?Olsem Wanem Oli Stanap Strong Agensem Ol Rabis Fren?

FASIN blong wantem se ol narafala oli laekem olgeta i pulum plante man blong folem tingting mo fasin blong ol rabis fren. I impoten we ol yangfala oli lan blong talem “no” long ol fasin we oli save spolem olgeta, olsem fasin blong tekem drag, mo fasin blong slip olbaot. ?Wanem samting i save halpem olgeta blong stanap strong agensem ol rabis fren?

I no longtaem i pas, tu yangfala gel long Polan i raet i kam se: “I klia nomo se tingting blong wol i gat paoa long ol fren blong mitufala. Ol fren ya oli stap giaman long ol eksam blong olgeta, oli tok swea, oli laekem blong dres folem evri niufala stael, mo oli laekem miusik we i wael mo we i leftemap rabis fasin long saed blong seks. !Mitufala i glad tumas blong gat ol stori long ol magasin we oli stret long mifala ol yangfala mo we oli blokem mifala long ol fasin blong ol yangfala tede we oli no glad mo we oli stronghed!

“Mitufala i no save olsem wanem blong talem tangkiu from ol stori blong Wajtaoa we oli soemaot klia long mitufala se ol yangfala tu oli gat wok blong mekem mo i gat man we i intres long mifala. Advaes long Baebol we mitufala i kasem i givhan long mitufala blong folem rod blong laef we Jeova God i glad long hem. Mitufala i sua se fasin blong holemstrong long wok blong Jeova hem i beswan rod blong laef.”

Yes, ol yangfala oli save stanap strong agensem ol rabis fren. Taem ol yangfala we oli Kristin oli trenem “paoa blong tingting” blong olgeta, oli save lan blong mekem ol waes disisen we oli soemaot se “spirit we i kamaot long wol” i no bos long olgeta be ‘spirit blong God’ nao i bos long olgeta.​—⁠Hibrus 5:​14, NW; 1 Korin 2:​12.