!Tingting Long Spirit Mo Stap Laef!
!Tingting Long Spirit Mo Stap Laef!
‘Sipos tingting blong man i fas gud long ol gudfala fasin ya we tabu spirit i wantem, bambae hem i gat laef.’—ROM 8:6.
1, 2. ?Olsem wanem Baebol i soem se ol fasin we “tingting blong man” nomo i wantem oli defren olgeta long ol fasin we “tabu spirit” i wantem?
I NO isi nating blong stap klin oltaem long fes blong God from we yumi laef long wan wol we ol man oli stap leftemap ol fasin we tingting blong olgeta nomo i wantem. Be Baebol i soem se ol fasin we “tingting blong man” nomo i wantem oli defren olgeta long ol fasin we ‘tabu spirit’ i wantem. Baebol i soemaot klia ol nogud frut we i save kamaot taem man i letem bodi blong hem we i gat sin i lidim hem mo ol gudfala frut we i save kamaot taem man i letem tabu spirit blong God i lidim hem.
2 Jisas Kraes i talem se: ‘Tabu spirit nomo i save mekem man i laef. Bodi blong man i no save mekem samting ya. Ol tok ya we mi mi talem long yufala, oli blong tabu spirit, mo oli save givim laef long man.’ (Jon 6:63) Aposol Pol i raet long ol Kristin long Galesia se: ‘Ol rabis samting we tingting blong yumi i wantem i agensem ol samting we tabu spirit i wantem. Mo ol samting we tabu spirit i wantem i agensem ol rabis samting we tingting blong yumi i wantem. Tufala samting ya i olsem we tufala i enemi long tufala.’ (Galesia 5:17) Pol i talem tu se: ‘Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we hemia ded nomo. Be sipos hem i planem fasin we tabu spirit i wantem, tabu spirit bambae i givim kakae long hem, we hemia laef ya we i no save finis.’—Galesia 6:8.
3. ?Yumi mas mekem wanem blong kam fri long ol samting we oli stap pulum yumi mo long ol rong tingting?
3 Tabu spirit blong Jeova, no strongfala paoa blong hem, i save tekemaot “ol rabis fasin we tingting” blong yumi nomo i wantem mo strongfala paoa blong sin we i stap long yumi. (1 Pita 2:11) Blong kam fri long ol rong tingting we oli stap holemtaet yumi, i impoten tumas we tabu spirit blong God i givhan long yumi. Pol i talem se: ‘Sipos tingting blong man i fas gud long ol rabis fasin ya we tingting blong hem nomo i wantem, bambae hem i ded from. Be sipos tingting blong man i fas gud long ol gudfala fasin ya we tabu spirit i wantem, bambae hem i gat laef mo pis from.’ (Rom 8:6) ?I minim wanem blong mekem tingting i fas gud long wanem we tabu spirit i wantem?
‘Tingting i Fas Gud Long Wanem We Tabu Spirit i Wantem’
4. ?Fasin ya blong mekem ‘tingting i fas gud long ol gudfala fasin ya we tabu spirit i wantem’ i minim wanem?
4 Taem Pol i tokbaot ‘tingting blong man [we] i fas gud long ol gudfala fasin ya we tabu spirit i wantem,’ hem i yusum wan Grik tok we i minim “fasin blong tingting, maen (we i fasgud long wan samting), . . . mak we man i wantem kasem, strong tingting blong kasem wan samting, traehad long wan rod.” Wan narafala tok we i klosap sem mak long Grik tok ya i karem minim ya se, “man i tingting, no man i mekem tingting i folem wan rod.” Taswe, fasin ya blong mekem tingting i fasgud long ol fasin we tabu spirit i wantem, hem i minim se strongfala paoa blong Jeova i lidim, i bos, mo i pusum tingting blong wan man blong mekem samting. Hemia i min se yumi mas rere blong letem tabu spirit blong God i lidim fulwan tingting blong yumi mo strong tingting we yumi gat blong kasem wan samting.
5. ?Yumi mas putum yumi aninit long paoa blong tabu spirit go kasem wanem mak?
5 Pol i makem klia se yumi mas putum yumi fulwan aninit long paoa blong tabu spirit taem hem i talem se yumi mas ‘obei long spirit blong God.’ (Rom 7:6) From we ol Kristin oli bilif long sakrefaes blong Jisas we i pemaot olgeta, oli kam fri long paoa blong sin, nao i olsem we oli “ded” long olfala laef we i bin holemtaet olgeta. (Rom 6:2, 11) Olgeta ya oli laef i stap, nating se oli ded long olfala laef ya blong olgeta, mo naoia oli fri blong folem Kraes, we ‘stret fasin i bos long olgeta.’—Rom 6:18-20.
Wan Bigfala Jenis
6. ?Wanem jenis i kamaot long laef blong olgeta we ‘stret fasin i bos blong olgeta’?
6 Fastaem, ‘sin i bos long yumi,’ be naoia yumi stap mekem wok blong God, we ‘stret fasin i bos blong yumi.’ Hemia i rili wan bigfala jenis. Pol i tokbaot sam long olgeta ya we laef blong olgeta i jenis bigwan, se: ‘Long nem blong Jisas Kraes, Masta blong yumi, mo long paoa blong spirit blong God, God i wasemaot ol sin blong yufala finis blong mekem yufala i klin. Hem i mekem yufala i tabu, yufala i man blong hem, mo hem i mekem yufala i stret man finis long fes blong hem.’—Rom 6:17, 18; 1 Korin 6:11.
7. ?From wanem i impoten tumas blong save tingting blong Jeova long evri samting?
7 Sipos yumi wantem se laef blong yumi i jenis olsem, fastaem yumi mas save tingting blong Jeova long evri samting. Plante handred yia bifo, Deved, wan man blong raetem Ol Sam, i prea long God wetem fulhat blong hem se: “Hae God. Plis yu tijim mi long ol fasin blong yu, . . . yu tijim mi, blong mi save folem trutok blong yu long olgeta laef blong mi.” (Ol Sam 25:4, 5) Jeova i lesin long Deved, mo Hem i save lesin tu long ol man blong hem tede, we oli prea long hem olsem Deved. Ol fasin blong God mo trutok blong hem oli klin mo oli tabu. Taswe, sipos yumi tingting dip long ol fasin mo trutok blong God, bambae yumi no foldaon long trap ya blong mekem ol doti fasin we tingting blong yumi nomo i wantem.
Impoten Wok We Tok Blong God i Mekem
8. ?From wanem yumi mas stadi Baebol?
8 Tok blong God, Baebol, i kamaot long paoa blong tabu spirit. Taswe, wan impoten rod blong letem tabu spirit i wok long laef blong yumi, hemia blong ridim mo stadi Baebol. I gud blong mekem olsem evri dei sipos yumi naf. (1 Korin 2:10, 11; Efesas 5:18) Sipos yumi fulumap tingting mo hat blong yumi wetem ol trutok mo ol rul blong Baebol, bambae yumi save stanap strong agensem ol samting we oli traem bilif blong yumi. Taem yumi kasem wan traem olsem, tabu spirit blong God i save mekem yumi tingbaot ol loa mo ol rul blong Baebol, nao samting ya i save givim paoa long yumi blong mekem ol samting we God i wantem. (Ol Sam 119:1, 2, 99; Jon 14:26) Olsem nao, bambae yumi no foldaon long ol trik we oli save pulum yumi long rong rod.—2 Korin 11:3.
9. ?Olsem wanem Baebol stadi i save mekem tingting blong yumi i strong blong holemtaet fasin fren blong yumi wetem Jeova?
9 Taem yumi gohed blong mekem dip stadi long Baebol mo ol buk we oli stanap long Baebol, bambae tabu spirit blong God i wok long tingting mo hat blong yumi, nao yumi save gat bigfala respek long ol rul blong Jeova. Fasin fren blong yumi wetem God bambae i kam faswan samting long laef blong yumi. Nao taem yumi kasem wan traem, bambae yumi no gat tingting ya se fasin nogud i save mekem yumi haremgud. Nogat. Long tingting blong yumi, yumi wantem holemstrong oltaem long Jeova. Sipos yumi tinghevi long fasin fren we yumi gat wetem God, bambae yumi agensem eni tingting we i save spolem fasin fren ya.
“Mi Mi Laekem Loa Blong Yu Tumas”
10. ?Blong mekem tingting blong yumi i fas gud long wanem we tabu spirit i wantem, from wanem i impoten blong obei long loa blong Jeova?
10 Sipos yumi wantem se tingting blong yumi i fas gud long ol gudfala fasin we tabu spirit i wantem, yumi mas mekem sam samting moa. I no naf we yumi kasem save nomo long Tok blong God. King Solomon i gat bigfala save long ol loa blong Jeova, be taem hem i kam olfala, hem i no moa folem ol loa ya. (1 King 4:29, 30; 11:1-6) Sipos yumi tingting oltaem long ol samting we tabu spirit i wantem, bambae yumi luksave se yumi nidim blong kasem save long ol tok blong Baebol, be tu, yumi mas obei long loa blong God wetem fulhat blong yumi. Hemia i min se yumi mas savegud ol loa blong Jeova mo traehad blong folem olgeta. Man blong raetem Ol Sam i gat sem tingting olsem. Hem i singsing se: “Hae God. Mi mi laekem Loa blong yu tumas, mi stap tingting long hem i stat long moning, gogo kasem sapa.” (Ol Sam 119:97) Sipos i tru se yumi wantem folem loa blong God, bambae yumi stat blong mekem ol fasin we God i wantem. (Efesas 5:1, 2) Bambae yumi no fas long ol fasin nogud, be bambae yumi soemaot ol fasin blong tabu spirit, mo from we yumi wantem mekem Jeova i glad, bambae yumi lego ‘ol rabis samting ya we tingting blong yumi nomo i wantem.’—Galesia 5:16, 19-23; Ol Sam 15:1, 2.
11. Eksplenem olsem wanem loa blong Jeova we i blokem fasin blong slip olbaot i blong mekem i gud long yumi.
11 ?Olsem wanem blong gat bigfala ona mo lav long ol loa blong Jeova? Wan rod hemia blong lukluk gud ol gudfala frut we i save kamaot taem yumi folem ol loa blong hem. Tingbaot loa ya blong God we i talem se man mo woman i save slip tugeta nomo sipos oli mared mo se i tabu blong slip olbaot. (Hibrus 13:4) ?Bambae yumi mestem wan gudfala samting sipos yumi obei long loa ya? ?Papa blong yumi long heven, we i lavem yumi tumas, i givim loa ya blong spolem yumi? !Nogat! Traem tingbaot laef blong plante man mo woman we oli no wantem folem ol rul blong God long saed blong stret fasin. Plante gel oli gat pikinini blong rod, mo oli kilim pikinini long bel blong olgeta. Samfala gel, pikinini blong olgeta i no bon long stret manis blong hem mo oli no haremgud nating long mared blong olgeta. Plante man mo woman oli mas lukaot long wan pikinini olgeta nomo from we oli no gat wan waef no hasban. Antap long hemia, olgeta we oli slip olbaot oli kasem ol rabis sik we i save pas i go long narafala. (1 Korin 6:18) Mo sipos wan man blong Jeova i slip olbaot, hem i save harem nogud tumas long filing blong hem. Maet hem i no save slip long naet, tingting blong hem i trabol tumas, taem hem i stap traem blong winim tingting ya we i stap stikim hem. (Ol Sam 32:3, 4; 51:3) ?Yu yu bilif se loa ya we i blokem fasin blong slip olbaot, Jeova i givim blong protektem yumi? !Yes, bambae yumi gat gudfala laef sipos yumi holemtaet ol fasin we oli klin!
Askem Help Long Jeova
12, 13. ?From wanem i stret blong prea taem ol samting we tingting blong yumi nomo i wantem oli pulum yumi?
12 Blong mekem tingting blong yumi i fas gud long ol fasin we tabu spirit i wantem, yumi mas prea long God wetem fulhat blong yumi. I stret nomo we yumi askem tabu spirit blong God blong i givhan long yumi. Jisas i talem se: ‘Yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim tabu spirit long ol man we oli askem long hem.’ (Luk 11:13) Long ol prea blong yumi, yumi save talemaot long God se yumi nidim tabu spirit blong i givhan long yumi blong winim ol slak fasin blong yumi. (Rom 8:26, 27) Sipos yumi luksave se fasin mo tingting blong yumi we i gat sin i stap pulum yumi, no sipos wan brata no wan sista i talemaot slak fasin ya long yumi, i waes blong prea long God mo askem hem blong i givhan long yumi blong winim slak fasin ya.
13 Jeova i save givhan long yumi blong tingting oltaem long ol samting we i stret, i klin gud, ol samting we i save mekem man i harem gud, mo we ol man oli stap ona long olgeta. Mo i stret we yumi prea long God wetem fulhat blong yumi, nao “pis we hem i givim” bambae i lidim hat mo tingting blong yumi. (Filipae 4:6-8) I gud we yumi askem Jeova blong i halpem yumi blong gat fasin “fas gud long God, mo bilif, mo lav, mo fasin blong stanap strong oltaem, mo kwaet fasin.” (1 Timoti 6:11-14, NW ) Taem Papa blong yumi long heven i givhan long yumi, ol wari mo ol traem oli no save winim yumi. Be bambae yumi gat pis ya we God nomo i save givim.
Yu No Mas Mekem Tabu Spirit i Harem Nogud
14. ?From wanem tabu spirit blong God i wan paoa we i pusum man blong mekem ol fasin we oli klin?
14 Ol man blong Jeova we oli bigman long tingting, oli folem tok ya blong Pol se: ‘Bambae yufala i no traem blokem tabu spirit.’ (1 Tesalonaeka 5:19) From we spirit blong God, “hem i tabu,” hemia i min se spirit ya i klin gud, i no gat poen nating long hem, mo i stret blong tinghae long hem. (Rom 1:4) Taem spirit ya i wok long laef blong yumi, hem i pusum yumi blong mekem ol fasin we i tabu, i klin gud. Spirit ya i halpem yumi blong gat klin fasin oltaem long laef blong yumi, we hemia i soem se yumi obeigud long God. (1 Pita 1:2) Man we i stap mekem ol fasin we oli no klin, hem i soem se hem i no tinghae long spirit ya, mo man ya i save kasem plante nogud frut long laef blong hem. ?Olsem wanem?
15, 16. (a) ?Olsem wanem yumi save mekem tabu spirit blong God i harem nogud? (b) ?Olsem wanem blong no mekem tabu spirit blong Jeova i harem nogud?
15 Pol i talem se: ‘Yufala i no mas mekem tabu spirit blong God i harem nogud, from we spirit ya, hem i olsem mak we God i putum finis long yufala, blong soemaot we long las dei, hem bambae i mekem yufala i fri olgeta.’ (Efesas 4:30) Baebol i talem se tabu spirit blong Jeova i olsem wan mak we hem i putum finis long ol tabu Kristin, blong “soemaotgud we ol promes blong hem bambae oli kamtru.” Mo mak ya, hemia blong kasem laef blong olwe long heven. (2 Korin 1:22; 1 Korin 15:50-57; Revelesen 2:10) Tabu spirit blong God i save lidim ol tabu Kristin wetem ol man we oli gat hop blong laef foreva long wol ya, blong oli stap tru long God mo i save halpem olgeta tu blong winim ol wok blong sin.
16 Aposol Pol i givim woning se yumi mas blokem tingting we i save lidim yumi blong giaman, stil, mekem ol fasin we i blong sem nomo, mo ol narafala fasin olsem. Sipos yumi letem ol fasin ya oli pulum yumi, bambae yumi mekem ol samting we oli agensem Tok blong God, we i kamaot long paoa blong tabu spirit. (Efesas 4:17-29; 5:1-5) Nao i olsem we yumi stap mekem tabu spirit blong God i harem nogud, mo hemia wan samting we yumi no wantem nating blong mekem. Taswe, sipos yumi stat blong ting nating long Tok blong God, bambae yumi stat blong gat ol tingting mo fasin we i save pulum yumi blong wantem mekem sin, nao bambae God i no moa agri long yumi. (Hibrus 6:4-6) Nating se yumi no mekem wan sin naoia, be maet yumi stap folem wan rod we i save lidim yumi blong mekem sin. Sipos yumi mekem wan samting we i agensem rod we tabu spirit i soem, yumi stap mekem tabu spirit i harem nogud. Ale, hemia i olsem we yumi stap agensem Jeova, we i stamba blong tabu spirit, yumi stap mekem Hem i harem nogud. From we yumi lavem God tumas, yumi neva mas letem samting ya i hapen. I gud yumi prea long Jeova blong i halpem yumi blong no mekem tabu spirit i harem nogud. Be yumi mas askem hem blong givhan long yumi blong tingting oltaem long wanem we tabu spirit i wantem, blong yumi save givim ona long tabu nem blong Jeova.
Tingting Oltaem Long Ol Fasin We Tabu Spirit i Wantem
17. ?Wanem sam mak we yumi save putum long Kristin laef blong yumi, mo from wanem i waes blong mekem olsem?
17 Wan nambawan rod blong mekem tingting i fas gud long ol fasin we tabu spirit i wantem, hemia blong putum sam mak long Kristin laef blong yumi mo traehad blong kasem ol mak ya. Ol mak we yumi putum oli dipen long ol nid blong yumi mo ol samting long laef blong yumi. Maet yumi nidim blong kam moa gud long fasin blong yumi blong stadi, spenem moa taem long wok blong prij, no blong mekem sam wok olsem fultaem paenia, wok long Betel, no kam wan misinari. Samting ya bambae i mekem se tingting blong yumi i bisi long wanem we God i wantem. Nao bambae yumi no foldaon long ol slak fasin blong yumi, mo bambae yumi no letem mane mo ol nogud fasin blong wol ya oli pulumaot yumi long stret rod. Hemia nao rod we i waes blong folem, from we Jisas i talem se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos, blong go insaed blong stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos, blong go insaed blong stil. Mi mi talem olsem, from we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.”—Matiu 6:19-21.
18. ?Long ol las dei ya, from wanem i impoten tumas blong mekem tingting blong yumi i fas gud long ol fasin we tabu spirit i wantem?
18 Long ‘ol lasdei’ ya, i waes blong tingting oltaem long wanem we tabu spirit i wantem mo blokem ol samting blong wol ya. (2 Timoti 3:1-5) Tingbaot, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:15-17) Sipos wan yangfala Kristin i stap traehad blong kam fultaem paenia, wok ya i save givhan long hem blong winim ol traem we hem i save kasem long fiuja, taem hem i kam bigman. Taem ol samting oli traem bilif blong hem, hem i gat wan klia tingting, hem i save wanem we hem i wantem mekem long wok blong Jeova. Man no woman olsem, hem i bigman long tingting blong hem. Hem i save se, i no waes nating, mo i krangke nomo, blong lego ol samting long saed blong Kristin laef, jes blong ronem olting blong wol no eni fasin blong haremgud long sin. Tingbaot Moses, we i bigman long tingting blong hem. “Hem i no wantem blong i stap hapi long fasin blong sin we i blong smoltaem nomo, hem i glad moa blong go joen long ol man blong God blong harem nogud wetem olgeta.” (Hibrus 11:24, 25) Nating we yumi yangfala no yumi olfala, yumi save mekem olsem Moses, taem yumi gohed blong mekem tingting blong yumi i fas gud long ol fasin we tabu spirit i wantem, be i no wanem we bodi blong yumi we i gat sin i wantem.
19. ?Bambae yumi kasem wanem frut sipos yumi gohed blong mekem tingting blong yumi i fas gud long ol fasin we tabu spirit i wantem?
19 “Sipos tingting blong man i fas gud long ol rabis fasin we tingting blong hem nomo i wantem, bambae hem i kam olsem enemi blong God,” be ‘sipos tingting blong man i fas gud long ol gudfala fasin ya we tabu spirit i wantem, bambae hem i gat laef mo pis.’ (Rom 8:6, 7) Blong gat pis ya we i sas tumas, tingting blong yumi i mas fas gud long ol fasin we tabu spirit i wantem. Nao bambae sin i no save spolem hat mo tingting blong yumi. Be bambae yumi kam strong moa blong agensem ol samting we oli stap pulum yumi blong mekem nogud. Mo bambae God i givhan long yumi blong gohed blong faet agensem ol samting we tingting blong yumi nomo i wantem.
20. ?From wanem yumi sua blong win long faet ya we yumi stap mekem agensem ol fasin we tingting blong yumi nomo i wantem?
20 Taem yumi gohed blong tingting oltaem long ol fasin we tabu spirit i wantem, yumi stap joengud wetem Jeova we i stamba blong laef mo tabu spirit. (Ol Sam 36:9; 51:11) Devel Setan wetem ol man blong hem oli wantem tumas blong spolem fasin fren we yumi gat wetem Jeova God. Oli wantem lidim tingting blong yumi, from we oli save se sipos oli winim yumi, bambae yumi kam enemi blong God, nao bambae yumi ded from. Be yumi save win long faet ya we i stap bitwin ol fasin we tabu spirit i wantem mo ol fasin we tingting blong yumi nomo i wantem. Pol i bin win long faet ya. Taem hem i stap tokbaot faet ya we hem i bin mekem, fastaem hem i askem se: “?Hu man we bambae i save pulumaot mi long laef ya we i stap holemtaet mi, we bambae mi ded from?” Biaen hem i soem se i gat rod blong kamaot long laef ya, hem i talem se: “Mi mi talem tangkiu tumas long God, we hem bambae i mekem. Masta blong yumi Jisas Kraes bambae i wokem samting ya.” (Rom 7:21-25) Yumi tu, yumi save mekem olsem. Tru long Jisas Kraes, yumi talem bigfala tangkiu long God from help we hem i givim blong winim ol slak fasin blong yumi mo blong mekem tingting blong yumi i fas gud long ol fasin we tabu spirit i wantem, nao yumi gat hop ya blong kasem laef we i no save finis.—Rom 6:23.
?Yu Yu Tingbaot?
• ?Fasin ya blong mekem tingting i fas gud long ol gudfala fasin we tabu spirit i wantem i minim wanem?
• ?Olsem wanem blong letem tabu spirit blong Jeova i wok long laef blong yumi?
• ?Long faet ya we yumi stap mekem agensem sin, from wanem i impoten blong stadi Baebol, obei long ol loa blong Jeova, mo prea long hem?
• ?Taem yumi putum sam mak long Kristin laef blong yumi, olsem wanem samting ya i save halpem yumi blong stap oltaem long rod blong laef?
[Kwestin]
[Tok blong pija long pej 16]
Stadi long Baebol i halpem yumi blong stanap strong agensem ol samting we oli traem Kristin laef blong yumi
[Tok blong pija long pej 17]
I gud yumi askem Jeova blong i halpem yumi blong winim ol tingting ya we oli stap pulum yumi blong mekem sin
[Tok blong pija long pej 18]
Ol mak we yumi putum long Kristin laef blong yumi, oli save halpem yumi blong tingting oltaem long ol fasin we tabu spirit i wantem