Ol Witnes Blong Jeova—!Oli Stap Muf i Go Wetem Strong Tingting!

Miting Ripot We Oli Holem Evri Yia

LONG taem ya we ol man oli no save wanem bambae i hapen, ol Witnes blong Jeova oli ol Kristin we oli gat strong tingting. Pruf blong samting ya i kamaot klia long miting we Watch Tower Bible and Tract Society of Pennsylvania i stap mekem evri yia. Oli holem miting ya long Haos Asembli blong ol Witnes blong Jeova long Jersey Siti, New Jersey, long Sarede Oktoba 7, 2000. *

Jeaman blong program, hem i John E. Barr, wan memba blong Hed Kampani blong ol Witnes blong Jeova. Hem i openem miting ya wetem wan tok we i talem se: “I gat plante bilian man long wol, be yumi nomo i save mo i bilif se Jisas Kraes, Pikinini blong Jeova, we Jeova i lavem hem tumas, i stap sidaon long bigfala jea blong hem long heven, i stap rul long medel blong ol enemi blong hem.” Bambae yumi luk sikis nambawan ripot we i kamaot raonabaot long wol we i pruvum se tok ya i tru nomo.

Trutok Blong Baebol i Winim Paoa Blong Rabis Spirit Long Haiti

Plante man Haiti oli wok wetem rabis spirit. John Norman we hem i lukaot long Branj Komiti i talem se: “Ol man oli joen long wosip blong ol olfala bubu blong protektem olgeta.” Tingting blong wan kleva i hafhaf taem hem i brekem wan saed leg blong hem long aksiden. Hem i stap tingting se: ‘?Olsem wanem samting ya i save hapen long mi? Mi ting se ol spirit oli stap protektem mi.’ Man ya i mekem wanem we plante man oli mekem. Hem i lanem trutok wetem ol Witnes blong Jeova mo ol Witnes oli givhan long hem blong lego wok blong rabis spirit. Long Eprel 19, 2000, namba blong ol man we oli kam long Memoriol blong ded blong Kraes i fo taem antap long namba blong ol man we oli stap talemaot gud nius long kantri ya. Samting ya i soem se long Haiti, bambae i gat moa man yet oli kam long trutok.

Wok Strong Long Bigfala Teritori Blong Koria

Long Koria, 40 pesen blong ol Witnes blong Jeova oli wok fultaem blong talemaot gud nius. Milton Hamilton we hem i lukaot long Branj Komiti i talem se: “Wetem bigfala ami ya, klosap evri manis mifala i kavremap teritori blong mifala we i gat bitim 47 milian man. Fulap man i stap joen wetem ol kongregesen we oli toktok saen lanwis. Long wan eria we i gat ol kongregesen we oli toktok saen lanwis, oli mekem 800 Baebol stadi. Hemia i min se wanwan long olgeta we oli stap talemaot gud nius long eria ya, oli gat wan Baebol stadi. Yumi sore blong harem se ol yangfala brata long ples ya oli  mas go long kalabus from we oli no wantem joen long ami. Nating se i olsem, oli mekem i gud long ol yangfala Kristin ya we oli strong long bilif, mo oli givim wok we i soem se ol man oli trastem olgeta.

Halpem Ol Man Meksiko We Oli Intres Long Trutok

Long Ogis 2000, 533,665 man blong talemaot Kingdom long Meksiko oli putum ripot blong olgeta. Namba blong ol man we oli kam long Memoriol i bitim tri taem antap long namba ya. Robert Tracy we i lukaot long Branj Komiti i talem se: “Mak we mifala i wantem kasem long yia ya i blong bildim 240 Haos Kingdom. Be hemia i no naf, mifala i nidim plante moa Haos Kingdom.”

Ol yangfala Witnes blong Jeova long Meksiko oli gudfala eksampol. Wan pris blong Katolik i tokbaot wan long ol yangfala ya se: “Bambae mi mi glad tumas sipos fasin blong wan long ol man blong mi i olsem fasin blong yangfala ya. Mi tinghae long ol yangfala ya from we oli rere blong wok mo oli waes blong yusum Baebol. Oli tok blong leftemap God, nating se samtaem klosap oli lusum laef blong olgeta.”

Holemstrong Long God Long Siera Leon Nating Se i Gat Faet

Stat long Eprel 1991, bigfala faet i kamaot bitwin ol man Siera Leon. Plante taosen man oli ded, oli kasem kil, mo oli lusum wan haf blong bodi blong olgeta. Bill Cowan we i lukaot long Branj Komiti i talem se: “Faet mo hadtaem i mekem ol man oli harem nogud tumas. From samting ya, plante man we bifo oli no intres, naoia oli wantem lesin long mesej we mifala i talemaot long olgeta. Long taem ya, plante man oli kam long Haos Kingdom blong joen long faswan miting blong olgeta nating se mifala i no singaot olgeta. Plante taem, oli stopem ol brata sista long rod blong askem Baebol stadi.” Yes, wok blong talemaot Kingdom i stap karem gudfala frut long Siera Leon, nating se trabol long kantri ya i stap gohed.

Bigfala Wok Blong Bildim Haos Kingdom Long Saot Afrika

Naoia i nidim plante taosen Haos Kingdom long ol ples we oli stap aninit long branj ofis blong Saot Afrika. Oli wokem plante Haos Kingdom finis. John Kikot we i lukaot long Branj Komiti i talem se: “Bifo, plante brata blong yumi long ol ples ya oli mekem miting long ol olfala haos no aninit long tri nomo. Be naoia, oli gat stret ples blong mekem miting. Nating se plante long ol Haos Kingdom ya oli no wokem wetem ol sas samting, ol man oli sapraes tumas taem oli luk olgeta. Long sam eria, mifala i luk se, afta we mifala i bildim wan Haos Kingdom, bambae namba blong kongregesen ya i dabol long yia we i kam.”

Wan Niufala Laen Blong Ol Witnes Long Yukren

Long yia 2000, namba blong ol man we oli talemaot gud nius long Yukren i kasem 112,720. Bitim 50,000 long olgeta ya oli lanem trutok blong Baebol long ol faef yia we oli jes pas. John Didur we i lukaot long Branj Komiti i talem se: “!Tru ya, Jeova i stanemap wan niufala laen blong man, hemia ol yangfala Witnes, blong oli talemaot nem blong hem! Long ol tu yia we oli jes pas, mifala i seremaot bitim 50 milian magasin, we hemia i stret namba blong ol man long kantri ya. Evri manis, samwe long wan taosen man we oli intres oli stap raet long mifala from we oli wantem kasem moa save.”

Sam Narafala Haf Blong Program We Oli Pulum Intres

Daniel Sydlik, wan memba blong Hed Kampani, i givim wan tok we i rili pulum intres. Haf ya, “Olsem Wanem Hed Kampani i Defren Long Kampani We Loa i Agri Long Hem,” we i stap long magasin ya i karem ol save we oli kamaot long tok ya.

Theodore Jaracz blong Hed Kampani i givim wan tok we i rili pulum tingting. Stamba blong tok ya i olsem se, “Putumap Ol Elda Mo Ol Man Blong Givhan Folem Tiokratik Oda.” Wan haf long magasin ya i karem ol save we oli kamaot long tok ya.

Long miting ya tu David Splane blong Hed Kampani i givim wan nambawan tok long saed blong vas blong yia 2001. Tok ya i stanap long ol tok ya blong aposol Pol se: “Yufala i mas stanap olsem we yufala i bigman mo gat strong tingting blong mekem wanem we God i wantem.” (Kolosi 4:​12, NW ) Ol Witnes blong Jeova raon long wol oli gat strong tingting blong mekem samting ya taem oli stap wok strong blong talemaot gud nius blong Kingdom long olgeta ples long wol.​—⁠Matiu 24⁠:14.

[Futnot]