!Trufala Skul i Kam Strong Moa!
!Trufala Skul i Kam Strong Moa!
“Nao long ol bigbigfala samting ya we i hapen, tok blong Masta blong yumi i stap goaot moa long evri ples, i stap kam strong moa oltaem.”—OL WOK 19:20.
1. Eksplenem olsem wanem Kristin Skul i kam antap bigwan long faswan handred yia.
TABU spirit i givim paoa long ol faswan Kristin, nao oli talemaot tok blong God wetem strong tingting, we i no gat wan samting i naf blong blokem olgeta. Wan man we i stadi long histri i raetem se: “Kwiktaem nomo, Kristin Skul i kasem olgeta ples we oli stap aninit long gavman blong Rom. Long ol yia 100, i gat ol Kristin oli stap long evri provins long Mediterenian Si.”
2. ?Olsem wanem Setan i traem spolem gud nius, mo wanem woning i bin kamaot finis long saed ya?
2 Devel Setan i no naf blong satem maot blong ol faswan Kristin. Taswe, hem i yusum wan narafala rod blong spolem gud nius. Rod ya, hemia apostasi. * Jisas i bin tokbaot samting ya long parabol blong gudfala sid mo rabis gras. (Matiu 13:24-30, 36-43) Aposol Pita tu, i bin givim woning se ol giaman tija bambae oli kamaot insaed long kongregesen, nao bambae oli spolem bilif blong sam Kristin. (2 Pita 2:1-3) Mo aposol Pol i talem sem samting, taem hem i givim woning se apostasi bambae i kam antap bigwan bifo long dei blong Jeova.—2 Tesalonaeka 2:1-3.
3. ?Wanem i hapen afta we olgeta aposol oli ded?
3 Afta we olgeta aposol oli ded, ol hiten tijing mo waes blong wol oli kam antap bigwan, oli kavremap gud nius. Wanem we Jisas mo ol aposol oli bin talemaot, i kamtru. Yes, ol giaman tija oli twistim mo oli spolem mesej blong trutok we i klingud. Sloslou, wan giaman Kristin Skul, we yumi kolem Krisendom, i stanap mo i kavremap trufala Kristin Skul. Wan grup blong ol lida i girap insaed long giaman Kristin Skul ya mo i traem blokem ol man olbaot blong oli no ridim Baebol. Nating se namba blong ol man we oli talem se oli Kristin, i kam antap, wosip blong olgeta i no klia. Ol tijing blong Krisendom oli goaot, oli kasem plante moa ples, nao oli mekemap wan bigfala skul we i gat strongfala paoa long ol kantri blong Wes. Nating se i olsem, skul ya i no kasem blesing blong God mo tabu spirit blong hem.
4. ?From wanem rabis plan blong Setan i no spolem stamba tingting blong God?
4 Be, rabis plan blong Setan i no save spolem stamba tingting blong Jeova. Nating se apostasi i kam antap bigwan tumas, trufala Kristin Skul i no lus olgeta. Ol man we oli mekem ol kopi blong Baebol, oli rili traehad blong mekem ol kopi we oli stret gud. From samting ya, Baebol i stap gud kam kasem tede, nating se plante man we oli talem se oli gat raet blong tijim Baebol, oli bin traem jenisim sam toktok blong hem. Long ol handred yia we oli pas, i gat ol man blong mekem dip stadi, olsem Jerome mo Tyndale, we oli no fraet nating blong tanem Tok blong God i go long narafala lanwis mo blong seremaot long olgeta man. Long taem ya, plante milian man oli kasem Baebol mo oli joen long Kristin Skul ya we i giaman.
5. ?Profet Daniel i talemaot wanem long saed blong “tru save”?
5 Sloslou, “tru save i kam fulap,” olsem we buk blong Daniel i bin talemaot. Samting ya i hapen long “taem blong en”—hemia taem we yumi stap long hem naoia. (Daniel 12:4, NW ) Raonabaot long wol, tabu spirit i lidim ol man we oli lavem trutok, nao oli kasem stret save long saed blong trufala God mo ol stamba tingting blong hem. !Yes, nating se tijing blong apostasi i stap blong plante handred yia, tok blong God i stap kam strong moa! Tede, gud nius i kasem olgeta ples, mo gud nius ya i stap soemaot long ol man se bambae i gat wan niufala wol. (Ol Sam 37:11) Naoia bambae yumi tokbaot olsem wanem tok blong God i stap goaot moa long taem blong yumi.
Tok Blong God i Stap Goaot Moa Long Taem Blong Yumi
6. ?Long 1914, ol Baebol Studen oli kasem save long wanem trutok?
6 Long lashaf blong ol yia 18 handred, trutok blong Baebol i givim paoa bakegen long wan smol grup blong ol Baebol Studen, we tede oli karem nem ya ol Witnes blong Jeova. Long 1914, ol Baebol Studen ya oli luk Baebol olsem wan buk we i laef. Oli kasem save long ol nambawan trutok long saed blong stamba tingting blong God. Oli gat bigfala tangkiu from lav we Jeova i soemaot, taem hem i sanem Pikinini blong hem i kam long wol, blong openem rod long ol man blong kasem laef we i no save finis. Mo tu, oli kasem save mo oli tinghae long nem mo ol fasin blong God. Antap long ol samting ya, oli luksave se “taem blong ol Hiten man” i finis, mo se i no longtaem Kingdom blong God bambae i karem ol blesing i kam long ol man. (Luk 21:24, King James Version) !Hemia i rili ol gudfala nius! Long evri ples, ol man oli mas talemaot ol trutok ya we oli gat paoa. !Laef blong ol man i stap long denja!
7. ?Olsem wanem trutok blong Baebol i kam strong moa long taem blong yumi?
7 Jeova i blesem smol grup ya blong ol Kristin we tabu spirit i makemaot olgeta. Tede, namba blong olgeta we oli joen long trufala Kristin Skul i bitim sikis milian. Tok blong God i kavremap plante ples, from we naoia ol Witnes blong Jeova oli stap long 235 kantri. Antap long samting ya, trutok blong Baebol i givim paoa, i mekem se man i kam strong moa blong winim enikaen traem we i kamaot long ol skul no long ol narafala samting. Wok blong prij long fulwol i pruvum bigwan se Jisas i kasem paoa finis blong rul long Kingdom.—Matiu 24:3, 14.
8. ?Sam man oli talem wanem long saed blong ol Witnes blong Jeova we namba blong olgeta i gru bigwan?
8 Ol man blong histri oli sapraes tumas mo oli mekem plante toktok taem oli luk olsem wanem Kristin Skul long faswan handred yia i kam antap bigwan. Tede tu, plante man blong hae save oli sapraes tumas taem oli luk se wok blong ol man blong Jeova i stap kam antap bigwan. Long Yunaeted Stet, tu man blong hae save, tufala i raetem se: “Long ol laswan 75 yia, namba blong ol Witnes blong Jeova i go antap kwiktaem nomo . . . mo raonabaot long wol, namba blong olgeta i stap gohed blong go antap.” Wan niuspepa blong Is Afrika i tokbaot ol Witnes se, “namba blong olgeta i stap gru kwiktaem tumas mo ol man long fulwol oli gat bigfala respek long olgeta from we oli folem fulwan olgeta tijing blong Baebol.” Mo wan niuspepa blong Katolik, we oli prentem long Yurop, i tokbaot “ol Witnes blong Jeova se, namba blong olgeta i stap kam antap bigwan tumas.” ?Wanem i mekem se namba blong olgeta i kam antap kwiktaem olsem?
Tabu Spirit i Stap Wok Tede
9. (a) ?Wanem faswan risen we i mekem se tok blong God i kam strong moa tede? (b) ?Olsem wanem Jeova i pulum ol man oli kam long hem?
9 Faswan risen we i mekem se tok blong God i stap kam strong moa tede, hemia se tabu spirit blong Jeova i stap wok strong, i sem mak olsem long faswan handred yia. Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Vas ya i soemaot se God i luk ol man we hat blong olgeta i stret, mo wetem kaen fasin, hem i stap pulum olgeta oli kam long hem. Jeova i stap yusum wok blong prij we ol Witnes blong hem oli stap mekem, blong pulum ol man oli kam wosipim hem. Ol man ya oli “ol gudgudfala samting blong olgeta nesen”—we i minim ol man long wol ya we oli gat tingting daon mo we oli olsem sipsip.—Hagae 2:6, 7, NW.
10. ?Wanem kaen man i bin lesin long tok blong God?
10 Tabu spirit i givim paoa long ol man blong God blong oli karem tok blong God i go kasem olgeta ples long wol. Be tu, tabu spirit i pulum ol defren kaen man blong oli laekem gud nius. Olgeta ya we oli akseptem tok blong God oli “kamaot long olgeta kala, mo long olgeta kantri, mo long olgeta laen, mo long olgeta lanwis.” (Revelesen 5:9; 7:9, 10) Sam long olgeta ya oli rij, sam long olgeta oli pua, mo sam oli skulgud, sam oli no skul gud. Sam long olgeta oli kasem tok blong God long taem blong faet mo taem oli stap harem nogud long han blong narafala, be samfala oli kasem tok blong God long taem we oli no kasem trabol. Yes, plante man mo woman oli bin akseptem gud nius, nating se oli gat wanem gavman mo kastom. Sam long ol man ya oli kasem gud nius long rabis kalabus, sam oli kasem long haos blong king.
11. ?Olsem wanem tabu spirit i wok long laef blong ol man blong God, mo olsem wanem olgeta oli defren?
11 Nating se ol wanwan man blong God oli defren long narawan, oli rili joengud. (Ol Sam 133:1-3) Hemia i wan narafala pruf we i soemaot se tabu spirit i stap wok long laef blong ol man we oli mekem wok blong God. Tabu spirit blong God i wan strongfala paoa we i stap pusum ol man blong mekem ol gudfala samting. Paoa ya i givhan long ol man blong Jeova blong soemaot lav, glad, pis, kaen fasin, mo ol narafala gudfala fasin. (Galesia 5:22, 23) Tede, yumi kasem save long wanem we profet Malakae i bin talem longtaem bifo se: “Bambae yufala i save luk . . . wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.”—Malakae 3:18, NW.
Tok Blong God i Fulap Long Man We i Wok Strong
12. ?Wanem tingting blong ol Witnes blong Jeova long saed blong wok blong talemaot gud nius, mo oli save se ol man bambae oli gat wanem tingting long saed blong gud nius?
12 Ol Witnes blong Jeova tede, oli no ol man blong go long jos nomo. Oli wok strong long wok ya blong talemaot gud nius. Oli folem fasin blong ol faswan Kristin. Oli rere blong yusum ful laef blong olgeta blong mekem wok blong God. Mo, oli wantem halpem ol narafala blong save ol promes blong Jeova long saed blong Kingdom. Ol Witnes blong Jeova, oli stap wok wetem God, mo tabu spirit i stap lidim olgeta blong hivimap ol man oli kam wanples blong wosipim Jeova. Taem oli mekem olsem, oli soemaot long ol man we oli no bilif, se Jeova i gat bigfala sore mo lav. Nating se man i no intres long gud nius, i jikim mo i kilim olgeta, oli gohed nomo. Jisas i mekem ol man blong hem oli reregud blong fesem enikaen fasin we man i save mekem long olgeta taem oli stap talemaot gud nius. Hem i se: “I no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala. Sipos olgeta oli stap obei long ol tok blong mi, bambae oli save obei long ol tok blong yufala tu.”—Jon 15:20.
13. ?Wanem samting we yu save faenem nomo long medel blong ol Witnes blong Jeova?
13 Yumi sapraes tumas blong luk se ol Witnes blong Jeova tede oli sem mak nomo long trufala Kristin Skul long faswan handred yia. Yumi sapraes tu, blong luk se ol Witnes blong Jeova oli defren olgeta long Krisendom tede. Wan man blong hae save i tokbaot strong tingting we ol faswan Kristin oli gat blong talemaot gud nius, i se: “Ol man blong jos oli mas jenisim fasin blong olgeta, mo oli mas tingbaot wok blong talemaot gud nius olsem wan impoten wok blong evri Kristin we oli baptaes finis. Mo tu, wok ya i mas joen wetem fasin blong laef we i gud moa i winim laef blong ol man we oli no gat bilif. Sipos [ol Kristin] oli mekem olsem, bambae yumi save karem plante gudfala frut.” !Yes, ol impoten samting we yu no save faenem long Krisendom, yu save faenem long medel blong Witnes blong Jeova! Bilif blong ol Witnes i laef mo i tru, mo bilif ya i stanap long trutok blong Baebol. Ol Witnes oli wantem tumas blong serem bilif ya wetem ol man we oli glad blong lesin.—1 Timoti 2:3, 4.
14. ?Wanem tingting blong Jisas long saed blong wok blong prij, mo ol disaepol blong hem tede oli gat wanem tingting?
14 Jisas i rili tinghae long wok blong prij, hem i putum wok ya fasples long laef blong hem. Hem i talem long Paelat se: “Mi mi bon, mi kam long wol ya blong wan samting nomo, blong mi talemaot ol tok we i tru.” (Jon 18:37) Ol man blong God oli gat sem tingting olsem Jisas. Trutok blong Baebol i stap long hat blong olgeta, taswe oli traehad long evri rod blong talemaot trutok ya long olgeta man we oli save faenem. Sam long ol rod we oli folem blong talemaot gud nius oli soem se ol man blong God oli rili waes.
15. ?Olsem wanem sam Witnes oli soem waes fasin taem oli talemaot gud nius?
15 Long wan kantri blong Saot Amerika, ol Witnes oli mas tekem bot mo folem wan smol reva we i joen long bigfala Amazon Reva, blong karem trutok i go long ol man long ples ya. Be taem faet i kamaot long eria ya long 1995, ol man oli putum tabu se bambae ol bot olbaot oli no mas pas long reva ya. Be ol Witnes oli gat strong tingting blong givimaot ol buk long saed blong Baebol long ol man we oli intres. Ale, oli plan se bambae oli yusum reva blong kasem mesej blong Baebol i go long ol man. Oli raetem leta mo oli putum wetem sam Wajtaoa mo Wekap! insaed long ol plastik botel, mo oli sakem ol botel ya oli go long reva. Oli mekem olsem blong fo yia haf, go kasem taem we ol man oli tekemaot tabu we oli bin putum long ol bot long reva ya. Taem ol Witnes oli folem reva ya bakegen, ol man oli talem tangkiu long olgeta from ol buk we oli kasem. Wan woman we i bin stadi Baebol, i sakem han blong hem i goraon long olgeta mo wota blong ae blong hem i ron, taem hem i talem se: “Mi ting se bambae mi neva luk yufala bakegen. !Be taem mi stat kasem ol buk insaed long ol botel ya, mi save se yufala i no fogetem mi!” Samfala man we oli laef klosap long reva oli talem se oli bin ridim ol magasin ya bakegen mo bakegen. Plante long ol haos klosap long reva oli gat wan “postofis”—hemia ol ples long saed blong reva we i no gat taed. Oltaem ol man we oli intres, oli jekem ol ples ya blong luk sipos i gat sam “leta” i stap.
16. ?Olsem wanem fasin blong rere oltaem i save openem rod long yumi blong pulum ol man oli kam disaepol?
16 Jeova God mo ol strongfala enjel blong hem oli stap lidim mo givhan long wok blong talemaot gud nius. (Revelesen 14:6) Taem yumi rere oltaem blong mekem wok, yumi save gat moa janis blong pulum ol man oli kam disaepol. Long Nairobi, Kenia, i gat tu Kristin woman i stap prij long ol haos wanwan. Taem tufala i finisim ol haos long eria we tufala i prij long hem, wan yangfala woman i kam long tufala mo i talem se: “Mi bin stap prea blong bambae mi mi mitim sam man olsem yufala.” Hem i askem tufala Witnes ya blong kam long haos blong hem blong storian. Long sem dei ya, yangfala woman ya i stat blong stadi Baebol. ?From wanem woman ya i wantem tumas blong luk tufala Kristin ya? Tu wik bifo long taem ya, bebi blong hem i ded. Taswe, taem hem i luk wan smol boe i stap holem pepa ya “?Olsem Wanem Long Ol Fren Blong Yumi We Oli Ded?”, hem i wantem pepa ya tumas. Nao hem i askem long boe ya blong givim long hem. Boe ya i no wantem givim, be i poen i go long tufala Witnes we i givim pepa ya long hem. Yes, woman ya i stap gohed gud long trutok mo i kam strong moa blong winim filing blong hem we i trabol from bebi blong hem we i ded.
Lav Blong God i Mas Kam Strong Moa
17-19. ?Lav we Jeova i soemaot taem hem i mekem rod blong pemaot yumi i olsem wanem?
17 Tok blong God we i stap goaot moa, i joen gud wetem sakrefaes blong Jisas Kraes. Sakrefaes ya i soemaot se Jeova i lavem tumas ol man. Long sem fasin, wok blong prij i soemaot bigfala lav blong Jeova. Tabu spirit i pulum aposol Jon blong raetem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.
18 Tingbaot bigfala lav we Jeova i soemaot taem hem i mekem rod blong pemaot yumi. Blong plante bilian yia, God i bin kampani mo i frengud wetem nambawan Pikinini blong hem, wan nomo we hem i gat mo we hem i “faswan long olgeta samting we God i wokem.” (Revelesen 3:14, NW ) Jisas i lavem Papa blong hem tumas, mo Jeova i lavem Pikinini blong hem “bifo olgeta, taem we wol ya i no stap yet.” (Jon 14:31; 17:24) Jeova i letem nambawan Pikinini ya blong hem i ded blong bambae ol man oli kasem laef we i no save finis. !Lav ya we God i soemaot long olgeta man i bigwan we i bigwan tumas!
19 Jon 3:17 i talem se: “God i no sanem mi, mi Pikinini blong hem, mi kam long wol ya blong mi jajem ol man long wol. Hem i sanem mi blong mi wok blong hem blong mekem rod blong sevem olgeta.” Jeova i lavem yumi tumas. Hem i sanem Pikinini blong hem i kam blong sevem yumi, be i no blong jajem mo panisim yumi. Samting ya i laenap wetem tok blong Pita se: “[Jeova] i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.”—2 Pita 3:9.
20. ?Olsem wanem wok blong talemaot gud nius i joen wetem rod blong sef?
20 Folem stret fasin, Jeova i pem wan praes we i bigwan tumas blong sevem ol man, taswe hem i wantem se plante moa man oli yusum rod ya blong sef. Aposol Pol i raetem se: “Olgeta we oli singaot long Hae God, oli talem nem blong hem, hem bambae i sevem olgeta. ?Be . . . sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?”—Rom 10:13, 14, Nyutesteman Wetem Ol Sam Long Bislama.
21. ?Yumi mas gat wanem tingting long saed blong janis ya blong joen long wok blong prij?
21 !Yumi gat nambawan janis ya blong joen long wok blong prij mo blong tijim ol man long fulwol! Wok ya i no isi blong mekem. !Be Jeova i glad tumas taem hem i luk se ol man blong hem oli stap traehad blong mekem trutok i wok long laef blong olgeta mo blong serem gud nius wetem ol narafala man! Taswe, nating se laef blong yu i olsem wanem, i gud yu letem tabu spirit blong God mo lav we i stap long hat blong yu i pusum yu blong joen long wok ya. Mo rimemba se, wok we i stap gohed long fulwol i pruvum fulwan se i no longtaem, bambae Jeova God i mekem promes blong hem i kamtru. Hemia promes long saed blong wan “niufala skae mo niufala wol, we stret fasin nomo bambae i stap long hem.”—2 Pita 3:13.
[Futnot]
^ Fasin blong lego trufala bilif mo agensem hem.
?Yu Yu Tingbaot?
• ?From wanem apostasi i no naf blong stopem ol man blong talemaot gud nius?
• ?Olsem wanem tok blong God i kam strong moa long taem blong yumi?
• ?Long wanem rod tabu spirit blong God i stap wok tede?
• ?Olsem wanem sakrefaes we i pemaot yumi i joen wetem wok blong talemaot gud nius?
[Kwestin]
[Tok blong pija long pej 16]
(Lukluk niuspepa)
Namba blong ol man blong talemaot Kingdom we i kam antap bigwan long ol yia 19 handred
Namba Blong Ol Pablisa (milian)
6.0
5.5
5.0
4.5
4.0
3.5
3.0
2.5
1.5
1.0
0.5
1900 1910 1920 1930 1940 1950 1960 1970 1980 1990 2000
[Foto blong pija long pej 15]
JEROME
TYNDALE
GUTENBERG
HUS
[Credit Line]
Gutenberg and Hus: From the book The Story of Liberty, 1878
[Tok blong pija long pej 15]
Ol Baebol Studen oli stap talemaot gud nius long ol yia 1920
[Tok blong pija long pej 16, 17]
Raonabaot long wol ol man oli stap lesin mo obei long gud nius
[Tok blong pija long pej 18]
Wok blong prij i leftemap lav blong God olsem we sakrefaes blong Jisas Kraes i leftemap lav blong God