yumi stap mekem wok blong Jeova jes from we yumi wantem laef long niufala wol? Sipos yumi gat tingting olsem, kwiktaem nomo bambae yumi lusum longfala tingting mo glad, taem hadtaem i kam, no ol samting oli no hapen olsem we yumi wantem. Denja i stap nao se, yumi save lusum rod isi nomo. (Hibrus 2:1; 3:12) Pol i tokbaot wan fren blong hem bifo, nem blong hem Demas, we biaen i lego hem. ?From wanem Demas i lego Pol? From we Demas i “laekem tumas ol samting blong laef long wol ya.” (2 Timoti 4:10) Man we i mekem wok blong God jes blong kasem samting we hem wan i wantem, bambae hem i foldaon long sem trap we Demas i foldaon long hem. Ol man ya, maet oli letem ol samting blong wol i pulum olgeta, nao oli no moa rere blong lego ol samting we olgeta nomo i wantem, blong kasem ol blesing we bambae i kamaot long fiuja.
11 I stret nomo blong wantem kasem blesing long fiuja mo blong wantem kam fri long ol hadtaem we yumi stap fesem. Be, lav i mekem yumi tinghae moa long samting we i impoten tumas long laef blong yumi. Impoten samting ya, hemia wanem we Jeova i wantem, be i no wanem we yumi nomo i wantem. (Luk 22:41, 42) Yes, lav i mekem yumi strong. Hem i mekem se yumi glad nomo blong wet long God wetem longfala tingting, mo i mekem yumi glad long wanem blesing we hem i givim naoia. Mo lav i mekem yumi sua se long stret taem blong hem, bambae yumi kasem olgeta samting we God i promes blong givim—wetem plante moa blesing bakegen. (Ol Sam 145:16; 2 Korin 12:8, 9) Be bifo long taem ya, lav i halpem yumi blong mekem wok blong God we yumi no tingbaot yumi nomo, from we ‘man we i stap lavem man . . . hem i no save tingbaot hem nomo.’—1 Korin 13:4, 5.
?Ol Kristin Oli Mas Lavem Hu?
12. ?Olsem Jisas i talem, yumi mas lavem hu?
12 Taem Jisas i tokbaot tufala haf blong Loa blong Moses, hem i givim wan rul, i talemaot klia hu nao yumi mas lavem. Hem i talem se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu” mo, “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”—Matiu 22:37-39.
13. ?Olsem wanem yumi save lanem blong lavem Jeova, nating se yumi no save luk hem?
13 Tok blong Jisas i soemaot klia se fastaem yumi mas lavem Jeova. Be, taem yumi bon, lav ya we yumi gat long Jeova i no fulwan yet. Hemia wan fasin we yumi mas wokem. Long faswan taem we yumi harem nius long saed blong hem, nius ya i pulum yumi i kam long hem. Sloslou, yumi lanem olsem wanem hem i bin rerem wol ya blong olgeta man. (Jenesis 2:5-23) Yumi lanem se, taem sin i kasem olgeta man, Jeova i no sakemaot yumi be i wokem rod blong pemaot yumi. (Jenesis 3:1-5, 15) Hem i mekem i gud tumas long olgeta we oli stap tru long hem, mo biaen hem i givim stret Pikinini blong hem, wan nomo we hem i gat, blong mekem rod blong fogivim ol sin blong yumi. (Jon 3:16, 36) Ol save ya we yumi kasem, oli mekem se yumi gat bigfala tangkiu long Jeova. (Aesea 25:1) King Deved i talem se hem i lavem Jeova from we Hem i gat lav mo i keagud long ol man. (Ol Sam 116:1-9) Tede, Jeova i keagud long yumi, hem i stap lidim yumi, i stap givim paoa long yumi, mo i stap leftemap tingting blong yumi. Taem yumi kasem moa save long saed blong hem, bambae lav we yumi gat long hem i kam moa strong.—Ol Sam 31:23; Sefanaea 3:17; Rom 8:28.
?Olsem Wanem Blong Soem Lav?
14. ?Yumi save mekem wanem blong soemaot se yumi rili lavem God?
14 Plante man long wol ya oli talem se oli lavem God, be fasin blong olgeta i soem se tok blong olgeta i no tru. ?Olsem wanem blong luksave sipos yumi rili lavem Jeova? Yumi save toktok wetem hem long prea mo talemaot filing blong yumi long hem. Mo yumi save mekem ol fasin we oli soemaot se yumi lavem hem tumas. Aposol Jon i talem se: “Man we i stap folem ol tok blong God, hemia man we i lavem God long fasin we i stret gud. . . . Fasin ya i soemaot we yumi savegud se laef blong yumi i stap joen gud long laef blong God.” (1 Jon 2:5; 5:3) Long olgeta samting we Tok blong God i talem long yumi, yumi faenem advaes ya se yumi mas joen tugeta long ol miting mo gat wan laef we i klin, i folem ol stret fasin. Yumi no mas gat tu fes, be yumi mas talem trutok, mo holem tingting we i klin oltaem. (2 Korin 7:1; Efesas 4:15; 1 Timoti 1:5; Hibrus 10:23-25) Yumi soem lav taem yumi givim samting we narafala i nidim long laef. (1 Jon 3:17, 18) Mo yumi no letem wan samting i blokem yumi blong tokbaot Jeova long ol narafala man. Hemia i min se yumi joen long wok blong talemaot gud nius blong Kingdom long olgeta ples long wol. (Matiu 24:14; Rom 10:10) Taem yumi obei long olgeta samting we Tok blong God i talem, yumi pruvum se yumi rili lavem Jeova.
15, 16. ?Long yia we i pas, olsem wanem fasin blong lavem Jeova i gat paoa long laef blong plante man?
15 Taem man i lavem Jeova, samting ya i halpem hem blong mekem ol gudfala disisen. Las yia, lav i pusum 288,907 man mo woman blong givim laef blong olgeta i go long Jeova mo oli tekem baptaes. (Matiu 28:19, 20) Fasin ya we oli givim laef blong olgeta long God, i gat bigfala mining. Hem i makem wan jenis long laef blong olgeta. Tingbaot eksampol blong Gazmend. Hem i wan long ol top man blong plei basketbol long Albania. Hem mo waef blong hem, tufala i stadi Baebol blong sam yia, mo nating se tufala i fesem plante traem, tufala i joen long wok blong talemaot gud nius blong Kingdom. Las yia, Gazmend i tekem baptaes. Hem i wan long ol 366 man Albania we oli baptaes long sevis yia blong 2000. Wan niuspepa i tokbaot hem i se: “Laef blong hem i gat mining, mo from samting ya, hem mo famle blong hem oli haremgud long wan laef we i hapi moa i bitim bifo. Naoia hem i no moa tingbaot hamas samting we hem i save kasem long laef, be hem i stap tingbaot hamas samting we hem i save givim long narafala blong givhan long olgeta.”
16 Tingbaot wan sista long Guam, we hem i jes tekem baptaes. Sista ya i wok long wan kampani blong mekem oel mo oli givim wan wok long hem we i traem hem bigwan. Long ol yia we oli pas, hem i bin kasem gudnem long wok blong hem, nao hem i gat janis blong kam vaes presiden blong kampani ya mo hem i faswan woman blong stap olsem presiden blong kampani ya. Be long taem ya, hem i givim laef blong hem finis i go long Jeova. Afta we hem i tokbaot samting ya wetem hasban blong hem, sista ya i mekem disisen blong no tekem wok ya. Hem i mekem plan blong faenem wan haftaem wok, olsem nao hem i save joen long wok blong fultaem paenia. Lav we hem i gat long Jeova i pulum hem blong wantem mekem wok ya blong Jeova, be i no blong ronem ol sas samting blong wol ya. Yes, lav ya i pulum 805,205 man raon long wol blong joen long ol defren haf blong wok blong paenia long sevis yia blong 2000. !Hemia wan nambawan rod we olgeta ya oli jusum blong soemaot lav mo bilif blong olgeta long God!
Gat Lav Long Jisas
17. ?Wanem nambawan eksampol blong lav we Jisas i soemaot long yumi?
17 Jisas i wan nambawan eksampol long fasin blong wok wetem lav. Bifo we hem i kam long wol, hem i lavem tumas Papa blong hem mo i lavem olgeta man. Hem i stret pija blong waes, hem i talem se: “Mi stap klosap long Jeova, mi olsem nambawan man blong wok blong hem. Evri dei, mi stap kam fulap moa long glad, mo oltaem mi stap haremgud long fored blong hem. Mi glad long gudfala graon blong wol blong hem. Mo mi mi glad tumas long ol pikinini blong man.” (Ol Proveb 8:30, 31, NW ) Lav blong Jisas i pulum hem blong lego laef blong hem long heven mo i bon long wol ya olsem wan smol bebi. Hem i gat longfala tingting mo i kaengud long ol man we oli gat tingting daon mo we oli stap safa long han blong ol enemi blong Jeova. Ale, hem i harem nogud bigwan, i ded long pos blong sevem olgeta man. (Jon 3:35; 14:30, 31; 15:12, 13; Filipae 2:5-11) !Hemia wan nambawan eksampol we yumi save folem! !Stret tingting nao i mas pusum yumi blong wok!
18. (a) ?Olsem wanem yumi save gat lav long Jisas? (b) ?Yumi save mekem wanem blong soemaot lav ya?
18 Taem ol man we hat blong olgeta i stret, oli ridim ol stori blong Jisas long ol Gospel mo oli tingting dip long ol blesing we yumi kasem from we Jisas i bin holemstrong long God, samting ya i save mekem se lav we ol man ya oli gat long Jisas i kam bigwan moa. Tede, yumi i olsem ol man ya we Pita i tokbaot olgeta, i se: “Nating we yufala i no luk Jisas Kraes samtaem, be yufala i lavem hem.” (1 Pita 1:8) Yumi soem lav long Jisas taem yumi bilif long hem mo folem eksampol blong hem, long saed ya we yumi no tingbaot yumi nomo. (1 Korin 11:1; 1 Tesalonaeka 1:6; 1 Pita 2:21-25) Long Eprel 19, 2000, i gat 14,872,086 man we oli tingtingbak long risen from wanem yumi mas lavem Jisas. Ol man ya oli bin joen long Memoriol blong ded blong Jisas. !Hemia wan bigfala namba ya! Mo yumi kam strong moa taem yumi save se plante man oli wantem kasem sef from sakrefaes blong Jisas! Yes, lav we Jeova mo Jisas i gat long yumi mo lav we yumi gat long tufala, i mekem yumi kam strong moa.
19. ?Wanem ol kwestin long saed blong lav we bambae yumi tokbaot long nekis stadi?
19 Jisas i talem se yumi mas lavem Jeova wetem olgeta hat, olgeta laef, olgeta tingting, mo olgeta paoa blong yumi. Be tu, hem i talem se yumi mas lavem ol man raonabaot long yumi, yumi mas mekem i gud long olgeta olsem we yumi stap mekem long yumi. (Mak 12:29-31) ?Hemia i minim hu? ?Mo olsem wanem lav we yumi gat long ol man i save halpem yumi blong gat wan tingting we i skelgud mo wan gudfala tingting we i pusum yumi? Bambae yumi tokbaot ol kwestin ya long nekis stadi.
?Yu Yu Rimemba?
• ?From wanem lav i impoten tumas?
• ?Olsem wanem yumi save lanem blong lavem Jeova?
• ?Olsem wanem fasin blong yumi i pruvum se yumi lavem Jeova?
• ?Olsem wanem blong soemaot se yumi lavem Jisas?
[Kwestin]
[Tok blong pija long pej 10]
Lav i halpem yumi blong wet wetem longfala tingting blong kam fri long hadtaem
[Tok blong pija long pej 12]
Bigfala sakrefaes blong Jisas i pusum yumi blong lavem hem