Wan Spesel Nius

LONG en blong miting blong Watch Tower Bible and Tract Society of Pennsylvania, we oli holem long Oktoba 7, 2000, jeaman blong miting, John E. Barr, blong Hed Kampani i talemaot wan spesel nius. Nius ya i stanap long ol tok we Theodore Jaracz mo Daniel Sydlik i givim finis long dei ya.​—⁠Lukluk pej 12-16 mo 28-31 long magasin ya.

Brata Barr i makem bigfala poen ya se: “Wok we Jisas i putum long han blong ‘slef we i stret mo waes’ mo Hed Kampani blong hem, i impoten tumas mo i bigwan moa bitim wok blong ol kampani we loa i agri long olgeta. Ol wanwan kampani oli gat wan plan we i soem wok ya nomo we kampani ya i gat blong mekem. Be, Masta blong yumi, Jisas Kraes, hem i putumap grup we olsem slef we i stret blong i lukaot long ‘olgeta samting blong hem,’ hemia olgeta wok blong Kingdom long wol ya.”​—⁠Matiu 24⁠:​45-47, NW.

Brata Barr i gohed, i tokbaot kampani ya blong Pennsylvania, se: “Stat long taem we oli stanemap kampani ya, long 1884, Watch Tower Bible and Tract Society of Pennsylvania i bin mekem wan impoten wok long histri blong ol man blong Jeova tede. Nating se i olsem, kampani ya we loa i agri long hem i jes wan tul we ‘slef we i stret mo waes’ i stap yusum taem i nidim.”

Brata Sydlik mo Jaracz, tufala i bin eksplenem se taem Masta i putum olgeta samting blong hem long wol ya long han blong “slef we i stret mo waes,” hemia i no min se slef ya i no save yusum sam man blong “ol narafala sipsip,” we oli nafgud blong lukaot long sam wok. (Jon 10⁠:16) Mo tu, i no gat wan pruf long Baebol we i soem se olgeta daerekta blong ol kampani ya we ol Witnes blong Jeova oli stap yusum oli mas ol Kristin ya nomo we tabu spirit i makemaot.

Brata Barr i talem long ol man we oli stap long miting ya se, i no longtaem i pas, sam memba blong Hed Kampani blong ol Witnes blong Jeova we oli bin wok olsem daerekta long ol kampani we “slef we i stret mo waes” i stap yusum long Yunaeted Stet, oli agri blong lego wok ya. Ale, oli jusum sam brata we oli nafgud, we oli blong “ol narafala sipsip” blong tekem ples blong olgeta.

Disisen ya i rili wokgud. Naoia, ol memba blong Hed Kampani oli gat moa taem blong rerem ol kakae long saed blong spirit mo blong lukaot long Kristin laef blong ol brata sista long olgeta ples long wol.

Long lastok blong jeaman, hem i talem long ol man we oli stap lesin se: “Nating se sam elda we oli wok plante yia finis oli holem sam long ol defren wok naoia, . . . Hed Kampani i lidim olgeta long saed blong spirit. . . . Yumi evriwan i mas prea long Jeova mo trastem hem se bambae hem i blesem ol traehad blong yumi blong mekem wanem we hem i wantem, mo blong givim ona long hem mo presem hae nem blong hem.”