Laef Stori

Wok Long Eni Ples We Oli Nidim Mi

JAMES B. BERRY I TALEM STORI YA

Hemia long yia 1939. Bigfala Hadtaem long saed blong mane i mekem se laef long Yunaeted Stet i had tumas, mo bigfala faet i stap gohed long Yurop. Mi mo smol brata blong mi, Bennett, mitufala i aot long Mississippi, mitufala i go long Houston, Texas, blong lukaot wok.

WAN dei, klosap long en blong hot taem, mitufala i harem wan nius long radio we i mekem mitufala i sek bigwan: Ol ami blong Hitler oli maj i go insaed long Polan. Brata blong mi i talem se: “!Amagedon i stat finis!” Kwiktaem nomo, mitufala i lego wok blong mitufala. Nao mitufala i go long Haos Kingdom we i stap klosap mo joen long faswan miting blong mitufala. ?From wanem mitufala i go long Haos Kingdom? Bambae mi talem fulwan stori.

Mi mi bon long Hebron, Mississippi, long 1915. Mifala i laef long wan plantesin afsaed long taon. Ol Baebol Studen, hemia ol Witnes blong Jeova bifo, oli kam long ples ya wan taem evri yia mo oli givim tok long haos blong wan long mifala. From samting ya, papa mama blong mi, tufala i gat plante buk we i tokbaot Baebol. Ale, kwiktaem nomo, mi mo Bennett mitufala i bilif long wanem we ol buk ya oli tijim, olsem: Hel i no hot, sol i save ded, mo ol stret man bambae oli laef blong olwe long wol ya. Be i gat plante samting yet we mitufala i mas lanem. Afta we mi finisim skul, mi mo brata blong mi, mitufala i go long Texas blong lukaot wok.

Taem mitufala i mitim ol Witnes long Haos Kingdom, oli askem mitufala sipos mitufala i paenia. Mitufala i neva save se wan paenia hem i wan Witnes blong Jeova we i prij fultaem. Biaen oli askem long mitufala sipos mitufala i wantem prij. Mitufala i ansa se: “!Yes!” Mitufala i ting se bambae oli sanem wan man i kam wetem mitufala blong soem long mitufala olsem wanem blong  prij. Be no gat, oli jes givim wan map long mitufala mo oli talem se: “!Yutufala i wok long ples ya!” Tingbaot, mi mo Bennett, mitufala i no save nating olsem wanem blong prij, mo mitufala i no laekem nating blong sem fored long ol man. !Biaen, mitufala i sanem map blong teritori ya i go long kongregesen mo mitufala i gobak long Mississippi!

Ol Trutok Blong Baebol Oli Kam Haf Blong Laef Blong Mifala

Afta we mitufala i kambak long haos, mitufala i ridim ol buk blong ol Witnes evri dei. Mitufala i mekem olsem blong klosap wan yia. I no gat lektrik long haos blong mifala, taswe long naet mifala i rid wetem laet blong faea. Long olgeta taem ya, ol seket elda oli visitim kongregesen blong ol Witnes blong Jeova mo ol Witnes we oli stap wanwan. Visit ya i blong mekem ol Witnes oli kam strong long Kristin laef blong olgeta. Ted Klein i wan long ol seket elda ya, we i visitim kongregesen blong mifala mo i joen wetem mi mo Bennett blong prij long ol haos wanwan. Oltaem hem i tekem mitufala i go wetem hem. Hem i eksplenem long mitufala wanem ya wok blong paenia.

From we oltaem mitufala i joen wetem hem, samting ya i pusum mitufala blong wantem mekem moa long wok blong God. Taswe long Eprel 18, 1940, Brata Klein i baptaesem mi, Bennett mo sista blong mitufala. Papa mama blong mifala i stap taem mifala i baptaes, mo tufala i glad long disisen we mifala i tekem. Samwe long tu yia biaen, tufala tu i baptaes. Tufala tugeta i stap tru long God gogo kasem we tufala i ded. Papa i ded long 1956 mo Mama long 1975.

Taem Brata Klein i askem mi blong mekem wok blong paenia, mi talem long hem se mi mi laekem, be mi no gat mane, mo klos, mi no gat wan samting nating. Hem i talem se: “Yu no wari, bambae mi lukaot long yu.” Mo hem i mekem olsem. Fastaem hem i sanem pepa we mi bin fulumap blong kam paenia, i go long Sosaeti. Biaen, hem i tekem mi mo mitufala i go long New Orleans we i stap 300 kilometa longwe. Long ples ya, hem i soem long mi sam naesfala stori haos, we oli stap antap long wan Haos Kingdom. Ol haos ya oli blong ol paenia. Smoltaem biaen, mi muf i go long ples ya mo mi statem wok blong paenia. Ol Witnes long New Orleans oli givhangud long ol paenia. Oli givim klos, mane, mo kakae long olgeta. Long dei, ol brata oli karem kakae i kam mo oli livim long doa no oli putum insaed long aes bokis blong mifala. Oltaem, wan brata we i gat wan restoron klosap, i singaot mifala taem we hem i satem doa blong restoron. Long rod ya, mifala i save tekem ol haf kakae blong dei olsem mit, bred, chili con carne, * mo kek.

Fesem Ol Stronghed Man

Smoltaem biaen, oli sanem mi mi go paenia long Jackson, Mississippi. Mi mo yangfala brata we mitufala i wok wanples, mitufala i mitim wan stronghed grup blong man, mo i luk olsem se ol polis long ples ya oli stap sapotem grup ya. Mitufala i fesem sem samting long Columbus, Mississippi. Mitufala i prij long ol man we oli kamaot long ol defren laen mo kantri. From samting ya, samfala waet man oli agensem mitufala. Plante man oli ting se mitufala i stap agensem gavman. Wan lida blong ogenaesesen ya American Legion, we i stap leftemap kantri blong hem, i gat tingting olsem. Plante taem, lida ya i pusum ol stronghed man blong mekem trabol long mitufala.

Faswan taem we ol stronghed man oli mekem trabol long mitufala long Columbus, hemia taem mitufala i stap seremaot ol magasin long taon. Oli holem mitufala mo oli pusum mitufala i go fas long glas windo blong stoa. Plante man oli kam blong luk wanem i stap hapen. Smoltaem biaen, polis i kam mo i tekem mitufala i go long kot haos. Stronghed grup ya i folem mifala i go long kot haos, mo oli talem long fored blong ol bigman  long kot se sipos mitufala i wantem laef, mitufala i mas lego taon ya long dei we oli jusum. !Sipos no, bambae oli kilim mitufala i ded! Mitufala i ting se i moa gud blong aot long taon ya smoltaem. Be sam wik nomo biaen, mitufala i kambak long taon ya mo gohed blong prij bakegen.

Smoltaem biaen, wan grup blong eit man oli kam mo oli fosem mitufala blong go insaed long tufala trak blong olgeta. !Oli tekem mitufala i go long bus, oli karemaot ol klos blong mitufala, mo oli wipim wanwan long mitufala 30 taem wetem strap blong mi! Oli gat ol masket wetem ol rop, mekem se mitufala i fraet we i fraet. Mi ting se bambae oli fasem mitufala mo sakem mitufala long reva. Oli brebrekem ol buk blong mitufala mo oli sakem i go olbaot, mo oli smasem fonograf blong mitufala long stamba blong wan tri.

Afta we oli wipim mitufala, oli talem long mitufala blong havem ol klos blong mitufala bakegen mo wokbaot long wan rod i gotru long bus we mitufala i no mas lukluk bak biaen. !Taem mitufala i stap wokbaot i go, mitufala i ting se sipos mitufala i lukluk bak, bambae oli sutum mitufala i ded mo ronwe long panis! Be sam menet afta, mitufala i harem we trak blong olgeta i aot i go.

Wan narafala taem bakegen, wan stronghed grup blong man i ronem mitufala, mo mitufala i mas fasem klos blong mitufala raon long nek blong mitufala, mo swim kros long reva blong ronwe long olgeta. I no longtaem afta, oli holem mitufala mo oli jajem mitufala se mitufala i stap agensem gavman. Mitufala i stap tri wik long kalabus bifo we mitufala i pas long kot. Nius blong samting ya i goraon long olgeta man long Columbus. Mo tu ol tija blong wan hae skul klosap oli letem ol studen blong kam harem ol toktok long kot. !Long dei ya, kot haos i fulap gud wetem ol man, i no moa gat ples blong sidaon! I gat tu prija, mea, mo wan polis we oli toktok long bihaf blong Gavman.

Wan loea we i wan Witnes, nem blong hem G. .C. Clarke wetem fren blong hem, tufala nao i toktok long bihaf blong mitufala. Tufala i askem kot blong karemaot ol tok we ol man oli bin talem se mifala i stap agensem gavman, be oli no gat pruf nating. Loea we i wok wetem Brata Clarke, hem i givim ol strongfala tok long bihaf blong mitufala, nating se hem i no wan Witnes blong Jeova. Hem i talem long jaj se: “Ol man oli talem se ol Witnes blong Jeova oli krangke. ?I tru se oli krangke? !Thomas Edison nao i krangke!” Nao, hem i poen i go long wan laet mo i talem se: “!Be yufala i luk laet ya!” Maet samfala oli ting se Edison we i wokem laet ya i krangke, be i no gat man i save tok agensem hem from niufala samting ya we hem i wokem.

Afta we hae jaj i harem ol toktok finis, hem i talem long narafala loea se: “Yu yu no gat pruf nating blong soem se oli stap agensem gavman, mo olgeta oli gat raet blong mekem wok ya. Yu no mas tekem olgeta i kambak long kot kasem we yu gat sam pruf. Yu mekem se Gavman i westem taem mo mane blong hem!” !Mitufala i win bakegen!

Be biaen, jaj i singaot mitufala i go long rum blong hem. Hem i save se fulwan taon i agensem disisen blong hem. Taswe hem i givim woning long mitufala se: “Samting we mi talem i folem loa, be mi wantem talem long yutufala se: !Yutufala i ronwe long ples ya, sipos no bambae oli kilim yutufala i ded!” Mitufala i save se tok blong hem i tru, taswe mitufala i aot long taon ya.

Taem mi aot long taon ya, mi joen wetem Bennett mo Velva, we tufala i stap wok olsem spesel paenia long Clarksville, Tenessee. Afta long sam manis, oli sanem mitufala i go long Paris, Kentucky. Wan yia haf biaen, mitufala i rere blong stanemap wan kongregesen long ples ya. Be long sem  taem ya, mi mo Bennett mitufala i kasem wan spesel leta.

Misinari Wok

Taem mitufala i luk leta ya we i askem mitufala blong go long seken klas blong Wajtaoa Baebol Skul blong Gilead, mitufala i tingting se, ‘!E, oli mekem wan mastik ya! ?From wanem bambae oli askem tu yangfala boe blong Mississippi we oli no skulgud blong go long skul ya?’ Mitufala i ting se bambae oli tekem ol man we oli skulgud, be nating se i olsem, mitufala i go nomo. I gat 100 studen long klas, mo kos ya i gohed faef manis. Mifala i kasem ol stefeket blong mifala long Jenuware 31, 1944, mo mifala i wantem tumas blong wok long narafala kantri. Be long taem ya, i no isi nating blong kasem paspot mo visa. From samting ya, oli sanem mifala i go smoltaem long Yunaeted Stet. Mifala i paenia smoltaem long Alabama mo Georgia, biaen oli sanem mi mo Bennett i go long Barbados, West Indies.

Namba Tu Bigfala Faet Blong Wol i stap gohed yet, mo long plante ples, long Barbados tu, oli putum tabu long wok mo ol buk blong ol Witnes blong Jeova. Ol man long ofis blong kastom long Barbados, oli openem mo jekem bokis blong mitufala mo oli faenem ol buk we mitufala i bin haedem insaed. Mitufala i stap tingting se, ‘Saye, oli kasem yumitu.’ Be wan long olgeta i talem long mitufala se: “Sore we mifala i mas lukluk insaed long bokis blong yutufala; oli putum tabu long ol buk ya long Barbados.” !Nating se i olsem, hem i letem mitufala i go wetem olgeta buk we i stap long bokis blong mitufala! Biaen, taem mitufala i prij long ol hae man blong gavman, oli talem se oli no save from wanem oli putum tabu long ol buk ya. Sam manis biaen, oli karemaot tabu ya.

Mitufala i kasem plante gudfala frut long wok blong prij long Barbados. Wanwan long mitufala i mekem 15 Baebol stadi, mo plante long ol stadi ya oli gohed gud long Kristin laef blong olgeta. Mitufala i glad blong luk we samfala oli stap kam long ol miting blong kongregesen. Be long taem ya, ol brata long ples ya oli no save olsem wanem blong mekem ol miting, from we gavman i bin putum tabu long ol buk blong smoltaem. Ale mitufala i stat trenem sam brata we oli naf. Mitufala i glad blong halpem plante long ol studen blong mitufala blong joen long Kristin wok mo mitufala i luk we kongregesen i stap gru.

Gat Wan Famle

Afta we mi stap 18 manis long Barbados, ol dokta oli mas katem mi taswe mi gobak long Yunaeted Stet. Long Yunaeted Stet, mi maredem Dorothy, wan Witnes we mi bin stap raetem leta long hem. Biaen, mi mo waef blong mi, mitufala i paenia long Tallahassee, Florida. Be afta long sikis manis, mitufala i muf i go long Louisville, Kentucky, mo long ples ya, wan Witnes i givim wan wok long mi. Brata blong mi, Bennett, hem i gohed long wok blong misinari long Barbados blong plante yia. Biaen, hem i maredem wan misinari mo i mekem wok blong visitim ol kongregesen long ol aelan. Be biaen, tufala i mas gobak long Yunaeted Stet from sam problem long helt. Long Yunaeted Stet, tufala i gohed blong visitim ol kongregesen we oli toktok lanwis Spen go kasem we Bennett i ded long 1990 taem hem i gat 73 yia.

 Long 1950, Dorothy i bonem faswan pikinini blong mitufala, wan bebi gel we nem blong hem Daryl. Mitufala i gat faef pikinini evriwan. Seken pikinini blong mitufala, Derrick, hem i ded taem hem i gat tu yia haf from sik ya spinal meningitis. Be Leslie i bon long 1956, mo biaen Everett i bon long 1958. Mi mo Dorothy, mitufala i traehad blong tijim ol pikinini blong mitufala blong folem trutok long Baebol. Oltaem, mitufala i traehad blong folem program blong mifala blong mekem famle Baebol stadi evri wik, mo blong mekem evri pikinini oli intres blong stadi. Taem Daryl, Leslie, mo Everett , trifala i yangfala yet, mitufala i givim ol kwestin long trifala evri wik blong mekem dip stadi long hem mo givim ansa long wik biaen. Mo tu, trifala i mekem pleplei long saed wok blong prij long ol haos wanwan. Wan i go insaed long kabod mo i mekem olsem se hem i man blong haos. Wan i stanap afsaed mo i kilkilim doa blong kabod. Oli toktok mo mekem olsem se wan Witnes i stap prij long wan man long haos. Fasin ya i givhan long olgeta blong mekem lav we oli gat long wok blong talemaot gud nius i gru. Mo tu, mitufala i prij oltaem wetem trifala.

Dorothy i gat klosap 50 yia mo mi gat samwe long 60, taem Elton, laswan pikinini blong mitufala i bon long 1973. !Long kongregesen, oli stap singaotem mitufala se Ebraham mo Sera! (Jenesis 17:​15-​17) Oltaem, tufala bigfala brata blong Elton oli tekem hem i go long wok blong prij. Mifala i harem se hem i wan nambawan witnes, taem ol man oli luk ol brata mo ol sista, ol papa mama mo ol pikinini oli stap wok tugeta olsem wan famle, blong talemaot trutok blong Baebol long ol narafala. Wanwan long tufala bigfala brata blong Elton i karem hem long solda mo oli givim wan traket long hem blong i holem. Plante man oli lesin taem oli openem doa mo oli luk naesfala smol boe ya long solda blong bigfala brata blong hem. Tufala bigfala brata blong Elton oli tijim hem blong givim traket long man blong haos taem storian i finis, mo tufala i tijim hem tu blong talem wan smol tok. Hemia nao rod we hem i statem blong prij.

Long olgeta yia we i pas, mitufala i gat janis blong halpem ol narafala blong save Jeova. Long en blong ol yia 1970, mifala i aot long Louisville mo muf i go long Shelbyville, Kentucky, blong givhan long wan kongregesen. Long ples ya, mifala i luk we kongregesen i gru i kam bigwan, be tu, mifala i givhan blong faenem graon mo bildim wan Haos Kingdom. Biaen, oli askem mifala blong wok long wan narafala kongregesen we i no longwe tumas.

Laef Long Famle i Jenis

Mi wantem tumas se olgeta pikinini blong mi oli folem rod blong Jeova, be ol samting oli no bin hapen olsem. Taem oli kam bigwan, tri long ol fo pikinini blong mitufala oli lego trutok taem oli kam bigwan mo lego haos. Be, boe blong mitufala, Everett, i folem eksampol blong mi mo hem i joen long fultaem wok blong prij. Biaen, hem i wok long hedkwota blong ol Witnes blong Jeova long New York, mo long 1984, oli askem hem blong go long namba 77 klas blong Gilead. Afta we hem i kasem stefeket blong hem, hem i go wok long Sierra Leone, long Wes Afrika. Long 1988, hem i maredem Marianne, wan paenia blong Beljiom. Stat long taem ya kam kasem naoia, tufala i stap wok olsem misinari.

Olsem ol narafala papa mama, mitufala i harem nogud tumas taem trifala pikinini blong mitufala oli lego rod we i save givim glad naoia, mo nambawan hop blong kasem laef we i no save finis long wol long fiuja. Samtaem mi harem olsem se i fol blong mi. Be mi harem gud bakegen taem mi tingbaot se sam spirit pikinini blong Jeova, no ol enjel, oli lego Hem, nating se Jeova i gat lav mo i kaengud taem hem i stretem man mo hem i neva mekem mastik. (Dutronome 32:4; Jon 8:​44; Revelesen 12:​4, 9) Samting ya i mekem mi tingbaot se, nating sipos ol papa mama oli traehad blong tijim gud ol pikinini blong olgeta long fasin we Jeova i wantem, be maet sam long ol pikinini ya oli no wantem holem trutok.

Yumi mas jenisim tingting blong yumi folem ol defren hadtaem mo ol problem we yumi fesem long laef blong yumi, olsem wan tri we i save ben isi taem strong win i blu long hem. Long olgeta yia we i pas, mi luksave se fasin blong stadi Baebol mo blong go long ol miting, oli givim paoa we mi nidim blong stanap strong long Kristin laef blong mi, olsem wan tri we i stanap strong. Taem mi stap kam moa olfala mo mi luksave ol mastik blong mi, mi traem blong tingbaot ol gudfala samting we oli bin hapen long laef blong mi. Yes,  sipos yumi gohed blong holem strong long God, ol samting we oli hapen long laef blong yumi oli save givhan long yumi blong gru long Kristin laef blong yumi. Sipos yumi lan long ol mastik blong yumi, bambae yumi kasem gudfala frut.​—⁠Jemes 1:​2, 3.

Naoia helt blong mi mo Dorothy i kam nogud mo mitufala i no moa gat paoa blong mekem wanem we mitufala i wantem mekem long wok blong Jeova. Be mitufala i talem bigfala tangkiu long help we ol gudfala Kristin brata sista blong mitufala oli stap givim long mitufala. Klosap long evri miting, oli talem long mitufala se oli glad blong luk se mitufala i stap wetem olgeta. Mo oli traem bes blong olgeta blong givhan long mitufala, mo samtaem oli kam fiksimap haos mo trak blong mitufala.

Wanwan taem, mitufala i gat janis blong joen long wok blong haftaem paenia, mo mitufala i mekem stadi wetem olgeta we oli intres. Wan spesel samting we i stap mekem mitufala i glad tumas, hemia taem mitufala i kasem nius long boe blong mitufala we i stap wok long Afrika. Nating se naoia mitufala tu nomo, mitufala i stap gohed yet blong mekem famle stadi. Mitufala i glad tumas we mitufala i bin spenem plante yia long wok blong Jeova. Yes, Jeova i talem klia long yumi se bambae hem i no ‘save fogetem ol wok ya we yumi mekem mo hem bambae i stap tingbaot we yumi lavem hem.’​—⁠Hibrus 6:⁠10.

[Futnot]

[Tok blong pija long pej 25]

Taem ya we Ted Klein i baptaesem Velva, Bennett mo mi, long Eprel 18, 1940

[Tok blong pija long pej 26]

Mi mo waef blong mi, Dorothy, long ol yia 1940 mo long 1997

[Tok blong pija long pej 27]

Mifala i yusum wan bas long taon long Barbados blong talemaot stamba blong tok ta, “Prins blong Pis”

[Tok blong pija long pej 27]

Brata blong mi Bennett long fored blong haos blong ol misinari