?Olsem Wanem Hed Kampani i Defren Long Wan Kampani We Loa i Agri Long Hem?

STAT long Jenuware 1885, ol memba blong Watch Tower Bible and Tract Society of Pennsylvania oli bin mekem miting wan taem evri yia. Taem wok blong hivimap ol tabu Kristin i stat long lashaf blong ol yia 1800, olgeta daerekta mo memba blong komiti blong kampani ya oli man we hop blong olgeta i blong go laef long heven. Yes, kam kasem naoia klosap oltaem hem i olsem.

Wan taem nomo i defren. Long 1940, oli jusum wan daerekta blong Sosaeti we i no gat hop blong go long heven, nem blong hem Hayden C. Covington. Long taem ya hem i loea blong Sosaeti mo i wan long “ol narafala sipsip,” we oli gat hop blong laef long wol. (Jon 10⁠:16) Hem i holem wok olsem vaes presiden blong Sosaeti i stat long 1942 go kasem 1945. Brata Covington i lego wok olsem wan daerekta folem wanem we long taem ya oli ting se Jeova i wantem​—⁠se olgeta daerekta mo memba blong komiti blong kampani blong Pennsylvania oli ol Kristin we tabu spirit i makemaot olgeta. Lyman A. Swingle i tekem ples blong Hayden C. Covington olsem wan long ol daerekta, mo oli jusum Frederick W. Franz olsem vaes presiden.

?From wanem ol Witnes blong Jeova oli bin gat tingting ya se olgeta daerekta mo memba blong komiti blong Watch Tower Bible and Tract Society of Pennsylvania oli mas ol tabu Kristin nomo? From we long taem ya, ol memba blong Hed Kampani blong ol Witnes blong Jeova, we evriwan oli ol tabu man, oli wok tu olsem ol daerekta mo komiti blong kampani blong Pennsylvania.

Wan Impoten Miting

Long miting long Oktoba 2, 1944, long Pittsburgh, ol memba blong kampani blong Pennsylvania oli agri long sikis disisen we i jenisim plan blong kampani ya. Fastaem plan ya i talem se olgeta nomo we oli givim mane blong sapotem wok blong Sosaeti oli gat raet blong vot. Be, namba tri disisen we oli agri long hem, i jenisim rul ya. Wan ripot we i kamaot afta long miting ya i talem se: “Namba blong ol memba blong Sosaeti i no mas bitim 500 . . . Oli mas ol man we oli wok fultaem long Sosaeti, no haftaem long wan kampani [kongregesen] blong ol Witnes blong Jeova, mo oli mas soemaot semkaen tingting olsem Masta ya.”

Stat long taem ya, ol man we oli ona fulwan long Jeova, nating se oli givim smol mane no bigfala mane long wok blong Kingdom, olgeta nomo oli save vot blong jusumaot ol daerekta blong Sosaeti. Hemia i laenap wetem Aesea 60⁠:17 (NW ), we i soemaot se sloslou wok blong lidim ol man i mas kam gud moa. Vas ya i talem se: “Bambae mi no karem kopa i kam be bambae mi karem gol, mo bambae mi no karem aean be bambae mi karem silva, mo i no wud, be kopa, mo i no ston, be aean. Mo bambae mi putumap pis olsem ol man blong lukaot yufala, mo stret fasin olsem ol man blong givim wok long yufala.” Taem profet tok ya i tokbaot “ol man blong lukaot yufala” mo “ol man blong givim wok long yufala,” hem i stap soemaot se rod blong ol man blong Jeova blong lidim ogenaesesen bambae i kam gud moa.

Impoten step ya we i mekem se ogenaesesen i folemgud tiokratik rul, i kamaot long en blong “tu taosen tri handred dei” ya we Daniel 8:14 i tokbaot. Long taem ya, “haos ya blong God” hem i “kam klin, i tabu bakegen.”

Be, afta long miting ya long 1944, wan impoten kwestin i stanap. ?From we Hed Kampani i mekem wok blong ol seven daerekta blong kampani blong Pennsylvania, samting ya i minim se namba blong ol tabu Kristin we oli mekemap Hed Kampani i no save bitim seven? ?Mo, from we ol memba blong kampani ya oli vot long ol miting evri yia blong jusumaot ol daerekta, samting ya i minim se long semtaem oli stap vot blong jusumaot ol memba blong Hed Kampani tu? ?Ol daerekta mo ol memba blong komiti blong Watch Tower Bible and Tract Society of  Pennsylvania, mo ol memba blong Hed Kampani tufala i sem mak, no tufala i defren?

Wan Narafala Miting We Oli No Save Fogetem

Oli kasem ansa long ol kwestin ya, long miting blong olgeta long Oktoba 1, 1971. Long taem ya, brata we i givim tok i eksplenem se hed kampani blong “slef we i stret mo waes” i stanap plante handred yia finis, bifo long Watch Tower Bible and Tract Society of Pennsylvania. (Matiu 24⁠:​45-47, NW ) Hed kampani we i stanap long Pentekos 33 K.T., i statem wok blong hem bitim 1800 yia bifo long kampani blong Pennsylvania. Fastaem, i no jes gat 7 man insaed long hed kampani, be i gat 12 aposol. Mo biaen, namba ya i kam antap, from we “ol aposol mo ol elda” long Jerusalem oli lidim wok.​—⁠Ol Wok 15:⁠2.

Long 1971, sem brata ya i eksplenem se ol memba blong Watch Tower Sosaeti oli no save vot blong jusumaot ol memba blong Hed Kampani we tabu spirit i makemaot olgeta. ?From wanem oli no save mekem olsem? Hem i talem se, “i no wok blong ol man blong stanemap hed kampani ya we i wok olsem ‘slef.’ Jisas Kraes nomo, we hem i hed blong trufala Kristin kongregesen mo Masta blong ‘slef we i stret mo waes,’ . . . hem nao i stanemap hed kampani.” Taswe i klia se, ol man ya we oli memba blong ol kampani we loa i agri long olgeta, oli no save vot blong jusumaot ol memba blong Hed Kampani.

Brata we i givim tok i gohed i talemaot bigfala poen ya se: “Ol memba blong hed kampani oli no holem ol defren wok olsem ol memba blong Komiti blong ol Daerekta blong Sosaeti, we long olgeta ya i gat wan presiden, vaes presiden, sekretari we i lukaot long mane blong Sosaeti mo man we i givhan long sekretari ya. Hed kampani i gat wan jeaman nomo.” Blong plante yia, presiden blong kampani blong Pennsylvania, hem i memba we i lidim Hed Kampani tu. Be, fasin ya i jenis. Jenis ya i mekem se olgeta memba blong Hed Kampani oli sem mak nomo long wok we oli mekem, nating sipos sam oli gat moa ekspiriens no save long narafala. Brata i gohed i talem se: “Eni memba blong hed kampani i save mekem wok olsem jeaman, mo hem i no nidim blong holem wok olsem presiden blong . . . Sosaeti long semtaem . . . Samting ya i dipen nomo long wan lis wetem ol nem blong olgeta, we lis ya i soem hu nekiswan we bambae i tekem wok ya afta long narawan.”

Long miting ya long 1971, oli soemaot klia se ol memba blong Hed Kampani we tabu spirit i makemaot olgeta, mo ol daerekta blong kampani blong Pennsylvania, tufala i no sem mak. Nating se i olsem, ol memba blong Hed Kampani oli gohed blong mekem wok olsem ol daerekta mo ol memba blong komiti blong Sosaeti. Be, tede, kwestin i stanap se: ?I gat pruf long Baebol blong soemaot se ol daerekta blong Watch Tower Bible and Tract Society of Pennsylvania oli mas mekem wok olsem memba blong Hed Kampani tu?

Ansa blong kwestin ya se, nogat. Ol Witnes blong Jeova oli no yusum wan kampani nomo we gavman i rejistarem, olsem kampani blong Pennsylvania. I gat sam narafala bakegen. Wan long ol narafala kampani ya hem i Watchtower Bible and Tract Society of New York, Incorporated. Kampani ya i lukaot long wok blong yumi long Yunaeted Stet. I klia se Jeova i blesem kampani ya, nating se klosap evri daerekta mo memba long komiti blong hem oli man blong “ol narafala sipsip.” Kampani we oli rejistarem long Inglan i karem nem ya International Bible Students Association. Mo blong mekem se wok blong Kingdom i gohed long ol narafala kantri i gat sam narafala kampani bakegen we loa i agri long olgeta. Ol kampani ya oli joengud tugeta blong givhan long wok blong talemaot gud nius blong Kingdom long evri ples long wol. Nomata weples ol kampani ya oli stap long hem mo nomata hu ya olgeta we oli wok olsem daerekta no komiti, ol kampani ya oli folem tiokratik rul mo Hed Kampani i lidim mo i yusum olgeta. Taswe, ol kampani ya, nating se oli no sem mak long Hed Kampani, oli gat ol wok blong olgeta blong mekem se wok blong Kingdom i gohed moa.

I impoten tumas we yumi gat ol kampani we loa i agri long olgeta. Long rod ya yumi stap folem ol loa blong komuniti mo kantri, olsem we Tok blong God i talem. (Jeremaea 32⁠:11; Rom 13⁠:⁠1) Ol kampani ya oli givhan long wok blong yumi blong talemaot mesej blong Kingdom taem oli wokem ol Baebol, buk, magasin, buklet, mo ol narafala samting. Mo tu, ol kampani ya we  loa i agri long olgeta, oli stretem ol problem long saed blong graon, ol trabol long taem blong disasta, oli mekem ol kontrak from ples blong asembli, mo plante narafala samting bakegen. Yumi gat tangkiu from wok we ol kampani ya oli mekem.

Nem Blong Jeova Long Fasples

Long 1944, Atikol II long plan blong Watch Tower Bible and Tract Society of Pennsylvania, i jenis blong soemaot klia wanem ol mak we kampani ya i stap wok from. Folem wanem we plan ya i talem, stamba mak we Sosaeti i wantem kasem hemia se: “Blong talemaot gud nius blong kingdom blong God we Kraes Jisas i king long hem, long olgeta nesen olsem wan witnes long nem mo tok blong God ya we i gat Olgeta Paoa JEOVA.”

I stat long 1926, ‘slef ya we i stret’ i putum nem blong Jeova long fasples. Samting ya i klia moa long 1931 taem ol Baebol Studen oli karem nem ya ol Witnes blong Jeova. (Aesea 43⁠:​10-12) Sam long ol buk blong Sosaeti we oli yusum plante nem blong God hemia Jehovah (1934), “Let Your Name Be Sanctified” (1961), mo “The Nations Shall Know That I Am Jehovah”​—⁠How? (1971).

Mo i gud tu blong tokbaot New World Translation of the Holy Scriptures, we oli prentem fulwan long Inglis long 1960. Baebol ya i putum nem blong Jeova i stap long evri ples we long Hibrus hanraet blong Baebol yumi faenem ol fo leta blong nem blong God long hem. Mo tu, long Baebol ya nem blong God i stap long 237 ples long Kristin Grik haf blong Baebol, hemia afta we oli stadigud mo faenem se i stret blong mekem olsem. !Yumi tangkiu tumas from we Jeova i letem “slef” mo Hed Kampani blong hem i yusum ol kampani ya blong prentem ol buk we oli givhan long ol man blong wol blong save long nem blong hem!

Fasin Blong Seremaot Tok Blong God i Kam Antap

Taem ol man blong Jeova oli prentem plante milian Baebol mo buk, oli stap witnes long nem blong hem mo leftemap Tok blong hem. Long stat blong 1990, Watch Tower Sosaeti i kasem kopiraet blong Baebol ya The Emphatic Diaglott. Hemia wan translesen blong Kristin Grik haf blong Baebol, we Benjamin Wilson i tanem i kam long Inglis mo Grik. Sosaeti i prentem wan King James Version blong ol Baebol Studen, we i gat wan apendiks blong 500 pej long hem. Long 1942 oli prentem King James Version wetem ol refrens. Biaen, long 1944, Sosaeti i stat blong prentem American Standard Version blong 1901, we nem blong God i stap long hem. Nem blong Jeova i stap tu long The Bible in Living English, we Stephen T. Byington i tanem, mo Sosaeti i prentem long 1972.

Ol Witnes blong Jeova oli yusum ol kampani ya we loa i agri long olgeta blong givhan long wok blong prentem mo givimaot olgeta Baebol ya. Wan gudfala samting blong makem hemia se, Watch Tower Sosaeti mo grup blong ol tabu Witnes blong Jeova we oli stap insaed long Komiti blong New World Translation, oli wokgud wanples. Yumi glad tumas, from we kasem naoia, oli prentem 106,400,000 kopi blong translesen ya no ol haf blong hem long 38 lanwis. !Yes, Watch Tower Bible and Tract Society of Pennsylvania i rili wan Baebol sosaeti!

Masta blong ‘slef ya we i stret’ i ‘putumap hem blong lukaot long olgeta samting blong hem.’ Long olgeta samting ya i gat hedkwota long New York Stet, Yunaeted Stet, mo ol 110 branj ofis we oli stap wok long olgeta ples long wol. Ol memba blong grup ya we i wok olsem slef oli save se bambae oli mas stanap long fes blong masta ya blong talemaot olsem wanem oli lukaot long ol samting blong hem. (Matiu 25:​14-30) Be, samting ya i no minim se ‘slef ya’ i no save yusum ol man blong “ol narafala sipsip,” we oli naf, blong oli lukaot long sam wok we i joen wetem loa mo ol  narafala wok insaed long ol ofis. Yes, long rod ya ol memba blong Hed Kampani oli gat moa taem blong oli “save stap oltaem long wok ya nomo blong prea, mo blong talemaot tok blong God.”​—⁠Ol Wok 6:⁠4.

Go kasem taem we maet ol gavman blong wol oli no moa agri long ol kampani ya, Hed Kampani we i wan haf blong “slef we i stret mo waes,” bambae i gohed blong yusum olgeta. Ol kampani ya oli givhan bigwan, be sipos oli no moa stap, wok ya bambae i gohed nomo. Sipos wan gavman i putum tabu long wan kampani we bifo loa i agri long hem, wok blong prij bambae i gohed yet. Long sam kantri naoia, we gavman i putum tabu long wok blong yumi mo i no agri long wan kampani we yumi save yusum, wok blong talemaot Kingdom mo mekem disaepol i gohed, mo namba blong olgeta we oli folem tiokratik rul i kam antap. Hemia i kamaot from we ol Witnes blong Jeova oli planem kakae long garen, oli klinim garen, be God “nomo i stap mekem ol kakae i gru.”​—⁠1 Korin 3:​6, 7.

Taem yumi tingbaot fiuja, yumi save sua se Jeova bambae i lukaot long nid we ol man blong hem oli gat long saed blong spirit mo bodi. Jeova mo Pikinini blong hem, Jisas Kraes, nating se tufala i stap long heven, bambae tufala i gohed blong lidim mo sapotem wok ya blong talemaot Kingdom go kasem taem we wok ya i finis. Yes, wanem wok we yumi save mekem olsem ol man blong God, yumi mekem ‘i no long paoa blong ol soldia blong yumi, mo i no long paoa blong yumi. Bambae yumi win long paoa blong spirit blong [Jeova] nomo.’ (Sekaraea 4:⁠6) !Taswe yumi prea long God blong i halpem yumi, mo yumi save se long paoa we Jeova i givim bambae yumi finisim wok ya we hem i givim long yumi blong mekem long taem ya blong en!