Yu Save Kasem Ol Blesing Blong Kingdom

KRISTIN aposol Pol i savegud ol stamba lanwis we ol man long taem blong hem oli stap yusum. Hem i skulgud long wan skul we i sem mak olsem ol yunivesiti tede. Hem i wan sitisen blong Rom, taswe hem i gat raet mo i fri blong mekem plante samting. (Ol Wok 21⁠:​37-40; 22:​3, 28) From samting ya tu, Pol i gat bigfala janis blong kam rijman mo blong kasem haenem. Be defren olgeta, hem i talem se: “From ol samting we Kraes i mekem from mi, ol fasin ya we bifo mi luk olgeta olsem we oli blong mekem mi mi win, naoia mi luk olgeta olsem we oli blong mekem mi mi lus nomo. . . . Mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.” (Filipae 3:​7, 8) ?From wanem Pol i tok olsem?

Fastaem, ol man oli stap singaot Pol se Sol blong Tasas. Hem i wan man we i stap ronem olgeta we oli “folem Rod blong Masta.” Be biaen, hem i kam wan man blong bilif taem hem i luk wan vison blong Jisas we i laef bakegen mo we God i leftemap. (Ol Wok 9⁠:​1-19) Taem Pol i luk vison ya long rod i go long Damaskes, hem i luksave klia se Jisas hem i Mesaea, no Kraes, we ol profet oli bin tokbaot se bambae hem i rul long Kingdom. Be tu, vison ya i mekem bigfala jenis i kamaot long laef blong Pol. Yumi luksave samting ya long tok we hem i talem antap. Yes, wetem fulhat, Pol i tanem tingting from ol sin blong hem.​—⁠Galesia 1:​13-16.

 Long Baebol, plante taem tok ya “tanem tingting” i kamaot long wan Grik tok we i minim se “kasem save afta,” we i defren long tok ya “kasem save fastaem.” Taswe, fasin ya blong tanem tingting from sin, hem i min se man i jenisim tingting, fasin, no plan blong hem, i aot long rod we hem i stap folem, mo i luksave se rod ya i nogud. (Ol Wok 3⁠:19; Revelesen 2:⁠5) Tingbaot Pol long rod blong Damaskes. Samting we i hapen long hem i no pulum filing blong hem nomo, mo hem i no tingbaot samting ya olsem wan spesel merikel nomo we God i mekem. Vison ya i mekem hem i luksave se, fasin blong laef we hem i stap folem i blong nating nomo from we hem i no save Kraes. Hem i luksave tu se, sipos hem i wantem kasem blesing from niufala save we hem i kasem long saed blong Kraes, hem i mas mekem wan samting blong stretem laef blong hem.​—⁠Rom 2⁠:4; Efesas 4:⁠24.

Wan Jenis We i Karem Blesing

Fastaem, Pol i wan memba blong skul blong ol Farisi, taswe ol save we hem i gat long saed blong God, i kamaot long ol tijing blong skul ya. Plante bilif blong ol Farisi i stanap long save mo kastom blong man nomo. Ol rong tingting we skul ya i gat oli pusum Pol blong mekem samting we i no stret. Ale, hem i ting se hem i stap mekem wok blong God, be nogat, hem i stap faet agensem God nomo.​—⁠Filipae 3:​5, 6.

Taem Pol i kasem stret save long saed blong Kraes mo bigfala wok we hem i mekem blong bambae ol stamba tingting blong God oli kamtru, Pol i luksave se hem i gat wan jus blong mekem: ?Bambae hem i gohed blong stap olsem wan Farisi mo haremgud long posisen mo haenem we hem i gat, no bambae hem i jenisim laef blong hem mo mekem evri samting we i nidim blong God i agri long hem? I gud tumas we Pol i mekem gudfala jus. Hem i se: “Mi mi no sem nating long gud nius ya, from we hem i paoa blong God blong sevem olgeta man we oli bilif long hem, fastaem long mifala ol laen blong Isrel, be biaen long ol narafala man tu.” (Rom 1⁠:16) Pol i kam wan man we tingting blong hem i strong blong talemaot gud nius long saed blong Kraes mo Kingdom.

Plante yia biaen, Pol i talem long ol Kristin brata blong hem se: “Mi mi no ting se mi holem ol fasin ya finis, olsem we mi win finis. Hemia no yet ya. Be wan samting nomo mi stap mekem. Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. I olsem we mi stap resis i go stret long mak, we i gat praes blong man we i win. Mo praes ya, hemia we God i singaot yumi blong yumi joen long Jisas Kraes, yumi go stap antap, long ples blong hem.” (Filipae 3:​13, 14) Gud nius i karem blesing i kam long Pol from we hem i rere blong lego samting we i bin lidim hem i gowe long God. Ale, wetem fulhat blong hem, hem i wok folem stamba tingting blong God.

?Bambae Yu Mekem Wanem?

Maet yu jes harem gud nius blong Kingdom i no longtaem. ?Yu yu laekem hop ya blong laef foreva long wan paradaes? I stret nomo blong laekem hop ya from we yumi evriwan i wantem tumas blong stap long pis mo blong gat wan laef we i sefgud. Baebol i talem se God i putum “laef we i no save finis” long hat blong yumi. (Prija 3:​11, NW ) Taswe, i stret nomo sipos yumi wantem tumas blong luk taem ya we ol man bambae oli laef foreva long pis mo glad. Mo hemia nao samting we gud nius blong Kingdom i karem long ol man.

Be, blong bilif strong long hop ya, yu mas faenemaot se gud nius ya hem i long saed blong wanem. Aposol Pol i givim advaes se: “Yufala nomo i [mas] luksave ol samting we God i wantem, we ol samting ya oli gud, oli mekem man i glad, mo oli stret gud olgeta.” (Rom 12:​2, NW ) Taswe, i gud we yu mekem olsem Pol. Afta we yu kasem save, yu mas mekem wan jus.

I tru, maet yu yu gat sam bilif finis long saed blong fiuja. Tingbaot Sol. Bifo we hem i kam aposol Pol, hem i gat tingting blong hem finis long saed blong wok we hem i ting se God i wantem hem blong mekem. I gud we yu wan yu tingtinggud long saed ya. Yu no mas wet se bambae God i mekem wan merikel blong soemaot fiuja long yu. Askem long yu wan se: ‘?Mi mi rili save tingting blong God long saed blong ol man mo graon ya? ?Mi save yusum wanem pruf blong soemaot se bilif blong mi i stret? ?Pruf ya i laenap wetem Tok blong God, Baebol?’ Yu no mas ting se bambae yu westem taem sipos yu skelem bilif blong yu. I stret nomo blong mekem olsem, from we Baebol i talem se: “Yufala i mas traem olgeta samting fastaem, nao yufala i save holemstrong ol samting we  oli gud.” (1 Tesalonaeka 5⁠:21) Tingbaot, samting we i moa impoten, hemia blong mekem God i agri long yu.​—⁠Jon 17⁠:3; 1 Timoti 2:​3, 4.

Maet ol lida blong skul oli promes long yumi se bambae yumi laef foreva. Be sipos ol promes ya oli no stanap long ol tijing blong Baebol, bambae oli no save halpem yumi blong kasem ol blesing we Kingdom blong God bambae i karem. Long Bigfala Toktok antap long Hil, Jisas i givim strongfala woning ya se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.”​—⁠Matiu 7:⁠21.

Long vas ya, Jisas i makem klia se man we i mekem ol samting we Papa blong hem i wantem, hem nao bambae i kasem ol blesing we Kingdom blong God bambae i karem. Be man we i giaman nomo se hem i stap wosip long God, God i no save agri long hem. Jisas i gohed, i se: “Long Lasdei, bambae plante man oli save singaot long mi se, ‘Masta, Masta. Long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’ Be bambae mi mi talem stret long fes blong olgeta se, ‘Neva mi mi save yufala. Yufala i man blong mekem ol rabis fasin, yufala i gowe long mi.’ ” (Matiu 7:​22, 23) Yes, wanem we i rili impoten, hemia blong meksua se yumi kasem stret save long gud nius blong Kingdom, mo mekem ol save ya oli wok long laef blong yumi.​—⁠Matiu 7:​24, 25.

Yumi Save Kasem Help

Bitim 100 yia finis we ol Witnes blong Jeova oli stap talemaot gud nius blong Kingdom blong God. Oli seremaot ol buk mo oli toktok wetem ol man raonabaot long wol blong halpem olgeta blong kasem stret save long saed blong Kingdom mo ol blesing we bambae Kingdom ya i karem. Mo tu, oli givhan long ol man blong save wanem we oli mas mekem blong kasem ol blesing ya.

Mifala i leftemap tingting blong yu blong lesin long mesej we ol Witnes blong Jeova oli stap talemaot. Sipos yu lesin long gud nius mo yu mekem laef blong yu i laenap wetem gud nius ya, yu save kasem plante nambawan blesing naoia mo long fiuja, taem Kingdom blong God bambae i rulum fulwol.​—⁠1 Timoti 4:⁠8.

Tekem aksin naoia, from we ol blesing blong Kingdom blong God oli klosap.

[Tok blong pija long pej 7]

Ol Witnes blong Jeova oli seremaot ol buk mo oli toktok wetem ol man long saed blong gud nius blong Kingdom blong God