Ol Man Blong Jeova We Oli Stanap Bakegen Oli Presem Hem
Ol Man Blong Jeova We Oli Stanap Bakegen Oli Presem Hem
“Bambae mi jenisim lanwis blong ol man i kam klin lanwis. Nao olgeta oli save singaot nem blong Jeova.”—SEFANAEA 3:9, NW.
1. ?From wanem ol mesej blong jajmen oli kamtru long Juda mo ol narafala nesen?
!OL JAJMEN mesej we Jeova i givim long Sefanaea blong i talemaot, oli strong tumas! From we ol lida mo ol man Juda oli no mekem wanem we Jeova i wantem, ol jajmen mesej ya oli kamtru long nesen ya mo bigfala taon blong hem, Jerusalem. Mo tu, kros blong God bambae i kasem ol nesen raonabaot long olgeta, olsem Filistia, Moab, mo Amon. ?From wanem? From we, long plante handred yia, ol nesen ya oli agensem mo mekem nogud long ol man blong Jeova. From semfala risen ya, gavman blong Asiria tu bambae i lus, mo neva bambae i save stanap bakegen.
2. ?Ol tok blong Sefanaea 3:8 oli go long hu?
2 Be, i gat sam man long Juda bifo we hat blong olgeta i stret. Olgeta ya oli wantem se jajmen blong God i kamtru agensem ol man nogud. Maet ol tok ya we Jeova i talemaot, i go long olgeta ya se: “ From samting ya, yufala i wet long mi go kasem dei ya we bambae mi girap blong go tekem pei blong mi. From we jajmen blong mi, se mi mi mas hivimap ol nesen blong mekem ol kingdom oli kam wanples, blong mi kafsaedem ol strong tok blong mi i godaon long olgeta, yes, olgeta strong kros blong mi. From we strong tingting ya blong mi i olsem faea we bambae i kakae olgeta ples long wol. ”—Sefanaea 3:8, NW.
?‘Wan Klin Lanwis’ Blong Hu?
3. ?Jeova i pusum Sefanaea blong talemaot wanem mesej we i givim hop?
3 Yes, Sefanaea i talemaot ol nogud mesej ya blong jajmen blong Jeova. Be Jeova i pusum profet ya tu blong talemaot wan nambawan mesej we i givim hop mo i leftemap tingting blong olgeta we oli gohed blong stap tru long Jeova. Jeova God i talemaot long Sefanaea 3:9 (NW ) se: “From we long taem ya, bambae mi jenisim lanwis blong ol man i kam klin lanwis. Nao olgeta oli save singaot nem blong Jeova, blong mekem wok blong hem, we solda blong wan i joen long solda blong narawan.”
4, 5. (a) ?Wanem bambae i hapen long ol man we fasin blong olgeta i no stret? (b) Hu bambae i kasem blesing from jajmen ya, mo from wanem?
4 Jeova i no givim klin lanwis ya long evri man. Profet tok i makem samting ya se: “Olgeta we oli praod, mo oli stap mekem hed, bambae mi tekemaot olgeta evriwan.” (Sefanaea 3:11) Yes, God bambae i tekemaot olgeta we oli praod, we oli no laekem nating loa blong hem mo we oli mekem fasin we i no stret. ?Hu bambae i kasem blesing from samting ya? Sefanaea 3:12, 13 i talem se: “Be yufala we tingting blong yufala i stap daon, bambae mi [Jeova, mi] letem yufala nomo i stap long ples ya, nao bambae yufala i stap kam long mi blong mi givhan long yufala. Yufala ol laen blong Isrel we bambae yufala i laef i stap, bambae yufala i no moa save mekem i nogud long narafala man, mo bambae yufala i no moa save talem ol giaman toktok, mo yufala i no moa save giaman long man blong trikim hem. Bambae yufala i no moa save sot long wan samting, bambae yufala i stap gud, i no gat wan samting i save spolem yufala. Mo bambae i no moa gat man blong mekem yufala i fraet.”
5 Wan smol grup long Juda, we oli stap tru long God, bambae oli kasem blesing. ?From wanem? From we olgeta nao oli mekem wanem we tok ya i talem se: “Yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.”—Sefanaea 2:3, NW.
6. ?Wanem i hapen taem profet tok blong Sefanaea i kamtru long faswan taem blong hem?
6 Faswan taem we God i mekem profet tok blong Sefanaea i kamtru, i blong panisim Juda we i no stap tru long hem. God i letem Babilon, we long taem ya hem i bigfala politik paoa blong wol, i spolem Juda mo tekem ol man blong hem oli go kalabus long 607 B.K.T. Sam man oli sef, olsem profet Jeremaea, mo sam narafala oli stap tru long Jeova taem oli kalabus. Long 539 B.K.T., King Sirus i lidim ol man Midia mo Pesia blong spolem Babilon. Samwe long tu yia biaen, Sirus i givim oda blong wan smol grup blong ol man Jiu oli gobak long kantri blong olgeta. Sloslou olgeta ya oli bildim bakegen tempel blong Jerusalem, mo putumap ol pris bakegen blong tijim ol man long saed blong Loa. (Malakae 2:7) Sipos smol grup ya i gohed blong stap tru long Jeova, bambae Jeova i gohed blong blesem olgeta.
7, 8. ?Ol profet tok long Sefanaea 3:14-17 oli tokbaot hu, mo from wanem yu ansa olsem?
7 Sefanaea i tokbaot olgeta ya we bambae oli haremgud tumas blong gobak, i se: “Ol laen blong Isrel. Yufala i mas glad, yufala i singsingaot. Ol man Jerusalem. Yufala i mas harem gud long olgeta tingting blong yufala. Naoia panis blong yufala i finis, Hae God i no moa save panisim yufala. Hem i tekemaot ol enemi blong yufala finis. Hem i King blong yufala, mo naoia hem i stap wetem yufala, mo i no moa gat wan samting blong yufala i fraet long hem. I gat taem i stap kam we bambae ol man oli talem long ol man Jerusalem se: ‘Ol man Saeon. Yufala i no fraet, yufala i no letem han blong yufala i stap hang blong soemaot se yufala stap harem nogud. Hae God i God blong yufala, mo hem i stap wetem yufala. Paoa blong hem i stap mekem yufala i win. Hem bambae i glad long yufala. Fasin blong hem we oltaem hem i stap lavem man, bambae i mekem yufala i gat niufala laef. Hem bambae i glad tumas long yufala we bambae i stap singsing from.’ ”—Sefanaea 3:14-17.
8 Profet tok ya i tokbaot olgeta we oli gofri long kalabus blong Babilon mo gobak long kantri blong ol bubu blong olgeta bifo. Samting ya i klia long Sefanaea 3:18-20, we yumi ridim se: “Bigfala trabol ya, mi bambae mi tekemaot, mo bambae mi mekem we yufala i no moa sem. I gat taem i stap kam we bambae mi mi givim panis long olgeta we oli stap mekem i strong tumas long yufala. Olgeta ya we oli no save wokbaot gud bambae mi sevem olgeta, mo olgeta we oli stap wok slef long narafala kantri mi bambae mi tekem olgeta evriwan i kambak long stret ples blong olgeta. Olgeta ya we oli stap sem, bambae mi tekemaot sem long olgeta, mi mekem ol man oli ona gud long olgeta, mo olgeta man long wol ya bambae oli stap presem olgeta. Ol man Jerusalem. I gat taem i stap kam, we ol man ples blong yufala we oli stap olbaot long evri ples, bambae mi tekem olgeta i kambak long stret ples blong yufala bakegen. Bambae mi mekem nius blong hae nem blong yufala i kasem olgeta ples long wol ya, mo bambae mi mekem yufala i kam rijman bakegen. Mi mi Hae God, mo hemia tok blong mi.”
9. ?Olsem wanem Jeova i mekem nem blong hem i hae long taem blong Juda bifo?
9 !Tingbaot bigfala sapraes long ol nesen raonabaot we oli enemi blong ol man blong God! Strongfala nesen ya, Babilon, i bin tekem ol man Jiu oli go kalabus, mo long tingting blong ol nesen raonabaot, neva bambae ol man Jiu oli save gofri bakegen. Antap long samting ya, kantri blong olgeta i olsem ples nating nomo. Be, long paoa blong God, afta we 70 yia i pas, oli gobak long kantri blong olgeta. Mo ol nesen ya we oli enemi blong olgeta, oli stap long rod blong lus. !Jeova i leftemap nem blong hem bigwan taem hem i tekem smol grup ya i gobak long ples blong olgeta! Hem i mekem ‘nius blong hae nem blong olgeta i kasem olgeta ples long wol.’ !Fasin ya blong stanemap olgeta bakegen long kantri blong olgeta i presem Jeova mo olgeta we oli karem nem blong hem!
Leftemap Wosip Blong Jeova
10, 11. ?Wetaem profet tok blong Sefanaea long saed blong trufala wosip we i stanap bakegen, i kamtru long wan fasin we i bigwan moa, mo olsem wanem yumi save samting ya?
10 Long faswan handred yia Kristin Taem, Jisas Kraes i stanemap trufala wosip bakegen, taem hem i hivimap wan smol grup blong ol man Isrel. Samting we Jisas i mekem i wan pija blong soemaot wanem we bambae i hapen long fiuja, taem trufala wosip i stanap bakegen we i bigwan moa i bitim bifo. Profet tok blong Maeka i talemaot se: “Mo i mas hapen long laswan haf blong ol dei, se bambae hil blong haos blong Jeova i stanap strong antap moa long ol bigfala hil, mo tru, hem i kam hae moa i bitim ol hil. Mo ol pipol oli mas kam wanples long hem, we oli fulap.”—Maeka 4:1, NW.
11 ?Wetaem bambae samting ya i kamtru? Olsem profet tok ya i talem se, “long laswan haf blong ol dei ya”—yes, long taem blong ‘lasdei.’ (2 Timoti 3:1) Bifo we rabis fasin blong wol i finis taem ol nesen oli stap wosip yet long ol giaman god, trufala wosip i mas stanap bakegen. Maeka 4:5 (NW ) i talem se: “Olgeta pipol, bambae oli wokbaot long nem blong god blong olgeta.” ?Olsem wanem long ol trufala man blong wosip? Profet tok blong Maeka i ansa se: “Be yumi, bambae yumi wokbaot olwe long nem blong Jeova, God blong yumi, yes, gogo i no save finis.”
12. ?Olsem wanem Jeova i leftemap trufala wosip long taem blong lasdei?
12 Taswe, long taem blong lasdei ya, “hil blong haos blong Jeova i stanap strong antap moa long ol bigfala hil.” Trufala wosip blong Jeova, we i hae mo i antap olgeta long ol narafala skul, i stanap strong bakegen. Olsem profet tok blong Maeka i talem, “ol pipol oli mas kam wanples long hem, we oli fulap.” Olgeta we oli folem trufala skul ‘bambae oli wokbaot olwe long nem blong Jeova, God blong olgeta, yes, gogo i no save finis.’
13, 14. ?“Laswan haf blong ol dei ya,” i stat wetaem, mo afta long taem ya wanem i hapen long trufala wosip?
13 Ol profet tok we Baebol i talemaot, we oli kamtru finis, oli pruvum se wol ya i statem “laswan haf blong ol dei ya”—ol lasdei blong hem—long yia 1914. (Mak 13:4-10) Histri i soemaot se, blong stanemap tru wosip bakegen, Jeova i stat blong hivimap smol grup blong ol tabu man we oli stap tru long hem mo we oli gat hop blong laef long heven. Biaen, hem i hivimap “wan bigfala hip blong ol man, we . . . oli kamaot long olgeta kala, mo long olgeta kantri, mo long olgeta laen, mo long olgeta lanwis”—hemia olgeta we oli gat hop blong laef foreva long wol.—Revelesen 7:9.
14 Stat long taem blong Faswan Bigfala Faet Blong Wol, i kam kasem taem blong yumi, Jeova i lidim ol man we oli karem nem blong hem, mekem se wosip we ol man oli mekem long hem i kam antap bigwan. Afta long Faswan Bigfala Faet Blong Wol i gat sam taosen man nomo we oli wosip long hem. Naoia namba blong olgeta we oli wosip long Jeova i kasem raonabaot sikis milian man, we oli hivap long samwe long 91,000 kongregesen long 235 kantri. Evri yia, ol man blong talemaot Kingdom oli spenem bitim wan bilian aoa blong presem Jeova long fored blong olgeta man. I klia nomo se ol Witnes blong Jeova oli mekem profet tok blong Jisas i kamtru se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae [“en,” NW ] i save kam.”—Matiu 24:14.
15. ?Olsem wanem Sefanaea 2:3 i stap kamtru tede?
15 Sefanaea 3:17 i talem se: “Hae God i God blong yufala, mo hem i stap wetem yufala. Paoa blong hem i stap mekem yufala i win. Hem bambae i glad long yufala.” God ya we i gat olgeta paoa i ‘stap wetem olgeta.’ Taswe, long taem blong lasdei, ol man blong Jeova oli rij long saed blong spirit. Samting ya i tru tumas tede olsem we i bin tru bifo, taem ol man Juda oli gobak long kantri blong olgeta long 537 B.K.T. From samting ya yumi save se ol tok ya blong Sefanaea 2:3 oli kamtru long wan fasin we i bigwan moa long taem blong yumi, vas ya i se: “Lukaot Jeova, yufala olgeta kwaet man blong wol we tingting blong yufala i stap daon.” Long 537 B.K.T., sam long “olgeta kwaet man” ya hemia smol grup blong ol man Jiu we oli gofri long kalabus long Babilon. Tede, tok ya “olgeta kwaet man” i minim ol man blong olgeta nesen blong wol we oli gat tingting daon, we oli lesin long mesej blong Kingdom mo we oli kam wanples long “hil blong haos blong Jeova.”
Trufala Wosip i Kam Antap
16. ?Ol enemi blong yumi oli talem wanem taem oli luk se ol man blong Jeova oli rij long saed blong spirit?
16 Afta long 537 B.K.T., plante long ol man blong ol nesen raonabaot oli sapraes tumas blong luk ol man blong God oli gobak long kantri blong olgeta blong stanemap trufala wosip bakegen. Be, long taem ya, trufala wosip i stanap bakegen long wan fasin we i smol nomo. Traem tingbaot wanem we sam man—ol enemi blong ol man blong God tu—oli stap talem tede, taem oli luk we namba blong ol man blong Jeova i kam antap, oli rij long saed blong spirit mo oli gohed gud. Ating sam long ol enemi ya, oli gat sem tingting ya we ol Farisi oli gat taem oli luk we plante man oli biaenem Jisas. Oli kraeaot se: “Yufala i luk. . . . Naoia, olgeta man evriwan oli biaen long hem.”—Jon 12:19.
17. ?Wanem samting we wan tija i talem long saed blong ol Witnes blong Jeova, mo olsem wanem namba blong olgeta i kam antap bigwan?
17 Wan tija we nem blong hem Charles S. Braden, i raetem long buk blong hem (These Also Believe) se: ‘Ol Witnes blong Jeova oli prij long evri ples long wol. I stret blong talem se i no gat wan narafala skul long wol we i soemaot strong tingting blong talemaot Kingdom olsem ol Witnes blong Jeova. I sua se skul ya bambae i mas gru i kam bigwan moa.’ !Wanem we tija ya i talem i tru tumas! Long taem we hem i raetem tok ya, hemia 50 yia bifo, i gat 300,000 Witnes nomo we oli joen long wok blong prij long ful wol. !Ating man ya i save sapraes bigwan sipos hem i luk se namba blong olgeta we oli talemaot gud nius tede i go antap 20 taem moa long namba ya—samwe long sikis milian!
18. ?Wanem ya klin lanwis, mo God i givim lanwis ya long hu?
18 God i promes tru long profet blong hem se: “Bambae mi jenisim lanwis blong ol man i kam klin lanwis. Nao olgeta oli save singaot nem blong Jeova, blong mekem wok blong hem, we solda blong wan i joen long solda blong narawan.” (Sefanaea 3:9, NW ) Long taem blong lasdei ya, ol Witnes blong Jeova oli singaot long nem blong Jeova, oli joengud long wok blong hem mo oli fasgud tugeta long fasin lav we i no gat wan samting i save spolem—yes, i olsem we “solda blong wan i joen long solda blong narawan.” Olgeta ya nao oli ol man ya we Jeova i givim klin lanwis long olgeta. Klin lanwis ya i minim se oli kasem stret save long trutok long saed blong God mo ol stamba tingting blong hem. Jeova nomo i save givim stret save ya tru long tabu spirit blong hem. (1 Korin 2:10) ?Hem i givim tabu spirit blong hem long hu? Long olgeta nomo “we oli obei long hem olsem rula.” (Ol Wok 5:32, NW ) Ol Witnes blong Jeova nomo oli glad blong obei long God olsem Rula blong olgeta long evri samting we oli mekem. From samting ya oli kasem tabu spirit blong God mo oli save toktok klin lanwis ya, we hem i trutok long saed blong Jeova mo ol nambawan stamba tingting blong hem. Oli yusum klin lanwis ya long ful wol blong presem Jeova long wan fasin we i bigwan mo we i gohed blong gru.
19. ?Man we i toktok klin lanwis ya i mas mekem wanem?
19 I tru se man we i toktok klin lanwis ya i bilif long trutok mo i tijim trutok long ol narafala. Be fasin blong hem tu i mas laenap wetem ol loa mo rul blong God. Ol tabu Kristin oli lidim yumi blong lukaot Jeova mo toktok klin lanwis. !Tingbaot bigfala wok we oli mekem finis! Nating se namba blong olgeta i godaon, we naoia i no bitim 8,700, samwe long sikis milian narafala man oli folem fasin blong bilif blong olgeta taem oli lukaot Jeova mo toktok klin lanwis ya. Ol narafala man ya oli mekemap wan bigfala hip blong man, we namba blong olgeta i gohed blong gru, mo oli kamaot long olgeta nesen. Olgeta ya oli bilif long ransom sakrefaes blong Jisas, oli mekem tabu wok blong hem long wol ya, long yad blong haos blong God long saed blong spirit, mo bambae oli sef tru long “bigfala trabol” we i no longtaem bambae i kam long rabis wol ya.—Revelesen 7:9, 14, 15.
20. ?Wanem fiuja blong ol tabu man mo bigfala hip blong man?
20 Bambae bigfala hip ya blong man i go insaed long niufala wol we stret fasin nomo i stap long hem. (2 Pita 3:13) Jisas Kraes mo ol 144,000 tabu man we oli laef bakegen long heven blong mekem wok olsem ol king mo ol pris bambae oli mekemap niufala gavman blong wol. (Rom 8:16, 17; Revelesen 7:4; 20:6) Olgeta we oli sef long taem blong bigfala trabol bambae oli wok blong mekem wol i kam paradaes mo bambae oli gohed blong toktok klin lanwis we God i givim. Ol tok ya i stret tu long olgeta se: “Mo olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap. Bambae yufala i stanap strong long ol fasin we oli stret.”—Aesea 54:13, 14, NW.
Wan Bigfala Wok Blong Tijim Man
21, 22. (a) ?Olsem Ol Wok 24:15 i soemaot, hu ya olgeta we bambae oli mas lanem klin lanwis? (b) Wanem bigfala wok blong tij we bambae oli mekem long wol aninit long rul blong Kingdom?
21 Ol Wok 24:15 i tokbaot wan bigfala kampani we bambae oli kasem janis blong lanem klin lanwis long niufala wol, se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” Long ol yia we oli pas, plante milian man oli laef mo ded we neva oli lanem stret save long saed blong Jeova. Long wan fasin we i folem oda, God bambae i mekem olgeta oli laef bakegen. Mo bambae i nidim ol man blong tijim klin lanwis long olgeta.
22 !Bambae i wan nambawan blesing blong joen long bigfala wok blong tijim olgeta! Wok ya bambae i bigwan moa bitim eni wok blong tij long histri blong man. Bambae oli mekem bigfala wok ya taem Jisas Kraes i rul wetem paoa long Kingdom blong hem. Taem wok ya i finis, bambae ol man oli luk we tok blong Aesea 11:9 i kamtru se: “Kantri ya bambae i fulap gud long ol man we oli savegud Hae God, olsem we solwota i fulumap gud ples blong hem.”
23. ?From wanem yu yu ting se hem i wan bigfala blesing blong stap olsem ol man blong Jeova?
23 !Yumi rili gat wan bigfala blesing long taem blong lasdei ya! !Yumi stap rere from nambawan taem ya we bambae save blong Jeova i fulumap gud wol ya! !Mo yumi kasem blesing naoia, olsem ol man blong God, blong luk se profet tok blong Sefanaea 3:20 i kamtru long nambawan fasin! Long vas ya Jeova i promes se: “Bambae mi mekem nius blong hae nem blong yufala i kasem olgeta ples long wol ya.”
?Bambae Yu Yu Ansa Olsem Wanem?
• ?Folem profet tok blong Sefanaea, talem ol defren taem we trufala wosip i stanap bakegen?
• ?Olsem wanem trufala wosip i gohedgud long taem blong lasdei?
• ?Wanem bigfala wok blong tij we bambae oli mekem long niufala wol?
[Kwestin]
[Tok blong pija long pej 25]
Ol man blong Jeova oli gobak long kantri blong olgeta blong stanemap trufala wosip bakegen. ?Yu yu luksave mining blong samting ya tede?
[Tok blong pija long pej 26]
Ol Witnes blong Jeova oli toktok “klin lanwis,” taem oli talemaot mesej blong Baebol we i leftemap tingting blong man