?Hemia Nao Beswan Wok Long Laef?

SIPOS yu yu wan Kristin we i baptaes finis, i sua se lav we yu gat long God i pusum yu blong mekem wok blong hem. Mo i sua se, wok blong prij i faswan wok we yu givim ful laef blong yu blong mekem. Yes, Jisas i bin givim oda long ol man blong hem se oli mas pulum ol narafala oli kam disaepol blong hem. (Matiu 28:​19, 20) Maet yu stap mekem wan wok blong kasem mane we yu nidim blong laef. Be from we yu yu wan man blong Jisas mo yu wan Witnes blong Jeova, faswan impoten samting, hemia se yu yu wan Kristin man blong talemaot gud nius​—⁠i minim se yu putum wok blong talemaot Kingdom i stap fasples long laef blong yu.​—⁠Matiu 24:⁠14.

Maet yu yu stap go from 20 yia blong yu, no maet yu jes bitim 20 yia. Ating yu bin tingting plante long wanem rod we bambae yu folem long laef blong yu. Taem yu stap skelem ol defren jus blong yu, i sua se bambae yu jusum blong folem rod we i givim glad long yu.

Tingbaot wanem we Jørgen long Denmak i talem long saed blong disisen we hem i mekem. Jørgen i tokbaot disisen ya olsem wan “nambawan wok we i mekem se man i save putum tingting blong hem i stap strong long samting ya we i moa impoten i bitim ol narafala samting.” Eva, wan woman Gris we i gat 31 yia, i talem se: “Taem mi skelem laef blong mi wetem laef blong ol fren blong mi, oltaem mi agri se laef blong mi i gat moa mining mo mi mi glad moa i winim olgeta.” ?Wanem wok i save givim glad olsem? ?Olsem wanem yu save kasem wan wok olsem?

?God i Stap Soem Rod Long Yumi?

I no isi blong jusum wok we yu wantem mekem long laef blong yu. Samfala oli wantem se God i soemaot stret long olgeta wanem wok we oli save mekem.

Taem Moses i stap long Midian, Jeova i talem long hem blong gobak long Ijip, mo lidim ol man Isrel oli gofri, oli no moa wok slef. (Eksodas 3⁠:​1-10) Wan enjel blong God i kamtru long Gideon, we God i bin jusumaot hem blong sevem ol man Isrel long han blong ol enemi blong olgeta. (Jajes 6⁠:​11-14) Deved i stap lukaot long ol sipsip taem God i talem long Samuel blong makemaot hem olsem nekiswan king blong Isrel. (1 Samuel 16⁠:​1-3) Tede, God i no stap lidim yumi long semfala fasin olsem. Yumi wanwan i mas skelemgud ol samting mo jusum olsem wanem bambae yumi yusum gud save ya we God i givim long yumi.

Tede, Jeova i letem wan ‘doa i open finis long ol yangfala Kristin, blong oli mekem wan gudfala wok we bambae i gat plante frut blong hem.’ (1 Korin 16:⁠9) ?Hem i mekem samting ya olsem wanem? Long ol ten yia we oli pas, namba blong ol man blong talemaot Kingdom long fulwol i go antap stat long 2,125,000 i go bitim 6,000,000. ?Hu olgeta we oli givhan blong wokem ol milian Baebol, buk, buklet, magasin, mo traket we ol man oli nidim blong givhan long Kristin laef blong olgeta mo blong mekem wok blong talemaot gud nius long fulwol? Ol memba blong Betel famle raon long wol, olgeta nao oli kasem nambawan blesing ya.

Wan Laef We i Karem Blesing

Betel i minim “Haos blong God.” Ol haos Betel oli ples blong slip blong ol Kristin we oli kam wok long hedkwota mo long ol branj ofis blong Watch Tower Sosaeti, blong givhan blong mekem ol wok we oli stap gohed long ol ples ya. (Jenesis 28:​19, NW, futnot) Tede, ol memba blong Betel oli olsem ol famle we oli wok folem wan gudfala program we ‘prapa fandesen blong olgeta i stanap long waes’ mo lav we oli gat long Jeova.​—⁠Ol Proveb 24:⁠3.

?Yumi save talem wanem long saed blong laef long Betel? Wan memba blong Betel famle long Estonia, we hem i gat 25 yia, i talem se: “Mi harem  gud tumas long filing ya se mi stap oltaem wetem ol fren blong Jeova. Hemia wan long ol stamba samting long Betel we i impoten tumas long mi.”​—⁠Ol Sam 15:​1, 2.

Long ful wol naoia, i gat raonabaot 19,500 brata sista we oli stap wok long Betel. (Ol Sam 110:⁠3) Long Yunaeted Stet, 46 pesen blong olgeta we oli stap long Betel, yia blong olgeta i stap bitwin 19 kasem 29. Olsem Aesea, olgeta ya oli bin talem se: “!Mi ya, mi save go! !Yu sanem mi!” (Aesea 6:⁠8) Aesea i rere blong mekem moa wok bakegen, nating we hem i givim laef blong hem finis long Jeova. Samting ya i min se hem i mas lego sam samting we hem nomo i wantem. Ol brata sista we oli kam wok long Betel, oli lego haos mo ples blong olgeta, oli lego mama, papa, ol stret brata sista mo fren blong olgeta. Oli rere blong lego olgeta samting ya from “gud nius.”​—⁠Mak 10:​29, 30.

!Yes, olgeta we oli wok long Betel oli kasem plante blesing long saed blong spirit! Wan yangfala memba blong Betel famle long Rasia i eksplenem se: “Taem yumi rere blong lego sam samting we yumi nomo i wantem, yumi lanem plante samting we bambae i givhan long yumi blong laef long niufala wol. Mi save talem se ol blesing we Jeova i givim long mi oli bigwan moa i winim ol samting we mi bin lego.”​—⁠Malakae 3:⁠10.

Laef Long Betel

?Laef long Betel i olsem wanem? Ol memba blong Betel famle oli agri se laef long Betel i gud tumas mo i givim glad. Jens, we i gat 43 yia, i glad tumas blong wok long Betel. ?From wanem? Hem i talem se: “From we mifala i harem se mifala i stap joen wetem ol man we oli stap traehad blong mekem wan impoten wok. Long ples ya, mi rili luksave se wok blong Jeova i bigwan mo i impoten tumas.”

Evri moning, stat long Mande go kasem Sarede, i gat moning wosip long Betel. Long taem ya, wan elda i lidim olgeta blong storian long saed blong Baebol. Evri Mande naet, ol memba blong Betel oli tekem wan aoa blong mekem Wajtaoa stadi tugeta. Samtaem, afta long Wajtaoa stadi, wan brata i givim wan tok long saed blong Baebol we i stret long nid blong Betel.

?Wanem i hapen taem wan niufala brata no sista i kam memba blong Betel? Blong rerem ol niufala memba ya blong laef long Betel, sam brata long Betel we oli bigman long tingting, oli givim sam kos blong eksplenem ol defren haf blong wok long Betel. Long faswan yia, ol niufala memba blong Betel famle bambae oli joen evri wik long wan skul we i blong givim moa save long olgeta long saed blong Baebol. Mo tu, ol niufala memba ya oli mas folem wan spesel program blong ridim Baebol. Long faswan yia blong olgeta long Betel, oli mas ridim Baebol fulwan.

?Trening ya i save karem wanem frut? Josua, we i gat 33 yia mo i wan memba blong Betel famle long Hong Kong, i ansa se: “Laef long Betel i mekem mi gat moa tangkiu long Jeova. Mi kampani wetem plante brata we oli bin spenem klosap ful laef blong olgeta long wok blong Jeova. Mi rili laekem ol program long saed blong spirit, olsem moning wosip mo Wajtaoa Stadi. Mo tu, mi laekem fasin blong laef we i gat oda mo we i no fasfas long tumas samting. Laef olsem i mekem se mi mi no stap wari from ol samting we mi no nidim. Mi lanem tu, olsem wanem blong stretem ol problem long Kristin fasin, mo oltaem nomo fasin ya i bin givhan long mi.”

Ol memba blong Betel famle oli spenem bighaf blong taem mo paoa blong olgeta blong mekem wanem we oli kam blong mekem. Yes, oli yusum paoa mo tingting blong olgeta blong mekemgud wok we Betel i askem blong mekem. I gat plante defren samting blong mekem. Samfala oli mas wok long ol mesin blong prentem buk, oli mas joenem ol pepa long ol buk, putum ol buk long ol bokis mo sanem long sip i go long olgeta kongregesen. Sam narafala oli wok long kijin, long ples blong kakae, mo long ples blong wasem klos. I gat wok blong klinim ples, wokem garen, bildim haos, mo plante narafala wok bakegen. Samfala, wok blong olgeta i blong lukaotgud long ol tul blong wok long ol ofis. Sam narafala, oli lukaot long olgeta we oli sik, mo samfala bakegen oli wok long ol ofis. I tru se samtaem i no isi blong mekem olgeta wok ya, be nating se i olsem, ol wok ya oli karem plante blesing. Man we i wok long Betel, hem i harem gud tumas from we ol wok blong hem oli stap leftemap Kingdom mo oli stanap long lav we hem i gat long God.

Ol memba blong Betel famle oli joen long ol defren kongregesen, mo long ol kongregesen ya, oli  luksave ol nambawan frut we i kamaot from hadwok blong olgeta. Oli glad blong joen long ol miting blong kongregesen mo long wok blong prij. From samting ya, ol memba blong Betel famle oli joengud wetem ol brata mo sista we oli stap long kongregesen blong olgeta.​—⁠Mak 10:​29, 30.

Rita, wan memba blong Betel famle long Briten, i talem se: “!Kongregesen i mekem mi mi harem gud tumas! !Taem mi joen long ol miting mo long wok blong prij, bilif blong mi i kam moa strong taem mi luk ol gudfala brata sista blong mi, wetem ol pikinini mo ol olfala oli stap! Nomata wanem samting i hapen long laef blong olgeta, be oli stap. Samting ya i halpem mi blong gohed strong moa long ol wok blong mi long Betel.”

Laef long Betel i no minim se yumi stap wok, mekem miting, prij, mo stadi nomo oltaem. I gat taem blong pleplei mo spel tu. Wanwan taem, i gat “Famle Naet.” Hemia wan taem we evriwan long Betel oli harem gud long ol pleplei we narafala i mekem mo oli lesin long stori long saed blong laef blong ol narafala we oli wok long Betel. Ol brata sista long Betel oli glad tu blong visitim ol narafala blong spenem taem tugeta mo storian blong leftemap tingting blong olgeta. I gat sam ples long Betel we ol memba blong Betel oli save yusum blong spel, i gat laebri wetem plante buk blong ridim no mekem dip stadi. Mo tu, oli harem gud tumas blong storian tugeta long taem blong kakae.

Tom, wan memba blong Betel famle long Estonia, i talem se: “Solwota i no stap longwe tumas long Betel, mo i gat wan naesfala ples we i gat ol tri long hem. Mi mo waef blong mi, mitufala i glad tumas blong go wokbaot long ples ya. Wanwan taem, mi plei golf, hoki, mo tenis, wetem ol fren long kongregesen no long Betel. Mo sipos weta i gud, mitufala i go ron long baskel blong mitufala.”

?Yu Save Mekem Wanem Blong Kam Naf Blong Wok Long Betel?

Betel i wan ples blong mekem tabu wok blong Jeova mo blong givhan long olgeta brata sista long fulwol. Taswe, ol memba blong Betel famle oli mas ol Kristin we oli bigman long saed blong spirit. Oli mas kasem sam mak fastaem long laef blong  olgeta. ?Yu save mekem wanem blong kam i naf blong wok long Betel?

Olsem Timoti, we i wok wetem aposol Pol, olgeta we oli kasem wok long Betel oli mas gat gudnem long kongregesen. (1 Timoti 1:⁠1) Timoti i wan yangfala we ‘ol brata long Listra mo Ikoniam oli stap talem se hem i wan gudfala man.’ (Ol Wok 16:⁠2) Nating se hem i yangfala nomo, hem i savegud Baebol mo i stanap strong long trutok. (2 Timoti 3:​14, 15) Long sem fasin, olgeta we oli wantem wok long Betel oli mas gat gudfala save long Baebol.

Ol memba blong Betel famle oli mas ol man mo woman we oli rere blong lego sam samting we olgeta nomo i wantem. Timoti i rere blong lego ol samting we hem nomo i wantem mo hem i putum wok blong Kingdom fastaem long laef blong hem. Taswe Pol i tokbaot hem se: “I no gat narafala man long ples ya we i gat sem tingting we Timoti i gat, we hem i stap tingbaot yufala tumas. Olgeta  narafala man oli stap tingbaot ol wok blong olgeta nomo, be oli no save tingbaot wok blong Jisas Kraes. Be hem, yufala i save we hem i soemaot fasin blong hem finis, from we hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem.”​—⁠Filipae 2:​20-22.

I nidim ol man mo woman we oli strong long saed blong spirit blong wok long Betel. Ol program long Betel oli givhan long ol memba blong Betel famle blong kam strong moa long bilif. Oli gat taem blong stadi Baebol, blong go oltaem long ol Kristin miting mo long wok blong prij, mo blong oli joen wetem ol Kristin we oli strong long bilif. Taswe, ol memba blong Betel oli save folem advaes ya blong Pol se: “Yufala i mas gohed blong wokbaot wetem [Jisas Kraes]. Yufala i mas gat rus long hem, yufala i mas stanap long hem, mo bilif blong yufala i mas kam strong moa, i stret nomo long ol tijing ya we yufala i kasem. Mo yufala i mas fulap gud long bilif, blong talem tangkiu.”​—⁠Kolosi 2:​6, 7, NW.

From we wok blong Betel i no isi, olgeta we oli wantem wok long ples ya oli mas strong long bodi mo gat gud helt. Sipos yu yu kasem olgeta mak ya finis, mo yu gat 19 yia i go antap, mo sipos yu baptaes moa long wan yia finis, mifala i leftemap tingting blong yu blong tingbaot wok long Betel.

Yumi Evriwan i Joen Blong Wok

I sua se, yumi evriwan we i Kristin, yumi wantem putum Kingdom fastaem long laef blong yumi mo yusum ful laef blong yumi blong mekem wok blong Jeova. (Matiu 6⁠:33; Kolosi 3⁠:23) Yumi save leftemap tingting blong olgeta we oli stap wok long Betel, blong oli gohed long wok ya. Antap long samting ya, i gud sipos ol yangfala brata we oli naf blong wok long Betel, oli tingbaot nambawan blesing ya.

Wok long Betel i karem plante blesing long saed blong spirit mo i givim mining long laef​—⁠hem i wan wok we yu save gohed blong mekem long ful laef blong yu. Hemia nao tingting blong Nick, we i stat wok long Betel taem hem i gat 20 yia. Afta we hem i wok ten yia long Betel, hem i talem se: “Plante taem mi prea long Jeova blong talem tangkiu long hem from kaengud fasin blong hem. ?Wanem samting moa we mi save askem? Long ples ya, mi stap long medel blong plante Kristin we oli strong long bilif, mo we oli stap traem bes blong olgeta blong mekem wok blong Jeova.”

[Bokis blong pija long Pej 22]

?OL ELDA MO OL PAPA MAMA OLI SAVE MEKEM WANEM?

Ol elda long ol kongregesen mo ol elda we oli stap visitim ol kongregesen, oli mas leftemap tingting blong ol yangfala brata blong wok long Betel. I no longtaem i pas, sam brata oli askem kwestin long ol yangfala memba blong Betel mo oli faenemaot se 34 pesen blong olgeta oli kam wok long Betel from we ol Kristin elda oli bin leftemap tingting blong olgeta blong mekem olsem. Yes, maet ol memba blong kongregesen we ol yangfala ya oli bin stap long hem oli sore we wan yangfala olsem i lego olgeta. Be i gud blong tingbaot Timoti. Hem i wan gudfala eksampol long ol yangfala blong Listra mo Ikoniam. Be, ol elda long ol ples ya oli no traem holem hem i stap, blong i no wok wetem Pol. Oli no gat tingting se sipos oli letem Timoti i go, bambae kongregesen blong olgeta i lusum wan bigfala samting, nogat.​—⁠1 Timoti 4:⁠14.

Ol Kristin papa mama tu, oli mas leftemap tingting blong ol pikinini blong olgeta blong wok long Betel. Sem stadi ya we yumi tokbaot antap, i soem se 40 pesen blong ol narafala yangfala long Betel oli talem se papa mama blong olgeta i bin leftemap tingting blong olgeta blong wok long Betel. Wan sista we i wok long Betel blong sam yia finis, i talem se: “Papa mama blong mi, tufala i spenem laef blong tufala long wok blong Jeova, mo samting ya i pusum mi blong wantem wok long Betel. Taem mi luk eksampol blong tufala long wok blong prij, mi save se hemia beswan rod blong laef we mi save jusum blong harem gud.”

[Bokis blong pija long Pej 24]

OLI GLAD BLONG WOK LONG BETEL

“Mi mi laekem tumas wok long Betel. Mi harem gud tumas taem mi tingbaot se mi bin mekem wok blong Jeova long wan ful dei mo se bambae mi mekem olsemia tumora, mo long dei we i kam biaen. Taem mi wok long Betel, tingting blong mi i kwaet mo i bisi long ol gudfala samting nomo.”

“Betel i wan ples we yu save givim fultaem mo paoa blong yu blong mekem wok blong Jeova, we i no gat wan samting i blokem yu. Hemia wan wok we i mekem mi mi glad tumas. Be tu, hem i mekem mi mi luk ogenaesesen blong Jeova long wan fasin we i defren. Mi harem se mi stap stret long stamba blong ogenaesesen ya, mo samting ya i mekem mi harem gud tumas.”

“Beswan samting we i hapen long laef blong mi, hemia taem mi kam long Betel. Long ples ya, mi neva stop blong lanem samting. Mo ol tijing we mi kasem oli no blong leftemap mi, be oli blong leftemap Jeova. Mi save se wok we mi mekem long ples ya bambae i no blong nating.”

“Taem mi yusum save blong mi blong wok insaed long Betel, mi harem gud tumas mo tingting blong mi i gat pis from we mi save se mi stap yusum save blong mi blong mekem wok blong Jeova mo blong givhan long ol brata.”

“Wok blong mi bifo i no givim trufala glad long mi. Blong plante yia, mi bin wantem tumas blong wok wetem ol brata sista mo blong givhan long olgeta. Samting ya nao i mekem se mi kam long Betel. Mi faenem trufala glad taem mi kasem save se ol traehad blong mi bambae oli givhan bigwan long Kristin laef blong ol narafala mo bambae i givim ona long Jeova.”