Gud Nius Blong Kingdom—?Hem i Minim Wanem?

Las yia, i gat 6,035,564 man, ol yangfala mo ol olfala, we oli spenem 1,171,270,425 aoa blong talemaot nius ya long ol man long 235 kantri. Oli talemaot long maot blong olgeta, be tu, oli seremaot moa long 700 milian buk we i tokbaot mo eksplenem nius ya long ol man. Oli givimaot plante taosen kaset mo video kaset blong mekem nius ya i goaot i kasem plante man. ?Wanem “nius” ya?

“HEMIA” gud nius blong Kingdom blong God. Yes, i neva gat wan taem long histri blong man we “gud nius blong Kingdom” i kavremap plante ples olsem tede.​—⁠Matiu 24:​14, NW.

Olgeta we oli stap mekem wok ya blong prij mo tij long fulwol, oli no kasem pei from. Long tingting blong ol man blong wol, ol man ya blong talemaot gud nius oli no skul i naf blong mekem wok ya. ?Wanem nao i givhan long olgeta blong no fraet mo blong karem gudfala frut long wok ya? Wan samting we i givhan bigwan long olgeta hemia paoa blong gud nius blong Kingdom from we hem i wan nius long saed blong ol blesing we bambae ol man oli kasem. Hemia ol blesing we ol man oli wantem tumas, olsem glad, fri long ol trabol long saed blong mane, wan gudfala gavman, pis mo seftaem, mo laef we i no save finis​—⁠wan samting, we plante man oli no ting se bambae i save hapen. Hemia i rili wan gudfala nius long ol man we oli stap lukaot mining blong laef. Yes, yu save kasem ol blesing ya mo plante narafala blesing bakegen, sipos yu lesin mo obei long gud nius ya blong Kingdom.

?Wanem Ya Kingdom?

?Be wanem ya Kingdom, we oli stap talemaot se hem i gud nius? Hemia Kingdom we plante milian man oli bin lanem blong prea from: “Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu, mo we yu yu kam King blong olgeta man, mo we olgeta man long wol oli mekem ol samting we yu yu wantem, olsem we olgeta long heven oli stap mekem.”​—⁠Matiu 6:​9, 10.

Daniel, wan profet blong ol man Hibru, i bin tokbaot Kingdom ya 2500 yia bifo, taem hem i raetem se: “Nao long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”​—⁠Daniel 2:​44.

Taswe, gud nius hem i wan nius long saed blong Kingdom, no gavman, we God bambae i yusum blong finisim olgeta rabis fasin, mo bambae Kingdom ya i putum pis long fulwol taem we hem i rul. Bambae Kingdom ya i mekem stamba tingting  blong God long saed blong ol man, i kamtru long wol ya.​—⁠Jenesis 1:​28.

“Kingdom Blong Heven i Kam Klosap Finis”

Faswan man we i talemaot gud nius blong Kingdom, i statem wok ya klosap 2,000 yia bifo. Hem i wan man we fasin mo laef blong hem i pulum tingting blong plante man. Man ya, hemia Jon Baptaes. Hem i pikinini blong Sekaraea, we i pris blong ol man Jiu, mo waef blong hem, Elisabet. Jon i putum klos we oli wokem long hea blong kamel, mo strap blong hem oli wokem long skin blong buluk, i sem mak long profet Elaeja bifo. Be, samting we i pulum intres blong plante man, hemia mesej we hem i talemaot. Hem i stap talemaot se: “Yufala i mas tanem tingting blong yufala from ol sin blong yufala, from we [“Kingdom blong heven i kam klosap finis,” NW ].”​—⁠Matiu 3:​1-6.

Ol man we oli lesin long mesej blong Jon, oli ol man Jiu, we oli talem se oli stap wosipim trufala God, Jeova. Nesen ya i bin kasem kontrak blong Loa we Moses i karem i kam long olgeta, samwe 1,500 yia bifo. Bigfala tempol, we i ples blong mekem ol sakrefaes folem Loa, i stap stanap yet long Jerusalem. Ol man Jiu oli ting se wosip blong olgeta i stret finis long ae blong God.

Be, sam long ol man we oli stap lesin long Jon oli luksave se tingting we oli gat long saed blong skul blong olgeta i no stret. Ol tijing blong skul blong ol man Jiu i stat blong meks wetem tijing mo waes blong ol man Gris. Ol bilif mo kastom blong ol man oli mekem se Loa we God i bin givim fastaem long Moses blong i pasem long nesen blong Isrel, i kam olsem nating nomo. (Matiu 15:⁠6) Ol lida blong skul blong ol man Jiu oli no gat sore mo fasin blong olgeta i strong tumas. From samting ya, plante man oli no moa mekem wosip long God long fasin we i stret. (Jemes 1⁠:27) Oli mas tanem tingting blong olgeta from ol sin we oli mekem agensem God mo Loa blong hem.

Long taem blong Jon, plante man Jiu oli stap wet long Mesaea we ol profet oli bin tokbaot hem bifo. Taswe, sam long olgeta oli stap tingting long saed blong Jon se: “Ating man ya hem i Mesaea ya, we God i promes bifo finis blong sanem hem i kam blong sevem yumi.” Be, Jon i talem se hem i no Mesaea ya, mo i pulum tingting blong olgeta i go long wan narafala man we bambae i mas kam, i se: “Mi mi no naf nating blong tekemaot strap blong sandel blong hem.” (Luk 3:​15, 16) Taem Jon i soemaot Jisas long ol disaepol blong hem, hem i se: “!Olgeta! Man ya, hem i smol sipsip blong God, we hem bambae i tekemaot sin blong olgeta man long wol.”​—⁠Jon 1:⁠29.

Yes, hemia i rili wan gudfala nius from we Jon i stap soemaot long ol man se rod blong kasem laef mo glad hemia Jisas ya, ‘we bambae i tekemaot sin blong olgeta man long wol.’ From we yumi pikinini blong Adam mo Iv, yumi evriwan i stap aninit long paoa blong sin mo ded. Rom 5⁠:19 i eksplenem se: “From we wan man nomo [Adam] i no obei long God, olgeta man oli kam man nogud. Be long sem fasin, from we wan man nomo [Jisas] i obei long God, God i mekem we plante man oli kam stret man long fes blong hem.” Jisas, we i olsem wan smol sipsip blong mekem sakrefaes, bambae i “tekemaot sin” mo finisim ol trabol we ol man oli stap kasem naoia. Baebol i talem se:  “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.”​—⁠Rom 6:⁠23.

Jisas i stret gud olgeta, mo hem i hae moa long olgeta man long wol. Hem i bin mekem wok blong talemaot gud nius. Stori blong Baebol we i stap long Mak 1:​14, 15 i talem se: “Biaen long taem we oli putum Jon long kalabus, Jisas i kam long distrik ya Galili, i stap talemaot gud nius blong God. Hem i talem se, ‘Taem blong hem i stret nao. Taem blong God i kam King blong olgeta man long wol i kam klosap finis. Yufala i mas tanem tingting blong yufala from ol sin blong yufala, yufala i mas bilif long gud nius ya.’ ”

Ol man we oli lesin long mesej blong Jisas mo oli bilif long gud nius, oli kasem bigfala blesing. Jon 1:​12 i talem se: “Olgeta we oli glad long hem, mo oli bilif long hem, hem i givim raet long olgeta blong oli kam pikinini blong God.” From we oli pikinini blong God, oli gat janis blong kasem presen ya, hemia laef we i no save finis.​—⁠1 Jon 2:⁠25.

Be janis ya blong kasem ol blesing blong Kingdom i no blong ol man long faswan handred yia nomo. Olsem we yumi luk finis long haf ya, tede i gat ol man we oli stap talemaot mo tijim gud nius ya blong Kingdom blong God long fulwol. Taswe, yumi save gat janis blong kasem ol blesing ya blong Kingdom. ?Be yu mas mekem wanem blong kasem ol blesing ya? Nekis haf bambae i tokbaot samting ya.