Ol Man We Oli Jusum Laet Oli Save Sef
Ol Man We Oli Jusum Laet Oli Save Sef
“Hae God, hem i laet blong mi, mo hem i stap sevem mi. Mi bambae mi no save fraet long man.”—OL SAM 27:1.
1. ?Jeova i mekem wanem blong givim laef long yumi?
JEOVA nao i Wokem san we i stap givim laet blong mekem se olgeta samting long wol ya oli gat laef. (Jenesis 1:2, 14) Mo tu, Jeova i Man We i Wokem laet long saed blong spirit. Laet ya i stap saenaot long tudak blong wol ya blong Setan we i save givim ded. (Aesea 60:2; 2 Korin 4:6; Efesas 5:8-11; 6:12) Olgeta we oli jusum laet, oli save talem tok ya blong man we i raetem Ol Sam, se: “Hae God, hem i laet blong mi, mo hem i stap sevem mi. Mi bambae mi no save fraet long man.” (Ol Sam 27:1a) Be, olsem long taem blong Jisas, olgeta we oli jusum tudak, bambae oli kasem panis nomo.—Jon 1:9-11; 3:19-21, 36.
2. ?Long taem bifo, wanem i hapen long olgeta we oli tanem baksaed long laet blong Jeova mo wanem i hapen long olgeta we oli lesin long tok blong hem?
2 Long taem blong Aesea, bighaf blong ol man we Jeova i mekem kontrak wetem olgeta, oli tanem baksaed long laet. From samting ya, kingdom blong Isrel long not i lus long taem blong Aesea. Mo long 607 B.K.T., * Jerusalem mo tempel blong hem i lus, mo ol man Juda oli go kalabus long narafala kantri. Be olgeta we oli lesin long tok blong Jeova, oli kasem paoa blong stanap strong agensem apostasi * long taem ya. Jeova i bin promes se olgeta we oli lesin long hem, bambae oli laef tru long trabol we i kamaot long 607 B.K.T. (Jeremaea 21:8, 9) Tede, yumi we i lavem laet, yumi save lanem plante samting long wanem we i hapen long taem ya.—Efesas 5:5.
Olgeta We Oli Stap Long Laet Oli Glad
3. ?Tede, yumi save trastem hu, yumi lavem wanem ‘nesen we i gat stret fasin,’ mo “nesen” ya i gat wanem ‘strongfala taon’?
3 “!Taon blong yumi i strong! Fasin ya we Hae God i sevem yumi, hem i olsem wan bigfala stonwol we i goraon, i blokemgud yumi blong yumi stap gud. Yumi ol man blong [“nesen,” NW ] ya, oltaem, yumi stap folem ol stret fasin, oltaem, yumi stap obei gud long hem. I gud hem i openem ol doa blong stonwol ya, blong letem yumi go insaed.” (Aesea 26:1, 2) Hemia ol naesfala tok blong ol man we oli trastem Jeova. Long taem blong Aesea, ol man Jiu we oli gat strong bilif oli lukluk i go long Jeova, olsem Stamba blong trufala sefples blong olgeta. Oli no lukluk i go long ol giaman god blong ol manples blong olgeta. Tede, yumi tu, yumi trastem Jeova olsem sefples blong yumi. Antap long hemia, yumi lavem ‘nesen ya we i stap folem ol stret fasin,’ hemia “Isrel blong God.” (Galesia 6:16, NW; Matiu 21:43) Jeova tu i lavem nesen ya from we hem i wan nesen we i gat stret fasin. God i blesem nesen ya, Isrel blong God, mo i mekem se hem i gat wan ‘strongfala taon,’ we i minim wan bigfala ogenaesesen we i stap givhan mo protektem nesen ya.
4. ?Yumi mas gat wanem tingting?
4 Olgeta we oli stap insaed long “taon” ya, oli luksave se “man we oltaem tingting blong hem i stap strong long [Jeova, bambae Jeova i givhan long hem, i] mekem tingting blong hem i kwaet gud from we hem i stap trastem [Jeova].” Jeova i stap givhan long olgeta we tingting blong olgeta i strong, nao oli stap trastem hem mo folem ol stret rul blong hem. Taswe ol man Juda we oli gat strong bilif, oli folem tok ya blong Aesea se: “Olgeta. [“Jeova,” NW ] i God blong yumi, mo yumi mas trastem hem oltaem nomo, from we hem nao i strong sefples blong yumi we bambae i stap oltaem, gogo i no save finis.” (Aesea 26:3, 4; Ol Sam 9:10; 37:3; Ol Proveb 3:5) Olgeta ya we oli gat stret tingting, oli lukluk i go long “Jeova” olsem strongfala sefples blong olgeta. Oli harem gud from we hem i stap mekem ‘tingting blong olgeta i kwaet gud.’—Filipae 1:2; 4:6, 7.
Ol Enemi Blong God Oli Sem Bigwan
5, 6. (a) ?Olsem wanem Babilon blong bifo i sem bigwan? (b) ?Long wanem rod “Bigfala Babilon” i sem bigwan?
5 ?Olsem wanem sipos olgeta we oli trastem Jeova oli kasem bigfala trabol? Oli no nid blong fraet. Jeova i letem ol trabol ya blong smoltaem nomo. Biaen, bambae hem i mekem ol man blong hem oli haremgud mo bambae i panisim ol man we oli stap spolem ol man blong hem. (2 Tesalonaeka 1:4-7; 2 Timoti 1:8-10) Tingbaot wanem we i hapen long wan ‘bigfala taon we stonwol blong hem i hae we i hae.’ Aesea i talem se: “Ol man ya we fastaem oli stap flas, [Jeova] i daonemgud olgeta, mo bigfala taon blong olgeta we stonwol blong hem i hae we i hae, be hem i flatemdaon evriwan finis, i foldaon i stap long graon. Olgeta ya we fastaem, ol man blong ples ya oli stap spolem olgeta, oli stap flatemdaon olgeta, naoia oli stap wokbaot long ples ya, oli stap purumbut long ol stonwol ya blong hem.” (Aesea 26:5, 6) Taon we Aesea i tokbaot long ples ya, maet hem i Babilon. I tru se taon ya i bin mekem bigfala trabol long ol man blong God. ?Be wanem i hapen long Babilon? Long 539 B.K.T., ol man Midia mo Pesia oli winim taon ya. !Yes, ol man Babilon oli sem bigwan!
6 Long taem blong yumi, profet tok blong Aesea i stret long wanem we i hapen long “Bigfala Babilon,” stat long 1919. Long sem yia ya, taon ya we stonwol blong hem i hae we i hae, hem i foldaon mo i sem bigwan, taem ol man blong Jeova oli fri long kalabus long saed blong spirit. (Revelesen 14:8, NW ) Be, samting we i hapen long Bigfala Babilon biaen, i moa nogud. Smol grup ya blong ol Kristin, i “purumbut” long enemi blong hem. Long 1922, ol Kristin ya oli stat blong talemaot se en blong Krisendom i klosap. Hemia i laenap wetem namba fo pupu we enjel i blu long hem long Revelesen 8:7-12 mo namba tri trabol long Revelesen 9:1–11:15.
“Stretem Rod Blong Ol Stret Man”
7. ?Ol man we oli lukluk i go long laet blong Jeova oli kasem wanem samting blong lidim olgeta? ?Oli putum tingting blong olgeta i strong long hu mo oli lavem wanem?
7 Ol man we oli stap lukluk i go long laet blong Jeova, Jeova i stap sevem olgeta mo i stap stretem rod blong olgeta. Aesea i talem se: “Hae God, yu yu stret olgeta. Oltaem yu yu stap stretem rod blong ol stret man, oltaem yu stap mekem rod blong olgeta i level gud. Oltaem mifala i stap mekem ol samting we yu yu wantem, mo mifala i stap putum tingting blong mifala i stap long yu, from we mifala i lavem yu nomo.” (Aesea 26:7, 8) Jeova i wan God we i gat stret fasin, mo ol man we oli wosipim hem, oli mas folem ol stret rul blong hem. Taem oli mekem olsem, Jeova i lidim olgeta, i mekem rod blong olgeta i level gud. Taem olgeta ya we oli gat tingting daon oli folem ol tok blong Jeova, oli soemaot se tingting blong olgeta i strong long hem mo oli lavem tumas nem blong hem—hemia i olsem “memoriol” blong tingbaot Jeova.—Eksodas 3:15, NW.
8. ?Wanem eksampol we Aesea i soem long yumi?
8 Aesea tu i lavem tumas nem blong Jeova. Samting ya i klia long nekiswan tok blong hem. “Long naet, oltaem mi mi wantem yu tumas [“long sol blong mi,” NW ], mo long eli moning, tingting blong mi i stap lukaot yu. Taem we yu bambae yu jajem wol ya wetem ol man we oli stap long hem, bambae ol man oli lanem mining blong stret fasin.” (Aesea 26:9) ‘Sol blong Aesea’ i wantem Jeova tumas—we i min se hem i lavem Jeova wetem ful laef blong hem. Traem tingbaot profet ya we i stap prea long Jeova long naet taem ples i kwaet. Hem i stap talemaot ol dip filing blong hem mo i stap askem strong long Jeova blong i lidim hem. !Hemia i rili wan nambawan eksampol! Mo tu, Aesea i lanem mining blong stret fasin, taem hem i luk jajmen blong Jeova. Long rod ya, Aesea i leftemap tingting blong yumi blong lukaotgud mo stap wekap oltaem. Olsem nao, bambae yumi luksave wanem we Jeova i wantem yumi blong mekem.
Samfala Oli Jusum Tudak
9, 10. ?Olsem wanem Jeova i kaen tumas long nesen blong hem we i no stap tru long hem? ?Nesen ya i soem wanem fasin?
9 Jeova i kaen tumas mo i soem bigfala lav long ol man Juda, be sore tumas, bighaf blong olgeta oli ting nating long lav blong hem. Plante taem, oli no jusum laet blong trutok blong Jeova, be oli jus blong rebel mo tanem baksaed long trufala wosip. Aesea i talem se: “Nating we yu yu stap mekem i gud long ol man nogud, be neva olgeta oli lan, neva olgeta oli stap mekem ol stret fasin. Mo nating we olgeta oli stap long medel blong ol stret man, be oli stap gohed blong mekem ol fasin nogud, mo oli no save luksave we yu yu King we yu hae we yu hae.”—Aesea 26:10.
10 Long taem blong Aesea, Jeova i protektem ol man Juda long ol enemi blong olgeta. Be, bighaf blong ol man Juda oli no wantem luksave samting we Jeova i mekem. Jeova i blesem nesen blong olgeta wetem pis, be oli no soem tangkiu long hem nating. Taswe Jeova i lego olgeta, nao oli kam slef blong “ol narafala masta,” mo hem i letem ol man Jiu oli go kalabus long Babilon long 607 B.K.T. (Aesea 26:11-13) Be biaen, wan smol grup blong olgeta oli tanem tingting blong olgeta mo oli gobak long kantri blong olgeta.
11, 12. (a) ?Ol enemi blong ol man Juda oli gat wanem fiuja? (b) ?Long 1919, ol enemi blong ol tabu man blong Jeova oli gat wanem fiuja?
11 ?Olsem wanem long ol enemi blong ol man Juda? Aesea i talem se: “Ol narafala masta ya oli ded finis, mo oli no save laef bakegen. . . . Oli no save girap bakegen, from we yu yu panisimgud olgeta, yu spolemgud olgeta finis. I no moa gat man i stap we i save tingbaot olgeta bakegen.” (Aesea 26:14) Yes, taem Babilon i foldaon long 539 B.K.T., hem i no moa stanap bakegen. Biaen, bambae taon ya i lus olgeta. Hem i no moa “save girap bakegen,” mo stori blong hem bambae i stap long ol buk blong histri nomo, from we hem i no moa stap. !Hemia i wan woning long olgeta we oli stap trastem ol strongfala lida blong wol ya!
12 Sam haf blong profet tok ya oli kamtru taem God i letem ol tabu man blong hem oli kalabus long saed blong spirit long 1918 mo biaen, hem i mekem oli kam fri bakegen long 1919. Stat long taem ya, fiuja blong ol enemi ya, antap moa, Krisendom, i kam tudak we i tudak. Be ol man blong Jeova oli stap wet long ol nambawan blesing.
‘Yu Mekem Kantri Ya i Kam Bigwan Moa’
13, 14. ?Wanem nambawan blesing we ol tabu man blong Jeova oli bin haremgud long hem stat long 1919?
13 Long 1919, ol tabu man oli tanem tingting blong olgeta, nao God i blesem olgeta, i mekem oli kam plante. Fastaem, oli hivimap ol laswan memba blong Isrel blong God. Mo biaen, oli stat blong hivimap “bigfala hip” blong ol “narafala sipsip.” (Revelesen 7:9; Jon 10:16) Aesea i bin talemaot ol blesing ya long profet tok ya se: “Hae God. Yu yu mekem kantri ya blong mifala i stap kam bigwan moa, mo yu stap seftem mak blong hem i go longwe moa long evri saed, mo fasin ya i stap leftemap nem blong yu i go antap. Mifala i man blong yu, be bifo, yu yu panisim mifala. Taem we mifala i stap harem nogud, mifala i stap prea long yu.”—Aesea 26:15, 16.
14 Tede, kantri blong Isrel blong God i kasem narasaed wol, mo bigfala kampani we i joen wetem olgeta, naoia namba blong olgeta i bitim sikis milian man. Olgeta ya oli glad tumas blong talemaot gud nius. (Matiu 24:14) !Hemia i wan nambawan blesing we Jeova i givim! !Mo samting ya i karem bigfala ona long nem blong hem! Tede, ol man oli stap talemaot nem ya long 235 kantri—hemia i mekem nambawan promes blong Jeova i kamtru.
15. ?Wanem i hapen long 1919 we i olsem se ol man blong God oli laef bakegen long saed blong spirit?
15 Blong kam fri long Babilon, ol man Juda oli nidim we Jeova i halpem olgeta. Oli no save kam fri sipos Jeova i no givhan long olgeta. (Aesea 26:17, 18) Hemia i sem mak long saed blong Isrel blong God. I klia se Jeova nao i givhan long olgeta blong kam fri long kalabus long 1919. Sipos God i no givhan long olgeta, bambae oli no save kam fri. Wan samting blong sapraes, hemia taem laef blong olgeta i jenis wantaem. Aesea i talem se, jenis ya i olsem we oli laef bakegen long ded: “Ol man blong yumi we oli ded, oli stap slip long beregraon, bambae oli laef bakegen. Ol bodi blong olgeta bambae oli girap, oli laef bakegen. Olgeta ya bambae oli wekap, oli glad, oli stap singsing. Olsem we wota blong naet i folfoldaon, i mekem graon i kam sofsof, i kam niuwan bakegen, long sem fasin, Hae God bambae i mekem olgeta ya oli laef bakegen.” (Aesea 26:19; Revelesen 11:7-11) !Yes, olgeta ya we i luk olsem se oli ded, oli girap mo oli gohed bakegen blong prij!
Protektem Yumi Long Taem We i Denja Tumas
16, 17. (a) ?Long 539 B.K.T., ol man Jiu oli nidim blong mekem wanem sipos oli wantem laef taem Babilon i lus? (b) ?Tede, wanem ya we i olsem “ol haos,” mo olsem wanem yumi save kasem blesing from ol haos ya?
16 Oltaem, ol man blong Jeova oli nidim we hem i protektem olgeta. Klosap nao bambae Jeova i tekem laswan aksin agensem wol blong Setan. Long taem ya, ol man blong God bambae oli nidim moa we hem i givhan long olgeta, i bitim ol narafala taem bifo. (1 Jon 5:19) Hemia wan taem we i denja tumas, taswe Jeova i wonem yumi se: “Yufala i go insaed long ol haos blong yufala, mo taem yufala i stap insaed, yufala i satem doa. Yufala i go haed blong smoltaem, gogo kros blong Hae God bambae i godaon bakegen. Naoia, bambae hem i kamaot long haos blong hem long heven, bambae i kam panisim ol man long wol ya from ol sin blong olgeta. Fasin ya we man i kilim man i ded be i haedem samting ya, bambae i no moa save haed, graon bambae i soemaot blad ya we i ron.” (Aesea 26:20, 21; Sefanaea 1:14) Woning ya i soemaot long ol man Jiu olsem wanem blong laef tru long bigfala trabol we i spolem Babilon long 539 B.K.T. Olgeta we oli obei long woning ya, oli stap nomo long haos blong olgeta, nao oli sef, ol enemi soldia we oli stap olbaot long rod oli no kilim olgeta oli ded.
17 Tede, “ol haos” ya, we profet tok ya i tokbaot, i minim ol taosen kongregesen blong ol Witnes blong Jeova raon long wol. Naoia tu, ol kongregesen ya oli save protektem yumi. Long ol kongregesen ya, yumi save stap gud wetem ol Kristin brata sista blong yumi, mo ol elda oli save kea long yumi wetem lav. (Aesea 32:1, 2; Hibrus 10:24, 25) Yumi rili nidim samting ya from we en blong rabis wol ya i klosap tumas. Mo ol man we oli obei, olgeta nomo bambae oli sef.—Sefanaea 2:3.
18. ?Olsem wanem bambae Jeova i “kilim bigfala anamol ya blong solwota” i ded?
18 Aesea i tokbaot taem ya i se: “Long taem ya, Hae God bambae i tekem naef blong faet blong hem, we i strong, mo i sap, mo i gat paoa, nao bambae i panisim Leviatan, bigfala snek ya blong solwota, we i stap tantanem bodi blong hem, i stap glis i go. Mo hem bambae i kilim bigfala anamol ya blong solwota tu i ded.” (Aesea 27:1) ?Tede, wanem mining blong “Leviatan”? I klia se hem i minim “snek ya blong bifo,” Setan, wetem rabis wol ya blong hem, we hem i stap yusum blong faet agensem Isrel blong God. (Revelesen 12:9, 10, 17; 13:14, 16, 17) Long 1919, Leviatan i no moa save holemtaet ol man blong God. Mo biaen, bambae hem i mas lus blong olwe. (Revelesen 19:19-21; 20:1-3, 10) Yes, bambae Jeova i “kilim bigfala anamol ya blong solwota” i ded. Naoia, Leviatan i stap mekem plante samting blong agensem ol man blong Jeova, be hem i no save winim olgeta blong olwe. (Aesea 54:17) !Yumi glad tumas taem yumi kasem save long samting ya!
‘Grep i Karem Plante Frut’
19. ?Laef blong smol grup blong ol man blong God tede i olsem wanem?
19 Yumi glad tumas taem yumi tingbaot olgeta laet ya we Jeova i givim long yumi. Aesea i talem ol naesfala tok ya blong tokbaot glad blong ol man blong Jeova: “Long taem ya, Hae God bambae i talem se, ‘Plantesen blong rop ya grep we mi mi planem, hem i karem plante frut. Yufala i mas sing long singsing blong hem. Mi mi stap lukaot long hem, mo oltaem mi stap wasem ol rop blong hem. Mi stap gad long hem long dei mo long naet, blong man i no kam spolem.’ ” (Aesea 27:2, 3) Jeova i bin keagud long “plantesen blong rop ya grep” we hem i planem, hemia smol grup blong Isrel blong God, mo ol fren blong olgeta we oli wok strong. (Jon 15:1-8) Frut we i kamaot, i karem bigfala ona long nem blong Jeova mo i mekem ol man blong hem long wol ya oli glad tumas.
20. ?Olsem wanem Jeova i protektem Kristin kongregesen?
20 Jeova i bin kros long ol tabu man blong hem, taswe hem i letem olgeta oli kalabus long saed blong spirit long 1918. Be yumi glad tumas se biaen, hem i no moa kros long olgeta. Jeova hem wan i talem se: “Mi mi no moa kros long plantesen ya blong mi. Sipos i gat ol rabis gras mo ol ropnil oli stap long hem, bambae mi go katem olgeta, mo bambae mi bonem olgeta. Be sipos ol enemi blong ol man blong mi oli wantem blong mi mi lukaot long olgeta, i moa gud oli kam [“long strongfala haos blong mi,” NW ], oli mekem pis wetem mi. Yes, i moa gud oli mekem pis wetem mi.” (Aesea 27:4, 5) Jeova i mekem sua se ol grep we hem i planem, oli mas “karem plante frut.” Taswe, hem i tekemaot mo i spolem ol samting we i olsem rabis gras, we i stap spolem ol man blong hem. !I no gat wan man i save spolem Kristin kongregesen! I gud we yumi evriwan i kam ‘long strongfala haos blong Jeova,’ blong hem i glad long yumi mo i protektem yumi. Sipos yumi mekem olsem, bambae yumi gat pis wetem God. Pis ya i impoten tumas taswe Aesea i talemaot tu taem long vas ya.—Ol Sam 85:1, 2, 8; Rom 5:1.
21. ?Olsem wanem graon i fulap gud wetem ol “frut”?
21 I gat sam narafala blesing bakegen: “Long taem we bambae i kam, ol laen blong yumi bambae oli gru olsem tri we rus blong hem i godaon, nao i gru i kam bigwan, i karem flaoa, nao frut blong hem i kam fulap olbaot long wol ya.” (Aesea 27:6) Vas ya i bin kamtru stat long 1919, mo hem i pruvum bigwan se Jeova i gat strongfala paoa. Ol tabu Kristin oli fulumap wol ya finis wetem ol “frut,” hemia ol nambawan kakae long saed blong spirit. Nating se oli stap long wol ya we i fulap long kruked fasin, oli glad blong leftemap ol stret rul blong God. Mo Jeova i stap blesem olgeta, i mekem oli kam plante moa. From samting ya, plante milian fren blong olgeta, ol narafala sipsip, ‘oli stap mekem wosip long God long dei mo long naet.’ (Revelesen 7:15) !Yumi neva mas fogetem bigfala blesing we yumi gat blong kakae ol “frut” ya mo blong serem wetem ol narafala!
22. ?Ol man we oli jusum laet oli kasem wanem blesing?
22 Naoia we laef i strong tumas, tudak i kavremap gud wol ya mo olgeta nesen. Yumi talem bigfala tangkiu long Jeova from we hem i givim laet long yumi ol man blong hem. (Aesea 60:2; Rom 2:19; 13:12) Olgeta we oli jusum laet ya, bambae oli gat pis long tingting blong olgeta naoia mo bambae oli glad. Antap long hemia, bambae oli kasem laef we i no save finis long fiuja. Yes, yumi ol man we i lavem laet, i stret nomo we yumi presem Jeova wetem fulhat blong yumi, yumi talem olsem man ya blong raetem Ol Sam se: “Hae God i strong ples blong haed blong mi. Bambae mi no save fraet. Yumi mas trastem Hae God, mo yumi mas bilif long hem. Yumi no mas letem tingting blong yumi i foldaon, oltaem yumi mas trastem hem.”—Ol Sam 27:1b, 14.
[Ol futnot]
^ B.K.T. i minim Bifo Kristin Taem.
^ Fasin blong lego trufala bilif mo agensem hem.
?Yu Yu Tingbaot?
• ?Wanem fiuja blong olgeta we oli stap spolem ol man blong Jeova?
• ?Wanem samting we Aesea i talem se i kam bigwan moa?
• ?Wanem ya “ol haos” mo from wanem yumi mas stap insaed long ol haos ya?
• ?From wanem laef blong ol man blong Jeova i leftemap nem blong hem?
[Kwestin]
[Bokis blong pija long pej 22]
NIUFALA BUK
Ol poen we yumi tokbaot long tufala stadi ya oli stanap long wan tok we i kamaot long distrik asembli blong 2000/2001. Long en blong tok ya, yumi kasem niufala buk ya, Isaiah’s Prophecy—Light for All Mankind I. Buk ya we i gat 416 pej blong hem, i eksplenem ol wanwan vas blong ol faswan 40 japta blong buk blong Aesea.
[Tok blong pija long pej 18]
Jeova i letem ol stret man nomo oli stap long ‘strongfala taon’ blong hem, hemia ogenaesesen blong hem
[Tok blong pija long pej 19]
Aesea i prea long Jeova “long naet”
[Tok blong pija long pej 21]
Jeova i lukaotgud ‘long plantesen blong rop ya grep’ we hem i planem mo i mekem se oli karem plante frut