Stanap Strong Olsem Bigman Mo Bilif Fulwan

“Wan Nambawan Samting We Oli Wokem”

TAEM ol Witnes blong Jeova oli statem wok blong olgeta long taem blong yumi, oli bin soem bigfala intres long wan profet tok we Jisas Kraes i talem: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae [en] i save kam.” (Matiu 24⁠:14) Yia ya 1914 hem i stat blong ol ‘las dei.’ Bifo long yia ya, ol trufala Baebol Studen, we oli bilif fulwan, oli statem wan bigfala wok blong tijim ol man long saed blong Tabu Baebol. Wok ya i gohed long fulwol mo i bigwan moa i bitim ol narafala taem long histri blong man.​—⁠2 Timoti 3⁠:⁠1.

Blong kasem olgeta ples long wol wetem gud nius, ol man blong Jeova oli yusum wan niufala rod we i gat paoa mo we i klia gud blong man i harem save. Blong save moa long saed ya, i gud yumi tingting i gobak long taem ya bifo.

Wan Niufala Rod Blong Talemaot Gud Nius

Yumi stap long Jenuware 1914. Tingbaot se yu stap sidaon wetem 5,000 narafala man long wan bigfala haos long New York Siti. Ples i dak. Long fored blong yu i gat wan bigfala skrin. Nao long skrin ya yu luk wan olfala man we hea blong hem i waet gud, mo i werem wan bigfala kot. Yu bin luk sam skrin olsem finis, wetem ol pija we oli kamaot long hem. Long ol skrin ya we yu bin luk i no gat man i toktok, be long skrin we yu stap luk naoia, olfala man ya i stat toktok, mo yu save harem ol tok blong hem. Yu stap luk wan samting we hemia fastaem we i hapen long histri blong man, mo mesej we i kamaot long hem i spesel. Man ya we i toktok hemia, Charles Taze Russell, faswan presiden blong Watch Tower Sosaeti, mo nem blong pija ya hemia “Sinema Blong Ol Samting We God i Wokem” (Photo-Drama of Creation).

C. T. Russell i luksave se ol sinema oli wan gudfala rod blong kasem plante moa man. Taswe, long 1912, hem i rerem “Sinema Blong Ol Samting We God i Wokem.” I tekem eit aoa blong soem ol foto mo pija we oli muvmuf, wetem kala mo saon.

Sinema ya i gat fo defren haf blong hem. Hem i soem taem we God i wokem olgeta samting, mo histri blong man kasem taem we Jeova God i mekem stamba tingting blong hem i kamaot long wol ya mo ol man, i go kasem en blong Taosen Yia Rul blong Kraes. Plante yia nomo biaen, ol bisnes man oli stat yusum semfala rod ya blong mekem sinema blong winim mane. !Be, plante milian man oli no pem blong luk “Sinema Blong Ol Samting We God i Wokem”!

Oli jusum ol beswan miusik mo oli rikodem 96 tok blong yusum long sinema ya. Oli mekem ol slaed blong sam pija we ol man oli bin wokem blong soem histri blong wol. Mo tu, i nidim blong mekem plante handred niufala pija. Sam long ol slaed ya mo ol film we oli gat kala long olgeta, ol brata oli pentem long han nomo. Mo oli mas mekem semfala wok ya  bakegen mo bakegen, go kasem we oli wokem 20 kopi blong sinema ya we wanwan long olgeta i seraot long fo haf. !Hemia i mekem se ol brata oli save soem wan haf blong sinema ya long 80 defren taon long eni dei nomo!

Wok We i Gohed Taem Sinema Ya i Plei

?Wanem wok i stap gohed taem ol pija blong sinema ya oli stap kamaot? Wan Baebol Studen we nem blong hem Alice Hoffman, i talem se: “Long stat blong hem, sinema ya i soem Brata Russell. Taem pija blong hem i kamtru mo maot blong hem i stat muf, wan fonograf i plei we i talemaot ol tok we oli rikodem finis . . . nao mifala i save harem voes blong hem.”

Zola Hoffman i tingtingbak long sam pija blong sinema ya: “Mi sapraes bigwan blong luk ol pija long saed blong taem ya we God i wokem ol samting. Stret long ae blong mifala, mifala i luk sam pija we oli soem olsem wanem ol flaoa oli stap open sloslou.”

Karl F. Klein, wan memba blong Hed Kampani blong ol Witnes blong Jeova, we i laekem miusik, i talem se: “Long sem taem we ol pija oli stap kamaot long skrin, ol naesfala miusik oli stap plei, olsem miusik we oli kolem Narcissus mo Humoreske.”

I gat sam narakaen samting tu oli hapen we samtaem man i laf from. Clayton J. Woodworth, i rimemba se: “Samtaem sam fani samting oli hapen. Wantaem, wan miusik i stap plei we nem blong hem ‘Ronwe Olsem Wan Pijin i Go long Bigfala Hil,’ mo pija we i stap long skrin i soem wan bigbigfala anamol we i laef bifo we Bigfala wota i ron, anamol ya oli kolem gigantosaurus.”

I no longtaem afta we oli wokem “Sinema Blong Ol Samting We God i Wokem,” ol brata oli wokem wan narawan we oli kolem “Sinema Blong Niufala Save” (Eureka Drama). (Lukluk bokis.) Long drama ya i gat ol tok mo miusik we oli rikodem finis, we man i save lesin long hem. Mo i gat ol pija wetem ol tok mo miusik tu, we man i save luk. Nating se “Sinema Blong Niufala Save” i no gat ol pija we oli muvmuf, hem i karem plante gudfala frut long ol smosmol taon we sinema ya i pas long hem.

Wan Tul Blong Givim Witnes We i Gat Bigfala Paoa

Long en blong 1914, i gat 9,000,000 man long Not Amerika, Yurop, mo Ostrelia we oli bin luk “Sinema Blong Ol Samting We God i Wokem.” Nating se ol Baebol Studen oli smol nomo, oli gat strong tingting blong yusum niufala rod ya blong talemaot gud nius. Oli glad blong givim mane we i nidim blong rentem sam ples we oli stret, blong soem ol sinema ya. Long rod ya nao, “Sinema Blong Ol Samting We God i Wokem,” i bin givhan bigwan long wok ya blong letem ol man oli save long Tok blong God mo ol stamba tingting blong hem.

Wan man i raetem wan leta i go long C. T. Russell i se: “Taem we mi wajem Sinema ya blong yufala, hem i mekem wan bigfala jenis long laef blong mi, no maet mi save talem se, hem i jenisim tingting blong mi bigwan long saed blong Baebol.” Wan woman i talem se: “Klosap nomo bilif blong mi i lus fulwan, be i olsem se ‘Sinema Blong Ol Samting We God i Wokem,’ we mi wajem long hot taem las yia, i sevem mi . . . Naoia mi kasem pis ya we wol i no save givim mo olgeta sas samting blong wol ya bambae oli neva save pulum mi blong lego pis ya.”

Demetrius Papageorge, wan brata we i wok longtaem finis long hedkwota blong Sosaeti, i talem se: “Taem yumi tingbaot smol namba blong ol Baebol Studen mo smol mane nomo we olgeta oli gat long taem ya, i stret blong talem se Sinema ya i wan nambawan samting we oli wokem. !Spirit blong Jeova i stap biaen long plan ya!”

[Bokis blong pija long pej 8, 9]

“Sinema Blong Niufala Save”

Eit manis nomo afta we “Sinema Blong Ol Samting We God i Wokem” i kamaot, Sosaeti i luk se i nidim wan narawan bakegen we oli kolem “Sinema Blong Niufala Save.” Ol brata oli soem ol pija blong “Sinema Blong Ol Samting We God i Wokem” long ol bigfala taon, be oli soem “Sinema blong Niufala Save,” long ol smosmol vilej mo ples afsaed long ol taon. Wan haf blong “Sinema Blong Niufala Save,” i givim wan “nambawan janis long ol sista” blong oli prij. ?From wanem? From we bokis we i fulap long ol rikod blong ol tok mo miusik i hevi olsem 14 kilo nomo. Be, blong plante man i luk sinema ya, i nidim blong karem wan fonograf tu.