Yumi Mekem Wanem We Tok Blong God i Talem Mo Yumi Faenem Glad

“Yumi luksave se asembli ya i wan rod we Jeova i yusum blong rerem yumi blong gohed moa long wok blong Kingdom.” Hemia toktok blong wan long ol man we i givim tok long stat blong Distrik Asembli ya “Yumi Mekem Wanem We Tok Blong God i Talem.” Man ya i gohed i talem se: “Yumi rerem yumi blong kasem ol tijing blong mekem famle i hapi, blong mekem yumi stap klosap long ogenaesesen blong Jeova, blong wok strong long wok blong Kingdom, mo blong tingbaot se yumi nidim blong stap wekap gud.”

I STAT long en blong manis Mei 2000, plante milian man we oli mekem wanem we Tok blong God i talem, mo ol fren blong olgeta, oli wokbaot i go long plante taosen ples raonabaot long wol blong kasem impoten tijing blong Baebol. ?Oli lanem wanem long trifala dei blong asembli?

Fasfala Dei​—⁠No Fogetem We Jeova i Kaen Tumas

Long faswan tok blong asembli, jeaman i pulum ol man blong luksave ol blesing we oli kamaot taem ol man oli joen tugeta blong wosipim Jeova long ol asembli. Hem i talem long olgeta we oli stap se bambae asembli ya i mekem bilif mo fasin fren blong olgeta wetem Jeova i kam strong moa.

“Hapi God ya” hem i savegud wanem we yumi wanwan i nidim blong stap glad. (1 Timoti 1:​11, NW ) Taswe, tok ya “Mekem Wanem We God i Talem i Givim Glad” i makem klia se Tok blong Jeova, Baebol, i soemaot wan fasin blong laef we i beswan. (Jon 13:17) Oli askem kwestin long samfala we oli Witnes blong Jeova longtaem finis mo ansa blong olgeta i soemaot se fasin blong mekem wanem we God i wantem, nomata wanem samting i hapen long yumi, i mekem se laef blong yumi i gat moa mining. Tok we i kam biaen, “Harem Gud Long Ol Gudgudfala Samting We God i Givim,” i makem se ol Kristin oli man ‘blong folem fasin blong God,’ taswe oli mas “mekem ol fasin we i gud” long laef blong olgeta. (Efesas 5:​1, 9) Wan nambawan rod blong mekem samting ya hemia long wok blong talemaot gud nius mo mekem disaepol.​—⁠Ol Sam 145:⁠7.

Tok ya “Gohed Blong Stanap Strong Olsem We Yu Stap Luk God Ya We Man i No Save Luk” i soemaot olsem wanem strong bilif i givhan long yumi blong “luk” God ya we man i no save luk. Man we i givim tok ya i tokbaot se ol man we oli gat tingting long saed blong spirit oli luksave ol fasin blong God, olsem fasin blong hem blong save evri samting we yumi tingbaot. (Ol Proveb 5:​21) Sam man we hem i askem kwestin long olgeta, oli tokbaot ol step we oli tekem blong wokem wan strong bilif mo blong putum ol wok blong Kingdom long fasples long laef blong olgeta.

Laswan tok long moning ya, hemia Stamba Tok blong asembli, “Presem Jeova​—⁠Hem i Stap Mekem Ol Bigbigfala Samting.” Tok ya i givhan long ol man blong luksave se, taem yumi lanem moa long saed blong Jeova, yumi faenem moa risen blong presem hem olsem Man We i Mekem ol bigbigfala samting. Man we i givim tok ya i talem  se: “Taem yumi tingbaot ol nambawan samting we God i wokem mo ol bigbigfala samting we hem i mekem long yumi tede, trufala fasin tangkiu i pusum yumi blong presem hem. Taem yumi tingting dip long ol merikel we hem i mekem long ol man blong hem bifo, yumi wantem presem hem. Mo taem yumi tingbaot ol nambawan promes blong Jeova, we bambae hem i mekem i kamtru, yumi wantem lukaot rod tu blong talem tangkiu long hem.”

Program long aftenun i stat wetem tok ya “No Kam Slak Blong Mekem Ol Gudfala Samting.” Tok ya i mekem olgeta man we oli lesin oli tingbaot se ol hadtaem long wol ya oli mekem yumi sua se en i klosap. (2 Timoti 3:⁠1) Mo, sipos yumi no lego Jeova, yumi pruvum se “yumi man blong bilif long God, mo hem bambae i sevem yumi.”​—⁠Hibrus 10:⁠39.

?Wanem advaes blong Baebol we ol man oli kasem long saed blong famle laef? Faswan tok long asembli we i gat tri haf long hem, hemia “Obei Long Tok Blong God.” Hem i stat wetem haf ya “Jusumgud Hasban No Waef Blong Yu.” Disisen blong jusum wan hasban no waef, hem i wan long ol disisen we i bigwan moa bitim ol narafala disisen we yumi mas mekem long laef. Taswe, i gud se ol Kristin oli wet go kasem taem we oli bigman finis blong oli mared, mo i gud se oli mared nomo long wan we i “man blong Masta.” (1 Korin 7:​39) Nekis haf blong tok ya i tokbaot se Jeova i wantem we olgeta Kristin famle oli strong long saed blong spirit. Mo tok ya i tokbaot sam rod we oli wokgud blong kasem mak ya. Lashaf blong tok ya i mekem ol papa mama oli tingbaot se bifo we oli save tijim ol pikinini blong olgeta blong lavem God, fastaem ol papa mama oli mas lavem hem.

Ol poen we oli kamaot long tok ya “Lukaot Long Ol Toktok Olbaot Mo Ol Toktok blong Spolem Narafala” oli givhan long yumi blong gat waes fasin. Nating se sam narakaen samting oli save hapen, yumi no mas kwik blong bilivim evri stori we yumi harem. I moa gud sipos ol Kristin oli tokbaot ol stori we oli sua se oli tru​—⁠olsem gud nius blong Kingdom. Plante long olgeta we oli stap long asembli ya oli haremgud long tok ya we i leftemap tingting blong olgeta se “Winim Samting Ya We i Olsem ‘Nil Blong Aranis.’ ” Tok ya i givhan long olgeta blong luksave se nating se yumi fesem ol traem we oli gohed longtaem, Jeova i givim tabu spirit blong hem, Tok blong hem, mo kampani blong ol Kristin brata blong givhan long yumi. Ol samting we aposol Pol i fesem oli leftemap tingting blong yumi long saed ya.​—⁠2 Korin 12:​7-​10; Filipae 4:​11, 13.

Faswan dei blong asembli i finis wetem tok ya “Wokbaot Wetem Ogenaesesen Blong Jeova.” Man we i givim tok ya i tokbaot tri samting we oli soemaot se ogenaesesen blong God i gohedgud: (1) laet long saed blong spirit we Jeova i givim i kam klia moa, (2) minista wok we Jeova  i givim long yumi blong mekem, mo (3) ol jenis insaed long ogenaesesen we oli kamaot long stret taem. Wetem strong tingting hem i talem se: “Yumi glad tumas taem yumi tingbaot wanem we bambae i kamaot long fiuja.” Hem i askem se: “?Yumi gat evri risen blong trastem ogenaesesen blong Jeova, olsem we yumi bin mekem fastaem, gogo kasem en?” (Hibrus 3:​14) Ansa blong kwestin ya i klia nomo. Nao, hem i soemaot wan niufala buklet we nem blong hem !Yu Save Kam Fren Blong God! Buklet ya bambae i givhan bigwan blong tijim ol man we oli no skulgud no we oli no save ridgud, blong oli save lanem moa long saed blong Jeova.

Namba Tu Dei​—⁠Gohed Blong Tokbaot Ol Bigfala Wok Blong God

Afta we oli tokbaot vas blong dei, namba tu dei blong asembli ya i gohed wetem wan tok we i gat tri haf long hem se “Ol Minista Blong Tok Blong God.” Fas haf blong hem i tokbaot olsem wanem wok blong prij long ful wol i karem gudfala frut. Be, blong stanap strong long wok ya i no isi, from we bighaf blong ol man oli no wantem lesin long mesej blong Kingdom. Sam long ol pablisa we oli prij plante yia finis oli tokbaot olsem wanem oli holem glad long wok ya. Oli lukaotgud se tingting mo hat blong olgeta i no kam slak from ol man we oli no intres no we oli agens long mesej ya. Namba tu haf blong tok ya i mekem ol man long asembli oli tingbaot se ol Witnes blong Jeova oli traehad blong toktok wetem ol man long evri ples, long ol haos wanwan mo long rod tu. Mo lashaf blong tok ya i tokbaot ol defren rod we olgeta Kristin oli save yusum blong mekem moa long wok blong prij. Man we i tokbaot haf ya i makem se sipos yumi wantem mekem moa, yumi mas putum Kingdom blong God long fasples long laef blong yumi, nating se fasin ya i mekem hadwok long yumi no yumi mas lego sam samting we yumi wantem.​—⁠Matiu 6:​19-​21.

From we plante man long wol oli no bilif long God mo oli wantem tumas ol samting long saed blong bodi, tok ya “Wokem Fasin Ya Blong Fasgud Long God Wetem Glad” i stret long taem blong yumi. Tok ya i stanap long 1 Timoti 6:​6-​10, 18, 19, mo man we i givim tok ya i tokbaot olsem wanem fasin fasgud long God i save givhan long ol Kristin blong blokem fasin blong laekem mane tumas. Fasin ya blong laekem mane tumas i save lidim olgeta oli gowe long bilif mo i save mekem oli harem nogud tumas. Tok ya i soemaot klia se nomata sipos yumi pua no rij, glad i dipen long fasin fren blong yumi wetem Jeova mo tingting blong yumi long saed blong spirit. Ol poen we oli  kamaot long tok ya “No Mekem Samting We i Save Mekem God i Sem” i kasem hat blong plante man. Tok ya i soemaot se Jeova i neva fogetem ol trufala Witnes blong hem. Eksampol blong Jisas Kraes​—⁠we “fasin blong hem i sem mak nomo, i stat bifo, i kam kasem tede”​—⁠i wan eksampol we yumi no save skelem wetem narafala. Eksampol blong hem bambae i givhan long plante man blong stanap strong mo gohed long resis ya blong laef.​—⁠Hibrus 13:⁠8.

Laswan tok long moning ya hemia tok blong baptaes​—⁠we hem i wan bigfala samting long ol asembli blong ol Witnes blong Jeova. !Yumi glad tumas blong luk ol man ya we oli jes givim laef blong olgeta long Jeova, nao oli folem fasin blong Jisas mo tekem baptaes long wota! (Matiu 3⁠:​13-17) Olgeta man we oli tekem baptaes, oli mekem plante samting finis olsem ol man we oli mekem wanem we Tok blong God i talem. Taem oli tekem baptaes, God i putumap olgeta olsem ol man blong talemaot gud nius. Mo oli kasem bigfala glad from we oli save se oli joen long wok ya blong mekem nem blong Jeova i tabu.​—⁠Ol Proveb 27:⁠11.

Gudfala advaes i kamaot long tok ya “Ol Bigman Oli Mas ‘Jusumaot Wanem i Gud Mo Wanem i Nogud.’ ” Ol rul blong wol long saed blong wanem fasin i gud mo wanem fasin i nogud oli no stret nating. Taswe yumi mas trastem ol rul blong Jeova. (Rom 12:⁠2) Tok ya i leftemap tingting blong ol man blong traehad blong kasem stret save long ol fasin blong God mo kam bigman long saed blong spirit. Biaen, bambae oli lan blong yusum paoa blong tingting blong olgeta we i “naf blong jusumaot wanem fasin i gud mo wanem fasin i nogud.”​—⁠Hibrus 5:​11-​14.

 Biaen i gat wan tok we i gat tri haf long hem se “Wokhad Blong Kam Strong.” Ol trufala Kristin oli luksave se i impoten tumas blong wokem mo holem wan strong tingting long saed blong spirit. Be hemia i minim se oli mas wok had​—⁠oli mas rid, stadi, mo tingting dip. (Matiu 7:​13, 14; Luk 13:24) Mo tu ol man we oli laekem ol samting long saed blong spirit oli ‘mas prea, oli mas askem long God blong i givhan long olgeta.’ (Efesas 6:​18) Yumi luksave se ol prea blong yumi oli soemaot bilif blong yumi, mo sipos yumi onagud long God mo yumi strong long saed blong spirit no nogat. Mo tu oli soemaot wanem ol samting we oli “impoten moa” long laef blong yumi. (Filipae 1:​10, NW ) Tok ya i soemaot tu se i impoten blong wokem wan fasin fren wetem Jeova we yumi laekem hem tumas, olsem wan pikinini we i obei i frengud wetem papa blong hem we i kaen tumas. Yumi no talem nomo se yumi gat wan skul​—⁠nating se skul ya hem i trufala skul​—⁠be yumi wantem wokem wan strong bilif ‘olsem we yumi stap luk God ya we man i no save luk long ae blong hem.’​—⁠Hibrus 11:​6, 27.

Tok ya “Soemaot Se Yu Stap Gohed Gud” i gohed blong tokbaot olsem wanem blong gru long saed blong spirit. I gat tri fasin we oli soemaot se yumi stap gohed gud, Hemia taem: (1) yumi gru moa long saed blong save, fasin blong kasem mining blong ol samting, mo fasin waes, (2) yumi wokem ol frut blong tabu spirit, mo (3) yumi wanwan i mekem prapa wok blong yumi insaed long famle blong yumi.

Long en blong laswan tok blong dei ya, “Wokbaot Long Laet Blong Tok Blong God We i Kam Klia Sloslou,” ol man long asembli ya oli glad tumas blong kasem wan niufala buk, Isaiah’s Prophecy​—⁠Light for All Mankind I. Hemia faswan long tu buk we oli tokbaot olgeta wanwan japta blong buk blong Aesea. Man blong givim tok i talem se: “I gat wan mesej long buk blong Aesea we i stret long yumi tede.” Hem i gohed i talem se: “Yes, plante long ol profet tok blong hem oli kamtru finis long taem blong Aesea. . . . Be, plante long ol profet tok blong Aesea oli stap kamtru tede, mo sam long olgeta bambae oli kamtru i no longtaem long niufala wol blong God.”

Namba Tri Dei​—⁠Mekem Wanem We Tok Ya i Talem

Laswan dei blong asembli ya i stat wetem vas blong dei. Biaen i gat wan tok we i gat tri haf long hem, “Ol Profet Tok Blong Sefanaea i Gat Mining Long Olgeta We Oli Obei Long God.” Trifala haf blong tok ya oli soemaot se, olsem we Jeova i mekem long stronghed nesen blong Juda finis, bambae hem i letem bigfala trabol i kam kasem olgeta man tede we oli no lesin long woning blong hem. From we ol man ya oli sin agensem God, bambae oli wokbaot olsem man we i blaen, oli no save olsem wanem blong fri long ol trabol ya. Be, ol trufala Kristin, oli gohed blong lukaot Jeova, mo Jeova bambae i haedem olgeta long dei blong kros blong hem. Mo tu, oli haremgud long plante blesing naoia. Jeova i blesem olgeta wetem nambawan janis ya blong toktok “klin lanwis” we i kamaot long trutok blong Baebol. (Sefanaea  3:​9, NW ) Man we i givim tok ya i talem se: “Blong toktok klin lanwis i no minim nomo se yumi bilif long trutok mo tijim ol narafala long hem, be hem i minim tu se, fasin blong laef blong yumi i mas laenap wetem ol loa mo ol rul blong God.”

Ol man long asembli ya oli wantem tumas blong luk drama ya “Ol Eksampol We Oli Olsem Woning Long Yumi Tede.” Ol man we oli pleplei long drama ya oli putum klos olsem ol man bifo. Drama ya i soemaot olsem wanem plante taosen man Isrel oli lusum laef blong olgeta from we oli fogetem Jeova taem oli stap klosap nomo long Promes Lan. Oli letem ol hiten woman oli pulum olgeta blong mekem nogud long saed blong seks mo joen long giaman wosip blong olgeta. Wan man long drama ya​—⁠Jamin​—⁠fastaem hem i no sua se bambae hem i mekem wanem. Bambae hem i folem ol woman Moab no bambae hem i stap tru long Jeova. Drama ya i soemaot klia se tingting blong Simri we i no laekem God, i no stret mo i blong trikim ol man nomo, be Finehas i man blong bilif we i onagud long God. Mo tu, drama ya i soemaot denja we i save kamaot from fasin blong joen wetem ol man we oli no laekem Jeova.

Drama ya i rerem yumi blong lesingud long tok we i kamaot biaen se, “No Lesin Nomo Afta Fogetem.” Tok ya i tokbaot 1 Korin 10:​1-​10 mo i soem se Jeova i traem fasin obei blong yumi blong luksave se yumi stret blong kasem laef long niufala wol no nogat. Yumi stap klosap finis long taem ya we bambae yumi go insaed long niufala wol. Be, sam long yumi oli letem ol samting we bodi i wantem i blokem olgeta blong mekem ol wok long saed blong spirit. Tok ya i leftemap tingting blong olgeta, blong no mestem janis blong “kasem spel ya” blong Jeova.​—⁠Hibrus 4:⁠1.

Pablik tok i tokbaot poen ya “From Wanem Yumi Intres Long Ol Nambawan Wok We God i Mekem.” “Ol bigbigfala wok” we Jeova i mekem oli soemaot waes blong hem mo paoa we hem i gat long ol samting we hem i wokem raonabaot long yumi. (Job 37:14) Sam kwestin we Jeova i askem Job oli pulum tingting blong Job blong luksave bigfala paoa blong Man ya We i Wokem olgeta samting. Long fiuja, bambae Jeova i mekem “ol bigbigfala wok” bakegen blong givhan long ol trufala man blong hem. Man blong givim tok i finisim tok blong hem i se: “Yumi gat plante risen blong tingtinggud long ol nambawan wok we Jeova i mekem​—⁠ol samting we hem i mekem bifo, ol samting raonabaot long yumi we hem i wokem, mo ol samting we hem i promes blong mekem long fiuja.”

Afta long tok we i stanap long Wajtaoa stadi long wik ya, i gat laswan tok blong asembli ya. Nem blong hem, “Tinghae Long Blesing Blong Yu Blong Mekem Wanem We Tok Blong God i Talem.” Tok ya we i wekemap tingting blong ol man, i soemaot klia se i wan blesing blong stap olsem man we i mekem wanem we Tok blong God i talem. (Jemes 1:​22) Tok ya i pulum ol man we oli lesin blong tingbaot se blesing we yumi gat olsem ol man blong mekem wanem we God i talem, hem i spesel, mo sipos yumi gohed moa blong mekem wanem we God i talem, bambae yumi tinghae moa long blesing ya. Tok ya i leftemap tingting blong olgeta we oli stap blong oli soemaot se asembli ya i gat paoa long fasin blong olgeta blong wantem mekem wanem we Tok blong God i talem. Long rod ya nomo yumi save kasem glad we i bigwan olgeta.

[Bokis/Foto blong pija long pej 25]

!Yu Save Kam Fren Blong God!

Long Fraede aftenun wan niufala buklet we nem blong hem !Yu Save Kam Fren Blong God! i kamaot. Long plante ples long wol i nidim ol tul blong tijim Baebol we oli isi blong ol man oli kasem save long olgeta. Buklet ya bambae oli yusum long ol ples olsem. Bambae buklet ya i givhan bigwan long ol man we oli no save ridgud mo we oli no skulgud mo olgeta we oli skulgud be oli no savegud lanwis blong kantri we oli laef long hem.

[Bokis/Foto blong pija long pej 26]

Profet Tok Blong Aesea​—Laet Blong Olgeta Man

Ol man oli haremgud tumas blong kasem Volium I blong wan buk we bambae i gat tu haf long hem, nem blong hem Isaiah’s Prophecy​—Light for All Mankind. Buk ya i soemaotgud we profet tok blong Aesea i save givhan long laef blong yumi tede.