Wan Kwestin

?Wanem tingting blong ol Kristin long fasin we i kam antap naoia, we man i pem ol program blong kompiuta (sofwea) nao i mekem ol kopi blong hem blong givim long narafala man?

Samfala maet oli traem mekem eskius se fasin ya i laenap nomo wetem ol tok blong Jisas se: “Yufala i kasem we yufala i no pem, mo yufala i mas yusum, we oli no pem yufala from.” Be long ples ya, Jisas i no stap tokbaot fasin blong givim fri kopi blong ol buk no program blong kompiuta we oli gat kopiraet long olgeta. I gat loa i stap finis long saed blong fasin blong yusum ol samting ya. Jisas i stap tokbaot wok blong prij. Hem i talem long ol aposol blong hem, we oli rere blong go long ol taon mo vilej, se oli mas talemaot Kingdom, mekem ol sikman oli kamgud bakegen, mo ronemaot ol devel long man. From ol wok ya nao, ol aposol oli no mas askem mane, be oli mas givim fri nomo.​—⁠Matiu 10:​7, 8.

Naoia we plante moa man oli gat ol kompiuta long haos no long wok blong olgeta, i nidim ol program blong yusum long ol kompiuta ya. Be, ol program ya oli samting we man i mas pem. Sam man oli wokem ol program blong kompiuta we oli givimaot fri nomo, mo oli talem long ol man se oli save mekem kopi blong ol program ya blong givim long narafala man bakegen. Be bighaf blong ol program blong kompiuta oli samting we man i stap pem long stoa. Nomata sipos wan man i nidim wan program blong yusum long haos no long wok blong hem, i klia se hem i mas spenem mane from. Sipos nao wan man i tekem no i mekem kopi blong wan program blong kompiuta we i gat kopiraet long hem, be hem i no pem, hemia i brekem loa. Samting ya i tru tu long saed blong fasin blong mekem fulwan fotokopi blong wan buk we narafala man i raetem, nating se i blong givimaot fri nomo long ol man.

Bighaf blong ol program blong kompiuta (wetem ol gem) oli gat wan laesens blong olgeta. Eni man we i tekem no i yusum wan program olsem, hem i mas folem ol loa mo ol samting we laesens ya i talem se hem i save  mekem mo we hem i no gat raet blong mekem wetem program ya. Plante long ol laesens ya oli talem se wan man nomo i gat raet blong putum program ya long kompiuta blong hem mo hem nomo i gat raet blong yusum​—⁠hemia i minim se program ya i stap long wan kompiuta nomo, maet long haos no long wok no long skul. Sam laesens oli givim raet long man we i pem program ya, blong mekem wan kopi blong program ya we bambae hem i save yusum sipos wan samting i hapen long program blong hem we i stap long kompiuta. Be, hem i no save mekem kopi ya blong givim long narafala man. Sipos man we i holem program ya i wantem givim fulwan program i go long narafala man (hemia i minim laesens mo olgeta haf blong program ya), hem i save mekem olsem. Be taem hem i mekem olsem, hem i no moa gat raet blong yusum program ya. I gat ol defdefren kaen laesens, taswe man we i pem wan program no i kasem wan long narafala man, hem i mas faenemaot wanem ol rul blong laesens ya.

Plante kantri oli joen tugeta blong protektem kopiraet blong ol program blong kompiuta, mo oli stanemap sam loa long saed ya we oli wantem ol man blong folem. Eksampol, niuspepa ya The New York Times blong Jenuware 14, 2000, i ripotem se “ol polis blong Jemani mo Denmak oli holem sam man blong wan bigfala grup we oli stap mekem ol giaman kopi blong ol program blong kompiuta.” Grup ya i stap mekem kopi mo i stap seremaot ol program mo gem blong kompiuta long ol man, we sam long olgeta ya oli salem long ol man tru long Internet.

?Kristin kongregesen i mas folem wanem tingting long saed ya? Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12⁠:17) Hemia i min se ol Kristin ol mas obei long ol loa blong kantri we oli no go agensem ol loa blong God. Aposol Pol i tokbaot ol gavman taem hem i raetem se: “Yumi evriwan i mas ona long gavman. . . . Sipos wan man i agens long olgeta, be hem i agens long ol fasin we God i stanemap. Mo man we i stap mekem olsem, God bambae i jajem hem from.”​—⁠Rom 13:​1, 2.

I no wok blong ol elda long Kristin kongregesen blong jekemap kompiuta blong evriwan. Mo tu, i no wok blong olgeta blong eksplenem ol loa blong kopiraet mo blong meksua se ol man oli folem ol loa ya. Nating se i olsem, ol elda oli bilif mo oli tijim se ol Kristin oli no mas tekem samting we i no blong olgeta mo oli mas traehad blong stap olsem man we i folemgud loa. Fasin ya i blokem ol Kristin long ol panis we oli kasem man we i brekem loa, mo fasin ya i givhan tu long ol Kristin blong holem tingting we i klin oltaem long fes blong God. Pol i raetem se: “From samting ya, yufala i mas obei long gavman. Be i nogud we yufala i stap obei nomo from we yufala i fraet se bambae God i jajem yufala. Yufala i mas obei long gavman, we long tingting blong yufala bambae yufala i harem se yufala i no mekem wan samting we i rong.” (Rom 13:⁠5) Mo tu, Pol i talemaot wanem kaen filing we olgeta trufala Kristin oli mas gat taem hem i se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo.”​—⁠Hibrus 13:⁠18.

[Bokis blong pija long pej 29]

Sam bisnes kampani mo sam skul oli pem wan laesens we i givim raet long olgeta blong letem wan stret namba blong man i yusum program blong olgeta. Long 1995, ol kongregesen blong ol Witnes blong Jeova oli bin tokbaot bisnes ya wetem ol advaes ya we oli bin kasem se:

“Plante kampani we oli mekem mo salem ol program blong kompiuta oli gat kopiraet blong olgeta, mo oli givim wan laesens long man we i pem, blong talem olsem wanem man ya i save yusum ol program ya long fasin we i stret folem loa. Klosap oltaem, laesens ya i talem se man we i pem wan program, i no save givim kopi blong program ya long wan narafala. Intenasnal loa long saed blong kopiraet, hem tu i talem se i agensem loa blong mekem samting ya. . . . Sam bigfala kampani oli salem ol kompiuta we oli gat ol program i stap finis insaed long olgeta, mo ol program we i gat laesens wetem olgeta. Be, sam stoa blong salem kompiuta, oli no givim ol laesens. Hemia from we ol program we oli putum insaed long ol kompiuta we oli stap salem, oli no stret folem loa. Samting ya i min se man we i pem wan long ol kompiuta ya mo yusum program insaed long hem, hem i brekem loa. Wan narafala poen we i joen wetem samting ya se, ol Kristin oli no mas sanem no kasem long program blong kompiuta, ol save we i gat kopiraet long hem (olsem ol buk blong Sosaeti). Ol save ya, ol narafala man oli save mekem kopi blong hem be oli no gat raet, from we oli no bin askem long hemia we i holem kopiraet blong hem.”