Olgeta We Oli Wokbaot Long Laet Oli Glad
Olgeta We Oli Wokbaot Long Laet Oli Glad
“Yumi mas wokbaot long delaet ya we Hae God i stap givim long yumi.”—AESEA 2:5.
1, 2. (a) ?Laet i impoten olsem wanem? (b) ?From wanem woning ya se tudak bambae i kavremap wol i impoten tumas?
JEOVA i Stamba blong laet. Baebol i kolem hem se, “Man we i Putum san blong givim laet long dei, mo i putum mun mo ol sta, blong oli givim laet long naet.” (Jeremaea 31:35, NW; Ol Sam 8:3) Jeova nao i wokem san we i stap givim laet long yumi. San ya i olsem wan bigfala faea we bigfala paoa blong hem i stap goaot long skae tru long laet mo hot blong hem. Smol paoa nomo blong san, we yumi kasem tru long laet blong hem, i naf blong givim laef long evri samting long wol ya. Sipos i no gat laet blong san, bambae yumi no save laef. Bambae i no gat wan laef samting nating i stap long wol ya.
2 Taem yumi tingbaot samting ya, yumi kasem save se wanem we Aesea i tokbaot i impoten tumas. Hem i talem se: “!Yu luk! Tudak hem wan bambae i kavremap wol, mo olgeta nesen oli stap long bigfala blak klaod.” (Aesea 60:2, NW ) I tru se vas ya i no stap tokbaot prapa tudak. Aesea i no minim se wan dei, bambae san, mun mo ol sta, oli no moa saen, nogat. (Ol Sam 89:36, 37; 136:7-9) Be hem i stap tokbaot tudak long saed blong spirit. Tudak ya i save givim ded long man. Yes, yumi no save laef sipos i no gat laet blong san. Long sem fasin, yumi no save kasem laef sipos i no gat laet long saed blong spirit.—Luk 1:79.
3. ?Folem tok blong Aesea, ol Kristin oli mas mekem wanem?
3 Nating se ol tok blong Aesea oli kamtru finis long ol man Juda bifo, i impoten tumas blong luksave se ol tok ya oli stap kamtru tede long wan fasin we i bigwan moa. Ol man oli stap long bigfala denja, taswe oli rili nidim laet long saed blong spirit. Hemia nao from wanem ol Kristin oli mas obei long tok ya blong Jisas se: “Yufala i mas letem laet ya i saenaot i kasem ol man.” (Matiu 5:16) Ol Kristin we oli gat strong bilif oli save mekem laet i saenaot i go long ol man we oli gat tingting daon, nao bambae ol man ya oli gat janis blong kasem laef.—Jon 8:12.
Tudak Long Isrel
4. ?Wetaem ol profet tok blong Aesea oli kamtru fastaem, be stat long taem blong hem finis, laef blong ol man i olsem wanem?
4 Faswan taem we tok blong Aesea long saed blong tudak i kamtru, hemia taem ol man Babilon oli spolem Juda mo oli tekem ol man Juda oli go kalabus. Be long taem blong Aesea, taem ol man Babilon oli no spolem Juda yet, bighaf blong nesen ya i stap finis long tudak long saed blong spirit. Taswe Aesea i talem long ol manples blong hem se: “Yumi ol laen blong Jekob, mo yumi mas wokbaot long delaet ya we Hae God i stap givim long yumi.”—Aesea 2:5; 5:20.
5, 6. ?Wanem samting i mekem se tudak i kavremap ol man long taem blong Aesea?
5 Aesea i talem profet tok ya “long taem blong King Usia, mo long taem blong King Jotam, mo long taem blong King Ahas, mo long taem blong King Hesekia, we olgeta ya wanwan oli king blong Juda.” (Aesea 1:1) Long taem ya, politik i olbaot, fasin tu fes blong ol skul i kam antap bigwan, i gat kruked fasin blong jajem man, mo ol puaman oli stap harem nogud long han blong ol narafala man. Taem ol gudfala king, olsem King Jotam, oli rul, plante olta blong ol giaman god oli stap yet antap long ol hil. Taem ol king we oli no stap tru long God oli rul, ol samting oli kam moa nogud. Eksampol, rabis King Ahas i bitim mak long ol fasin nogud. Hem i bonem ol pikinini blong hem long faea blong mekem sakrefaes long god ya Molek. !Hemia wan taem we i rili tudak long saed blong spirit!—2 King 15:32-34; 16:2-4.
6 Tudak ya i kavremap ol narafala kantri tu. Kantri blong Moab, Edom, mo Filistia we oli denja tumas, oli stap klosap nomo long kantri blong Juda. Kingdom blong Isrel long not, hem i enemi wetem Juda nating se oli famle. Siria, we i stap long saed i go long not, i mekem se i no gat pis long Juda. Be samting we i denja moa, hemia Asiria we oltaem i stap lukaot rod blong mekem ol narafala kantri oli kam aninit long paoa blong hem. Long taem we Aesea i talemaot ol profet tok blong hem, ol man Asiria oli winim Isrel mo klosap se oli spolem Juda fulwan. Wan taem, ol man Asiria oli winim olgeta strongfala taon blong Juda, Jerusalem nomo oli no winim.—Aesea 1:7, 8; 36:1.
7. ?Ol man Isrel mo Juda oli jusum wanem rod, mo Jeova i mekem wanem?
7 Ol man we God i bin mekem kontrak wetem olgeta, oli kasem bigfala trabol ya from we Isrel mo Juda oli no stap tru long God. Oli olsem ol man we Ol Proveb i tokbaot, i se, “oli lego stret laef finis, oli stap long fasin blong tudak nomo.” (Ol Proveb 2:13) Be nating se Jeova i kros long ol man blong hem, hem i no lego olgeta fulwan. Hem i jusumaot Aesea mo ol narafala profet blong givim laet long eni man long nesen ya we i wantem yet blong wosipim Jeova. Laet we God i yusum profet ya blong givimaot, hem i impoten tumas. Hem i laet we i save givim laef.
Taem Blong Tudak Tede
8, 9. ?Tede, wanem samting i mekem se tudak i kavremap wol?
8 Wanem we i stap hapen tede i sem mak long wanem we i hapen long taem blong Aesea. Tede, ol lida oli tanem baksaed long Jeova mo long King we Hem i putumap, hemia Jisas Kraes. (Ol Sam 2:2, 3) Ol lida blong Krisendom * oli giaman gud long ol man blong olgeta. Ol lida ya, oli talem se oli stap wosip long God, be oli giaman nomo. Samting we i tru, hemia se oli stap leftemap ol god blong wol ya—oli leftemap kantri blong olgeta, oli sapotem ol ami, oli trastem ol rij samting wetem ol man we oli gat haenem. Mo tu, oli stap tijim ol man long ol hiten tijing.
9 Ol skul blong Krisendom oli joen long plante faet. Sam long ol faet ya, oli blong kilimaot wan ful laen blong man mo oli fulap long plante narafala rabis fasin. Plante jos oli ting nating long ol stret fasin we Baebol i tokbaot, be oli strong blong leftemap ol nogud fasin olsem fasin blong slip olbaot, mo fasin we man i slip wetem man mo woman i slip wetem woman. From samting ya, ol sipsip blong Krisendom oli kam olsem olgeta ya we man blong raetem Ol Sam i tokbaot, i se: “Oli no save wan samting nating, mo oli no gat hed; oli stap wokbaot olbaot long tudak nomo.” (Ol Sam 82:5, NW ) I tru nomo, olsem Juda bifo, bigfala tudak i kavremap gud Krisendom.—Revelesen 8:12.
10. ?Olsem wanem laet i stap saenaot long tudak tede, mo olsem wanem olgeta we oli gat tingting daon oli kasem blesing?
10 Long tudak ya, Jeova i mekem se laet i saenaot i go long ol man we oli gat tingting daon. Hem i stap yusum ol tabu man blong hem long wol ya, hemia “slef we i stret mo waes,” blong oli “saenaot olsem laet long wol.” (Matiu 24:45, NW; Filipae 2:15, NW ) Slef ya wetem plante milian “narafala sipsip” we oli stap wok wanples, oli mekem laet ya blong Tok blong God, Baebol, i saenaot long olgeta man. (Jon 10:16) Long wol ya we i tudak, laet ya i stap givim hop long ol man we oli gat tingting daon. Mo laet ya i givhan long olgeta blong fren gud wetem God, mo blong oli no foldaon long ol trap blong Setan. Laet ya i impoten tumas, hem i save givim laef.
“Mi Leftemap Nem Blong Yu”
11. ?Wanem samting we Jeova i soemaot klia long taem blong Aesea?
11 Long taem blong Aesea mo long taem ya we ol man blong Jeova oli go kalabus long Babilon, i olsem we tudak i kavremap olgeta ples. ?Long taem ya, Jeova i yusum wanem blong lidim ol man? Hem i givim ol tijing long saed blong stret fasin blong lidim olgeta. Antap long hemia, hem i soemaot olsem wanem bambae hem i mekem ol stamba tingting blong hem long saed blong ol man blong hem oli kamtru. Wan eksampol long saed ya, hemia ol nambawan profet tok we i stap long Aesea japta 25 kasem japta 27. Trifala japta ya i soemaot ol wok we Jeova i bin mekem long taem ya mo olsem wanem bambae hem i mekem i sem mak tede.
12. ?Aesea i talem wanem tok we i rili kamaot long hat?
12 Fastaem, Aesea i talem se: “O Jeova, yu yu God blong mi. Bambae mi stap presem yu, mi leftemap nem blong yu.” !Hemia i wan tok blong presem God we i rili kamaot long hat! ?Be wanem i pusum profet ya blong talem wan prea olsem? Seken haf blong vas ya i soemaot wan stamba risen, i se: “Yu [Jeova] yu stap mekem ol samting blong sapraes, mo ol tok we yu yu talemaot longtaem bifo, oli tru, man i save trastem.”—Aesea 25:1, NW.
13. (a) ?Aesea i kasem save long wanem samting we i mekem se hem i gat moa tangkiu long Jeova? (b) ?Eksampol blong Aesea i save lanem wanem long yumi tede?
13 Bifo long taem blong Aesea, Jeova i bin mekem plante bigbigfala samting blong givhan long ol man Isrel, mo ol man oli bin raetem daon stori blong ol samting ya. I klia se Aesea i savegud ol stori ya. Eksampol, hem i save se Jeova i bin mekem ol man blong Hem oli fri, oli no moa wok slef long Ijip, i sevem olgeta long ol strongfala ami blong Fero long Red Si, mo i lidim olgeta oli krosem draeples, oli go insaed long Promes Lan. (Ol Sam 136:1, 10-26) Ol stori ya oli soem se Jeova i tru oltaem mo yumi save trastem hem. “Ol tok” we hem i talem—olgeta stamba tingting blong hem—bambae oli kamtru. Yes, stret save long saed blong God i givim paoa long Aesea blong wokbaot oltaem long laet. Taswe, Aesea i wan nambawan eksampol long yumi. Sipos yumi stadigud long Tok blong God mo mekem i wok long laef blong yumi, bambae yumi tu, yumi stap oltaem long laet.—Ol Sam 119:105; 2 Korin 4:6.
Wan Taon i Lus
14. ?Wan profet tok i talem wanem long saed blong wan taon, mo maet hemia i minim wanem taon?
14 Wan long ol tok ya we God i talem, hemia we yumi ridim long Aesea 25:2 se: “Ol bigbigfala taon, be yu yu mekem olgeta oli brobrok, oli kam nogud olgeta. Ol bigfala stonwol blong olgeta we i blong blokem ol enemi blong olgeta, be yu yu brekemdaon evriwan. Ol haos blong king blong ol enemi blong mifala, oli lus evriwan finis, mo neva bambae taon ya blong olgeta i save stanap bakegen.” ?Profet tok ya i stap tokbaot wanem taon? Maet Aesea i stap tokbaot Babilon. Yes, biaen taon blong Babilon i brobrok, i lus olgeta.
15. ?Tede, wanem ya “bigfala taon,” mo wanem bambae i hapen long hem?
15 ?Taon we Aesea i tokbaot i gat wan mining tede? Yes i gat. Revelesen i tokbaot “bigfala taon ya we king blong hem i rulum olgeta king blong wol.” (Revelesen 17:18) Taon ya, hem i ‘Bigfala Babilon,’ we i minim olgeta giaman skul raonabaot long wol. (Revelesen 17:5) Tede, Krisendom nao i mekemap bighaf blong Bigfala Babilon. Ol lida blong Krisendom oli strong blong agensem ol man blong Jeova we oli stap talemaot Kingdom. (Matiu 24:14) Be olsem Babilon bifo, bambae i no longtaem, Bigfala Babilon i lus blong olwe.
16, 17. ?Long ol taem bifo mo tede, olsem wanem ol enemi blong Jeova oli ona gud long hem?
16 ?Wanem samting bakegen we Aesea i talem long saed blong “bigbigfala taon”? Taem Aesea i stap tokbaot Jeova, hem i talem se: “Ol man blong ol kantri ya we oli gat paoa, bambae oli presem yu. Ol man blong ol bigbigfala taon ya we fasin blong olgeta i strong tumas, bambae oli fraet long yu, oli ona gud long yu.” (Aesea 25:3) ?Olsem wanem “ol man blong ol bigbigfala taon ya we fasin blong olgeta i strong tumas” oli save ona gud long Jeova? Tingbaot wanem we i hapen long strongfala King Nebukadnesa blong Babilon. Hem i kasem wan hadtaem we i soemaot slak fasin blong hem. Biaen, hem i mas talemaot se Jeova i hae olgeta mo i gat strongfala paoa. (Daniel 4:34, 35) Taem Jeova i soemaot paoa blong hem, olgeta man, wetem ol enemi blong hem tu, oli mas luksave bigfala paoa blong hem, nating se oli no glad blong mekem olsem.
17 ?Olsem wanem long Bigfala Babilon? ?Hem i luksave ol bigbigfala wok blong Jeova? Yes. Long faswan bigfala faet blong wol, ol tabu man blong Jeova oli prij, nating se i gat bigfala trabol. Long 1918, oli kalabus long saed blong spirit taem ol lida blong Watch Tower Sosaeti oli go long prisen. Klosap se wok blong prij i finis olgeta. Be long 1919, Jeova i mekem se oli kam fri bakegen mo tabu spirit i givim niufala paoa long olgeta, nao oli gohed bakegen blong talemaot gud nius long olgeta ples long wol. (Mak 13:10) Profet tok long buk blong Revelesen i bin tokbaot ol samting ya, mo hem i talem tu, wanem filing blong ol enemi blong Jeova. Ol enemi ya “oli fraet tumas, nao oli stap leftemap nem blong God we i stap long heven.” (Revelesen 11:3, 7, 11-13) Hemia i no min se olgeta enemi ya evriwan oli kam man blong bilif, nogat. Be i min se long taem ya, oli luksave bigfala wok blong Jeova, stret olsem we Aesea i bin talem.
‘Man We i No Gat Paoa i Stap Ronwe Blong Kam Haed Long Yu’
18, 19. (a) ?From wanem ol enemi oli no save brekem strong bilif blong ol man blong Jeova? (b) ?Olsem wanem bambae God i “satem maot” blong ol enemi blong hem?
18 Naoia, Aesea i tingbaot kaen fasin we Jeova i bin soem long olgeta we oli wokbaot long laet. Hem i talem long Jeova se: “Oltaem ol puaman wetem ol man we oli no gat paoa oli stap ronwe blong kam haed long yu, mo sipos oli trabol, bambae oli save stap gud long yu. Mo sipos i gat badtaem, be yu yu save blokemgud olgeta, mo sipos i gat bigsan, be yu yu save givim sed long olgeta. Ol enemi blong mifala oli no gat sore, mo oli stap kam mekem faet long mifala, olsem win mo ren long koltaem, no olsem draetaem long draeples. Be yu yu satem maot blong olgeta, yu blokem olgeta blong oli no moa singaot, olsem we klaod i blokem san, i mekem ples i no moa hot.”—Aesea 25:4, 5.
19 Stat long 1919, ol enemi oli traehad blong brekem strong bilif blong ol man blong Jeova, be ol enemi ya oli no win. ?From wanem? From we Jeova i wan strongfala ples blong haed mo hem i blokemgud ol man blong hem. Hem i protektem gud ol man blong hem taem narafala i mekem i nogud long olgeta, mo hem i kam olsem wan strongfala stonwol we i blokemgud olgeta taem i gat strongfala fasin agens. Yumi we i stap wokbaot long laet blong God, yumi stap wet long taem ya we bambae ‘ol enemi oli no moa singaot.’ Yes, yumi wantem tumas blong luk taem ya we bambae ol enemi blong Jeova oli lus.
20, 21. ?Bambae Jeova i mekem wanem bigfala lafet, mo long niufala wol, wanem sam narafala samting we bambae yumi gat long lafet ya?
20 I tru se Jeova i protektem ol man blong hem, be i no hemia nomo, hem i mekem sam samting moa. Hem i givim ol samting we oli nidim, mo i kam olsem Papa we i lavem olgeta tumas. Afta we hem i mekem ol man blong hem oli kam fri long Bigfala Babilon long 1919, hem i mekem wan bigfala lafet blong soemaot se oli winim ol enemi blong olgeta. Lafet ya i fulap long ol kakae long saed blong spirit. Aesea 25:6 i talem se: “Hae God i gat olgeta paoa, mo long tabu hil ya Saeon, hem bambae i mekemrere wan bigfala lafet blong yumi, we bambae i singaot ol man blong ol narafala kantri long wol blong oli kam joen. Long lafet ya, bambae yumi kakae ol nambawan kakae, mo yumi dring ol waen we i beswan.” !Yumi glad tumas long bigfala blesing we yumi gat blong joen long lafet ya! (Matiu 4:4) ‘Tebol blong Jeova’ i fulapgud long ol nambawan kakae. (1 Korin 10:21) Jeova i stap yusum “slef we i stret mo waes” blong givim evri samting we yumi nidim long Kristin laef blong yumi.
21 I gat plante moa samting we God i givim long yumi long lafet ya. Lafet long saed blong spirit we yumi stap haremgud long hem naoia, i mekem yumi tingbaot ol kakae long saed blong bodi we bambae i fulap long niufala wol blong God. Long taem ya, bambae yumi gat plante “nambawan kakae.” Bambae man i no moa hanggri long saed blong bodi mo long saed blong spirit tu. Ol gudfala man we naoia oli stap harem nogud from we “oli gat hadtaem blong kasem kakae,” we hemia wan “saen” blong soem se Jisas i stap, bambae oli harem gud tumas. (Matiu 24:3, 7) Tok blong man we i raetem Ol Sam bambae i leftemap tingting blong olgeta bigwan, se: “Bambae i gat plante kakae long ples ya, we bambae ol hil oli fulap gud long hem.”—Ol Sam 72:16.
22, 23. (a) ?Wanem ya “kaliko we oli somap,” mo olsem wanem bambae God i tekemaot kaliko ya? (b) ?Olsem wanem bambae ‘Jeova i tekemaot sem’ long ol man blong hem?
22 Naoia, lesin long narafala promes we i nambawan tumas. Taem Aesea i stap tokbaot sin mo ded se oli olsem “kaliko we oli somap,” hem i talem se: “Long bigfala hil ya, bambae Jeova i tekemaot kaliko we i stap antap long ol pipol, i stap kavremap gud olgeta, mo kaliko we oli somap long olgeta nesen.” (Aesea 25:7, NW ) !Traem tingbaot! Sin mo ded we i stap kavremap ol man olsem wan bigfala kaliko, bambae i no moa stap. !Yumi wantem tumas blong luk dei ya we ol gudfala man mo ol man we oli gat strong bilif bambae oli kasem blesing from sakrefaes blong Jisas!—Revelesen 21:3, 4.
23 Tabu spirit i pusum profet Aesea blong tokbaot nambawan taem ya, i se: “Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem. Hem i Hae God, mo hemia tok blong hem.” (Aesea 25:8) Bambae i no moa gat man i ded from sik mo bambae i no moa gat man i krae from we hem i lusum wan we hem i lavem tumas. !Hemia i rili wan nambawan blesing! Mo tu, long fulwol bambae i no moa gat giaman toktok mo ol nogud tok we ol man oli stap sakem long God mo ol man blong hem. ?From wanem? From we bambae Jeova i tekemaot stamba blong ol nogud toktok ya—hemia man blong giaman, Devel Setan, wetem laen blong hem.—Jon 8:44.
24. ?Olgeta we oli stap wokbaot long laet oli mekem wanem taem oli luk ol bigbigfala wok we Jeova i mekem blong blesem olgeta?
24 Ol man we oli wokbaot long laet oli haremgud tumas taem oli tingting dip long ol nambawan wok ya we oli soemaot bigfala paoa blong Jeova. Samting ya i pusum olgeta blong talem se: “!Hae God i God blong yumi! Yumi stap trastem hem, mo hem i sevem yumi. Oltaem yumi stap trastem hem, mo yumi save harem gud, yumi save glad, from we hem i sevem yumi.” (Aesea 25:9) I no longtaem bambae ol stret man oli kasem glad we i bigwan olgeta. Bambae i no moa gat tudak, be bambae laet blong Jeova i kavremap ol trufala man blong hem gogo i no save finis. !Yes, hop ya i nambawan tumas!
[Futnot]
^ Ol skul we oli giaman se oli Kristin.
?Yu Save Eksplenem?
• ?Tede, from wanem i impoten blong wokbaot long laet?
• ?From wanem Aesea i presem nem blong Jeova?
• ?From wanem ol enemi oli no save brekem strong bilif blong ol man blong God?
• ?Ol man we oli wokbaot long laet, oli stap wet blong kasem wanem nambawan blesing?
[Kwestin]
[Tok blong pija long pej 13]
Ol man Juda oli bonem ol pikinini blong olgeta blong mekem sakrefaes long Molek
[Tok blong pija long pej 15]
Aesea i kasem save long ol bigbigfala wok blong Jeova, nao hem i wantem tumas presem nem blong Jeova
[Tok blong pija long pej 16]
Ol stret man bambae oli stap long laet blong Jeova gogo i no save finis