?Yu Harem Olsem Se Narafala i Gat Rong Tingting Long Yu?

TINGTING blong Antonio i trabol. Hem i no save from wanem, wantaem nomo, gudfala fren blong hem, Leonardo, i no moa frengud wetem hem. * Wanwan taem Leonardo i bin mekem olsem se hem i no harem halo blong Antonio. Mo taem tufala i stap tugeta, i olsem se wan stonwol i seraotem tufala. Antonio i harem nogud from we hem i ting se maet fren blong hem i no kasem save long wan samting we hem i bin mekem no talem. ?Be wanem samting ya?

Taem wan man i no kasem save long wanem we narafala i talem no mekem, hem i save gat rong tingting long saed blong man ya. Problem ya i stap kamaot oltaem. Be plante taem ol rong tingting ya oli smol nomo, mo i isi blong stretem olgeta kwiktaem. Samtaem, ol rong tingting ya oli mekem man i harem nogud, antap moa sipos yumi traem blong stretem olgeta be yumi luk se oli stap gohed nomo. ?From wanem ol problem olsem oli stap hapen? ?Ol rong tingting ya oli save spolem yumi olsem wanem? ?Yu save mekem wanem sipos ol narafala oli no kasem save long wan samting we yu mekem? ?Mo, i rili impoten blong wari long tingting we narafala i gat long saed blong yumi?

Wan Trutok We Yumi No Save Ronwe Long Hem

From we ol narafala oli no save ridim tingting mo hat blong yumi, bambae i mas hapen samtaem we oli gat rong tingting long saed blong wan tok no fasin blong yumi. I gat plante samting we oli mekem se ol rong tingting oli save kamaot bitwin long yumi. Samtaem, yumi no talemaot ol tingting blong yumi long fasin we i klia mo i stret naf blong narafala i kasem save. Maet i gat wan noes no narafala samting we i pulum tingting blong olgeta we oli stap lesin long yumi, mekem se oli no kasem evri samting we yumi traem talem.

Mo tu, i gat sam fasin blong yumi we oli mekem se, kwiktaem nomo, ol narafala oli save gat rong tingting long saed blong yumi. Eksampol, wan man we i gat fasin blong sem maet ol narafala oli tingting se hem i no laekem frengud wetem ol man, hem i tingbaot hem wan nomo, no i flas. Samtaem, laef we wan man i gat taem hem i smol i mekem se, taem wan man i talem no i mekem wan samting long hem, hem i no save skelemgud samting ya be hem i letem ol filing blong hem oli kam antap kwiktaem. Kantri we yumi gruap long hem mo lanwis blong yumi, oli mekem se samtaem yumi no kasem save long yumi. Antap long samting ya, i gat ol man we oli hareap tumas blong talemaot sam samting we oli no suagud long hem fastaem, mo i gat sam man we oli gat fasin blong tokbaot narafala. Taswe yumi no  mas sapraes we samtaem ol narafala bambae oli kasem rong mining long ol samting we yumi talem no mekem. Be, ating olgeta samting ya oli no leftemap tingting blong yu sipos yu harem se ol narafala oli gat rong tingting long wan samting we yu bin mekem no talem.

Tingbaot eksampol blong Anna. Hem i no gat nogud tingting taem hem i talem long ol narafala se fren blong hem i gat wan fasin we i pulum plante man blong oli laekem hem. Taem ol narafala oli talemaot tok ya long fren blong hem, oli talem long wan fasin we i givim rong mining long fren ya. Biaen, Anna i sapraes bigwan mo i harem nogud tu, taem fren ya i tok kros long hem long fored blong plante man. Fren ya i talem se Anna i stap jalus long hem from we wan man we i wok wetem olgeta i stap laekem hem. Fren ya i kasem rong mining long tok we Anna i bin talem. Anna i traem eksplenem se hem i no talem tok ya blong spolem fren ya, be fren ya i no wantem save. Smol problem ya i stikim hat blong Anna, mo i tektaem blong ol narafala oli luksave se tingting ya we oli gat long saed blong hem i rong olgeta.

Plante taem, tingting we ol narafala oli gat long saed blong yu, i folem wanem we olgeta oli jajem se i stap long tingting blong yu. Taswe i stret we yu harem nogud taem ol narafala oli jajem yu se tingting blong yu i no stret. Maet yu kros from we yu save se ol narafala oli no gat risen blong tingting nogud long saed blong yu. Long lukluk blong yu, ol tingting ya we narafala i gat oli blong jajem no spolem yu nomo, no maet oli rong olgeta mo oli mekem yu yu harem nogud tumas​—⁠samting ya i tru moa sipos ol man ya we oli gat rong tingting long saed blong yu, oli impoten tumas long yu.

I tru se, maet yu harem nogud sipos ol narafala oli jajem yu, be nating se i olsem, yu mas respektem tingting we ol narafala oli gat. Wan Kristin i mas kea long wanem we ol narafala oli tingbaot long saed blong hem, mo hem i no wantem nating se ol toktok no fasin blong hem i spolem ol narafala man. (Matiu 7⁠:12; 1 Korin 8⁠:12) Taswe, wanwan taem, bambae yumi mas stretem rong tingting we narafala i gat long saed blong yumi. Be, i no stret tu blong bitim mak long fasin ya mo wari tumas long tingting we narafala i gat. Samting ya i save daonem tingting blong yumi, mo i save mekem we yumi no moa laekem yumi wan, mo yumi ting se ol narafala oli no laekem yumi. Yes, i no tingting we narafala i gat long saed blong yu, we bambae i makem sipos yu yu impoten no nogat.

Be, maet yu luksave se ol tok we narafala i talem long saed blong yu, oli tru. Hemia tu, i save mekem yu yu harem nogud tumas, be sipos yu rere mo yu rili wantem luksave ol slak fasin blong yu, ol tok ya oli save mekem i gud long yu from we oli pulum yu blong mekem sam jenis long fasin blong yu.

Sam Nogud Frut

I no oltaem we wan rong tingting i mekem bigfala trabol i kasem yu. Tingbaot sipos yu stap long wan restoron, ale, yu harem wan man we i stap toktok long bigfala voes. Maet yu ting se man ya i wantem pulum ae blong ol narafala no maet hem i flas. Be, maet tingting blong yu i rong olgeta. Maet man ya i stap toktok wetem wan narafala man we sora blong hem i fas. No, tingbaot sipos wan man we i wok long stoa i mekem strong fes long yu, maet yu ting se hem i kros long yu, be ating hem i stap harem nogud long wan samting. Yes, ol rong tingting ya oli kamaot from we yu no kasem save long samting we i stap long tingting blong narafala. Nating se i olsem, ol rong tingting ya bambae oli no mekem trabol long yu mo bambae oli no mekem yu yu harem nogud longtaem. Be, samtaem, ol rong tingting oli save karem bigfala trabol i kam. Tingbaot tu stori we oli bin kamaot long taem blong Isrel bifo.

Taem King Nahas blong Amon i ded, Deved i sanem sam man blong karem sore blong hem i go long Hanun, pikinini blong king ya, we i stat rul finis long ples blong papa blong hem. Be, ol lida blong Amon oli gat rong tingting long saed blong ol man ya we oli karem tok blong Deved i kam. Oli ting se ol man ya oli kam blong lukluksave ol samting long kantri blong Amon. Toktok ya i pusum Hanun  blong mekem wan samting long ol man blong Deved we oli sem bigwan from, mo biaen hem i go faet agensem Isrel. Samting olsem 47,000 man oli ded from rong tingting ya we sam man oli gat long saed blong wan gudfala aksin.​—⁠1 Kronikel 19⁠:​1-9.

Taem nesen blong Isrel i jes stat, i gat wan narafala samting i kamaot from rong tingting. Be, risal blong hem i defren. Laen blong Ruben mo Gad, wetem haf laen blong Manase we i stap long Is, trifala i wokem wan bigfala olta klosap long Jodan Reva. Ol narafala laen blong Isrel we oli luk samting ya, oli gat rong tingting se trifala laen ya i lego Jeova blong wosipim ol narafala god. From samting ya, ol narafala laen blong Isrel oli hivap wanples blong rere blong faet agensem trifala laen ya. Be, bifo we oli mekem faet ya, oli sanem sam man i go long trifala laen ya blong talemaot long trifala se ol narafala laen blong Isrel oli kros tumas long fasin blong olgeta blong lego trufala wosip. Laki nomo we oli bin mekem olsem. Ol man we oli stap wokem olta ya oli ansa long ol man ya se, oli no lego trufala wosip. Defren nao, olta ya we oli stap wokem hem i wan saen blong soemaot se oli stap tru long Jeova. Yes, from rong tingting ya, klosap plante man oli ded, be waes fasin i blokem trabol ya.​—⁠Josua 22⁠:​10-34.

Stretem Ol Samting Wetem Lav

Yumi save lanem plante samting from tufala stori ya. I klia se beswan samting blong mekem, hemia blong mekem tingting blong yumi long bisnes ya i klia. Tingbaot laswan stori ya we yumi bin tokbaot. Yumi no save hamas man we oli bin sef from we tufala saed i bin toktok tugeta fastaem. I tru, bambae i no gat man i ded sipos yu yu no kasem save long tingting blong hem, be fasin fren we yumi gat wetem narafala hemia nao samting we maet i save lus. ?Taswe, sipos yu ting se narafala i bin mekem i nogud long yu, yu yu sua se yu kasem save long toktok no aksin blong hem, no yu stap gat rong tingting nomo? ?Wanem i pusum man ya blong talem no mekem samting ya long yu? Askem hem. ?Yu ting se narafala i no kasem save long tingting blong yu? Tokbaot samting ya wetem hem. Yu no mas letem flas fasin i blokem yu blong mekem olsem.

Jisas i givim wan gudfala risen we i save pulum yumi blong stretem ol rong tingting: “Nao from samting ya, sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.” (Matiu 5:​23, 24) Taswe i stret we yu go toktok wetem man ya hem wan, mo no pulum ol narafala oli kam insaed long bisnes ya. Bambae yu no save stretem gud bisnes ya sipos man ya i harem toktok blong yu long maot blong narafala fastaem long yu. (Ol Proveb 17:⁠9) Mak blong yu hemia blong mekem pis mo soemaot lav. Long kwaet fasin, toktok klia mo stret blong eksplenem problem ya, mo no talem ol tok blong soem se narafala i gat fol. Eksplenem se problem ya i mekem wanem long yu. Ale, lesingud blong traem luksave tingting blong narafala. No hareap blong tingting nogud long saed blong hem. Rere blong bilif se narafala i no wantem mekem i nogud long yu. Rimemba se, lav i “bilivim olgeta samting.”​—⁠1 Korin 13:⁠7, NW.

Nating sipos yumi bin stretem sam rong tingting finis, be bambae ol filing blong yumi oli save harem nogud yet mo risal blong ol rong tingting ya maet i save stap longtaem lelebet. ?Yumi save mekem wanem long taem olsem? Sipos i gat janis, i impoten tumas blong talem trufala sore, mo i impoten tu blong traehad olsem we yumi naf, blong stretem bisnes ya. Long taem ya, wan we i no gat fol i mas folem advaes ya we i kamaot long tabu spirit se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.”​—⁠Kolosi 3:​13, 14; 1 Pita 4:⁠8.

From we yumi sinman yet, bambae i mas hapen we ol narafala oli gat rong tingting long yumi mo yumi harem nogud. Eniman i save mekem wan mastik no talem wan samting we maet yumi harem se i strong mo i no kaen gud long yumi. Baebol i talem se: “Plante taem, yumi evriwan i mekem i no stret. Be man we i no mekem mastik samtaem long toktok blong hem, hem i wan man we i stret gud olgeta. Man olsem bambae i save blokem olgeta rabis samting we i save spolem laef blong hem.” (Jemes 3:⁠2) Jeova God i save gud samting ya. Taswe hem i givim advaes ya: “I nogud yu yu man blong kros kwik. Mo i nogud yu holem kros blong yu i stap longtaem, from we hemia i fasin blong man we i no gat hed. I nogud yu stap lesin long evri toktok we man i  stap talem. Maet samtaem yu harem man blong wok blong yu i singaot trabol i kam long yu. Mo yu save, plante taem, yu tu yu singaot trabol i kam long narafala man.”​—⁠Prija 7:​9, 21, 22.

“Jeova i Stap Jekem Hat Blong Ol Man”

?Olsem wanem sipos yu luk se i no gat rod blong jenisim rong tingting we narafala i gat long saed blong yu? Yu no mas letem tingting blong yu i foldaon. Yu mas traem bes blong yu blong wokem mo soemaot ol Kristin fasin oltaem. Askem Jeova blong halpem yu blong kamgud moa long eni slak fasin we yu yu gat. I no ol narafala man we bambae oli talem se yu yu impoten olsem wanem. Jeova nomo i save “jekem hat blong ol man.” (Ol Proveb 21:⁠2, NW ) Jisas tu, ol man oli daonem hem mo oli no laekem hem nating, be samting ya i no jenisim tingting we Jeova i gat long saed blong Jisas. (Aesea 53:⁠3) Nating se samfala oli jajem yu rong, yu save “talemaot ol trabol” blong yu long Jeova. Yu save sua se Jeova i kasem save long yu, “from we fasin blong [hem] blong lukluk man i no olsem fasin blong man. Man i stap lukluk long bodi blong man nomo, be [Jeova i] stap lukluk long tingting blong hem.” (Ol Sam 62⁠:8; 1 Samuel 16:⁠7) Sipos yu strong blong mekem samting we i stret, ol man we oli stap holem nogud tingting long saed blong yu, maet, biaen, bambae oli luksave mastik blong olgeta mo oli save jenisim tingting blong olgeta.​—⁠Galesia 6⁠:9; 2 Timoti 2:⁠15.

?Yu rimemba Antonio we yumi tokbaot hem long stat blong stori ya? Hem i mekem tingting blong hem i strong blong folem ol advaes blong Baebol, ale, hem i toktok wetem fren blong hem, Leonardo, mo askem hem wanem nao i mekem hem i harem nogud. ?Wanem i hapen? Leonardo i sek bigwan. Hem i talem se hem i no harem nogud from wan samting we Antonio i bin mekem, mo hem i talem se hem i no minim blong gat fasin we i defren wetem Antonio. Sipos i luk olsem se hem i bin kros long Antonio, hemia maet from we tingting blong hem i stap long narafala samting. Leonardo i talem sore from we hem i bin mekem fren blong hem i harem nogud, mo i tangkiu long hem blong tokbaot samting ya wetem hem. Leonardo i talem se, nekis taem, bambae hem i lukaot gud blong no mekem fasin ya bakegen we i save mekem narafala i tingting se hem i kros long olgeta. Ol nogud tingting we oli stap bitwin long tufala, oli lus wantaem, mo tufala fren ya tufala i kam frengud moa.

I no gat wan long yumi we i glad taem yumi harem olsem se ol narafala oli gat rong tingting long yumi. Be, sipos yumi traem bes blong yumi blong stretem ol problem mo yumi folem ol advaes blong Baebol long saed blong lav mo fasin fogif, yumi save sua fulwan se yumi tu, bambae yumi kasem gudfala risal olsem tufala brata ya.

[Futnot]

[Tok blong pija long pej 23]

Gudfala risal i save kamaot sipos yumi stretem problem wetem lav mo fasin fogif