?Yu Save Kasem Trufala Glad?

GEORGE i smael taem hem i talem halo long evriwan. Long tingting blong hem, laef i wan nambawan presen we i mekem hem i harem gud tumas. Glad mo gudfala tingting we hem i gat long saed blong fiuja, oli impoten tumas long laef blong hem​—⁠antap moa, naoia we hem i stap kam olfala. Ol man oli save gud se George i stap glad go kasem we hem i ded. ?Yu yu glad olsem George? ?Yu yu tingbaot ol wanwan dei olsem wan presen we i mekem yu harem gud tumas? no ?Tingting ya blong laef long wan niufala dei i mekem se yu harem nogud, no maet i mekem yu wari? ?Wan samting i stap spolem glad long yu?

Tok ya, glad, ol man oli bin givim mining blong hem se, fasin blong harem gud longtaem. Man we i glad, hem i harem gud, i hapi bigwan, mo i wantem tumas se glad ya i gohed nomo. ?Kaen glad olsem, hem i rili stap tede?

Tede, ol man oli stap leftemap tingting ya se, man i save glad nomo sipos hem i gat plante mane. Plante milan man oli wantem kam rijman, taswe oli gohed blong wok strong moa bitim bifo. From samting ya, plante man oli lusum fasin fren we oli gat wetem ol narafala man mo oli no moa tingbaot ol narafala impoten samting long laef. Oli olsem ol anis antap long wan hil, oli gohed blong ronron olbaot nomo, mo oli no gat naf taem blong tingting long wanem we oli stap mekem, mo tu oli no gat taem blong spenem wetem ol narawan. Yumi kasem save from wanem niuspepa ya Los Angeles Times, i talem se “namba blong ol man we oli wari bigwan i stap go antap, mo naoia wari i no stap kasem ol olfala nomo be hem i stap kasem olgeta tu we oli yangfala. . . . Ol kampani blong wokem meresin oli salem moa meresin we i blong winim wari, i bitim ol narafala meresin.” Plante milan man oli tekem ol drag we loa i agensem, no oli tekem alkol blong traem winim ol problem blong olgeta. Samfala, taem oli wari, oli spenem mane blong olgeta olbaot  nomo. Wan stadi we oli mekem long Briten, we i stap insaed long niuspepa ya The Guardian, i talem se, “ol woman oli spenem plante taem blong pem olting long stoa, mo oli ting se hemia nao rod blong winim wari blong olgeta. Taem oli wari, oli go pem ol samting long stoa, tri taem moa bitim ol man.”

Be, yumi no save faenem trufala glad insaed long wan stoa, wan botel alkol, wan meresin, no wan bang akaon. Yumi no save pem glad; hem i fri nomo. ?Nao weples bambae yumi faenem nambawan presen ya? Bambae yumi tokbaot samting ya long nekis haf.