Lukaot Jeova Bifo We Dei Blong Kros Blong Hem i Kamtru
Lukaot Jeova Bifo We Dei Blong Kros Blong Hem i Kamtru
“Lukaot Jeova, . . . lukaot stret fasin, . . . lukaot tingting daon. Maet bambae yufala i haed long dei blong kros blong Jeova.”—SEFANAEA 2:3, NW.
1. ?Long taem we Sefanaea i statem wok blong hem olsem profet, olsem wanem long wosip blong ol man Juda?
SEFANAEA i statem wok blong profet long wan taem long histri blong Juda we wosip blong nesen ya i kam nogud olgeta. Oli no moa trastem Jeova, mo oli stap lukluk i go long ol pris blong ol hiten man mo olgeta we oli talem fiuja from ol sta, blong lidim olgeta. Kantri ya i fulap long ol rabis fasin long saed blong seks we ol man oli mekem blong wosip long Bal. Ol lida blong nesen—ol prins, ol haeman, mo ol jaj—oli no stap lukaot gud long ol man. Defren olgeta, oli stap mekem i strong tumas long ol man long nesen ya. (Sefanaea 1:9; 3:3) !Yumi no sapraes nating we Jeova i mekemap tingting blong hem blong “panisim” ol man Juda mo Jerusalem mo spolem olgeta!—Sefanaea 1:4.
2. ?Ol man Juda we oli holemstrong long God oli gat wanem hop?
2 Nating se laef long taem ya i nogud olgeta, ol man blong God oli gat hop. Josaea, pikinini blong Amon, i kam king long taem ya. Josaea i yangfala nomo, be hem i rili laekem Jeova. !Sipos niufala king ya i naf blong stanemap tru wosip bakegen long Juda, fasin ya bambae i rili leftemap tingting blong smol namba blong ol man we oli stap tru long Jeova! Mo maet samting ya i pulum sam narafala tu blong joen wetem olgeta mo, long rod ya, olgeta tu oli save sef long dei blong kros blong Jeova.
Ol Samting We Yumi Mas Mekem Blong Sef
3, 4. ?Wanem trifala samting we man i mas mekem blong sef long “dei blong kros blong Jeova”?
3 ?I tru se sam man oli save sef long dei blong kros blong Jeova? Yes, samting ya i tru, sipos ol man ya oli mekem trifala samting we Sefanaea 2:2, 3 (NW ) i tokbaot. Taem yumi ridim ol vas ya, i gud yumi makem trifala samting ya. Sefanaea i talem se: “Bifo we oda blong hem i mekem wan samting i kamtru, bifo we dei ya i pas finis olsem we skin blong wit i pas, bifo we bigfala kros blong Jeova i kamtru long yufala, bifo we dei blong kros blong Jeova i kamtru long yufala, yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.”
4 Wan man we i wantem sef i mas (1) lukaot Jeova, (2) lukaot stret fasin, mo (3) lukaot tingting daon. Yumi tede, yumi mas traehad blong mekem trifala samting ya. ?From wanem? Olsem we jajmen blong Jeova i kamtru long Juda mo Jerusalem long ol yia sikis handred B.K.T., bambae ol nesen blong Krisendom, yes olgeta nogud man, oli kasem jajmen blong Jeova long taem blong “bigfala trabol” we i stap kam. (Matiu 24:21) Eni man we i wantem sef long taem ya i mas tekem strong aksin naoia. ?Oli mas mekem wanem? !Oli mas lukaot Jeova, lukaot stret fasin, mo lukaot tingting daon bifo we i let finis!
5. ?I minim wanem blong “lukaot Jeova” tede?
5 Maet yu tingting se: ‘Mi mi givim laef blong mi i go long Jeova, mo mi baptaes olsem wan long ol Witnes blong Jeova. ?Samting ya i no soemaot se mi lukaot Jeova, stret fasin, mo tingtingdaon finis?’ I tru se Jeova i wantem we yumi givim laef blong yumi i go long hem. Be i no samting ya nomo we hem i wantem. I gat moa samting we yumi mas mekem. Isrel, olsem wan nesen, i givim laef blong hem i go long God finis. Be, long taem blong Sefanaea, ol man Juda oli no holem promes we oli mekem long Jeova. From samting ya, Jeova i sakemaot nesen ya. Blong “lukaot Jeova” tede, i minim se yumi wokem wan gudfala fasin fren wetem hem mo yumi joen oltaem wetem ogenaesesen blong hem long wol. I minim tu se yumi mas kasem save long ol tingting blong Jeova mo tingbaot ol filing blong hem. Yumi lukaot Jeova taem yumi stadigud long Tok blong hem, tingting dip long ol tok ya, mo mekem oli wok long laef blong yumi. Taem yumi askem strong long prea blong Jeova i soem rod long yumi mo yumi letem tabu spirit i lidim yumi, fasin fren blong yumi wetem Jeova i kam strong moa. Mo tu, samting ya i pusum yumi blong mekem wok blong Jeova ‘long olgeta tingting blong yumi, mo long olgeta laef blong yumi, mo long olgeta paoa blong yumi.’—Dutronome 6:5; Galesia 5:22-25; Filipae 4:6, 7; Revelesen 4:11.
6. ?Olsem wanem yumi “lukaot stret fasin,” mo olsem wanem yumi save mekem samting ya long wol tede?
6 Namba tu samting we yumi mas mekem we Sefanaea 2:3 i tokbaot hemia se, “lukaot stret fasin.” Plante long yumi oli mekem ol bigfala jenis long laef blong kam naf blong tekem baptaes olsem wan Kristin. Be yumi mas gohed blong wokem ol stret rul blong God long laef blong yumi. I gat sam we fastaem oli folemgud ol stret rul, be biaen oli letem wol ya i spolem fasin blong olgeta. I no isi nating blong lukaot stret fasin, from we fulap man raonabaot long yumi oli ting se fasin blong slip olbaot, giaman, mo ol narafala sin, oli oraet nomo. Be, strong tingting ya blong wantem mekem Jeova i glad long yumi, i save blokem yumi blong wantem joen wetem ol man blong wol blong mekem olgeta oli laekem yumi. God i no moa laekem Juda, from we ol man blong hem oli stap folem fasin blong ol nesen raonabaot long olgeta we oli no laekem God. I gud we yumi “folem fasin blong God,” mo yumi “putum niufala fasin blong laef we God i wokem olsem we hem i wantem. Fasin ya i kamaot long trufala stret fasin mo fasin blong obei long hem oltaem.”—Efesas 4:24; 5:1, NW.
7. ?Olsem wanem yumi “lukaot tingting daon”?
7 Namba tri poen we Sefanaea 2:3 i tokbaot hemia se sipos yumi wantem haed long dei blong kros blong Jeova, yumi mas “lukaot tingting daon.” Evri dei long laef blong yumi, yumi wok wetem ol man, woman, mo yangfala we oli no gat tingting daon. Long tingting blong olgeta ya, tingting daon i wan slak fasin. Fasin blong letem narafala i lidim yumi, hemia tu i wan bigfala slak fasin long tingting blong olgeta. Ol man ya oli wantem se ol narafala oli mas mekem wanem we olgeta nomo i wantem, oli tingbaot olgeta nomo, mo oli flas, oli wantem se ol man oli tingbaot “raet” blong olgeta fastaem, nating se fasin ya i save spolem narafala. !Sore tumas sipos yumi stat folem sam long ol fasin ya! Naoia i stret taem blong “lukaot tingting daon.” ?Olsem wanem yumi save mekem samting ya? Yumi mekem olsem taem yumi gat tingting daon, yumi letem Jeova i lidim mo stretem yumi, mo taem yumi mekem samting we hem i wantem.
?From Wanem “Maet” Bambae Yumi Haed?
8. ?Long Sefanaea 2:3, tok ya “maet” i soemaot wanem?
8 Makemgud we Sefanaea 2:3 i talem se: “Maet bambae yufala i haed long dei blong kros blong Jeova.” ?Sipos Sefanaea i toktok long ol ‘kwaet man blong wol we tingting blong olgeta i stap daon,’ from wanem hem i yusum tok ya “maet”? I tru se, ol kwaet man ya oli mekem plante gudfala wok finis, be oli no mas ting se oli no save foldaon. Oli mas stanap strong go kasem en blong laef blong olgeta. Sam long olgeta maet oli save foldaon long sin. Samting ya i tru tu long saed blong yumi. Jisas i talem se: “Man we i stanap strong gogo olgeta samting ya i finis, bambae God i sevem hem.” (Matiu 24:13) Yes, fasin sef long dei blong kros blong Jeova i dipen long fasin blong yumi blong gohed blong mekem wanem we i stret long fes blong hem. ?Yu yu gat strong tingting blong mekem samting ya?
9. ?Yangfala King Josaea i mekem wanem blong leftemap klin wosip?
9 Ol tok blong Sefanaea oli pusum King Josaea blong “lukaot Jeova.” Baebol i talem se: “Nao long taem ya we King Josaea i yangfala yet [samwe long 16 yia], long namba eit yia blong hem we hem i rul, hem i stat blong mekem wosip long [no “blong lukaotem,” New International Version] Hae God olsem we olfala bubu ya blong hem bifo, King Deved i stap mekem.” (2 Kronikel 34:3) Antap long samting ya, Josaea i gohed blong “lukaot stret fasin,” from we yumi ridim se: “Mo long namba twelef yia blong hem, hem i stat blong mekem ol ples long Jerusalem mo olbaot long Juda oli klin bakegen long fes blong Hae God. Hem i tekemaot ol ples blong mekem wosip long ol narafala god, wetem ol aedol blong woman god ya Asera, mo ol narafala aedol we oli stap long ol ples ya. Hem i lidim ol man blong hem oli go smasem ol olta blong god ya Bal.” (2 Kronikel 34:3) Mo tu, Josaea i “lukaot tingting daon.” Fasin ya pusum hem blong wantem mekem Jeova i glad. Taswe hem i klinimaot fasin blong wosipim aedol long kantri ya mo ol narafala kastom tu we oli joen wetem giaman wosip. !Long taem ya, ol man we oli gat tingting daon oli haremgud tumas!
10. ?Wanem i hapen long Juda long 607 B.K.T., be hu i sef long taem ya?
10 Long taem blong rul blong Josaea, plante man Jiu oli kambak long Jeova. Be, afta we king ya i ded, bighaf blong olgeta oli gobak long ol olfala fasin blong bifo—ol fasin we God i no agri nating long olgeta. Olsem we Jeova i talemaot, ol man Babilon oli winim Juda mo spolem bigfala taon blong hem, Jerusalem, long 607 B.K.T. Be, samting ya i no minim se i no gat hop. Profet Jeremaea, man Itiopia ya Ebedmelek, ol bubu blong Jonadab, mo sam narafala bakegen we oli stap tru long God, oli haed long dei blong kros blong Jeova.—Jeremaea 35:18, 19; 39:11, 12, 15-18.
Ol Enemi Blong God—!Lesingud!
11. ?From wanem i hadwok blong stap tru long God tede, be i gud sipos ol enemi blong God oli tingbaot wanem samting?
11 Taem yumi stap wet blong dei blong Jeova i kam blong spolem rabis wol ya, ‘plante samting oli stap kam blong traem yumi.’ (Jemes 1:2) Long plante kantri we oli sapotem fasin fri blong wosip, sam lida blong ol skul oli yusum paoa we oli gat long gavman blong mekem bigfala trabol long ol man blong God. Sam man we oli no gat stret fasin, oli giaman long saed blong ol Witnes blong Jeova, se oli “wan narakaen grup” we oli save spolem laef blong ol narafala man. God i savegud se ol tok ya oli giaman—mo bambae ol man ya oli kasem panis blong olgeta. I gud sipos ol enemi blong Jeova oli tingbaot wanem we i hapen long ol enemi blong hem bifo, olsem ol man Filistia. Profet tok i talem se: “Taon ya Gasa bambae i finis, i no moa gat man bambae i stap long hem. Mo taon ya Askelon tu bambae i emti, i no moa gat man bambae i stap long hem. Mo ol man blong taon ya Asdod, ol enemi bambae oli ronemaot olgeta long hafdei nomo, mo bambae oli ronemaot ol man Ekron oli gowe long taon ya blong olgeta.” Ol taon blong Filistia, olsem Gasa, Askelon, mo Ekron, oli mas lus evriwan.—Sefanaea 2:4-7.
12. ?Wanem i hapen long Filistia, Moab, mo Amon?
12 Profet tok i gohed i talem se: “Ol laen blong Isrel. Yufala i man blong mi, mo mi harem finis we ol man Moab mo ol man Amon oli stap tok nogud long yufala, mo oli stap jikim yufala. Oli stap tok flas se bambae oli tekemaot graon blong yufala.” (Sefanaea 2:8) Ol ami blong Babilon oli spolem Ijip mo Itiopia. ?Be wanem jajmen we God bambae i mekem long Moab mo Amon, ol nesen ya we oli kamaot long laen blong Lot, nefiu blong Ebraham? Jeova i talemaot se: “Bambae mi spolem tufala kantri ya Moab mo Amon long sem fasin we mi mi bin spolem Sodom mo Gomora bifo.” Ol man Amon mo Moab oli defren olgeta long tufala bubu blong olgeta—tufala gel blong Lot, we tufala i sef taem Sodom mo Gomora i lus. Ol man ya we oli flas tumas, oli no save ronwe long jajmen blong God. (Sefanaea 2:9-12; Jenesis 19:16, 23-26, 36-38) ?Olsem wanem long Filistia mo ol taon blong hem tede? ?Mo olsem wanem long Moab mo Amon, we oli bin flas tumas? Ol ples ya oli lus olgeta, yu no moa save faenem olgeta.
13. ?Ol man blong digim graon oli faenem wanem long Nineve?
13 Long taem blong Sefanaea, paoa blong Gavman blong Asiria i antap olgeta. Austen Layard, wan man blong digim graon, i tokbaot wan haf blong haos blong king we hem i faenem aninit long graon long Nineve, bigfala taon ya blong Asiria. Hem i talem se: “Ol siling . . . oli gat plante skwea long olgeta, mo insaed long ol skwea ya ol man oli pentem pija blong ol flaoa no anamol. Sam long ol skwea ya oli flasemgud wetem ol tut blong elefen, mo oli flasem tu ol fo saed blong olgeta long ol defren stael. Ol pos mo ol wol blong ol rum ya, oli kavremap long gol mo silva, mo oli yusum ol wud we man i no save faenem plante, olsem wud blong tri ya sida.” Be, olsem profet tok blong Sefanaea i talemaot, Asiria i mas lus, mo bigfala taon blong hem, Nineve, i mas “kam nogud olgeta, we bambae i no moa gat man i stap long hem.”—Sefanaea 2:13.
14. ?Olsem wanem profet tok blong Sefanaea i kamtru long Nineve?
14 Fiftin yia nomo afta we Sefanaea i talemaot profet tok ya, bigfala taon ya Nineve i lus, mo haos blong king i brobrok i kam wan hip ston. Yes, bigfala taon ya we i flas tumas i lus olgeta. Profet tok i talemaot klia se: “Ol hoknaet bambae oli stap slip olbaot long ol ololfala haos long ples ya we oli brobrok finis. Mo bambae oli stap sidaon long ol windo, nao oli stap singaot. . . . Ol pos blong ol haos ya we oli katem long ol gudgudfala tri ya sida, bambae ol man oli tekemaot olgeta evriwan.” (Sefanaea 2:14, 15) Ol naesfala haos blong Nineve oli gud nomo blong ol anamol mo pijin olsem hoknaet oli stap long olgeta. Long ol rod, i no moa gat noes blong ol bisnesman, krae blong ol soldia, mo singsing blong ol pris. Long ol rod ya we bifo oli fulap long noes blong ol man, i gat noes blong pijin nomo we i sidaon long windo i krae no noes blong win we i blu. !I gud sipos olgeta enemi blong God oli lus long sem fasin!
15. Samting we i hapen long Filistia, Moab, Amon, mo Asiria i tijim wanem long yumi?
15 ?Samting we i hapen long Filistia, Moab, Amon, mo Asiria i tijim wanem long yumi? Hem i tijim yumi se: From we yumi man blong Jeova, yumi no mas fraet nating long ol enemi blong yumi. God i stap luk olgeta samting we ol man oli mekem blong agensem yumi. Jeova i tekem aksin agensem ol enemi blong hem bifo, mo bambae hem i mekem jajmen blong hem i kamtru bakegen long olgeta man long wol tede. Be, bambae i gat man i sef—“wan bigfala hip blong ol man, we . . . oli kamaot . . . long olgeta kantri.” (Revelesen 7:9) Yu save stap wetem olgeta ya sipos yu gohed blong lukaot Jeova, lukaot stret fasin, mo lukaot tingting daon.
!Sore Tumas Long Olgeta We Oli Nogud Mo We Oli Flas!
16. ?Sefanaea i talemaot wanem long saed blong ol prins mo ol lida blong skul long Juda, mo from wanem ol tok ya oli stret long Krisendom tu?
16 Profet tok blong Sefanaea i gohed blong tokbaot Juda mo Jerusalem. Sefanaea 3:1, 2 i talem se: “!Sore tumas long yufala! Fasin blong yufala i nogud olgeta. Oltaem yufala i stap girap agens long Hae God, mo yufala i stap mekem i strong tumas long ol man ples blong yufala. Yufala i no save lesin nating long Hae God, mo taem hem i tok long yufala blong stretem yufala, be yufala i no save harem hem nating. Yufala i no save trastem hem, mo yufala i no save kam long hem blong i givhan long yufala.” !Sore tumas long ol man blong Jeova we oli no wantem lesin taem hem i stretem olgeta! Fasin blong ol prins, ol haeman, mo ol jaj, i nogud olgeta. Sefanaea i tok strong tu agensem ol lida blong skul we oli no gat sem nating, hem i se: “Ol profet, ol wok blong olgeta i olbaot nomo, man i no save trastem olgeta, mo ol pris oli stap mekem ol samting we i tabu, i kam doti long fes blong Hae God, mo oli stap tanem Loa blong hem blong i folem tingting blong olgeta, blong oli save win long hem.” (Sefanaea 3:3, 4) !Ol tok ya oli stret tu long ol profet mo pris blong Krisendom tede! Olgeta ya oli daonem God, taem oli karemaot nem blong hem long ol translesen blong Baebol mo givim ol giaman tijing long saed blong Man ya we oli talem se oli wosip long hem.
17. ?Nating sipos ol man oli lesin no nogat, from wanem yumi mas gohed blong talemaot gud nius?
17 Jeova i mekem i gud long ol man blong hem long taem ya bifo, from we hem i givim woning long olgeta long saed blong wanem we bambae hem i mekem. Hem i sanem ol profet blong hem—olsem Sefanaea mo Jeremaea—blong pulum ol man blong oli tanem tingting blong olgeta. Yes, “Hae God, . . . neva hem i mekem samting we i no stret. Evri moning, hem i stap soemaot stret fasin blong hem long ol man blong hem, we i no save mestem.” ?Ol man blong hem oli mekem wanem? “Nating we hem i stap mekem olsem long olgeta, be ol man we fasin blong olgeta i no stret, oli no gat sem nating, oltaem nomo oli stap mekem i nogud.” (Sefanaea 3:5) Wan woning we i sem mak, i stap goaot long taem blong yumi tede. Sipos yu wan pablisa blong gud nius, yu stap joen long wok blong givim woning ya. !Gohed blong talemaot gud nius, we yu no kam slak blong mekem olsem! Nating sipos ol man oli lesin no nogat, wok blong yu i nambawan long tingting blong God. Taem yu gat strong tingting blong gohed long wok ya, yu no nid blong sem.
18. ?Olsem wanem bambae Sefanaea 3:6 i kamtru?
18 Taem God i mekem jajmen blong hem i kamtru, i no Krisendom nomo we bambae i lus. Jeova i tok strong agensem olgeta nesen se: “I gat plante kantri we mi mi bin kilim ol man blong olgeta finis. Ol taon blong olgeta, wetem ol stonwol blong ol taon ya, mo ol wajhaos blong olgeta, mi spolem olgeta evriwan finis. Ol taon ya oli stap nating, mo bigrod blong olgeta oli emti, i no moa gat man blong i wokbaot long olgeta.” (Sefanaea 3:6) Blong soemaot se yumi save trastem ol tok blong hem fulwan, Jeova i tok long wan fasin olsem we hem i spolem olgeta finis. ?Wanem i hapen long ol taon ya blong Filistia, Moab, mo Amon? ?Mo olsem wanem long Nineve, bigfala taon ya blong Asiria? Olgeta evriwan oli lus. Mo eksampol ya i wan woning long olgeta nesen tede. Oli no save jikim God.
Gohed Blong Lukaot Jeova
19. ?Wanem ol kwestin we yumi save askem?
19 Long taem blong Sefanaea, kros blong God i kasem olgeta we ‘oli agens long hem.’ (Sefanaea 3:7) Bambae i sem mak long taem blong yumi. ?Yu luksave ol pruf we oli soemaot se dei blong kros blong Jeova i klosap finis? ?Yu stap gohed blong “lukaot Jeova” taem yu ridim Tok blong hem oltaem—evri dei? ?Yu stap “lukaot stret fasin,” mo stap klin from we yu folem ol rul blong God long laef blong yu? ?Mo yu stap “lukaot tingting daon” taem yu soemaot long God se yu wantem stap aninit long hem mo folem ol plan we hem i wokem blong bambae yumi sef?
20. ?Wanem ol kwestin we bambae yumi tokbaot long nekis stadi we hem i lashaf blong profet tok blong Sefanaea?
20 Sipos yumi gohed blong lukaot Jeova, stret fasin, mo tingting daon, yumi sua se yumi save haremgud long plante rij blesing naoia—nating se yumi stap long taem blong ol ‘lasdei’ we oli traem bilif blong yumi. (2 Timoti 3:1-5; Ol Proveb 10:22) Be maet yu askem se: ‘?Olsem wanem Jeova i stap blesem ol man blong hem tede? ?Mo profet tok blong Sefanaea i tokbaot wanem blesing long fiuja, blong olgeta we bambae oli haed long dei blong kros blong Jeova we i klosap?’
?Bambae Yu Yu Ansa Olsem Wanem?
• ?Olsem wanem ol man oli “lukaot Jeova”?
• ?I minim wanem blong “lukaot stret fasin”?
• ?Olsem wanem yumi “lukaot tingting daon”?
• ?From wanem yumi mas gohed blong lukaot Jeova, stret fasin, mo tingting daon?
[Kwestin]
[Tok blong pija long pej 18]
?Yu yu stap lukaot Jeova taem yu stadi Baebol mo prea?
[Tok blong pija long pej 21]
Wan bigfala hip blong man bambae oli sef long dei blong kros blong Jeova from we oli gohed blong lukaot hem