Rod Blong Wokem Ol Gudfala Fasin

OL DIKSONARI blong tede oli givim mining blong “gudfala fasin” se hemia “fasin we i nambawan; fasin blong mekem i gud.” Hem i “ol aksin mo tingting we oli stret; ol fasin we i blong mekem i gud.” Wan man blong raetem diksonari, Marvin R. Vincent i talem se stamba mining blong Grik tok ya we oli tanem i kam “gudfala fasin” i blong soemaot “fasin we i nambawan long eni samting.” Taswe yumi no sapraes we, plante taem, ol man oli leftemap ol fasin olsem fasin blong lukaotgud, fasin blong stretem yumi wan, mekem i stret long narafala, sore, fasin blong holem strong oltaem, tok tru, tingting daon, mo fasin blong stap tru. Mo tu, gudfala fasin i karem mining ya se “laef we i folem wan rul blong stret fasin.”

?Yumi mas folem ol nambawan fasin, ol gudfala fasin, mo ol stret fasin blong hu? Niuspepa ya Newsweek i talem se: “Ol man blong hae save oli tingting se, taem ya we oli kolem Enlightenement, i mekem tingting blong plante man i fasfas. From samting ya i no moa gat stret rul blong talem wanem we i gud mo wanem we i nogud, be ol man oli fri nomo blong jusum samting we i stret long wanem we oli laekem no we i folem kastom blong olgeta.” ?Be blong faenemaot wanem i gud mo wanem i nogud, i stret blong yumi dipen nomo long samting we yumi wanwan nomo i laekem? Nogat. Sipos yumi wantem mekem ol gudfala fasin, yumi nidim ol rul we yumi save dipen long olgeta long saed blong wanem we i gud mo wanem we i nogud. Ol rul ya oli mas givhan long yumi blong jajem wan aksin, tingting, no fasin se i gud no i nogud.

Wan Stamba Nomo Blong Ol Fasin We i Stret

I gat wan Stamba nomo blong ol fasin we i stret​—⁠hemia Jeova God, Man We i Wokem olgeta man. I no longtaem afta we hem i wokem faswan man, Adam, Jeova God i givim loa ya long man ya se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:​16, 17) Jeova God i givim nem ya long tri ya, blong soemaot se hem nomo i gat  raet blong jusum wanem i gud mo wanem i nogud long ol man we hem i wokem. Taswe ol rul blong God long saed blong wanem i gud mo wanem i nogud oli olsem stamba blong jajem, no skelem, olgeta aksin blong wan man wetem ol tingting mo ol fasin we hem i gruap wetem. Sipos i no gat ol rul olsem bambae yumi no save makemaot stret wanem i gud mo wanem i nogud.

Loa ya we God i putum long saed blong tri blong save wanem i gud mo wanem i nogud, i letem Adam mo Iv i jus​—⁠bambae tufala i obei, no bambae tufala i no obei. Sipos tufala i folem fasin we i gud, bambae tufala i obei long loa ya. Biaen, Jeova i givim moa save long saed blong wanem we hem i laekem mo wanem we hem i no laekem, mo hem i raetem samting ya long Baebol blong givhan long yumi. Taswe, blong wokem ol gudfala fasin i minim se yumi mas folem ol stret rul blong Jeova we oli stap insaed long Baebol.

Save Gud Ol Rul Blong God

?From we Jeova God i putumap finis ol rul long saed blong wanem i gud mo wanem i nogud, mo hem i soemaot olgeta insaed long Baebol, i stret we yumi savegud ol rul ya fulwan? Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”​—⁠2 Timoti 3:​16, 17.

Eksampol, tingbaot Kunihito we yumi bin tokbaot hem long stat blong haf ya. Bos blong hem i no kasem save long hem taem hem i soemaot tingting daon olsem we hem i bin lanem long kastom blong hem. Biaen, taem Kunihito i save moa long saed blong ol rul blong Baebol, samting ya i givhan long hem blong skelem gud tingting blong hem. Baebol i leftemap fasin ya blong gat tingting we i stap daon, mo hem i givim advaes agensem fasin we man i trastem hem wan tumas mo fasin blong flas. (Ol Proveb 11⁠:2; Maeka 6⁠:8) Nating se i olsem, taem aposol Pol i tokbaot ol spesel wok olsem “wok blong elda long kongregesen,” hem i talem se man i mas “wantem mekem” wok ya. (1 Timoti 3⁠:1, NW ) I tru se, man we i “wantem mekem” wok ya i no mas tok blong leftemap hem wan mo hem i no mas flas, be tu, hem i no nidim blong daonem hem wan bitim mak long saed blong wok ya.

?Baebol i talem wanem long saed blong ol fasin we oli nambawan long ples blong wok? Tede, long ol bisnes, plante man oli no wantem spenem mane, ale oli yusum sam rod we i no folem stret loa blong gavman mo ol loa blong takis. Be, nomata wanem samting we ol narafala oli mekem, rul we i stap long Baebol i se, yumi mas “mekem i stret nomo long olgeta samting.” (Hibrus 13⁠:​18, NW ) Taswe, yumi wokem ol gudfala fasin taem yumi mekem i stret mo i gud long ol bos blong yumi, ol man we oli wok blong yumi, ol man we yumi salem samting long olgeta, mo gavman. (Dutronome 25⁠:​13-16; Rom 13⁠:1; Taetas 2:​9, 10) Fasin blong no giaman i leftemap fasin tras mo i mekem ol man oli frengud. Mo from we “ol samting we man i no save long hem” oli save kamaot enitaem nomo, i impoten tumas blong raetemdaon evri samting long wan kontrak. Samting ya i save blokem ol rao mo ol tingting we i fasfas.​—⁠Prija 9:​11, NW; Jemes 4:​13, 14.

Wan narafala rod blong soem ol gudfala fasin hemia long saed blong ol klos we yumi werem mo fasin blong mekem hea. Ol klos we man i jusum oli defren folem kastom blong olgeta, mo maet ol traem oli strong blong pulum man blong folem ol niufala stael blong werem klos. Be i no nidim blong folem evri fasin mo stael blong werem klos mo mekem hea we ol man oli folem. Baebol i givim advaes long yumi blong ‘no mas letem fasin blong yumi i kam olsem fasin blong ol man long wol.’ (Rom 12⁠:2) Aposol Pol i no wokem ol rul long saed ya, be God i pulum hem blong raetem se: “Mi wantem se ol woman oli putum klos blong olgeta we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel, mo ol dres ya we praes blong olgeta i antap tumas, blong mekem ol man oli glad long olgeta. Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.” (1 Timoti 2:​9, 10) Rul ya i stret long ol man mo woman tugeta. Be i tru se, rul ya i no blokem ol man blong werem klos mo mekem hea long ol defdefren kaen stael blong kastom no stael we olgeta wan oli laekem we i naes.

Mo tu, Baebol i makemaot ol nogud fasin we i klia gud se God i agensem olgeta. Long 1 Korin 6⁠:​9, 10, yumi ridim woning ya se: “Yufala i save finis. Ol man we oli stap mekem i no stret, bambae oli no save go insaed long niufala wol ya we God i king long hem. Yufala i mas tingting gud long samting ya. Yufala i mas save se man we i stap ronem woman, mo man we i stap prea long ol narafala god, bambae oli no save go insaed long niufala wol ya. Man we  i stap slip wetem woman blong narafala man, mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, bambae oli no save go insaed long niufala wol ya. Man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed. Ol man olsem bambae oli no save go insaed samtaem long niufala wol ya we God i king long hem.” Vas ya i halpem Maria, we yumi bin tokbaot hem fastaem, blong luksave se fasin blong hem wetem Juan i no laenap wetem ol rul blong nambawan fasin we Man We i Wokem yumi i givim. Taswe, hem i mas stopem fasin ya sipos hem i wantem se God i glad long hem. I klia se, blong wokem ol gudfala fasin, yumi nidim blong save gud ol rul blong Jeova.

Tijim Hat

Gudfala fasin i no minim nomo se yumi stap longwe long ol samting we i nogud. Hem i wan paoa blong folem samting we i gud. Wan man we i gat gudfala fasin hem i wan man we olgeta tingting blong hem tu oli gud. Wan tija i talem se: “Man i nidim blong tijim hat mo tingting blong hem tu, long ol gudfala fasin.” Taswe blong wokem gudfala fasin, i minim se man i mas mekem sam moa samting i bitim we hem i save gud Tok blong God nomo. Yumi mas tingting dip long wanem we oli raetem finis long Baebol blong mekem se hat blong yumi i kam fulap wetem tangkiu long Jeova mo yumi wantem wokem ol rul blong Baebol long laef blong yumi.

Man blong raetem Sam i talem se: “Mi mi laekem Loa blong yu tumas, mi stap tingting long hem i stat long moning, gogo kasem sapa.” (Ol Sam 119⁠:97) Mo King Deved i raetem se: “Be taem mi stap tingtingbak long ol dei ya we i pas finis, mi stap tingbaot olgeta wok ya we yu yu mekem, mo mi stap tingting long olgeta samting ya we yu yu mekem long mi.” (Ol Sam 143⁠:5) Yumi tu yumi mas mekem fasin blong tingting dip i kam wan impoten haf blong stadi blong yumi long Baebol mo ol buk we oli stanap long Baebol.

I tru, samtaem i hadwok blong faenem taem blong mekem stadi oltaem mo tingting dip. Be sipos yumi traehad blong gat ol gudfala fasin yumi nidim blong pemaot taem we yumi stap yusum long ol narafala samting. (Efesas 5:​15, 16) Aaron, we i gat 24 yia, i pemaot taem evri dei, taem hem i wekap 30 menet eli moa long taem we hem i bin wekap bifo. Hem i talem se: “Fastaem, mi ridim Baebol long fulwan haf aoa ya. Be i no longtaem biaen, mi luksave se fasin blong tingting dip i impoten. Taswe naoia mi yusum raonabaot haf blong taem ya blong tingting dip long wanem we mi jes ridim. Samting ya i rili karem plante blesing long mi.” Yumi save tingting dip tu long ol narafala taem. Long wan singsing we Deved i mekem i go long Jeova, hem i singsing se: “I stat long sapa gogo kasem long moning mi mi stap tingting long yu.” (Ol Sam 63⁠:6) Mo Baebol i talem se: “Wan dei, taem san i stap godaon, [Aesak] i stap wokbaot long open ples, [“i stap tingting dip,” NW ] mo i luk ol kamel oli stap kam.”​—⁠Jenesis 24⁠:63.

I impoten blong tingting dip sipos yumi wantem wokem ol gudfala fasin. Rod ya i halpem yumi blong kasem sem filing olsem Jeova mo blong mekem ol tingting blong yumi oli laenap wetem ol tingting blong hem. Tingbaot eksampol blong Maria. Hem i save se God i blokem fasin blong slip olbaot. Be blong ‘agens long ol rabis fasin, mo holemstrong ol gudfala fasin,’ Maria i nidim blong tingting dip long sam impoten vas blong Baebol. (Rom 12⁠:9) Taem hem i ridim Kolosi 3⁠:5, hem i luksave se hem i mas jenisim ol fasin blong hem. Vas ya i givim strong advaes long yumi se, ‘Yumi mas kilimaot ol fasin ya blong yumi, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem  man tumas, mo olgeta oli stap wantem tumas ol sin. Mo olgeta oli stap wantem evri samting.’ Maria i mas askem long hem wan se: ‘?Wanem fasin long saed blong seks we mi mi mas kilimaot? ?Mi mas blokem wanem samting we i save pulum mi blong wantem mekem ol fasin we oli doti? ?I gat sam samting we mi olsem wan woman mi nidim blong jenisim long tingting we mi gat long saed blong ol man?’

Fasin blong tingting dip i minim tu se man i tingbaot frut we bambae i kamaot from aksin blong hem. Pol i pulum ol Kristin blong blokem fasin blong slip olbaot mo blong bos long tingting blong olgeta. Olsem ya nao, bambae oli blokem fasin blong “mekem i nogud long wan narafala Kristin man, no i [“spolem raet blong hem,” NW ].” (1 Tesalonaeka 4⁠:​3-7) Sam gudfala kwestin blong tingbaot hemia se: ‘?Sipos mi mekem sin ya, wanem trabol bambae i save kasem mi, famle blong mi, no ol narafala? ?Samting ya bambae i spolem mi olsem wanem long saed blong spirit, filing, mo bodi? ?Olsem wanem long ol man we oli brekem loa ya blong God bifo? ?Olgeta oli bin kasem wanem frut?’ Fasin blong tingting dip olsem i mekem Maria i kam strong moa blong mekem samting we i stret, mo fasin ya i save mekem sem mak long yumi.

Lanem Samting From Ol Eksampol

?Yumi save lanem ol gudgudfala fasin insaed long wan skul? Kwestin ya i mekem tingting blong plante man i fasfas long ol taosen yia we oli pas finis. Plato, wan man Gris we i gat hae save, i bilif se i gat rod blong mekem olsem. Be Aristotle i ting se gudfala fasin i kamaot nomo long trening we man i kasem long laef. Wan man blong raetem niuspepa i tokbaot ol bigfala poen blong raorao ya i se: “Blong talem stret, yumi no save lanem ol rul long saed blong ol gudfala fasin yumi wan nomo. Mo ol buk oli no save tijim man long fasin ya. Gudfala fasin i kamaot taem man i laef long wan komuniti . . . we ol man blong hem oli leftemap ol gudfala fasin mo oli presem narafala we i folem ol fasin ya.” ?Be weples nao bambae yumi save faenem ol man we oli rili gat ol gudfala fasin? Plante kantri maet oli gat sam eksampol long saed blong ol gudfala fasin, taem oli storebaot sam long ol bigfala man blong olgeta no ol kastom stori blong olgeta. Be, Baebol i givim plante trufala eksampol long saed ya.

Jeova God i givim beswan eksampol long saed blong gudfala fasin. Ol wok blong hem oli folem gudfala fasin oltaem mo hem i mekem wanem we i stret mo i gud nomo. Yumi save wokem gudfala fasin taem yumi “traehad blong folem fasin blong [God].” (Efesas 5⁠:1) Mo Pikinini blong God, Jisas Kraes, ‘i soemaot fasin ya long yumi, blong bambae yumi biaen long hem.’ (1 Pita 2:​21) Antap long samting ya, long Baebol i gat ol stori blong fulap man blong bilif, olsem Ebraham, Sera, Josef, Rut, Job, mo Daniel wetem ol trifala Hibru fren blong hem. Mo tu, yumi no mas fogetem ol eksampol blong gudfala fasin we ol man blong wok blong Jeova tede oli soem.

Yumi Save Win

?Yumi rili save win sipos yumi mekem wanem we i stret long ae blong God? From we yumi bon wetem sin, samtaem tingting blong yumi, we i wantem mekem wanem we i gud, i mas faet strong agensem bodi we i wantem yumi blong folem ol slak fasin blong yumi. (Rom 5:​12; 7:​13-​23) Be yumi save winim faet ya wetem help blong God. (Rom 7:​24, 25) Jeova i givim Tok blong hem mo ol buk we oli stanap long Baebol. Taem yumi traehad blong stadi oltaem long Baebol mo yumi tingting dip mo prea long saed ya, bambae hat blong yumi i save kam klin. Ale, hat ya we i klin bambae i mekem se yumi gat ol tingting, toktok, mo aksin we oli gud. (Luk 6:​45) Yumi save wokem ol fasin we God i laekem, sipos yumi folem eksampol blong Jeova God mo Jisas Kraes. Mo yumi save lanem plante samting from eksampol blong olgeta we oli holem strong long wok blong God tede.

Aposol Pol i givim advaes long ol man we oli stap ridim tok blong hem se “yufala i mas putum tingting blong yufala i stap strong” long ol gudfala fasin mo ol fasin we i stret nomo blong man i presem. Sipos yumi mekem olsem yumi sua blong kasem ol blesing blong God. (Filipae 4:​8, 9) Wetem help blong Jeova, bambae yumi kam naf blong wokem ol gudfala fasin.

[Tok blong pija long pej 6]

Mekem fasin blong tingting dip i kam wan haf blong Baebol stadi blong yu

[Tok blong pija long pej 7]

Yumi wokem ol fasin we God i laekem taem yumi folem ol fasin blong Jisas Kraes