?Wanem Ya Paradaes Long Saed Blong Spirit?

GUSTAVO i gruap long wan taon long Brasil. * Taem we hem i pikinini yet, hem i lanem se ol gudfala man oli go long heven afta we oli ded. Hem i no gat save long stamba tingting blong God se ol man blong bilif bambae oli kasem laef we i stret olgeta long wan wol we i paradaes. (Revelesen 21:​3, 4) Mo i gat wan narafala samting bakegen we hem i no gat save long hem. Hem i no save se naoia tu, hem i save stap long wan paradaes long saed blong spirit.

?Yu yu harem finis se i gat wan paradaes ya long saed blong spirit? ?Yu yu save wanem ya paradaes ya, mo wanem we yu mas mekem blong stap long hem? Man we i wantem faenem trufala glad, i mas kasem save long saed blong paradaes ya.

Faenem Paradaes Long Saed Blong Spirit

Maet yu tingting se, man i no save stap long wan paradaes tede, hemia i wan drim nomo. I tru se wol ya i no wan paradaes nating. Fulap man oli fesem hadtaem. Wan king blong Isrel bifo i tokbaot samting ya se: “Ol man we oli gat paoa oli stap mekem i strong tumas long ol narafala man. Oli stap spolem olgeta, mo oli stap mekem olgeta oli harem nogud, we oli stap krae from, be i no gat man i save givhan long olgeta. Ol man raonabaot oli stap talem se, ‘No, mifala i no save mekem wan samting blong givhan long yufala, from we ol man ya oli strong tumas.’ ” (Prija 4:⁠1) Plante man oli safa from ol kruked fasin blong politik, skul, mo mane, mo oli no save faenem ‘wan man blong givhan long olgeta.’ Plante narafala bakegen oli wokhad tumas blong pem ol kaon blong olgeta, blong lukaotgud long ol pikinini blong olgeta, mo blong mekem fulap narafala samting we oli nidim blong stap laef. Ating olgeta evriwan oli wantem tumas we wan man i givhan long olgeta, blong mekem se hevi baden we oli stap karem i kam laet moa. Yes, long saed blong olgeta, laef i no wan paradaes nating.

?Taswe, paradaes ya long saed blong spirit i stap wea? Inglis tok ya “paradise” i klosap sem mak long ol tok long lanwis Grik, Pesia, mo Hibru we i blong talem wan naesfala garen, no wan ples blong haremgud long hem. Baebol i promes se wan dei, wol ya bambae i kam wan paradaes, wan garen we bambae i olsem hom blong ol man we oli no gat sin. (Ol Sam 37:​10, 11) Wetem samting ya long tingting blong yumi, yumi stat blong kasem save se ol man we oli stap long paradaes long saed blong spirit oli man we oli haremgud mo we tingting blong olgeta i stap kwaet, mekem se oli gat pis wetem ol narafala mo wetem God tu. Gustavo i faenem se long wol tede, i gat wan paradaes olsem. Plante man oli kam insaed long paradaes ya finis, mo namba blong olgeta i stap gru.

Taem Gustavo i gat 12 yia, hem i mekem disisen blong kam wan pris blong Katolik. Papa mama blong hem, tufala i agri blong sanem hem i go long wan kolej we i trenem ol man blong kam pris. Long kolej ya hem i stat blong plei miusik, hem i joen long ol plei blong sinema mo long politik tu, hemia ol samting we jos i stap yusum blong pulum ol yangfala. Gustavo i save se wan pris i mas yusum laef blong hem blong givhan long ol man, mo i no mas mared. Be, sam long ol pris mo ol studen we hem i save olgeta, oli stap mekem nogud long saed blong seks. From samting ya, Gustavo i stat blong dring bitim mak. Yes, i klia se hem i no faenem wan paradaes long saed blong spirit yet.

Wan dei, Gustavo i ridim wan smol pepa we i tokbaot promes blong Baebol se wol bambae i kam wan paradaes. Pepa ya i pulum hem blong tingbaot mining blong laef. Hem i talem se: “Mi stat blong ridim Baebol oltaem, be mi no kasem save long hem. Mi no luksave tu se God i gat wan nem.” Hem i lego kolej ya mo i askem ol Witnes blong Jeova blong  halpem hem blong kasem save long Baebol. Kwiktaem nomo hem i lanem ol save long saed blong spirit mo i no longtaem biaen hem givim laef blong hem i go long God. Naoia Gustavo i kasem save wanem ya paradaes long saed blong spirit.

Wan Kampani We Oli Holem Nem Blong God

Gustavo i kasem save se nem blong God, Jeova, i no wan samting we man i lanem nomo. (Eksodas 6:⁠3) Hem i wan impoten haf blong trufala wosip. Jisas i tijim ol man blong hem blong prea se: “Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu.” (Matiu 6:⁠9) Disaepol Jemes i tokbaot ol hiten man we oli kam Kristin, i se: “God i kamtru . . . long ol man we oli no laen blong Isrel blong tekemaot sam long olgeta, blong oli holem nem blong hem.” (Ol Wok 15⁠:14) Long faswan handred yia ya, grup blong ol man we “oli holem nem blong hem,” hemia Kristin kongregesen. ?Be olsem wanem tede? ?I gat wan grup blong ol man we oli holem nem blong God? Yes i gat. Mo Gustavo i luksave se grup ya, hemia ol Witnes blong Jeova.

Ol Witnes blong Jeova oli stap long bitim 235 kantri. Namba blong olgeta i bitim sikis milian. Mo i gat eit milian narafala man we oli intres, oli joen wetem ol Witnes long ol miting blong olgeta. Ol man oli savegud ol Witnes from wok blong prij we oli stap mekem. Olgeta ya oli mekem tok blong Jisas i kamtru se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.” (Matiu 24⁠:14) ?Be, from wanem Gustavo i gat tingting ya se ol Witnes blong Jeova nao oli stap long paradaes ya long saed blong spirit? Hem i talem se: “Mi skelem wanem we mi luk long wol, mo antap moa long kolej, wetem samting we mi faenem long ol Witnes blong Jeova. Samting we i mekem se ol Witnes oli defren, hemia se oli gat trufala lav.”

Sam narafala man oli talem sem samting long saed blong ol Witnes blong Jeova. Miriam, wan yangfala woman blong Brasil, i talem se: “Mi no bin save wanem we mi mas mekem blong stap glad long laef blong mi, mo long famle blong mi tu. Faswan taem we mi luk ol man we oli rili soemaot lav, hemia taem mi stap wetem ol Witnes blong Jeova.” Wan man we nem blong hem Christian i talem se: “Mi bin intres smol long wok blong ol rabis spirit, be mi neva intres long skul. Mi tinghae moa long mi wan mo long wok we mi mekem olsem wan enjinia. Nating se i olsem, taem waef blong mi i stat blong stadi Baebol wetem ol Witnes blong Jeova, mi luk se fasin blong hem i jenis. Mo tu, mi sapraes long fasin blong Kristin woman we i visitim waef blong mi, hem i wokhad mo i glad oltaem.” ?From wanem ol man oli talem ol toktok ya long saed blong ol Witnes blong Jeova?

?Wanem Ya Paradaes Long Saed Blong Spirit?

Wan samting we i mekem se ol Witnes blong Jeova oli defren olgeta long ol narafala, hemia se oli tinghae long save blong Baebol. Ol Witnes oli bilif se Baebol hem i tru mo hem i Tok blong God. Taswe, long tingting blong olgeta i no naf blong save ol stamba tijing nomo long saed blong skul blong olgeta. Oli gat wan program blong stadi mo ridim Baebol we i gohed oltaem. Sipos man i joen longtaem wetem ol Witnes blong Jeova, bambae hem i kasem plante save long saed blong God mo ol samting we Hem i wantem, olsem we Baebol i soemaot.

Save ya i mekem se ol Witnes blong Jeova oli no kalabus long ol bilif mo kastom we oli spolem glad we man i gat. Jisas i talem se: “Trutok ya bambae i mekem yufala i fri man,” mo ol Witnes blong Jeova oli faenem se tok ya i tru tumas. (Jon 8⁠:32) Fernando, we bifo hem i wok wetem ol rabis spirit, i talem se: “Mi haremgud tumas blong lanem se man i save laef foreva. Oltaem mi fraet se maet mi no papa mama blong mi, wan long mitrifala i ded.” Trutok i mekem se Fernando i no moa fraet long ol rabis spirit mo hem i no moa fraet long tingting ya we plante man i gat se spirit blong man i laef afta ded.

Long Baebol, save long saed blong God i joen wetem paradaes. Profet Aesea i talem se: ‘Long Saeon ya, tabu hil blong Hae God, bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.’​—⁠Aesea 11:⁠9.

 I tru se, save nomo i no naf blong givim pis we Aesea i tokbaot. Man i mas mekem save ya i wok long laef blong hem. Fernando i talem se: “Taem wan man i traehad blong wokem ol frut blong tabu spirit, hem i mekem se paradaes long saed blong spirit i gru moa.” Fernando i stap tokbaot ol tok blong aposol Pol, taem hem i talem se ol gudfala fasin we wan Kristin i mas wokem oli “ol frut blong tabu spirit.” Pol i tokbaot ol fasin olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.”​—⁠Galesia 5:​22, 23, NW.

?Yu yu luksave nao from wanem taem yumi joen wetem wan grup blong man we oli wokem ol gudfala fasin, i olsem we yumi stap long wan paradaes long saed blong spirit? Paradaes ya long saed blong spirit, we profet Sefanaea i talemaot, i mas stap long medel blong ol man we oli wokem ol fasin ya. Sefanaea i talem se: “Bambae yufala i no moa save mekem i nogud long narafala man, mo bambae yufala i no moa save talem ol giaman toktok, mo yufala i no moa save giaman long man blong trikim hem. Bambae yufala i no moa save sot long wan samting, bambae yufala i stap gud, i no gat wan samting i save spolem yufala. Mo bambae i no moa gat man blong mekem yufala i fraet.”​—⁠Sefanaea 3:⁠13.

Lav i Gat Bigfala Paoa

Faswan long ol frut blong tabu spirit we Pol i tokbaot, hem i lav. Baebol i tokbaot fasin ya plante taem. Jisas i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13⁠:35) I tru se, ol Witnes blong Jeova oli no stretgud olgeta. Samtaem sam problem we i kamaot bitwin long olgeta, olsem we ol aposol blong Jisas tu oli bin gat. Be oli rili lavlavem olgeta, mo oli prea se tabu spirit i givhan long olgeta blong wokem fasin ya.

From we oli lavlavem olgeta, fasin fren we oli gat i spesel. Oli no seraot from kantri no laen blong olgeta. Defren olgeta, long lashaf blong ol yia 19 handred, long ol kantri we ol man oli faet blong traem kilimaot wan ful laen blong man, ol Witnes blong Jeova oli putum prapa laef blong olgeta long denja blong lukaot long ol Witnes we oli blong narafala laen. Nating se oli kamaot “long olgeta kala, mo long olgeta kantri, mo long olgeta laen, mo long olgeta lanwis,” oli joengud. Ol narafala man oli no save kasem save long samting ya sipos oli no stap long medel blong olgeta.​—⁠Revelesen 7:⁠9.

Paradaes i Stap Long Medel Blong Ol Man Blong God

Ol man we oli griri, we oli mekem rabis fasin long saed blong seks, mo we oli tingbaot olgeta nomo, oli no save stap long paradaes long saed blong spirit. Baebol i talem long ol Kristin se: “Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:⁠2) Taem fasin blong laef blong yumi i klin, mo yumi mekem wanem we God i wantem, yumi mekem paradaes ya long saed blong spirit i gru moa, mo long rod ya yumi glad moa. Wan woman we nem blong hem Carla i faenem se samting ya i tru tumas. Hem i talem se: “Papa blong mi i tijim mi blong wok had blong mi save winim mane blong lukaot long mi wan. From we mi stap skul long yunivesiti, mi harem se bambae mi save mekem samting ya, be nating se i olsem mi mestem famle blong mi mo fasin sef we Tok blong God nomo i save givim.”

From we yumi haremgud long paradaes long saed blong spirit, i no minim se yumi neva kasem ol problem long laef blong yumi. Ol Kristin tu oli sik samtaem.  Maet i gat faet i kamaot bitwin ol manples long kantri blong olgeta. Plante long olgeta oli stap long ol kantri we oli pua. Be nating se i olsem, fasin frengud wetem Jeova God​—⁠we i wan impoten haf blong paradaes ya long saed blong spirit​—⁠i mekem se oli trastem Jeova blong givhan long olgeta. Yes, Jeova i singaot yumi blong ‘putum ol trabol blong yumi long hem,’ mo plante long yumi i save talem se Jeova i lukaotgud long yumi long taem we yumi fesem trabol. (Ol Sam 55⁠:22; 86:​16, 17) God i promes se bambae hem i stap wetem ol man blong hem ‘nating we oli pas long ples we i tudak olgeta.’ (Ol Sam 23:⁠4) From we yumi sua se Jeova i rere blong givhan long yumi, yumi naf blong holem “pis we hem i givim, we i bigfala moa, i bitim save blong yumi.” Pis ya nao i wan impoten fasin we man i mas gat blong stap long paradaes ya long saed blong spirit.​—⁠Filipae 4:⁠7.

Sapotem Paradaes Long Saed Blong Spirit

Plante man oli laekem blong visitim wan naesfala garen. Oli laekem blong wokbaot long hem no blong sidaon long wan jea mo lukluk ol naesfala samting raonabaot long olgeta. Long sem fasin, plante man oli laekem blong kampani wetem ol Witnes blong Jeova. Fasin fren we ol Witnes oli gat long olgeta i mekem ol man ya oli haremgud, oli gat pis, mo i givim niufala paoa long olgeta. Be, sipos yu wantem se wan garen i stap naes oltaem, yu mas lukaotgud long hem. Long sem fasin, from we ol Witnes blong Jeova oli lukaotgud long fasin blong olgeta, mo God i blesem olgeta, oli stap long wan paradaes long saed blong spirit long wan wol we i no olsem paradaes nating. ?Be, yu mas mekem wanem blong sapotem fulwan paradaes ya?

Faswan samting, yu mas joen long wan kongregesen blong ol Witnes blong Jeova, stadi Baebol wetem olgeta, mo kasem save long Baebol we i fandesen blong paradaes ya long saed blong spirit. Carla, we yumi tokbaot hem bifo, i makem se: “Sipos i no gat kakae long saed blong spirit, i no gat wan paradaes long saed blong spirit.” Samting ya i minim se yu mas ridim Baebol oltaem mo tingtinggud long wanem we yu ridim. Save we yu kasem bambae i mekem yu yu kam klosap moa long Jeova God, mo bambae yu lanem blong lavem hem. Bambae yu lanem blong toktok wetem hem long prea mo askem hem blong lidim yu mo blong spirit blong hem i givhan long yu taem yu mekem wanem we hem i wantem. Jisas i talem long yumi se yumi mas gohed blong prea. (Luk 11:​9-13) Aposol Pol i talem se: “Oltaem yufala i mas prea.” (1 Tesalonaeka 5⁠:17) Presen ya we yu gat blong prea long God wetem ful tras se hem i harem yu, i wan impoten haf blong paradaes ya long saed blong spirit.

Long ol taem we i kam, bambae yu luk se save we yu lanem long Baebol i gat paoa long laef blong yu, nao laef blong yu i kam gud moa. Sloslou, bambae yu wantem tokbaot ol samting we yu lanem wetem ol narafala. Long taem ya nao, bambae yu save folem oda blong Jisas se: “Yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Matiu 5⁠:16) Bambae yu harem bigfala glad taem yu halpem ol narafala blong kasem save long Jeova God mo Jisas Kraes mo taem yu leftemap bigfala lav we tufala i soemaot long ol man.

Taem i stap kam we bambae ful wol i kam wan trufala paradaes​—⁠wan naesfala garen we i no gat doti nating long hem mo we i wan gudfala ples blong ol man we oli stap tru long God. Naoia, long taem we laef long wol “i kam strong tumas,” paradaes ya long saed blong spirit i pruvum se paoa blong God i stap wok mo i soemaot wanem we God i naf blong mekem mo wanem we bambae hem i mekem long fiuja.​—⁠2 Timoti 3:⁠1.

Olgeta we naoia oli stap long paradaes long saed blong spirit oli luk we Aesea 49⁠:10 (NW ) i kamtru finis long wan fasin long saed blong spirit se: “Olgeta bambae oli no hanggri, bambae oli no tosta. Mo hot taem mo bigfala san bambae i no kilim olgeta. From we Hem we i gat sore long olgeta bambae hem i lidim olgeta. Bambae hem i lidim olgeta oli go long ol springwota.” José i luksave samting ya long laef blong hem. Hem i bin wantem tumas blong kam wan man blong plei miusik, we evri man i save long hem. Be hem i faenem se hem i haremgud moa taem hem i mekem wok blong God long Kristin kongregesen. Hem i talem se: “Naoia, laef blong mi i gat mining. Mi harem se mi sef taem mi stap wetem ol Kristin brata sista blong mi, mo mi save se Jeova i wan Papa we i laekem yumi tumas mo yumi save trastem hem.” Ol Sam 64⁠:10 i tokbaot glad ya we José mo plante taosen narafala olsem hem oli kasem se: “Ol man we oli stret bambae oli glad from ol samting ya we Hae God i mekem, nao bambae oli faenem sefples long hem.” !Ol tok ya we oli soemaot klia paradaes ya long saed blong spirit oli gud tumas!

[Futnot]

[Tok blong pija long pej 10]

!Taem yumi haremgud long wan paradaes long saed blong spirit, yumi mas givhan blong mekem se hem i gru moa!