Wokbaot Folem Ogenaesesen Blong Jeova

“Prea blong mi we God we i stamba blong pis, . . . bambae i givim evri gudfala samting long yufala we yufala i sot long hem, mo bambae i mekem yufala i naf blong wokem ol samting we hem i wantem.”​—⁠HIBRUS 13:​20, 21.

1. ?Hamas man oli laef long wol naoia, mo hamas man oli joen long ol defren skul blong wol?

 !LONG yia 1999, namba blong olgeta man long wol i kasem sikis bilian! The World Almanac i talem se long namba ya, i gat samwe long 1,165,000,000 we oli Muslim; 1,030,000,000 we oli Katolik; 762,000,000 we oli Hindu; 354,000,000 oli Budis; 316,000,000 oli Protestan; mo 214,000,000 oli Otodoks.

2. ?Yumi save talem wanem long saed blong ol skul tede?

² ?Taem yumi luk we wol i seraot long plante defren skul mo tingting blong plante man i fasfas, yumi save talem se olgeta milian man ya oli stap wok folem wanem we God i wantem? Nogat, from we “God i no stamba blong fasin ya we olgeta samting oli paspas, hem i stamba blong pis.” (1 Korin 14:33) ?Be olsem wanem long bigfala kampani blong ol brata we oli man blong wok blong Jeova long fulwol? (1 Pita 2:17) Sipos yumi lukluk moa long saed blong olgeta bambae yumi faenem plante pruf se ‘God we i stamba blong pis . . . i givim evri gudfala samting long olgeta mo bambae i mekem olgeta i naf blong wokem ol samting we hem i wantem.’​—⁠Hibrus 13:​20, 21.

3. ?Wanem i hapen long Jerusalem long Pentekos 33 K.T., mo from wanem?

³ Bigfala namba blong ol man we oli joen long ol Witnes blong Jeova, i no hemia we i soemaot se God i glad long yumi. God i no stap lukluk namba. Hem i no jusum ol man Isrel from we oli “plante moa” i winim ol nesen long wol. Tru tumas, ol man Isrel long taem ya oli “smol tumas” long medel blong ol narafala nesen. (Dutronome 7:⁠7) Be from we Isrel i no holem bilif, Jeova i jusumaot wan narafala grup blong man long Pentekos 33 K.T. * hemia niufala kongregesen we ol man blong Jisas Kraes oli stap long hem. Tabu spirit blong Jeova i makemaot olgeta, mo oli wok strong blong talemaot trutok blong God mo Kraes long olgeta man.​—⁠Ol Wok 2:​41, 42.

Muf i Go Fored Oltaem

4. ?Olsem wanem yumi save se faswan Kristin kongregesen i stap muf i go fored oltaem?

⁴ Long faswan handred yia, Kristin kongregesen i stap muf i go fored oltaem. Kongregesen ya i stap prij long ol ples we neva man i prij long hem, hem i mekem ol niufala disaepol, mo i kasem plante moa save long saed blong ol stamba tingting  blong God. Ol faswan Kristin oli folem gud olgeta niufala save long saed blong spirit we oli kamaot long ol leta we tabu spirit i pusum ol man blong God blong oli raetem. Ol aposol mo sam narafala brata tu, oli stap visitim ol Kristin ya oltaem, mekem se oli gohed strong long wok blong prij. Kristin Grik haf blong Baebol i soemaot gud samting ya.​—⁠Ol Wok 10:​21, 22; 13:​46, 47; 2 Timoti 1:13; 4:5; Hibrus 6:​1-3; 2 Pita 3:​17, 18.

5. ?From wanem ogenaesesen blong God i stap gohed gud tede, mo from wanem yumi mas wokbaot folem hem?

⁵ Olsem ol faswan Kristin, ol Witnes blong Jeova tede tu oli stat we oli smol nomo. (Sekaraea 4:​8-10) Stat long lashaf blong ol yia 18 handred, i klia se tabu spirit blong God i stap wok long ogenaesesen blong hem. From we yumi no dipen long paoa blong man, be yumi letem tabu spirit i lidim yumi, save blong yumi long saed blong Baebol mo ol samting we God bambae i mekem, i gru bigwan. (Sekaraea 4:⁠6) Naoia we yumi stap long ol ‘las dei,’ i impoten tumas blong wokbaot folem ogenaesesen blong Jeova we i stap muf i go fored oltaem. (2 Timoti 3:​1-5) Sipos yumi mekem olsem bambae yumi no lusum hop blong yumi mo, bifo we en blong wol ya i kam, bambae yumi joen oltaem long wok blong talemaot Kingdom blong God we i stanap finis.​—⁠Matiu 24:​3-14.

6, 7. ?Wanem trifala samting we bambae yumi tokbaot we oli pruvum se ogenaesesen blong Jeova i stap muf i go fored?

⁶ Long medel blong yumi i gat sam man we oli stat joen wetem ogenaesesen blong Jeova long ol yia 1920 kasem 1940. Long ol faswan yia ya, i no gat wan long yumi we i save tingbaot se bambae ogenaesesen i gru bigwan olsem we i stap tede. !Tingbaot ol bigfala samting we yumi bin kasem long ol yia we oli pas! Yes, yumi save harem gud tumas long saed blong spirit taem yumi tingtingbak long ol samting we Jeova i bin mekem long ol man blong hem we oli wok folem tiokratik oda.

⁷ Deved blong bifo i sapraes bigwan taem hem i tingting dip long ol nambawan wok blong Jeova. Hem i se: “Yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.” (Ol Sam 40:⁠5) Samting ya i sem mak long yumi. Long taem blong yumi, yumi no save talem hamas nambawan samting we Jeova i mekem we oli presem hem bigwan. Nating se i olsem, i gud yumi tingbaot tri samting insaed long ogenaesesen blong Jeova we oli soemaot se hem i stap muf i go fored: (1) laet blong trutok i kam klia moa, (2) wok blong prij we i kavremap plante moa ples, mo (3) ol jenis we oli kamaot long stret taem long ol plan blong wok insaed long ogenaesesen.

Tangkiu From Laet Blong Trutok We i Kam Klia Moa

8. ?Folem tok blong Ol Proveb 4:​18, laet blong trutok i givhan long yumi blong luksave wanem samting long saed blong Kingdom?

⁸ Ol Proveb 4:18 (NW ) i tru tumas taem hem i tokbaot laet blong trutok we bambae i kam klia sloslou. Hem i se: “Rod blong ol stret man i olsem laet we i saen i stap kam moa klia go kasem we delaet i kamtru fulwan.” !Yumi tangkiu tumas long laet ya blong trutok we sloslou i kam klia moa long yumi! Long 1919, long asembli blong Cedar Point, Ohio, plante tok oli kamaot long saed blong Kingdom blong God. Jeova i yusum Kingdom ya blong mekem nem blong hem i tabu mo blong leftemap hae rul blong hem. Yes, laet ya blong trutok, i mekem yumi naf blong luksave se stat long Jenesis go kasem Revelesen, Baebol i tokbaot stamba tingting blong Jeova se Kingdom blong hem, we Pikinini blong hem i rul long hem, bambae i mekem nem blong hem i tabu. Hop blong olgeta man we oli lavem stret fasin, i stap long Kingdom ya.​—⁠Matiu 12:​18, 21.

9, 10. ?Long ol yia 1920, yumi lanem wanem long saed blong Kingdom mo ogenaesesen, mo olsem wanem samting ya i givhan long yumi?

 ⁹ Long asembli blong Cedar Point, long 1922, J. F. Rutherford i pulum olgeta man blong God blong oli mas “talemaot, talemaot, talemaot, King ya mo Kingdom blong hem.” Long Wajtaoa blong Maj 1, 1925, haf ya, “Wan Nesen i Bon,” i pulum tingting i go long olgeta profet tok we oli bin soemaot se Kingdom blong God bambae i stanap long 1914. Mo tu, long ol yia 1920 yumi luksave se i gat tu ogenaesesen we tufala i stap agensem tufala​—⁠wan blong Jeova mo wan blong Setan. Faet i stap gohed bitwin long tufala ya, mo bambae yumi stap long saed we i win sipos yumi wokbaot oltaem folem ogenaesesen blong Jeova.

¹⁰ ?Olsem wanem laet ya we i kam klia moa, i halpem yumi? From we Kingdom blong God mo King Jisas Kraes, tufala i no haf blong wol ya, yumi tu yumi no mas haf blong wol ya. Sipos yumi no joen long wol ya yumi soem se yumi stap long saed blong trutok. (Jon 17:16; 18:37) !Taem yumi luk ol trabol we oli stap spolem rabis wol ya, yumi tangkiu tumas we yumi no stap insaed long ogenaesesen blong Setan! !Mo i rili wan blesing long yumi blong stap sef long saed blong spirit insaed long ogenaesesen blong Jeova!

11. ?Long 1931, ol man blong God oli karem wanem nem we i stanap long Baebol?

¹¹ Long 1931, asembli long Columbus, Ohio, i eksplenem klia ol tok blong Aesea 43:​10-12. Ol Baebol Studen oli karem nem ya Witnes blong Jeova, we i makemaot klia se oli defren long ol narafala skul. !I rili wan nambawan blesing blong talemaot nem blong God long ol narafala man blong bambae olgeta tu oli save singaot long hem blong kasem sef!​—⁠Ol Sam 83:18; Rom 10:⁠13.

12. ?Long 1935, laet i saenaot moa blong soemaot wanem long saed blong bigfala kampani?

¹² Bifo long 1930, plante long ol man blong God oli no sua gud long saed blong hop blong olgeta long fiuja. Sam oli tingbaot laef long heven be oli laekem tumas ol tijing blong Baebol long saed blong wan paradaes long wol. Long asembli blong 1935, we i stap long Washington, D.C., ol man oli bin glad tumas blong lanem se bigfala hip man, no bigfala kampani, we Revelesen japta 7 i tokbaot, oli gat hop blong laef long wol. Stat long taem ya, wok blong hivimap ol man blong bigfala kampani ya i stap spid moa. ?Yu yu glad naoia blong save hu ya bigfala kampani? Taem yumi luk we plante man oli stap kamaot long olgeta nesen, laen, mo lanwis, yumi wantem folemgud ogenaesesen blong Jeova we i stap spid moa.

13. ?Wanem bigfala kwestin we i kam klia long asembli blong St. Louis long 1941?

¹³ Bigfala kwestin we olgeta man long wol oli mas tinghevi long hem i kamaot long asembli long St. Louis, Missouri, long 1941. Kwestin ya hem i long saed blong hu i gat raet blong rulum heven mo wol. Kwestin ya i mas kasem ansa blong hem i no longtaem. !Bigfala dei ya we i mekem man i fraet mo we bambae i ansarem kwestin ya, i stap kam kwiktaem! Wan narafala poen we i kam klia long 1941, hemia fasin blong holem strong long God, we i soemaot sipos yumi sapotem hae rul blong God no nogat.

14. ?Long intenasnal asembli long 1950, yumi lanem wanem long saed blong ol prins we Aesea 32:​1, 2 i tokbaot?

¹⁴ Long 1950, intenasnal asembli long New York Siti i talemaot mining blong ol prins blong Aesea 32:​1, 2. Taem Brata Frederick Franz i tokbaot vas ya mo i eksplenem se ol prins ya blong niufala wol oli stap long medel blong yumi, plante man oli harem gud tumas long hat blong olgeta. Long asembli ya mo ol narawan tu, plante laet long saed blong trutok oli saenaot. (Ol Sam 97:11) !Yumi tangkiu tumas se rod blong yumi nao i olsem wan “laet we i saen i stap kam moa klia”!

Yumi Mekem Wok Blong Prij Blong Yumi i Go Moa

15, 16. (a) ?Olsem wanem wok blong prij blong yumi i gohed moa long ol yia 1920 kasem 1930? (b) ?Wanem ol buk we oli givim moa paoa long Kristin wok blong prij long ol yia we oli pas?

¹⁵ Namba tu samting we i soemaot se ogenaesesen blong Jeova i muf i go fored, hem i long saed blong stamba wok blong yumi​—⁠wok blong talemaot Kingdom mo mekem disaepol. (Matiu 28:​19, 20; Mak 13:10) Blong mekem wok ya i gohed gud, ogenaesesen i talem bakegen mo bakegen long yumi se i impoten blong  traem mekem wok blong prij blong yumi i go moa. Long 1922, ogenaesesen i leftemap tingting blong olgeta Kristin blong joen long wok blong prij. Hem i wok blong olgeta Kristin wanwan blong letem laet blong olgeta i saenaot, mo long rod ya, wanwan long olgeta i save gat wan haf long wok blong givim witnes long trutok. (Matiu 5:​14-16) Long 1927, ol brata oli mekem plan blong putum Sande olsem wan spesel dei blong prij. I stat long Februari 1940, ol man oli luk plante moa Witnes oli prij long ol ofis long taon blong seremaot Wajtaoa mo Consolation (we naoia hem i Wekap!).

¹⁶ Long 1937, wan niufala buk i kamaot we nem blong hem Model Study. Buk ya i pusum ol brata blong mekem visit bakegen long ol man blong tijim trutok blong Baebol long olgeta. Long ol yia we oli kam biaen, toktok i kamaot bakegen mo bakegen se i impoten blong mekem ol Baebol stadi. Wok ya i rongud moa taem tufala buk ya i kamaot, “Let God Be True” long 1946 mo Trutok Blong Soemaot Rod Blong Itenel Laef long 1968 (Inglis). Tede yumi yusum buk ya Save Blong Lidim Yu Long Laef We i No Save Finis. Ol buk ya oli givhan long yumi blong wokem ol disaepol we oli stanap long wan strongfala fandesen.

Muf i Go Fored Wetem Ol Jenis Insaed Long Ogenaesesen

17. ?Folem tok blong Aesea 60:​17, olsem wanem ogenaesesen blong Jeova i muf i go fored?

¹⁷ Namba tri samting we i givhan long ogenaesesen blong Jeova blong muf i go fored hemia ol jenis we hem i mekem long ol plan blong wok blong hem. Folem Aesea 60:17 Jeova i promes se: “Fastaem yufala i stap yusum bras blong wokem ol samting, be bambae mi mi givim gol long yufala. Fastaem yufala i stap yusum aean mo wud, be bambae mi mi givim silva mo bras long yufala. Fastaem yufala i stap yusum ston, be bambae mi mi givim aean long yufala. Bambae ol haeman mo ol lida oli no moa save mekem i strong long yufala. Mi bambae mi mekem we pis mo stret fasin tufala i rul long yufala.” Olsem profet tok ya i talem, sam jenis oli kamaot blong lidim wok blong prij mo wok blong lukaot long ol sipsip, long fasin we i moa gud.

18, 19. ?Long ol yia we oli pas, wanem sam jenis we oli kamaot insaed long ogenaesesen?

¹⁸ Long 1919, long ol kongregesen we oli wantem joen long wok blong prij, oli putumap wan brata blong lukaot long wok ya. Samting ya i givhan blong mekem wok blong prij i go moa. Long 1932, fasin blong vot blong putumap ol elda mo ol dikon long ol kongregesen i finis, mo hemia wan saen we i soem se yumi no moa folem demokratik rul. Wan narafala bigfala samting we i makem histri blong yumi i kamaot long 1938. Long taem ya, ogenaesesen i stat putumap olgeta man blong wok insaed long kongregesen, folem tiokratik oda we Kristin kongregesen blong faswan handred yia i stap folem. (Ol Wok 14⁠:23; 1 Timoti 4⁠:14) Long 1972, oli putumap ol elda mo ol man blong givhan blong wok insaed long kongregesen, olsem we ol faswan Kristin oli bin mekem. Oli no moa putum wan elda nomo blong lukaot long wan kongregesen. Filipae 1⁠:1 mo sam narafala vas bakegen oli soemaot se olgeta we oli kasem ol mak we Baebol i putum blong kam elda bambae oli stap olsem wan grup blong ol elda.​—⁠Ol Wok 20⁠:28; Efesas 4:​11, 12.

¹⁹ Long 1975, ol brata oli mekem plan blong stanemap sam komiti blong Hed Kampani blong ol Witnes blong Jeova, we wok blong olgeta i blong lukaot long ol wok blong ogenaesesen blong God long wol. Ol Branj Komiti oli stanap blong lukaot long wok we i gohed long ol defren kantri blong wol. Stat long taem ya, oli katemdaon wok long hedkwota mo long ol branj ofis blong Watch Tower Sosaeti blong oli save lukaot long “ol samting we oli impoten moa.” (Filipae 1:​9, 10, NW ) Ol man blong lukaot sipsip aninit long Kraes, oli mas lidim wok blong prij, tijim kongregesen, mo lukaot long ol sipsip blong God.​—⁠1 Timoti 4⁠:16; Hibrus 13:​7, 17; 1 Pita 5:​2, 3.

Jisas i Lida Blong Yumi

20. ?Blong wokbaot folem spid blong ogenaesesen blong Jeova, i nidim blong yumi luksave wanem long saed blong Jisas?

²⁰ Sipos yumi wantem wokbaot folem ogenaesesen blong Jeova we i stap muf i go fored oltaem, yumi mas luksave se God i putumap Jisas Kraes olsem “hed blong [“kongregesen,” NW ].” (Efesas  5:​22, 23) Wan narafala samting tu blong tingbaot hemia tok blong Aesea 55:4 (NW ) we i talem se: “!Yu luk! Mi [Jeova] mi putum hem i stap olsem wan witnes blong ol nesen, wan lida mo wan kapten blong olgeta nesen.” Jisas i save olsem wanem blong lidim ol man. Hem i save gud ol sipsip blong hem mo wok we oli mekem. Tru tumas, taem hem i jekem wok blong ol seven kongregesen blong Esia Maena, hem i talem faef taem long olgeta se: “Mi save finis fasin blong yufala.” (Revelesen 2:​2, 19; 3:​1, 8, 15) Jisas i save wanem samting we yumi nidim, olsem we Papa blong hem, Jeova, i save. Bifo we Jisas i tijim ol disaepol blong hem blong prea, hem i talem se: “Taem yufala i no askem ol samting long Papa blong yufala yet, be hem i save finis ol samting we yufala i sot long hem.”​—⁠Matiu 6:​8-13.

21. ?Olsem wanem blong luksave se Jisas i stap lidim Kristin kongregesen?

²¹ ?Olsem wanem Jisas i stap lidim yumi? Wan rod we hem i yusum hemia ol Kristin elda, we oli olsem ‘ol presen we hem i givim i go nomo long ol man.’ (Efesas 4:⁠8) Revelesen 1⁠:16 i tokbaot ol tabu elda se oli stap long raethan blong Kraes, aninit long paoa blong hem. Tede, Jisas i lidim plan ya blong putumap ol elda, nating sipos ol man ya oli blong go long heven no blong laef long wol ya. Olsem faswan stadi blong yumi i soemaot, tabu spirit i putumap ol man ya folem ol mak we Baebol i putum blong oli kasem. (1 Timoti 3:​1-7; Taetas 1:​5-9) Long faswan handred yia, wan grup blong ol tabu brata long Jerusalem i wok olsem hed kampani we i lukaot long olgeta kongregesen mo long wok blong prij long taem ya. Ogenaesesen blong Jeova tede i stap folem semfala rod ya.

!Wokbaot Folem Spid Blong Hem!

22. ?Wanem help we Hed Kampani i stap givim?

²² Ol wok we oli joen wetem Kingdom long wol ya oli stap long han blong “slef we i stret mo waes,” we wan haf blong hem nao hemia Hed Kampani blong ol Witnes blong Jeova. (Matiu 24:​45-47, NW ) Stamba wok blong Hed Kampani i blong tijim Baebol mo blong lidim ol Kristin kongregesen. (Ol Wok 6:​1-6) Be taem ol Kristin brata raon long wol oli kasem trabol from sam disasta, Hed Kampani i askem wan, no bitim wan, long ol kampani we gavman i rejistarem, blong oli givim help long ol brata ya mo blong lukaot long wok blong fiksimap no bildim bakegen ol haos blong olgeta mo Haos Kingdom. Sipos sam Kristin oli kasem sam hadtaem no narafala i kilim olgeta, Hed Kampani i faenem rod blong mekem ol Kristin ya oli stap strong long bilif. Mo “long taem blong trabol” oli traehad blong yusum evri rod blong mekem se wok blong prij i gohed.​—⁠2 Timoti 4:​1, 2, NW.

23, 24. ?Nomata wanem samting i hapen, Jeova i stap gohed blong givim wanem long ol man blong hem, mo yumi mas gat strong tingting blong mekem wanem?

²³ Nomata wanem samting i hapen long ol man blong Jeova, be bambae hem i meksua se oli kasem kakae long saed blong spirit mo advaes we i stret blong lidim olgeta oltaem. Mo tu, God i givim fasin luksave mo waes long ol brata we oli gat bigfala wok insaed long ogenaesesen blong oli rere blong jenisim mo mekem sam samting i kam moa gud insaed long tiokratik ogenaesesen. (Dutronome 34:9; Efesas 1:​16, 17) I klia se Jeova i givim evri samting we yumi nidim blong finisim gud wok ya blong mekem disaepol mo gohed blong prij long ful wol.​—⁠2 Timoti 4:⁠5.

²⁴ Yumi sua fulwan se neva bambae Jeova i lego ol man blong hem we oli holemstrong long hem. Bambae hem i sevem olgeta long taem blong “bigfala trabol.” (Revelesen 7:​9-14; Ol Sam 94:14 2 Pita 2:⁠9) Yumi gat plante risen blong holemtaet tras we yumi gat fastaem, i go kasem en. (Hibrus 3⁠:14) Taswe, i gud yumi gat strong tingting blong wokbaot folem ogenaesesen blong Jeova oltaem.

[Futnot]

?Bambae Yu Yu Ansa Olsem Wanem?

• ?From wanem yumi save talem se ogenaesesen blong Jeova i stap muf i go fored oltaem?

• ?Wanem pruf i soemaot se laet blong trutok i stap kam klia moa long ol man blong God?

• ?Olsem wanem Kristin wok blong prij i kam moa gud?

• ?Wanem jenis long saed blong ogenaesesen, we ol man blong Jeova oli mekem long stret taem?

[Kwestin]

[Tok blong pija long pej 17]

Olsem Deved, yumi no naf blong talem hamas nambawan wok we Jeova i mekem

[Tok blong pija long pej 18]

Ol sipsip blong God oli kasem plante blesing from ol jenis we oli kamaot insaed long ogenaesesen