Faet Agensem Fasin Pua—?Wan Faet We Yumi No Save Win?

OL TURIS we oli visitim Yunaeted Nesen long New York Siti, oli save luk Rum Blong Economic and Social Council. Antap long siling blong rum ya, ol paep blong lektrik oli klia nomo. Man we i lidim ol turis i eksplenem se: “Siling ya we ‘i no finis gud’ i olsem wan saen blong mekem man i tingbaot se wok we Yunaeted Nesen i stap mekem blong givhan long man long saed blong mane mo laef, i neva finis. Oltaem bambae i gat wan samting bakegen we oli save mekem blong laef blong ol man long wol i kam moa gud.”

Nating se Kaonsel ya i traehad bigwan blong mekem se evri man i gat wan laef we i gud, i luk olsem se wok ya i neva finis. I gud tumas blong save se, taem Jisas Kraes i mekem minista wok blong hem long wol long ol faswan handred yia K.T., hem i talem se: ‘Hae God i jusumaot mi, mo paoa blong spirit blong hem i kam fulap long mi blong mi talemaot gud nius long ol puaman.’ (Luk 4:​18) ?Wanem “gud nius” ya we hem i mas talemaot? Hemia mesej long saed blong Kingdom, we Jeova God bambae i stanemap. Jeova i kam olsem sef ples blong “ol puaman . . . sipos oli trabol.” King blong Kingdom ya we Jeova i stanemap hemia Jisas Kraes. ?Bambae Kingdom ya i mekem wanem? Profet tok blong Aesea i talem se: “Olgeta. Hae God i gat olgeta paoa, mo . . . hem bambae i mekemrere wan bigfala lafet blong yumi, we bambae i singaot ol man blong ol narafala kantri long wol blong oli kam joen. Long lafet ya, bambae yumi kakae ol nambawan kakae, mo yumi dring ol waen we i beswan. Bambae [hem] i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem.”​—⁠Aesea 25:​4-6, 8.

?Yu yu wantem save moa olsem wanem Kingdom blong God bambae i “mekem laef blong ol man long wol i kam moa gud,” mekem se ol man oli no moa sot long wan samting? Lukluk bokis daon blong save olsem wanem yu save gat wan tija we i nafgud blong kam luk yu, mo soemaot long yu wanem we Baebol i talem long saed ya.