Pol i Wokem Plan Blong Givhan Long Ol Tabu Kristin

OL TRUFALA Kristin oli tinghae tumas long ol samting long saed blong spirit. Be tu, oli tingbaot ol samting we ol narafala oli nidim long saed blong bodi. Plante taem finis, oli bin givhan long olgeta we oli stap fesem hadtaem. Lav we oli gat long ol brata, hemia nao i pusum ol Kristin blong halpem ol brata blong olgeta we oli trabol.​—⁠Jon 13:​34, 35.

Pol i lavem tumas ol Kristin brata mo sista blong hem. Lav ya i pusum hem blong jusum sam brata, blong oli tekem ol presen long ol kongregesen long Akaea, Galesia, Masedonia, mo distrik blong Esia. ?From wanem i impoten blong mekem samting ya? ?Wanem rod we hem i folem blong givim help? ?Wanem samting i kamaot from? ?Mo from wanem yumi mas intres long samting we i bin hapen?

Samting We i Kamaot Long Kongregesen Blong Jerusalem

Afta long Pentekos 33 K.T., * ol man Jiu mo ol proselaet blong narafala kantri, we oli kam disaepol long Pentekos, oli stap smoltaem long Jerusalem blong lanem moa long saed blong trufala bilif. Ol brata oli rere blong givhan long ol niufala Kristin ya blong oli save stap longtaem lelebet long Jerusalem. (Ol Wok 2:​7-​11, 41-​44; 4:​32-​37) Maet rao we i stap gohed long medel blong ol man Jiu i mekem se i gat ol raf fasin oli kamaot. Samting ya i mekem se ol Kristin oli nidim moa help. Be blong mekem se ol man blong Kraes oli no hanggri, evri dei oli givim kakae long ol wido we oli trabol. (Ol Wok 6⁠:​1-6) Herod i mekem i nogud tumas long kongregesen, mo long medel blong yia 40 K.T., kakae i sot long olgeta ples long Judia. Long tingting blong ol man blong Jisas, maet hemia ol trabol we Pol i bin tokbaot se “samting we i stap mekem yufala i harem nogud,” “oli mekem i nogud long yufala,” mo “ol man oli tekemaot olting blong yufala.”​—⁠Hibrus 10:​32-​34; Ol Wok 11:⁠27–12:⁠1.

Samwe long yia 49 K.T., ol trabol oli stap gohed yet. Taswe, afta we Pita, Jemes, mo Jon oli agri se Pol i mas gohed blong prij long ol Hiten man, oli talem long hem blong “tingbaot ol puaman blong olgeta, blong givhan long olgeta.” Hemia nao samting we Pol i traehad blong mekem.​—⁠Galesia 2:​7-10.

Wokem Rod Blong Kasem Kleksen

Pol i lidim wok ya blong sakem mane blong givhan long ol Kristin long Judia we oli trabol. Samwe long yia 55 K.T., hem i talem long ol Kristin long Korin se: “Long saed blong kleksen blong givhan long ol Kristin man long Judia, tingting blong mi i olsem. Yufala i mas mekem olsem we mi talem long ol man blong jos long Galesia, blong oli mekem. Evri wik, long Sande, yufala evriwan i mas putumgud sam mane blong yufala i stap, blong givim long ol Kristin man ya. Man we i kasem bigwan i save givim bigwan, mo man we i kasem smol i save givim smol . . . [Biaen] yufala i mas jusumaot sam man long yufala blong karem mane ya i go. Nao taem we mi kamtru, bambae mi save givim leta long olgeta blong talemaot bisnes ya, nao mi save sanem olgeta oli tekem mane ya i go long  Jerusalem.” (1 Korin 16⁠:​1-3) Wan yia biaen, Pol i talem se ol Kristin long Masedonia mo Akaea oli joen blong givim presen. Sam brata long distrik blong Esia oli karem ol presen ya i go long Jerusalem mo samting ya i soemaot klia se ol kongregesen blong Esia, olgeta tu oli givhan.​—⁠Ol Wok 20⁠:4; 2 Korin 8⁠:​1-4; 9:1, 2.

I no gat man we i harem olsem se narafala i fosem hem blong givim moa samting i bitim wanem we hem i gat. Defren olgeta, i stret nomo blong olgeta we oli gat plante samting, oli givhan long ol tabu Kristin long Jerusalem mo Judia. (2 Korin 8:​13-​15) Pol i talem se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.”​—⁠2 Korin 9:⁠7.

Aposol Pol i soemaot gud long ol Kristin long Korin from wanem oli mas soem gladhat long narafala. Jisas ‘i kam pua, blong oli save kam rij’ long saed blong spirit. (2 Korin 8:⁠9) Taswe i tru se bambae oli wantem folem eksampol blong hem long saed blong givim presen. Mo tu, God i stap mekem oli kam rij blong “bambae oltaem [oli] save givim plante samting i go long ol man.” From samting ya, i stret nomo we oli givhan long ol tabu Kristin we oli trabol.​—⁠2 Korin 9:​10-​12.

Fasin Blong Olgeta We Oli Givim Presen

Yumi save lanem plante samting taem yumi luk fasin blong ol Kristin blong faswan handred we oli rere blong givim presen, blong givhan long ol tabu Kristin. Kleksen we ol brata ya oli givim i plante moa, i bitim wanem we ol man blong Jeova we oli pua oli nidim. Fasin ya i soemaot klia se ol Kristin man Jiu mo ol Kristin blong ol narafala nesen oli rili joengud. Fasin blong givim mo kasem presen i soemaot tu se ol man blong narafala nesen oli joengud mo oli frengud wetem ol man Jiu. Oli serem ol samting long saed blong bodi, mo ol samting long saed blong spirit, bitwin olgeta.​—⁠Rom 15:​26, 27.

Maet Pol i no askem ol Kristin blong Masedonia blong givim help, from we olgeta tu oli pua tumas. Be ol Kristin ya oli stap “askem plante taem blong oli joen blong givhan.” Yes, nating se “plante trabol i kasem olgeta blong traem olgeta,” oli glad tumas blong givim presen. !Mo “oli no givim stret long mak blong mane we oli kasem, be oli bitim mak olgeta”! (2 Korin 8⁠:​1-4) Bigfala traem we oli kasem, hemia taem ol man oli stap tok agensem olgeta se skul blong olgeta i no folem loa blong ol man Rom. Taswe yumi kasem save se bambae oli sore long ol brata blong olgeta long Judia, we oli stap fesem semfala hadtaem we olgeta tu oli fesem.​—⁠Ol Wok 16:​20, 21; 17:​5-9; 1 Tesalonaeka 2:14.

Pol i tokbaot strong tingting we ol Kristin long Korin oli bin soemaot, blong leftemap tingting blong ol Kristin long Masedonia blong givim presem. Be naoia we ol Kristin long Korin oli no moa holem strong tingting we oli gat fastaem, aposol Pol i tokbaot gladhat blong ol Kristin long Masedonia, blong pulum olgeta long Korin blong kam strong bakegen long fasin ya blong givim presen. Hem i luk se i impoten blong talem long olgeta se naoia i taem blong finisim wanem we oli bin statem wan yia bifo. ?Wanem samting i bin hapen?​—⁠2 Korin 8:​10, 11; 9⁠:​1-5.

Long Korin, Taetas i bin lidim wok ya blong givim presen, be ol problem we i kamaot oli mekem se wok ya i stop. Afta we Taetas i tokbaot bisnes ya wetem Pol long Masedonia, hem i tekem tu brata, mo trifala i kambak blong givhan long kongregesen blong Korin mo finisim wok blong tekem kleksen. Ating samfala oli gat tingting se Pol i stap traem blong spolem ol man Korin. Maet hemia nao from wanem hem i sanem trifala ya i go blong finisim wok ya blong tekem kleksen mo i givim advaes long wanwan long trifala. Pol i talem se: “Mifala i stap traehad blong i no gat man i jajem mifala from ol fasin we mifala i mekem long bigfala presen ya. Mifala i wantem we fasin blong mifala long presen  ya i stret gud, i no long fes blong Masta blong yumi nomo, be long fes blong ol man tu.”​—⁠2 Korin 8:​6, 18-​23; 12:⁠18.

Givimaot Ol Presen

Klosap long taem we ol tri oli stap putum flaoa, long 56 K.T., oli rere blong tekem presen mane ya i go long Jerusalem. Pol wetem samfala we ol brata sista oli jusumaot, olgeta nao bambae oli karem presen ya i go. Ol Wok 20⁠:4 i talem se: “Olgeta we oli biaen long hem long taem ya, i gat Sopata, pikinini blong Piras, we i man Berea, mo Aristakas wetem Sekandas, we tufala i man Tesalonaeka, mo Gaeas, man Debe, wetem Timoti, mo tufala man Esia ya, Tikikas wetem Trofimas.” I klia se Luk tu i stap wetem olgeta. Maet hem i kam long nem blong ol Kristin long Filipae. Taswe, i gat samwe long naen man oli tekem presen mane i go long Jerusalem.

Man ya blong hae save, Dieter Georgi, i talem se: “Kleksen ya we oli givim i plante tumas. From we sipos presen ya i no plante, bambae wan bigfala grup blong man i no save folem Pol blong karem presen ya i go.” Grup ya i no lukaot long presen nomo, be oli rere blong blokem Pol long eni tok agens no giaman tok we ol narafala oli save sakem long hem. Ol brata ya we oli givhan long Pol blong karem presen i go long ol tabu Kristin long Jerusalem, oli kamaot long ol defdefren kongregesen blong ol Hiten man.

Pol wetem grup ya we i folem hem, oli jam long wan sip long Korin blong go long Siria, mo ating bambae oli kasem Jerusalem klosap long Lafet blong Pasova. Be, oli jenisim plan blong olgeta from we oli harem se sam man oli wantem kilim Pol i ded. (Ol Wok 20:⁠3) Maet ol enemi blong hem oli wantem kilim hem i ded long sip.

Pol i stap tingbaot sam narafala samting bakegen. Bifo we hem i jam long sip, hem i raet i go long ol Kristin long Rom blong prea long God ‘blong hem i blokem ol man Judia we oli no bilif long Kraes, blong oli no spolem hem. Mo oli prea tu se taem hem i go kasem long Jerusalem, bambae ol man blong God long ples ya oli save glad long wok blong hem.’ (Rom 15:​30, 31) I tru se ol tabu Kristin bambae oli gat bigfala tangkiu from presen ya we oli kasem. Nating se i olsem, Pol i stap wari long trabol we ol man Jiu oli save mekem long hem taem bambae hem i kamtru long Jerusalem.

Aposol Pol i stap tingbaot ol pua man. Baebol i no talem wetaem oli bin givim presen mane ya long ol puaman. Be presen ya we oli givim i mekem se oli joengud moa, mo i givim janis blong ol Hiten man we oli kam Kristin blong soem se oli gat bigfala tangkiu from ol samting long saed blong spirit we oli kasem long ol brata blong olgeta long Judia. Taem Pol i kamtru long tempel, bigfala rao i kamaot nao oli holem Pol oli putum hem long kalabus. Be trabol ya i givim janis long hem blong talemaot gud nius long ol haeman blong gavman mo ol king.​—⁠Ol Wok 9:​15; 21:​17-​36; 23⁠:11; 24:1–26:32.

Ol Presen We Yumi Givim

Stat long faswan handred yia kam kasem tede, i gat plante samting i jenis​—⁠be ol stamba rul blong Baebol oli no jenis. Tede, i stret nomo we ol Kristin oli kasem save long ol spesel nid long saed blong mane. Enikaen presen we oli givim long olgeta we oli gat nid hem i fri nomo. Lav we oli gat long God mo ol brata sista, hemia nao samting we i mas pusum olgeta blong givim presen mane.​—⁠Mak 12:28-31.

Olgeta presen we ol brata oli givim blong givhan long ol tabu Kristin long faswan handred yia i soem se wok blong givim ol presen i mas folem gudfala oda mo fasin we i stret nomo. I tru, Jeova God i save gud ol nid blong ol man blong hem, mo hem i halpem ol man blong hem blong oli save gohed blong talemaot gud nius blong Kingdom long ol narafala man, nating se i gat ol hadtaem. (Matiu 6:​25-​34) Nating se i olsem, yumi save givhan long narafala nomata we yumi rij no yumi pua. Long rod ya, ‘olgeta we oli gat plante, oli no ova mak, mo olgeta we oli gat smol nomo, bambae oli no sot.’​—⁠2 Korin 8:​15.

[Futnot]